မိူဝ်ႈၼႆႉ ဝၼ်းတီႈ 11/01/2026 တႄႇယၢမ်းဢိုတ်းႁူင်းပၼ်သဵင် ဝၢႆးဝၼ်း 4 မူင်း တေႃႇထိုင်ၵၢင်ၶမ်ႈ 9 မူင်း ၽူႈမီးပုၼ်ႈၽွၼ်း ၼႂ်းၶွမ်ႊမသျိၼ်ႊပၢင်လိူၵ်ႈတင်ႈ လႄႈ ၼႂ်းပႃႇတီႇၵၢၼ်မိူင်း တိုၵ်ႉၼပ်ႉဢၢၼ်ႇၶႅပ်းၵၢင်ၸႂ် ႁႂ်ႈယဝ်ႉတူဝ်ႈ ဝႃႈၼႆ။

ႁူင်းပၼ်သဵင် ၸိူဝ်းတင်ႈဝႆႉ ၼႂ်းၸႄႈဝဵင်းၵုၼ်ႁဵင်ၼႆႉ ႁူမ်ႈသဵၼ်ႈ မီးယူႇ 47 တီႈ။ ၼိုင်ႈတီႈလႄႈ ၼိုင်ႈတီႈ ၼႆႉသမ်ႉ ႁၢင်ႇၵႆၵၼ်တၢၼ်ႇတၢၼ်ႇ ဝႆႉလႄႈ တႃႇႁူႉၶေႃႈတွပ်ႇတႅတ်ႈတေႃးၼႆႉ လႆႈၸႂ်ႉၶၢဝ်းယၢမ်းပႂ်ႉတေႉတေႉယူႇ ၼႆယဝ်ႉ။

ၽူႈတူင်ႉၼိုင်ၼႂ်းတူင်ႇဝူင်းၵူၼ်း ၸႄႈဝဵင်းၵုၼ်ႁဵင်ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ႁဝ်းၵေႃႈ ပွႆႇၵူၼ်းႁဝ်း ၵႂႃႇပႂ်ႉတူၺ်းၸွမ်း လွင်ႈတူင်ႉ ၼိုင် ၸုမ်းၶွမ်ႊမသျိၼ်ႊ လႄႈ ပႃႇတီႇၵၢၼ်မိူင်းၶဝ်ဝႆႉယူႇ။ မိူဝ်ႈလဵဝ်ၼႆႉ ပႆႇလႆႈႁူႉၶေႃႈတွပ်ႇမၼ်းတႅတ်ႈတေႃး။ ဢၼ်လႆႈႁူႉဝႆႉၶၢဝ်ႉၶၢဝ်ႉတႄႉ ၶႅပ်းၵၢင်ၸႂ် ပႃႇတီႇသၢင်ႇသီႈ တင်း ပႃႇတီႇသိူဝ်ၽိူၵ်ႇၼႆႉ ၶႂ်ႈတဝ်ႉၵၼ်ဝႆႉ။ ႁူင်းပၼ်သဵင်ၼိုင်ႈတီႈလႄႈ ၼိုင်ႈတီႈၵေႃႈ သမ်ႉႁၢင်ႇၵၼ် တၢၼ်ႇ တၢၼ်ႇၼၼ်ႉၼႃႇ။ ပီၼႆႉ ၶဝ်ဝႃႈ ၸႂ်ႉၶိူင်ႈၸၢၵ်ႈၼႆသေတႃႉၵေႃႈ သမ်ႉတိုၵ်ႉလႆႈပႂ်ႉၶေႃႈတွပ်ႇ မိူၼ်ပီပူၼ်ႉမႃးၸိူဝ်းၼၼ်ႉ ယူႇၵူၺ်း ၼင်ႇၵဝ်ႇ။ ဢမ်ႇပွင်ႇၸႂ်ၼိူဝ် လၢႆးၸတ်းၶဝ်ယဝ်ႉဝႃႈ” ၼႆယဝ်ႉ။

ၼႂ်းၸႄႈဝဵင်းၵုၼ်ႁဵင်ၼႆႉ ႁူင်းပၼ်သဵင်တင်းသဵင်ႈမီးယူႇ 47 တီႈသေ ပႃႇတီႇဢၼ်ၶဝ်ႈလိူၵ်ႈတင်ႈ တီႈဝဵင်းၵုၼ်ႁိင်းၼႆႉ မီး 2 ဢၼ် ၊ ပဵၼ်ပႃႇတီႇ သၢင်ႇသီႈ (USDP) လႄႈ ပႃႇတီႇသိူဝ်ၽိူၵ်ႇ (SNDP) ။ သဵၼ်ႈမၢႆႁူဝ်ၼပ်ႉၵူၼ်း မီးသုၼ်ႇပၼ်သဵင် ဢၼ်သိုၵ်းမၢၼ်ႈ ပိုၼ်ၽၢဝ်ႇဝႆႉ မီးယူႇ 35221 ၵေႃႉ ၼႆယဝ်ႉ။