ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်းၸတ်းႁဵတ်းတီႈၸႄႈဝဵင်းတၢင်ႉယၢၼ်း မိူင်းတႆးပွတ်းႁွင်ႇၼၼ်ႉ ယဝ်ႉတူဝ်ႈၵႂႃႇယဝ်ႉလႄႈ ၵၢင်ၶမ်ႈမိူဝ်ႈၼႆႉ 11/01/2026 ၽူႈမီးပုၼ်ႈၽွၼ်း ၼႂ်းပႃႇတီႇ လႄႈ ၸိူဝ်းယူႇတႂ်ႈ ဢၢမ်းၼၢတ်ႈသိုၵ်းမၢၼ်ႈၶဝ် တိုၵ်ႉၼပ်ႉဢၢၼ်ႇဝႆႉ ယၢမ်းလဵဝ် လႆႈႁူႉၶေႃႈတွပ်ႇၵႂႃႇ ၶိုင်ႈၼိုင်ႈယဝ်ႉ ဝႃႈၼႆ။

ၼၢင်းသူၺ်ႇဢိင်ႇ ၼေႃႇၽွင်းတႅၼ်းသၽႃးၵူၼ်းမိူင်း ပႃႇတီႇသိူဝ်ၽိူၵ်ႇ လၢတ်ႈၼႄတီႈ ၽူႈတွႆႇႁွၵ်ႈဝႃႈ “မိူဝ်ႈလဵဝ်ၸွမ်းၼင်ႇလႆႈႁူႉၶေႃႈတွပ်ႇမၼ်းဝႆႉတႄႉ ပႃႇတီႇသၢင်ႇသီႈၼႆႉ ၼမ်းၼႃႈဝႆႉဢေႃႈ။ ၶႅပ်းၵၢင်ၸႂ်လူင်ႈၼႃႈၶဝ် မီး 3000 ၶႅပ်းပၢႆ။ ႁူဝ်ၼပ်ႉၵူၼ်းပၼ်သဵင်ႁဝ်းၶႃႈၼႆႉ တင်းမူတ်းမီးယူႇ 12000 ပၢႆၼႆႉ ၸိူဝ်းၵႂႃႇပၼ်ၶႅပ်းၵၢင်ၸႂ်တေႉတေႉ မီးယူႇမွၵ်ႈ 2000 ပၢႆၵူၺ်း။ ၵွပ်ႈၼၼ် မိူဝ်ႈလဵဝ်ၼႆႉ တႃႇပႃႇတီႇႁဝ်းတေပေႉၼႆႉ တၢင်းမုင်ႈမွင်းဢေႇဝႆႉဢေႃႈ” ၼႆယဝ်ႉ။

ၼႂ်းၸႄႈဝဵင်းတၢင်ႉယၢၼ်းၼႆႉ ႁူင်းပၼ်သဵင်းတင်းသဵင်ႈ မီးယူႇ 67 တီႈ။ ယၢမ်းလဵဝ် တိုၵ်ႉလႆႈႁူႉၶေႃႈတွပ်ႇ တႃႇ 30 တီႈပၢႆသေ တီႈၼင်ႈသၽႃးၸႄႈမိူင်းၼႆႉ ပႃႇတီႇသိူဝ်ၽိူၵ်ႇ လႆႈ ၶႅပ်းၵၢင်ၸႂ် ၼမ်လိူဝ်ပိူၼ်ႈဝႆႉ ၼပ်ႉႁူဝ်ပၢၵ်ႇၶႅပ်းမၼ်းၵူၺ်းလႄႈ တေဢမ်ႇၶႅင်ႇလႆႈ ၶႅပ်းၵၢင်ၸႂ်လူင်ႈၼႃႈ သိုၵ်းမၢၼ်ႈ ၼႆယဝ်ႉ။

ၼင်ႇႁိုဝ် တေလႆႈႁူႉၶေႃႈတွပ်ႇၽွၼ်းပၢင်လိူၵ်ႈတင်ႈ တႅတ်ႈတေႃးၼၼ်ႉ ၾၢႆႇၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇ တိတ်းတေႃႇၸွမ်း ၽူႈမီးပုၼ်ႈၽွၼ်းၸိူဝ်းၵဵဝ်ႇၵွင်ႉၼႂ်းမိူင်းတႆး ဝဵင်းလႂ်ဝဵင်းၼၼ်ႉဝႆႉယူႇ။