ဝဵင်းမိူင်းပၼ်ႇ တီႈဢၼ်ပႃႇတီႇသိူဝ်ၽိူၵ်ႇယၢမ်ႈပေႉပၢင်လိူၵ်ႈတင်ႈမႃးၶၢဝ်းတၢင်း 20 ပီၼႆႉ ယၢမ်းလဵဝ် ပႃႇတီႇသၢင်ႇသီႈ ဢွင်ႇပေႉၵႂႃႇ ယွၼ်ႉပိူဝ်ႈၵူၼ်းမိူင်းပိုၼ်ႉတီႈဢမ်ႇမႃးပၼ်သဵင်ၵၢင်ၸႂ်ၼမ် ဝႃႈၼႆ။
ပၢင်လိူၵ်ႈတင်ႈၵမ်းထိ 2 ဢၼ်ၸတ်းႁဵတ်းဝၼ်းမိူဝ်ႈၼႆႉ 11/1/2026 ၼႆႉ တီႈဝဵင်းမိူင်းပၼ်ႇၸိုင်ႈတႆးပွတ်းၸၢၼ်း ပႃႇတီႇသၢင်ႇသီႈ ဢဝ်ၶႅပ်းၵၢင်ၸႂ်လူင်ႈၼႃႈ လုၵ်ႉၼႂ်းတပ်ႉမႃးၼပ်ႉသွၼ်ႇလေႃးသေ ဢွင်ႇပေႉၵႂႃႇဝႃႈၼႆ ။
ၽူႈမီးပုၼ်ႈၽွၼ်းၼႂ်းပႃႇတီႇသိူဝ်ၽိူၵ်ႇ ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ပၢင်လိူၵ်ႈတင်ႈပွၵ်ႈၼႆႉ ၵူၼ်းမိူင်းမႃးပၼ် သဵင်ၵၢင်ၸႂ်ဢေႇႁႅင်းၼႃႇၶႃႈဢိူဝ်ႈ။ ပႃႇတီႇသၢင်ႇသီႈသမ်ႉ ၵူၼ်းၶဝ်မႃးပၼ်ၶႅပ်းၵၢင်ၸႂ်တင်းမူတ်းၶႃႈၼႃႇ ။ တေႃႇထိုင်ၵၢင်ၶိုၼ်း 10 မူင်းၼႆႉ ၽိူဝ်ႇၼပ်ႉသွၼ်ႇယဝ်ႉတူဝ်ႈၼႆႉ သၢင်ႇသီႈပေႉၵႂႃႇယဝ်ႉၶႃႈ”- ဝႃႈၼႆ။
တီႈဝဵင်းမိူင်းပၼ်ႇၼႆႉ ၽွင်းပၢင်လိူၵ်ႈတင်ႈ မိူဝ်ႈပူၼ်ႉမႃး ၵူၼ်းမိူင်းတူင်ႉတိုၼ်ႇဢွၵ်ႇမႃးပၼ်သဵင်ၵၢင်ၸႂ်လႄႈ ႁဵတ်းႁႂ်ႈပႃႇတီႇတႆး ဢွင်ႇပေႉ မႃးတႃႇသေႇ။
ထိုင်မႃးပၢင်လိူၵ်ႈတင်ႈၵမ်းၼႆႉ ၵူၼ်းမိူင်းတႄႉတႄႉ ဢၼ်ဢမ်ႇမႃးပၼ်သဵင်ၵၢင်ၸႂ်ၼႆႉၼမ်ၼႃႇလႄႈႁဵတ်းႁႂ်ႈပႃႇတီႇသၢင်ႇသီႈဢွင်ႇပေႉၵႂႃႇ ၼႆ ၽူႈမီးပုၼ်ႈၽွၼ်းၼႂ်းပႃႇတီႇသိူဝ်ၽိူၵ်ႇလၢတ်ႈၵႂႃႇၼင်ႇၼႆ။
“တပ်ႉ 11 တပ်ႉၼႆႉၶႅပ်းၵၢင်ၸႂ်ၶဝ်လႆႈၼႆႉၼမ်ၼႃႇ ႁဝ်းၶႃႈလမ်းဢမ်ႇၶိုတ်းလႆႈၶႃႈ။ ပီႈၼွင်ႉတႆးႁဝ်း ဢွၵ်ႇမႃးပၼ်သဵင်ဢေႇၼႃႇပူၼ်ႉတီႈ ။ မိူၼ်ၼင်ႇဝႃႈပႃႇတီႇသၢင်ႇသီႈၼႆႉၵူၼ်းၶဝ်မီး 5000 ၼႆၶဝ်ဢွၵ်ႇမႃးပၼ်သဵင်တင်း 5000 ၵေႃႉ။ တႆးႁဝ်းသမ်ႉ မိူၼ်ဝႃႈၵူၼ်းတႆး ႁဝ်းသမ်ႉမီး 10000 ၼႆသေတႃႉ ၵူၼ်းမႃးပၼ်သဵင်ဢေႇၼႃႇဢႃးလႃး ၶိုင်ႈၼိုင်ႈၵေႃႈဢမ်ႇမီးလႄႈ သဵင်ဢမ်ႇပေႃးလႄႈလႆႈသုမ်း။ ၵူၼ်းမိူင်းတႆးႁဝ်းသူၼ်ၸႂ်ၵၢၼ်မိူင်းဢႄႇၼႃႇ ။ ဢမ်ႇဢွၵ်ႇမႃးတွတ်ႈၶႅပ်းၵၢင်ၸႂ်။ ယူႇတီႈႁိူၼ်းၸိူင်ႉၼၼ်ၵေႃႈ ႁဵတ်းႁႂ်ႈပိူၼ်ႈပေႉႁဝ်းၵူၺ်းၶႃႈဢိူဝ်ႈၼေႃႈ။” – ဝႃႈၼႆ။
ဝဵင်းမိူင်းပၼ်ႇၼႆႉ ႁူင်းတွတ်ႈၶႅပ်းၵၢင်ၸႂ်မီး 31 ႁူင်း။ ပွၵ်ႉလႄႈဢိူင်ႇမီး 11 ။ ၸႂ်ႉၸၢၵ်ႈပဵၼ်သဵင်ၵၢင်ၸႂ် MEVM ၵႂႃႇ 172 လုၵ်ႈ။ ။ ၽူႈမီးသုၼ်ႇပၼ်သဵင်ၵၢင်ၸႂ်မီး 12481 ၵေႃႉ။ ဢၼ်မႃးပၼ်သဵင်ၵၢင်ၸႂ်မီး 9000 ၵူၺ်း။ ပၢင်လိူၵ်ႈတင်ႈၵမ်းၼႆံ မီးပႃႇတီႇသၢင်ႇသီႈလႄႈ ပႃႇတီႇသိူဝ်ၽိူၵ်ႇၵူၺ်းၶေႉၶဵင်ႇၵၼ်။ တီႈၽူႈတႅၼ်းသၽႃးၵူၼ်းမိူင်းၼႆႉ ပႃႇတီႇသၢင်ႇသီႈပေႉၵႂႃႇ 900 ပၢႆ။ သၽႃးၸႄႈမိူင်းၼႆႉသမ်ႉပေႉၵႂႃႇ 1000 ပၢႆ ။ သဵၼ်ႈမၢႆတႅတ်ႈတေႃးတႄႉ တေပိုၼ်ၽၢဝ်ႇပၼ်မိူဝ်ႈၽုၵ်ႈၵၢင်ၼႂ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ