ပၢင်လိူၵ်ႈတင်ႈ ပွၵ်ႈၵမ်း 2 ဢၼ်သိုၵ်းမၢၼ်ႈယိုတ်းမိူင်း ၸတ်းႁဵတ်းၵႂႃႇၼႆႉ တီႈၼႂ်းၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်းၼႆႉ ပႃႇတီႇပဢူဝ်း လႆႈၶႅပ်းၵၢင်ၸႂ် ၼမ်လိူဝ်ပိူၼ်ႈသုတ်းသေ ဢွင်ႇပေႉ ဝႃႈၼႆ။

ၵူၼ်းၵႂႃႇတွတ်ႈၶႅပ်းၵၢင်ၸႂ်တီႈဝဵင်းသီႇသႅင်ႇလၢတ်ႈၽူႈတွႆႇႁွၵ်ႈဝႃႈ -“တီႈသီႇသႅင်ၼႆႉ ပဢူဝ်းၵမ်ႈၼမ် ယူႇသဝ်း ၊ မိူဝ်ႈပႃႇတီႇၶဝ်(ပႃႇတီႇပဢူဝ်း ) လူင်းမႃးသူၼ်းတုမ်ၵေႃႈလၢတ်ႈဝႆႉပႃးယူႇဝႃႈ ၶဝ်တေသၢင်ႈပၼ် လွင်ႈငမ်း ယဵၼ်တွၼ်ႈတႃႇ ၵူၼ်းမိူင်း ၊ ႁႂ်ႈၵူၼ်းၸၢဝ်းၶိူဝ်းလဵဝ်ၵၼ်တွတ်ႈပၼ်ၵၼ်ၼႆ ”- ဝႃႈၼႆ ။

တီႈသီႇသႅင်ႇၼႆႉ ပႃႇတီႇဢၼ်ၶဝ်ႈလိူၵ်ႈတင်ႈမီးဝႆႉသၢမ်ဢၼ် ။ ပဵၼ်ပႃႇတီႇ  PPP ပႃႇတီႇပဢူဝ်း PNO လႄႈ ပႃႇတီႇသၢင်ႇသီႈ USDP ။

ၼႂ်းၸႄႈဝဵင်းသီႇသႅင်ႇၼႆႉ ၼေႃႇတႅၼ်းၽွင်းပႃႇတီႇ ပဢူဝ်း PNO  တႅၼ်းၽွင်းၸိူဝ်ႉၸၢတ်ႈ ပဵၼ် ၶုၼ်ႇထႆး  လႆႈၶႅပ်းၵၢင်ၸႂ် 52057 ၶႅပ်း ၼေႃႇတႅၼ်းၽွင်းသၽႃးၵူၼ်းမိူင်း ၶုၼ်ႇလႃႉတဵင်း တင်းၶႅပ်းမႄး 50045 ၶႅပ်း  လႄႈ ၼေႃႇတႅၼ်းၽွင်းသၽႃးမိူင်းတႆး (FPTP ) ၶုၼ်ႇသၢၼ်းထူး 50988 ၶႅပ်း သေဢွင်ႇပေႉပႃႇတီႇ  PPP တင်း USDP ၵႂႃႇဝႃႈၼႆ  ။

ဝၼ်းပၢင်လိူၵ်ႈတင်ႈၼႆႉ ႁွင်ႈၵၢၼ်ၾၢႆႇၽွင်းငမ်း ၵူႈလွင်ႈမႃး ၸႅၵ်ႇ ၼမ်ႉလႄႈ ၶဝ်ႈမုၼ်း ပၼ်ၵူၼ်းမႃးတွတ်ႈၶႅပ်းၵၢင်ၸႂ် – ႁူၺ်းသူၼ်းတၢင်းဢွမ်ႈယူႇသေတႃႉ လိုၼ်းသုတ်းၵေႃႈ ပႃႇတီႇပဢူဝ်း ပေႉပုၼ်ႈၵႂႃႇ ။

တီႈဝဵင်းသီႇသႅင်ႇၼႆႉ ႁူင်းတွတ်ႈၶႅပ်းၵၢင်ၸႂ်မီး 90 ႁူင်း ။ ၼိူဝ်ဝဵင်း သီႇသႅင်ႇ မီး 6 ပွၵ်ႉ ။ မီး 12 ဢိူင်ႇလႄႈ ၊ ၽူႈမီးသုၼ်ႇပၼ်သဵင်ၵၢင်ၸႂ်မီး ႁူဝ်မိုၼ်ႇၵေႃႉ ၼႆယဝ်ႉ ။

ဝဵင်းသီႇသႅင်ႇၼႆႉ ယူႇတီႈ တပ်ႉသိုၵ်းမၢၼ်ႈ ယိုတ်းၵုမ်းလႆႈၶိုၼ်း တီႈတပ်ႉသိုၵ်းပူတ်းပွႆႇၸိူဝ်ႉ ၸၢတ်ႈပဢူဝ်း PNLA မိူဝ်ႈႁၢင်လိူၼ်မၢတ်ႊၶျ် 2024 ပူၼ်ႉမႃးၼၼ်ႉ ။ ယၢမ်းလဵဝ် မီးၸုမ်းသိုၵ်းမၢၼ်ႈတင်း ပျီႇတူႉၸိတ်ႉ PNO လႄႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈပ ဢူဝ်း  PNLA  တူင်ႉၼိုင်ဝႆႉ ။