ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်းၼမ်းၸတ်း ၼႂ်းပီ 2025-2026 ၼႆႉ ၸႂ်ႉတိုဝ်းၶိူင်ႈၸၢၵ်ႈသေ ႁႂ်ႈၵူၼ်းမိူင်းၵႂႃႇတဵၵ်းသႂ်ႇပၼ် သဵင်ၵၢင်ၸႂ်မိူၼ်ၵၼ် ပတ်းပိုၼ်ႉၸိုင်ႈမိူင်း ႁူမ်ႈတုမ်။
ပၢင်လိူၵ်ႈတင်ႈ ပွၵ်ႈၵမ်း 1 ပူၼ်ႉမႃးၼႆႉ ၶိူင်ႈၸၢၵ်ႈၸိူဝ်းဢၼ်ၸႂ်ႉတိုဝ်းယဝ်ႉၵႂႃႇၼႂ်းမိူင်းတႆးပတ်းပိုၼ်ႉ ဢမ်ႇမီးပၼ်ႁႃဝႃႈၼႆသေတႃႉ ပွၵ်ႈၵမ်း 2 ၼႆႉတႄႉ ၶိူင်ႈၸၢၵ်ႈၶဝ် မီးပၼ်ႁႃမႃး။ ပဵၼ်တီႈၸႄႈဝဵင်းမွၵ်ႇမႆႇ မိူင်းတႆးပွတ်းၸၢၼ်း လႄႈ ဝဵင်းမိူင်းၽျၢၵ်ႈ မိူင်းတႆးပွတ်းဢွၵ်ႇ ။
ၵူၼ်းမိူင်းၵေႃႉၵႂႃႇပၼ်ၶႅပ်းၵၢင်ၸႂ် ၼႂ်းၸႄႈဝဵင်းမွၵ်ႇမႆႇၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ “ၵၢင်ၼႂ်ၸဝ်ႉ မိူဝ်ႈၽွင်းႁဝ်းၵႂႃႇသႂ်ႇၶႅပ်းၵၢင်ၸႂ် ၶိူင်ႈၸၢၵ်ႈၶဝ် ဢဝ်မီးပၼ်ႁႃ (error) ၵႂႃႇ ပႅတ်ႈ။ ၸေႈဢၼ်ၶဝ်သႂ်ႇဝႆႉၼႂ်းၸၢၵ်ႈၶဝ်ၼၼ်ႉ ဢမ်ႇတူၵ်းမႃး။ လႆႈပႂ်ႉႁိုင်မွၵ်ႈ 15 မိၼိတ်ႉထိုင် 20 မိၼိတ်ႉ။ ၶဝ်ၶိုင်ဢၢၼ်းတေမႄးယူႇ ၵူၺ်းၵႃႈ ဢမ်ႇမႄးလႆႈ။ ၵွပ်ႈၼၼ် ၶဝ်လႆႈလၢႆႈ ၶိူင်ႈၸၢၵ်ႈမႂ်ႇဢဝ်” ဝႃႈၼႆ။
ယွၼ်ႉၶိူင်ႈၸၢၵ်ႈၶဝ်မီးပၼ်ႁႃလႄႈ ၵူၼ်းမိူင်းၸိူဝ်းမႃးပႂ်ႉပၼ်ၶႅပ်းၵၢင်ၸႂ်ၵမ်ႈၼမ် ဢွၼ်ၵၼ်မိူဝ်းၵႂႃႇပႅတ်ႈ လႄႈ ၵိုတ်းဝႆႉၵူၼ်းဢိတ်းဢွတ်းၵူၺ်း ၼႆယဝ်ႉ။
ၼႂ်းၸႄႈဝဵင်းမွၵ်ႇမႆႇၼႆႉ မီး 7 ပွၵ်ႉ၊ 8 ဢိူင်ႇ ႁူင်းပၼ်သဵင်တင်းမူတ်းမီးယူႇ 33 တီႈ လႄႈ ၵူၼ်းမီးသုၼ်ႇပၼ်သဵင်တင်းသဵင်ႈမီးယူႇ 22977 ၵေႃႉ။ ၼေႃႇၽွင်းတႅၼ်းၸိူဝ်းၶဝ်ႈလိူၵ်ႈတင်ႈ ၼႂ်းသၽႃး 3 တီႈ မီးယူႇ 14 ၵေႃႉၼႆ သိုၵ်းမၢၼ်ႈယိုတ်းမိူင်းပိုၼ်ၽၢဝ်ႇဢွၵ်ႇဝႆႉ ၼႆယဝ်ႉ။
မိူၼ်ၼႆၼင်ႇၵဝ်ႇ ၽွင်းၵူၼ်းမိူင်းၽျၢၵ်ႈၵႂႃႇပၼ်ၶႅပ်းၵၢင်ၸႂ် ယၢမ်းၵၢင်ၼႂ်ၸဝ်ႉၼၼ်ႉ ၶိူင်ႈၸၢၵ်ႈဢၼ်သိုၵ်းမၢၼ်ႈယိုတ်းမိူင်းၸႂ်ႉဝႆႉ မီးပၼ်ႁႃလႄႈ ၵူၼ်းမိူင်းလႆႈၸႂ်ႉၶၢဝ်းယၢမ်းသေ ပႂ်ႉယူႇတင်းႁိုင် ၼႆယဝ်ႉ။
ၵူၼ်းၸၢႆး ဢႃႇယု 50 ပီပၢႆၵေႃႉၵႂႃႇပၼ်ၶႅပ်းၵၢင်ၸႂ် တီႈႁူင်းပၼ်သဵင် ၼႂ်းၸႄႈဝဵင်းမိူင်းၽျၢၵ်ႈၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “ၵၢင်ၼႂ်ၼႆႉ ၸၢၵ်ႈၶဝ်ပဵၼ်ႁင်ၵေႃႈဢမ်ႇႁူႉ။ ပုင်ႇမၢၼ်ႇၼႆႉ သဵင်ၸၢၵ်ႈ ဢၼ်တေပၼ်ၾၢင်ႉဝႃႈ တဵၵ်းပၼ်ၶႅပ်းၵၢင်ၸႂ်လႆႈယဝ်ႉၼႆၼၼ်ႉ လူဝ်ႇလႆႈလင်မေႃးမႃးဢွၼ်တၢင်း။ မိူဝ်ႈၼႂ်ၼႆႉသမ်ႉ ဢမ်ႇမီးသဵင်သင်မေႃး၊ ၸေႈၵေႃႈ ဢမ်ႇဢွၵ်ႇမႃးလႄႈ ၶဝ်ၸႂ်ႉပႂ်ႉ။ ၵွပ်ႈၼၼ် ႁဝ်းလႆႈၶိုၼ်းတဵၵ်းပဵၼ်လၢႆၵမ်း။ မိူဝ်ႈတဵၵ်းၼၼ်ႉသမ်ႉဢမ်ႇတူၵ်းသင်မႃး၊ ၽိူဝ်ႇၶႃႈဢမ်ႇတဵၵ်းသင်ႁႄယူႇဝႆႉတင်းႁိုင် ၸေႈၼၼ်ႉသမ်ႉ လုၵ်ႉတီႈလႂ်ဢွၵ်ႇမႃးၵေႃႈဢမ်ႇႁူႉ” ၼႆယဝ်ႉ။
ပၢင်လိူၵ်ႈတင်ႈ ပွၵ်ႈၵမ်း 2 ဢၼ်သိုၵ်းမၢၼ်ႈယိုတ်းမိူင်းၸတ်းႁဵတ်း ဝၼ်းမိူဝ်ႈၼႆႉ 11/01/2026 ၼႆႉ မိူင်းတႆးပွတ်းႁွင်ႇၸတ်းႁဵတ်း တီႈဝဵင်းမိူင်းယႆ၊ ဝဵင်းတၢင်ႉယၢၼ်း၊ မိူင်းတႆးပွတ်း ၸၢၼ်းၸတ်းႁဵတ်းၵႂႃႇ ဝဵင်းယႂႃႇငၢၼ်ႇ၊ ဝဵင်းသီႇသႅင်ႇ၊ ဝဵင်းၵၢတ်ႇလေႃႉ၊ ဝဵင်းလွၵ်ႉၸွၵ်ႇ၊ ဝဵင်းၵုၼ်ႁဵင်၊ ဝဵင်းမိူင်းပၼ်ႇ၊ ဝဵင်းမွၵ်ႇမႆႇ၊ ဝဵင်းမိူင်းၵိုင်၊ ဝဵင်းလၢႆးၶႃႈ၊ မိူင်းတႆးပွတ်းဢွၵ်ႇ ၸတ်း ႁဵတ်းဝဵင်းမိူင်းၶၢၵ်ႇ၊ ဝဵင်းမိူင်းပဵင်း၊ ဝဵင်းမိူင်းၽျၢၵ်ႈ၊ ဝဵင်းမိူင်းတူၼ်၊ ဝဵင်းမိူင်းယွင်း၊ ဝဵင်းမိူင်းယၢင်း ႁူမ်ႈသဵၼ်ႈမိူင်းတႆးပတ်းပိုၼ်ႉ ပဵၼ် 17 ၸႄႈဝဵင်း ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ