ထၢမ်- ၸၢႆးၶႂၼ်မိူင်း

ပႃႇတီႇၵၢၼ်မိူင်း 3 ဢၼ်ပႃးတင်းပႃႇတီႇသိူဝ်ၽိူၵ်ႇ SNDP ႁူမ်ႈၵၼ်တႅမ်ႈလိၵ်ႈတၢင်ႇၸူး ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ၼႂ်းလိူၼ်ၵျႅၼ်ႊၼိဝ်ႊရီႊဝူင်ႈထိၼိုင်ႈၼႆႉဝႃႈ ပၢင်လိူၵ်ႈတင်ႈၵမ်းထိၼိုင်ႈဢၼ်ၸတ်းႁဵတ်း ယဝ်ႉၵႂႃႇၼၼ်ႉ ၶႅပ်းၵၢင်ၸႂ်လူင်ႈၼႃႈ ဢမ်ႇမီးလွင်ႈလူင်ႉလႅင်းပူင်ႇသႂ် ဝႃႈၼႆ။

ပႃႇတီႇသိူဝ်ၽိူၵ်ႇၼႆႉ ၶဝ်ႈၶေႉၶဵင်ႇပၢင်လိူၵ်ႈတင်ႈၸၼ်ႉပတ်းပိုၼ်ႉၸိုင်ႈမိူင်း၊ ႁူဝ်ၼပ်ႉၼေႃႇၽူႈတႅၼ်းမီး 584 ၵေႃႉ။ ၵူၺ်းၵႃႈပၢင်လိူၵ်ႈတင်ႈၵမ်းထိ 1 ၼႆႉတႄႉ ဢွင်ႇပေႉတီႈၼင်ႈသၽႃးၵူၼ်းမိူင်း တီႈလဵဝ် ပဵၼ်တီႈဝဵင်း လၢင်းၶိူဝ်း။ ၵမ်းထိ 2 ဢၼ်တေၸတ်းၼႂ်းဝၼ်းတီႈ 11/1/2026 တေမႃးၼႆႉတႄႉပႆႇႁူႉဝႃႈငဝ်းလၢႆး တေပဵၼ် ၸိူင်ႉႁိုဝ်။ ပၢင်လိူၵ်ႈတင်ႈၵမ်းထိသၢမ်ဢၼ်တေၸတ်းႁၢင်လိူၼ်ၵျႅၼ်ႊၼိဝ်ႊရီႊၼႆႉသမ်ႉ တီႈဝဵင်းမိူင်းၼၢႆး ၸိုင်ႈတႆး ပွတ်းၸၢၼ်း မီးပႃႇတီႇသိူဝ်ၽိူၵ်ႇဢၼ်လဵဝ်ၵူၺ်း ဢမ်ႇမီးၵူႈၶႅင်ႇသေ တေလႆႈတီႈၼင်ႈသၽႃးတီႈၼိုင်ႈ။

ဢိင်ၼိူဝ်လွင်ႈ ပႃႇတီႇၵၢၼ်မိူင်းၶဝ်ယိုၼ်ႈလိၵ်ႈဝႆႉၼၼ်ႉသေၼႂ်းပၢင်လိူၵ်ႈတင်ႈ ၵမ်းထိ 2 လႄႈ 3 ဢၼ်တေ ၸတ်းၼႆႉတႄႉ တေပၼ်ၼေႃႇၽူႈတႅၼ်းဝဵင်းဢၼ်ၵဵဝ်ႇၶွင်ႈ ၶဝ်ႈတူၺ်းၸွမ်း ပၢင်လိူၵ်ႈတင်ႈလူင်ႈၼႃႈ ယူႇၼႆ ၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ် UEC ၶိုၼ်းတွပ်ႇလၢတ်ႈမိူဝ်ႈဝၼ်းတီႈ 5/1/2026 ၼၼ်ႉဝႃႈၼႆ။

ၵဵဝ်ႇၵပ်းလွင်ႈဢၼ်ပႃႇတီႇၵၢၼ်မိူင်းသူင်ႇယိုၼ်ႈလိၵ်ႈၸူး ၸွမ်ၸိၵ်းသိုၵ်းမၢၼ်ႈယိုတ်းမိူင်းၼၼ်ႉလႄႈသင် လွင်ႈငဝ်းလၢႆးပၢင်လိူၵ်ႈတင်ႈဢၼ်ယဝ်ႉၵႂႃႇၼၼ်ႉလႄႈသင် ၊ လွင်ႈပၼ်ၶႅပ်းၵၢင်ၸႂ်လူင်ႈၼႃႈ ၸိူဝ်းၼႆႉလႄႈ သင်မီးၸိူင်ႉႁိုဝ်၊ ႁၼ်ထိုင်ၸိူင်ႉႁိုဝ်ၼႆၼၼ်ႉ ၸၢႆးၶႂၼ်မိူင်း ၽူႈသိုဝ်ႇၶၢဝ်ႇ ၸုမ်းၶၢဝ်ႇၽူႈတွႆႇႁွၵ်ႈ လႆႈၵပ်းသိုပ်ႇ တွင်ႈထၢမ် လုင်းၸၢႆးဢၢႆႈပဝ်း ႁူဝ်ပဝ်ႈပႃႇတီႇသိူဝ်ၽိူၵ်ႇ (SNDP) ဝႆႉၼင်ႇၼႆ။

ထၢမ်။ ။ လႆႈငိၼ်းၶၢဝ်ႇဝႃႈ ဝၼ်းတီႈ 2/1/2026 ၼႆႉ ယူႇတီႈပႃႇတီႇသိူဝ်ၽိူၵ်ႇသေ လႆႈတၢင်ႇလိၵ်ႈတီႈၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ လွင်ႈ ပၢင်လိူၵ်ႈတင်ႈၵမ်းထိ 1 ၼၼ်ႉ ပႃႇတီႇသၢင်ႇသီႈဢဝ်ၶႅပ်းၵၢင်ၸႂ်လူင်ႈၼႃႈသေ ဢွင်ႇပေႉၵႂႃႇ ၼၼ်ႉ ဢမ်ႇမီးလွင်ႈပူင်ႇသႂ် ဝႃႈၼႆၶႃႈဢေႃႈ။ ၼႂ်းလိၵ်ႈၼၼ်ႉတႅမ်ႈဝႆႉသင်လၢႆလၢႆၽွင်ႈၶႃႈ။

တွပ်ႇ။ ။ ဢၼ်ၼၼ်ႉပဵၼ်လွင်ႈ ၶႅပ်းၵၢင်ၸႂ်လူင်ႈၼႃႈၶႃႈဢေႃႈၼၼ်ႉ ။ ၶႅပ်းၵၢင်ၸႂ်လူင်ႈၼႃႈဢၼ်ဝႃႈၼႆႉ တီႈတႄႉမၼ်း ပေႃးၼႂ်းမၢႆမီႈပၢင်လိူၵ်ႈတင်ႈတႄႉ တေလႆႈတႅမ်ႈၸိုဝ်ႈၽူႈပၼ်သဵင်ၵၢင်ၸႂ်လူင်ႈၼႃႈဝႆႉ တီႈႁူင်းတွတ်ႈၶႅပ်းၵၢင်ၸႂ်ၶႃႈလူး။ ၵူၺ်းၵႃႈဢၼ်ၼႆႉ မိူဝ်ႈလူင်းၵဵပ်းၵေႃႈ ႁဝ်းၶႃႈဢမ်ႇလႆႈႁူႉၸွမ်း။ ၽူႈပၼ်သဵင်ၵၢင်ၸႂ်လူင်ႈၼႃႈပဵၼ်ၽႂ်လၢႆလၢႆၼႆၵေႃႈႁဝ်းၶႃႈၵေႃႈဢမ်ႇလႆႈႁူႉၸွမ်း။

ၽွင်းၶဝ်လူင်းၵဵပ်းၶႅပ်းၵၢင်ၸႂ်လူင်ႈၼႃႈၼၼ်ႉ ၼေႃႇၽူႈတႅၼ်းႁဝ်းၶႃႈၵေႃႈဢမ်ႇလႆႈလူင်းၵႂႃႇၸွမ်း။ ၶဝ်လႆႈမႃးသင်လၢႆလၢႆၼႆႁဝ်းၶႃႈဢမ်ႇလႆႈႁူႉၸွမ်း။ ၵွပ်ႈၼႆ ႁဝ်းၶႃႈႁၼ်ထိုင်ဝႃႈ ၶႅပ်းၵၢင်ၸႂ်လူင်ႈၼႃႈၵမ်းၼႆႉ “ ဢမ်ႇမီးလွင်ႈလူင်ႉလႅင်းပူင်ႇသႂ်”။ ၵွပ်ႈၼႆလႄႈ ပၢင်လိူၵ်ႈတင်ႈၵမ်းထိ 2 လႄႈ 3 ၼႆႉ ႁႂ်ႈႁဵတ်းပၼ်ႁႂ်ႈပေႃးမီးလွင်ႈလူင်ႉလႅင်းပူင်ႇသႂ်ၼႆ ႁဝ်းၶႃႈ လႆႈတႅမ်ႈၵႂႃႇၸိူင်ႉၼၼ်။

ထၢမ်။ ။ လိၵ်ႈၼၼ်ႉသူင်ႇၸူးတီႈ ၶွမ်ႊမသျိၼ်ႊပၢင်လိူၵ်ႈတင်ႈပႃးယူႇၶႃႈႁႃႉ။ တၢင်ႇပႃႇတီႇၶႃႈလူး ၸွင်ႇတၢင်ႇလိၵ်ႈၸိူင်ႉၼႆၸွမ်းယူႇၶႃႈႁိုဝ်။ ၸွင်ႇၾၢႆႇၶဝ်ပႃႈ တွပ်ႇလိၵ်ႈမႃးၶိုၼ်းၸိူင်ႉႁိုဝ်ၶႃႈၼႄႇ။

တွပ်ႇ။ ။ သူင်ႇၸူးတင်းၶွမ်ႊမသျိၼ်ႊပၢင်လိူၵ်ႈတင်ႈလႄႈတင်းတီႈၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇတင်း 2 တီႈၶႃႈဢေႃႈ။ တီႈႁူဝ်ပဝ်ႈၶွမ်ႊမသျိၼ်ႊပၢင်လိူၵ်ႈတင်ႈ ၸႄႈမိူင်းလႄႈတိူင်းၵေႃႈ သူင်ႇၸူးဢေႃႈ။ ၶဝ်ဢမ်ႇတွပ်ႇလိၵ်ႈၶိုၼ်းၸိူင်ႉႁိုဝ်ၶႃႈလူင်။ မိူဝ်ႈဝႃးမိူဝ်ႈသိုၼ်း ဢၼ်ၶဝ်လူင်းၵဵပ်းၶႅပ်းၵၢင်ၸႂ်လူင်ႈၼႃႈတီႈမိူင်းပဵင်း မိူင်းတႆးပွတ်းဢွၵ်ႇၼၼ်ႉၵေႃႈ ၶဝ်ႈဢမ်ႇႁွင်ႉၼေႃႇၽူႈတႅၼ်းလူင်းၵႂႃႇၸွမ်းၶဝ်။ လွင်ႈၼႆႉႁဝ်းၵေႃႈလႆႈလၢတ်ႈၵႂႃႇတီႈ ဢူးၶိၼ်ႇမွင်ႇဢူး ၽူႈၶဝ်ႈၸုမ်းၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ် တီႈၼေႇပျီႇတေႃႇ။

မၼ်းၵေႃႈ ၼႅတ်ႈလၢတ်ႈၵႂႃႇတီႈႁူဝ်ပဝ်ႈ ၶွမ်ႊမသျိၼ်ႊပၢင်လိူၵ်ႈတင်ႈမိူင်းတႆး။ ၼႆလႄႈ ၵမ်းၼႆႉတႄႉ ပေႃးၶဝ်တေလူင်းၵဵပ်းၶႅပ်းၵၢင်ၸႂ်လူင်ႈၼႃႈ ၶဝ်ၵေႃႈတေႁွင်ႉပႃးၼေႃႇၽူႈတႅၼ်းႁဝ်းၵႂႃႇၸွမ်းၶႃႈဢိူဝ်ႈ။ ဢၼ်ၼႆႉတႄႉလႆႈဝႃႈ လူင်ႉလႅင်းပူင်ႇသႂ်ႇမႃးဢၼ်ၼိုင်ႈၶႃႈဢိူဝ်ႈၼေႃႈ။

ထၢမ်။ ။ ပေႃးပၢင်လိူၵ်ႈတင်ႈၵမ်း 2 ၵမ်း 3 မႃးၼႆႉၶႃႈလူး ၸွင်ႇႁၼ်ထိုင်ဝႃႈ ၶႅပ်းၵၢင်ၸႂ်လူင်ႈၼႃႈၼႆႉတေမီးလွင်ႈပူင်ႇသႂ်ယူႇၶႃႈႁႃႉ။

တွပ်ႇ။ ။ တလဵဝ်ၵေႃႈၶဝ်တေလူင်းၵဵပ်းၶႅပ်းၵၢင်ၸႂ်လူင်ႈၼႃႈၵေႃႈၶဝ်ႁွင်ႉပႃးႁဝ်းယူႇယဝ်ႉၶႃႈၼႃႇ။ လွင်ႈဝႃႈငဝ်းလၢႆးပၢင်လိူၵ်ႈတင်ႈၵမ်း 2 လႄႈ ၵမ်း 3 တေပဵၼ်ႁိုဝ်မႃးထႅင်ႈၼႆၼၼ်ႉတႄႉ ယွၼ်ႉဝႃႈမၼ်းပႆႇပဵၼ်လႄႈ ပႆႇလီလၢတ်ႈလူင်ႈၼႃႈၶႃႈၼႃႇၼေႃႈ။

ထၢမ်။ ။ ဢေႃႈၶႃႈ။မိူၼ်ၼင်ႇပၢင်လိူၵ်ႈတင်ႈၵမ်းထိ 1 တီႈဝဵင်းမူႇၸေႊၼၼ်ႉၼႆ ဝၼ်းပၼ်သဵင်ၵၢင်ၸႂ်ၼၼ်ႉၽိူဝ်ႇမႃးၼပ်ႉၶႅပ်းၵၢင်ၸႂ်ယဝ်ႉ လႆႈႁၼ်ပႃႇတီႇသိူဝ်ၽိူၵ်ႇ ပေႉလူၼ်ႉႁိုၵ်းလူၼ်ႉၾင်ႇ။ ၵူၺ်းၵႃႈၽိူဝ်ႇဢဝ်ၶႅပ်းၵၢင်ၸႂ်လူင်ႈၼႃႈၼၼ်ႉမႃးဢၢၼ်ႇၸွမ်းၼႆ ၽွၼ်းၵၢၼ်မၼ်းပိၼ်ႈၽူၼ်ၵႂႃႇၵမ်းလဵဝ်ႁေ ဢဝ်ပႃႇတီႇသၢင်ႇသီႈပေႉပႅတ်ႈတင်းပိုၵ်းၼၼ်ႉၶႃႈၼႃႇ။

တွပ်ႇ။ ။သူၵေႃႈဝူၼ်ႉတူၺ်းၵေႃႈပွင်ႇၸႂ်လႆႈယူႇၶႃႈၼႃ။ ႁူင်းတွတ်ႈၶႅပ်းၵၢင်ၸႂ် 18 ႁူင်းၼႆႉ တႃႇ 17 ၼႆႉပဵၼ်ၶႅပ်းၵၢင်ၸႂ်သိူဝ်ၽိူၵ်ႇလၢႆလၢႆၶႃႈၼႃႇ။ ၽိူဝ်ႇၵိုတ်းႁူင်းလဵဝ်ၼၼ်ႉ ဢဝ်ၶႅပ်းၵၢင်ၸႂ်လူင်ႈၼႃႈမႃးပွင်းသႂ်ႇလႄႈ ပဵၼ်ပႃႇတီႇသၢင်ႇသီႈၵႂႃႇမူတ်းၼႆ တေလႆႈလၢတ်ႈၸိူင်ႉႁိုဝ်လႃႇ – မၼ်းဢမ်ႇမၢၼ်ႇမႅၼ်ႈသေဢိတ်း ၼၼ်ႉၶႃႈၼႃႇ – ဢမ်ႇၸႂ်ႈႁိုဝ်။

ၶႃႈၵေႃႈဝူၼ်ႉယူႇၼႃ။ ၶႂ်ႈသၢၼ်ၶတ်းယူႇၼႃ။ ၵူၺ်းၵႃႈၶိုၼ်းမႃးဝူၼ်ႉတူၺ်းလီလီ။ ပေႃးတေသၢၼ်ၶတ်းၼႆ တေလႆႈလုၵ်ႉတီႈမူႇၸေႊသေ လူင်းမႃးၼေႇပျီႇတေႃႇၼၼ်ႉၵႃႈတၢင်းတေသဵင်ႈၼမ်။ ပေႃးတေသၢၼ်ၶတ်းၼႆ သမ်ႉတေလႆႈတၢင်ႇယိုၼ်ႈငိုၼ်းဝႆႉ 10 သႅၼ်ပျႃးဢွၼ်တၢင်းၵွၼ်ႇ။ ယဝ်ႉၵေႃႈၵႃႈတၢင်းၵႂႃႇမႃးႁေ၊ ၵႃႈၵူတ်ႇထတ်းသမ်ႉ 50-60 သႅၼ်ပျႃးႁေ ၵႃႈယူႇၵိၼ်ၽွင်းပႂ်ႉလွင်ႈၵူတ်ႇထတ်းႁေၼႆ တေသဵင်ႈငိုၼ်းယူႇမွၵ်ႈႁိမ်း 100 သႅၼ်ပျႃးၼႆႉၼေႈ။ ယွၼ်ႉပိူဝ်ႈႁဝ်းဢမ်ႇမီးငိုၼ်းၵွင်ၵၢင်လႄႈႁဝ်းၵေႃႈၸူး ယၢပ်ႇၽိုတ်ႇတႃႇတေသၢၼ်ၶတ်း။

ထၢမ်။ ။ပေႃးဢဝ် UEC ပိုၼ်ၽၢဝ်ႇဝႃႈၼႆ တီႈမိူင်းၼၢႆးၵေႃႈဢမ်ႇမီးၵူႈၶႅင်ႇလႄႈသိူဝ်ၽိူၵ်ႇတိုၼ်းဢွင်ႇပေႉယူႇယဝ်ႉ။ လႄႈပၢင်လိူၵ်ႈတင်ႈၵမ်းထိၼိုင်ႈၵေႃႈ သိူဝ်ၽိူၵ်ႇလႆႈဝႆႉတီႈၼိုင်ႈတီႈဝဵင်းလၢင်းၶိူဝ်းၶႃႈၼေႃႈ ။ တင်းသွင်ဢၼ်ၼႆႉပဵၼ်တီႈၼင်ႈသၽႃးၵူၼ်းမိူင်း။ လႄႈ- ပၢင်လိူၵ်ႈတင်ႈၵမ်းထိ 2 လႄႈ 3 ၼႆႉၶႃႈလူး လွင်ႈဢွင်ႇပေႉၼႆႉ မုင်ႈမွင်းဝႆႉမွၵ်ႈလႂ်ၶႃႈ။

တွပ်ႇ။ ။ မုင်ႈမွင်းၶႃႈဢိူဝ်ႈ ပၢင်လိူၵ်ႈတင်ႈၵမ်းထိ 2 လႄႈ 3 ၼႆႉ ။ ယွၼ်ႉဝႃႈတီႈဢၼ်ႁဝ်းတေၶဝ်ႈၶေႉၶဵင်ႇၼၼ်ႉ ပဵၼ်တီႈတႆးယူႇၼမ်လၢႆလၢႆၶႃႈလူး။ မိူဝ်ႈၵမ်းထိ 1 ၼၼ်ႉတႄႉတီႈဝဵင်းတူၼ်ႈတီး – ႁူဝ်ပူင်းၸိူဝ်းၼႆႉ ႁူဝ်ၵူၼ်းတႆးမီးဢေႇၼႃႇ။ မိူၼ်ၼင်ႇတီႈတႃႈၶီႈလဵၵ်းၼႆႉတီႈတႄႉမၼ်း ပႃႇတီႇသိူဝ်ၽိူၵ်ႇႁဝ်း တေလႆႈပေႉၼၼ်ႉၼႃ။ မိူဝ်ႈတႄႇတႄႉ သိူဝ်ၽိူၵ်ႇပေႉယူႇယဝ်ႉ။ ၵူၺ်းၵႃႈတီႈတႃႈၶီႈလဵၵ်းၼႆႉသမ်ႉ ယၢပ်ႇမဵဝ်းၼိုင်ႈ မီးပျီႇတူႉၸိတ်ႉၼမ်ၼႃႇ။ ပျီႇတူႉၸိတ်ႉၸိူဝ်းၼၼ်ႉသမ်ႉပဵၼ်ၵူၼ်းပႃႇတီႇသၢင်ႇသီႈမူတ်းလူး။ ၶဝ်ပဵၼ်တႂ်ႈမိုဝ်းသိုၵ်းမၢၼ်ႈၵူၺ်းလႃႇ ။

ထၢမ်။ ။ပႃႇတီႇသိူဝ်ၽိူၵ်ႇၼႆႉ ပႃးၼႂ်း 6 ပႃႇတီႇ ဢၼ်ၶဝ်ႈၶေႉၶဵင်ႇပတ်းပိုၼ်ႉၸိုင်ႈမိူင်းၼၼ်ႉလႄႈ လိုၼ်းသုတ်းပေႃးၼပ်ႉသွၼ်ႇယဝ်ႉမူတ်းယဝ်ႉၼႆႉ ဢၢၼ်းပေႉၼမ်သုတ်းမွၵ်ႈလႂ်ၶႃႈလႃႇ။

တွပ်ႇ။ ။ ဢၼ်ႁဝ်းၶႃႈလၢတ်ႈယူႇတႃႇသေႇၼၼ်ႉၼႃႇၼႃ။ သင်ဝႃႈမၼ်းလူင်ႉလႅင်းပူင်ႇသႂ် ၽဵင်ႇပဵင်းၼႆၸိုင်ႁဝ်းၶႃႈယုမ်ႇယမ်ဝႃႈတေဢွင်ႇပေႉၼမ်သုတ်းထိ 2 ၼႂ်းပတ်းပိုၼ်ႉၸိုင်ႈမိူင်းၵွၼ်ႇၶႃႈဢိူဝ်ႈ။ ၵူၺ်းၵႃႈတလဵဝ်တႄႉ ယၢပ်ႇၶႃႈဢိူဝ်ႈ။ ၶႃႈတႄႉဢမ်ႇၶႆႈလၢတ်ႈယဝ်ႉဝႃႈ။ လၢတ်ႈၵေႃႈဢမ်ႇလီၼေႃႈ။ ဢမ်ႇလၢတ်ႈယဝ်ႉဝႃႈ လၢတ်ႈၵေႃႈဢမ်ႇထူးသင်လူးၼေႃႈ။

ထၢမ်။ ။ပေႃးပၢင်လိူၵ်ႈတင်ႈယဝ်ႉ တေမီးမႃးသၽႃးၼၼ်ႉၵေႃႈ ယူႇတီႈပႃႇတီႇသိူဝ်ၽိူၵ်ႇသေ မုင်ႈမွင်းဝႆႉၸိူင်ႉႁိုဝ်ၶႃႈ။

တွပ်ႇ။ ။တေဢိင်ၼိူဝ်ၽူၼ်ၽွၼ်းၵၢၼ်လိူၵ်ႈတင်ႈၵူၺ်းၶႃႈဢိူဝ်ႈ သၽႃးတေပဵၼ်မႃးၸိူင်ႉႁိုဝ်ဢၼ်ဝႃႈၼၼ်ႉ။ ပၢင်လိူၵ်ႈတင်ႈတိုၵ်ႉယဝ်ႉၵမ်းထိ 1 ၵူၺ်း ပေႃးတူၺ်းၼႆ သၢင်ႇသီႈၼႆႉသမ်ႉပေႃးၽွတ်ႈလူင်ပွင်ၸိုင်ႈလႆႈယဝ်ႉလူးၼႆႉ။ ပေႃးၶဝ်ပွင်းတပ်ႉသိုၵ်း 166 ၵေႃႉႁေၵေႃႈၶဝ်ပဵၼ်လူင်ပွင်ၸိုင်ႈလႆႈယဝ်ႉလူး။

ထၢမ်။ ။ပေႃးၼႆ သင်ဝႃႈမီးသၽႃးမႂ်ႇမႃးၼႆ ယူႇတီႈပႃႇတီႇသိူဝ်ၽိူၵ်ႇသေတေႁူမ်ႈမိုဝ်းၸွမ်းလူင်ပွင်ၸိုင်ႈမႂ်ႇၸိူင်ႉႁိုဝ်ၶႃႈ။ ဢမ်ႇၼၼ် တေယူႇပဵၼ်ၾၢႆႇသၢၼ်ၶတ်းၶႃႈႁႃႉ။

တွပ်ႇ။ ။တေဢိင်ၼိူဝ်ၶႅပ်းမႄးဢၼ်ႁဝ်းၶႃႈလႆႈထႅင်ႈၵွၼ်ႇၶႃႈၼႃႇၼေႃႈ ။ လွင်ႈၼႆႉတႄႉဢမ်ႇၸၢင်ႈလၢတ်ႈဝႆႉလူင်ႈၼႃႈၶႃႈ။ ပိူင်လူင်ႁဝ်းၶႃႈလူဝ်ႇတူၺ်း ၽွၼ်းပၢင်ႈတႃႇၵူၼ်းမိူင်းၵူၺ်း။

ထၢမ်။ ။ၵဵဝ်ႇလူၺ်ႈပၢင်လိူၵ်ႈတင်ႈၼႆႉသေ ဢၼ်ႁဝ်းၶႃႈဢမ်ႇလႆႈထၢမ် ဢၼ်လုင်းႁဝ်းၶႂ်ႈလၢတ်ႈ မီးၸိူင်ႉႁိုဝ်ၽွင်ႈၶႃႈ။

တွပ်ႇ။ ။ဢမ်ႇမီးယဝ်ႉၶႃႈ ။ ဢမ်ႇမီးႁႅင်းလၢတ်ႈယဝ်ႉ။

ထၢမ်။ ။ဢေႃႈၶႃႈ ၸႂ်ယႂ်ႇၸႂ်ယၢဝ်းသေတွပ်ႇပၼ်လႄႈ ၶွပ်ႈၸႂ်ယႂ်ႇၼမ်ၶႃႈဢေႃႈ ။