ပၢင်လိူၵ်ႈတင်ႈ တီႈဝဵင်းမိူင်းၵိုင်ၸိုင်ႈတႆးပွတ်းၸၢၼ်း ၼႂ်းဝၼ်းတီႈ 11/1/2026 ၼႆႉ မီးပႃႇတီႇသၢင်ႇသီႈလႄႈ ပႃႇတီႇသိူဝ်ၽိူၵ်ႇ ၶေႉၵၼ် တေႃႇထိုင်ယၢမ်းၵၢင်ၶမ်ႈ 8 မူင်းၼႆႉ ႁူဝ်ၼပ်ႉၶႅပ်းၵၢင်ၸႂ်ပႃႇတီႇသိူဝ်ၽိူၵ်ႇ ၼမ်းၼႃႈဝႆႉဝႃႈၼႆၵေႃႈ ၽွင်းဢၢၼ်ႇၶႅပ်းမႄးၼၼ်ႉ ၶွမ်ႊမသျိၼ်ႊၸႄႈဝဵင်းဢမ်ႇပၼ်ၼေႃႇၽွင်းတႅၼ်းၶဝ်ၶဝ်ႈတူၺ်းၸွမ်း ဝႃႈၼႆ။

တီႈဝဵင်းမိူင်းၵိုင်ၼႆႉ ႁူင်းတွတ်ႈၶႅပ်းၵၢင်ၸႂ် မီး 35 ႁူင်း။ တေႃႇထိုင်ယၢမ်း 8 မူင်းၼႆႉ ၶႅပ်းၵၢင်ၸႂ်ဢၼ်ၵူၼ်းမိူင်းမႃးပၼ်ၼၼ်ႉႁုပ်ႈလႆႈယဝ်ႉတႃႇ 23 ႁူင်း။ ဢၼ်ပႆႇလႆႈႁုပ်ႈၶႅပ်းၵၢင်ၸႂ်ၼႆႉၵိုတ်း 12 ႁူင်း။

ၼႂ်း 23 ႁူင်းၼႆႉ ႁူဝ်ၼပ်ႉၶႅပ်းပႃႇတီႇသိူဝ်ၽိူၵ်ႇ ၼမ်လိူဝ်ၶႅပ်းၵၢင်ၸႂ် ပႃႇတီႇသၢင်ႇသီႈဝႆႉ 3000 ပၢႆ။

ၽူႈမီးပုၼ်ႈၽွၼ်းၼႂ်းပႃႇတီႇသိူဝ်ၽိူၵ်ႇ ဝဵင်းမိူင်းၵိုင်ၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ- “ ၶႅပ်းၵၢင်ၸႂ်လူင်ႈၼႃႈၵေႃႈတေမီးမွၵ်ႈ 1000 ၼႆႉၵူၺ်း။ ဢၼ်ၼၼ်ႉၵေႃႈပေႃးတူၺ်းတႄႉ တင်းသၢင်ႇသီႈလႄႈတင်းႁဝ်းၶႃႈတေမီးမွၵ်ႈၶိုင်ႈတေႃႇၶိုင်ႈယူႇ။ပေႃးတူၺ်းယၢမ်းလဵဝ်တႄႉ ၶႅပ်းပႃႇတီႇသိူဝ်ၽိူၵ်ႇႁဝ်းၶႃႈ ဢွင်ႇပေႉၵိၼ်ၶၢတ်ႇဝႆႉၶႃႈဢေႃႈ” – ဝႃႈၼႆ။

ၼေႃႇၽူႈတႅၼ်းပႃႇတီႇသိူဝ်ၽိူၵ်ႇ တီႈဝဵင်းမိူင်းၵိုင်ၼႆႉပဵၼ် ၼၢင်းတၢၼ်းတၢၼ်းမူၺ်း ပဵၼ်သၽႃးၵူၼ်းမိူင်း ၊ တႅၼ်းၽွင်းၸႄႈမိူင်းပဵၼ် သြႃႇမ ၼၢင်းမၢတ်ႈၼူၼ်း ၊ ဢၼ်ၶဝ်ႈၶေႉတီႈ PR ပဵၼ် ၼၢင်းလႃႉၸိင်ႇ သၽႃးၸိူဝ်ႉၸၢတ်ႈပဵၼ် ၼၢင်းၶမ်းယိၼ်ႇဢွင်ႇ ။

ယူႇတီႈ ၶွမ်ႊမသျိၼ်ႊ ၸႄႈဝဵင်းမိူင်းၵိုင်တႄႉလၢတ်ႈဝႃႈ ၶႂ်ႈႁႂ်ႈၼပ်ႉၶႅပ်းမႄးႁႂ်ႈယဝ်ႉၶမ်ႈၼႆႉ ဝႃႈၼႆသေတႃႉ ၽွင်းၼပ်ႉဢၢၼ်ႇၶႅပ်းၵၢင်ၸႂ်ယူႇၼၼ်ႉဢမ်ႇပၼ်ၸုမ်းၼေႃႇၽူႈတႅၼ်း ၶဝ်ႈတူၺ်းၸွမ်းလႄႈႁဵတ်းႁႂ်ႈ ၸုမ်းၼေႃႇၽူႈတႅၼ်းဢမ်ႇပေႃးၸႂ် လႆႈႁူႉၼင်ႇၼႆ။

ႁူင်းတွတ်ႈၶႅပ်းၵၢင်ၸႂ် ဢၼ်ၵိုတ်းယူႇ 12 ႁူင်း ဢၼ်ပႆႇလႆႈဢဝ်မႃးၼပ်ႉႁူမ်ႈၵၼ်ၼႆႉတေပဵၼ်ႁူင်းတွတ်ႈၶႅပ်းတီႈဝၢၼ်ႈႁမ်းငၢႆး၊ ႁူဝ်ၶၢႆး၊ ၼွင်ႁွႆ၊ ပၢင်သပ်း၊ ၼွင်ၸၢမ်ႁူး၊ မိူင်းယွၼ်း၊ ၶိူဝ်းဢူင်ႇဢူၺ်ႈ၊ ၵုင်းလူမ်း၊ ဝၢၼ်ႈသၢင်ႇႁႃႈ လႄႈ ပွၵ်ႉၼိုင်ႈ ဢိၵ်ႇ ပွၵ်ႉႁူၵ်း ။ ပေႃးတူၺ်းငဝ်းလၢႆး ၶႅပ်းၵၢင်ၸႂ် တၢင်းဝၢၼ်ႈ 12 ဢၼ်ၼႆႉၵေႃႈ ၶႅပ်းသိူဝ်ၽိူၵ်ႇလႅပ်ႈၼမ်လိူဝ်ယူႇ ဝႃႈၼႆသေတႃႉ ပႆႇလႆႈႁူႉ ႁူဝ်ၼပ်ႉတႅတ်ႈတေႃး။