ပၢင်လိူၵ်ႈတင်ႈ ပွၵ်ႈၵမ်း 2 ဢၼ်ၸတ်းႁဵတ်းယဝ်ႉတူဝ်ႈၵႂႃႇ 11/1/2026 ယၢမ်းတၢမ်းၶမ်ႈ 4 မူင်းၼႆႉၼၼ်ႉ ယၢမ်းလဵဝ် ယၢမ်းၵၢင်ၶမ်ႈ 8 မူင်း ၽူႈမီးပုၼ်ႈၽွၼ်းၶဝ် တိုၵ်ႉၼပ်ႉသွၼ်ႇၶႅပ်းၵၢင်ၸႂ် တႃႇႁုပ်ႈၶေႃႈတွပ်ႇဝႆႉယူႇ ၵူၺ်းၵႃႈလႆႈႁၼ်ၶႅပ်းၵၢင်ၸႂ်ပႃႇတီႇသိူဝ်ၽိူၵ်ႇ ၼမ်းၼႃႈဝႆႉဝႃႈၼႆ။

တီႈၸႄႈဝဵင်းလၢႆးၶႃႈတႄႉ ႁူင်းပၼ်သဵင် မီးယူႇ 33 တီႈသေ ပႃႇတီႇသိူဝ်ၽိူၵ်ႇ လႆႈၶႅပ်းၵၢင်ၸႂ်ၼမ်လိူဝ်ပႃႇတီႇ တၢင်ႇၸုမ်းဝႆႉ တႃႇ 28 တီႈဝႃႈၼႆ။

ၼေႃႇတႅၼ်းၽွင်း ပႃႇတီႇသိူဝ်ၽိူၵ်ႇ ၵေႃႉၶဝ်ႈၶႅင်ႇၼႂ်းၸႄႈဝဵင်းလၢႆးၶႃႈ လၢတ်ႈၼႄတီႈၽူႈတွႆႇႁွၵ်ႈဝႃႈ “မိူဝ်ႈလဵဝ် ပီႈၼွင်ႉတႆးႁဝ်း ၼမ်းၼႃႈဝႆႉ တင်းသၢမ်တီႈ (သၽႃးၸႄႈမိူင်း၊ ၵူၼ်းမိူင်းလႄႈ ၸိူဝ်ႉၸၢတ်ႈ)။ ဢၼ်ႁဝ်းၶႃႈ တေပႆႇလႆႈ သဵၼ်ႈမၼ်းၼႆႉ ၵိုတ်း 5 တီႈၵူၺ်းယဝ်ႉ။ ၶႅပ်းၵၢင်ၸႂ်လူင်ႈၼႃႈၵေႃႈ လႆႈမႃးမူတ်းယဝ်ႉ။ တီႈႁဝ်းလႆႈၶႅပ်းဢႄႇဝႆႉဢိၼ်ႉတႄႉမီး 4-5 တီႈ ။ တၢင်ႇတီႈတႄႉ ပဵၼ်ပႃႇတီႇသိူဝ်ၽိူၵ်ႇႁဝ်း ၼမ်သေဢွင်ႇပေႉဝႆႉၶႃႈဢေႃႈ” ဝႃႈၼႆ။

ၼေႃႇၽူႈတႅၼ်းပႃႇတီႇသိူဝ်ၽိူၵ်ႇ တီႈဝဵင်းလၢႆးၶႃႈၼႆႉ သၽႃးၵူၼ်းမိူင်းပဵၼ်ၸၢႆးၸိင်ႇဝုၼ်း ၊ သၽႃးၸႄႈမိူင်း ပဵၼ်ၼၢင်းဢႅတ်ႉၸၵီးမူဝ်း လႄႈ သၽႃးၸိူဝ်ႉၸၢတ်ႈပဵၼ် ၼၢင်းၶမ်းယိၼ်ႇဢွင်ႇ ။

ၼင်ႇႁိုဝ်တေႁူႉလႆႈၶေႃႈတွပ်ႇ ပၢင်လိူၵ်ႈတင်ႈ ႁႂ်ႈတႅတ်ႈတေႃးဝႃႈ ၽႂ်ပေႉ၊ ၽႂ်သုမ်းၼႆၼၼ်ႉ ၾၢႆႇၶွမ်ႊမသျိၼ်ႊၵမ်ၵၢၼ် ပၢင်လိူၵ်ႈတင်ႈၶဝ် ၸီႉသင်ႇႁႂ်ႈဢၢၼ်ႇၶႅပ်းၵၢင်ၸႂ်ယဝ်ႉတူဝ်ႈၶမ်ႈၼႆႉ (11/01/2026) ၵမ်းလဵဝ် ဝႃႈၼႆ။

ၼႂ်းၸႄႈဝဵင်းလၢႆးၶႃႈၼႆႉ ပႃႇတီႇသိူဝ်ၽိူၵ်ႇ (SNDP) ၊ ပႃႇတီႇသၢင်ႇသီႈ (USDP)၊ ပႃႇတီႇ တ သ ၺ ၶဝ်ႈၶႅင်ႇၵၼ် တီႈၼင်ႈသၽႃးၵူၼ်းမိူင်း၊ သၽႃးၸႄႈမိူင်း လႄႈ သၽႃးၸိူဝ်ႉၸၢတ်ႈ ။