မိူဝ်ႈဝၼ်းတီႈ 30 လိူၼ်မၢတ်ႉၶျ် လုမ်းသၽႃးမိူင်းႁူမ်ႈတုမ် ၸတ်းႁဵတ်းပၢင်ၵုမ်ၶိုၵ်ႉတွၼ်း ၶတ်းလိူၵ်ႈၵူၼ်းၼႂ်းပႃႇတီႇၵူႈၸုမ်း ၸိူဝ်းဢွင်ႇပေႉပၢင်လိူၵ်ႈတင်ႈ 2025-2026 ယဝ်ႉ လႆႈၶဝ်ႈႁူမ်ႈၸွမ်းၼႂ်းပၢင်ၵုမ်လုမ်းသၽႃးၼၼ်ႉ တႃႇပဵၼ်ၸွမ်ၸိုင်ႈ လႄႈ ၵႅမ်ၸွမ်ၸိုင်ႈ ပဵၼ်တၢင်း ၵၢၼ်ၵႂႃႇ ၼႆယဝ်ႉ။

ၼင်ႇႁိုဝ် တေထုၵ်ႇမၵ်းမၼ်ႈ ၸၼ်ႉၵႅမ်ၸွမ်ၸိုင်ႈ ပဵၼ်တၢင်းၵၢၼ်ၼၼ်ႉ ၾၢႆႇလုမ်းသၽႃးၵူၼ်းမိူင်း လႄႈ သၽႃးၸိူဝ်ႉၸၢတ်ႈ ၶတ်းလိူၵ်ႈဢွၵ်ႇဝႆႉ ၵူၼ်း 4 ၵေႃႉ တႃႇႁပ်ႉပုၼ်ႈ ၽွၼ်းၸွမ်ၸိုင်ႈ လႄႈ ၵႅမ်ၸွမ်ၸိုင်ႈ မိူင်းႁူမ်ႈတုမ်ၵႂႃႇပဵၼ်တၢင်းၵၢၼ်သေတႃႉ ယၢမ်းလဵဝ် ယၢမ်းလဵဝ်ၼႆႉ မိၼ်းဢွင်ႇလၢႆႇၼႆႉ လုၵ်ႉတီႈလုမ်းသၽႃးၵူၼ်းမိူင်းသေ ထုၵ်ႇလိူၵ်ႈယၢင်ႈ ၶိုၼ်ႈမႃးၼင်ႈဢွင်ႈတီႈယူႇ ၵႅမ်ၸွမ်ၸိုင်ႈတဵမ်တူဝ်ဝႆႉ ပဵၼ်တၢင်းၵၢၼ် ၼႆယဝ်ႉ။

ၵူၼ်းၸိူဝ်းထုၵ်ႇလိူၵ်ႈပဵၼ်ၵႅမ်ၸွမ်ၸိုင်ႈ ၶဝ်ႈႁွပ်ႈလိုၼ်းသုတ်းၼႆႉ မီးယူႇသၢမ်ၵေႃႉ။ ပဵၼ် မိၼ်းဢွင်ႇလၢႆႇ ၵေႃႉၼိုင်ႈ၊ ဢူးၺူဝ်ႇၸေႃး ၵေႃႉၼိုင်ႈ၊ တေႃႇၼၼ်းၼီႇၼီႇဢေး ၵေႃႉ ၼိုင်ႈ။

မိူၼ်ၼင်ႇၵူၼ်းမိူင်းႁူမ်ႈတုမ် လၢမ်းၶၢတ်ႈမႃးၼၼ်ႉ ၽွင်းႁူဝ်ပဝ်ႈ ပၢင်ၵုမ်လုမ်းသၽႃးၵူၼ်းမိူင်း ပိုၼ်ၽၢဝ်ႇဢွၵ်ႇ သဵၼ်ႈၸိုဝ်ႈၵႅမ်ၸွမ်ၸိုင်ႈ ပဵၼ်တၢင်းၵၢၼ်ၼၼ်ႉ ပႃးမႃးသဵၼ်ႈ ၸိုဝ်ႈ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇၵေႃႉၼိုင်ႈ၊ တွၵ်ႊတိူဝ်ႊၵျေႃႇသူၺ်ႇ ၽူႈၶဝ်ႈၸုမ်း ၼႂ်းၸုမ်းပွင်ၵၢၼ် ပႃႇတီႇၸၢဝ်းၶိူဝ်းၽွမ်ႉႁူမ်ႈ (တစည) ၵေႃႉၼိုင်ႈ၊ တီႈၼႂ်းလုမ်းသၽႃးၸိူဝ်ႉၸၢတ်ႈသမ်ႉ တေႃႇၼၼ်းၼီႇၼီႇဢေး ႁူဝ်ပဝ်ႈ ပႃႇတီႇသၢင်ႇသီႈ မိူင်းယၢင်းၽိူၵ်ႇ ၵေႃႉၼိုင်ႈ လႄႈ တွၵ်ႊတိူဝ်ႊတူးၵျႃႇ ႁူဝ်ပဝ်ႈ ပႃႇတီႇၵူၼ်းမိူင်းၶၢင် (KSPP) ဝႆႉ ၼႆ ယဝ်ႉ။

တွၵ်ႊတိူဝ်ႊမၼၢမ်ႇတူးၵျႃႇၼႆႉ မိူဝ်ႈပူၼ်ႉမႃး ယၢမ်ႈပဵၼ်ႁူဝ်ပဝ်ႈတပ်ႉသိုၵ်းလွတ်ႈလႅဝ်းၶၢင် (KIO) ၵေႃႉၼိုင်ႈသေ မိူဝ်ႈပၢင်ၵုမ်လူင်ၺီႇလႃႇၶၢမ်ႇၸိူဝ်ႉၸၢတ်ႈ (အမျိုးသားညီလာခံ) ဢုပ်ႇဢူဝ်းၵၼ် တႃႇတိုတ်ႉၸၼ်ၶဵၼ်ႇတႅမ်ႈလၵ်းမိူင်း 2008 ၼၼ်ႉၵေႃႈ ယူႇၼႂ်းၼၢမ်း ၽူႈတၢင်တူဝ် ၸုမ်းသိုၵ်းၶၢင် KIO သေ ယၢမ်ႈၶဝ်ႈႁူမ်ႈမႃးၸွမ်းၵေႃႉၼိုင်ႈ။

တေႃႇၼၼ်းၼီႇၼီႇဢေးၵေႃႈ ပဵၼ်ဝႆႉႁူဝ်ပဝ်ႈပႃႇတီႇသၢင်ႇသီႈ မိူင်းယၢင်းၽိူၵ်ႇ မိူဝ်ႈပၢင်လိူၵ်ႈတင်ႈ 2025-2026 ၼႆႉၵေႃႈ ၶဝ်ႈလိူၵ်ႈတင်ႈၸွမ်းပုၼ်ႈသုၼ်ႇ (PR) လႆႈတီႈၼင်ႈဝႆႉ ၼႂ်းသၽႃးၸႄႈမိူင်း။ မိူဝ်ႈပူၼ်ႉမႃး ယၢမ်ႈပဵၼ်တႅၼ်းၽွင်းၸိူဝ်ႉၸၢတ်ႈ ပႃႇတီႇသၢင်ႇသီႈ USDP ၵေႃႉၼိုင်ႈ။

ဢွင်ႈတီႈၼင်ႈ ၸၼ်ႉၸွမ်ၸိၵ်းသိုၵ်း (တပ်မတော်ကာကွယ်ရေးဦးစီးချုပ်) ၵေႃႈ မိၼ်းဢွင်ႇလၢႆႇ ပူတ်းၸၼ်ႉ ၸဝ်ႈၵဝ်ႇၶိုၼ်းသေ မွပ်ႈဢႃႇၼႃႇၸၼ်ႉၸွမ်ၸိၵ်းသိုၵ်းပၼ် တပေးမၼ်း ၸွမ်သိုၵ်းလူင် ယႄးဝိၼ်းဢူး ၵေႃႉယၢမ်ႈပဵၼ် ၽူႈၵုမ်းၵၢၼ်ၾၢႆႇၵႅတ်ႇၶႄ တပ်ႉပႆလိၼ် (ကာကွယ်ရေးဦးစီးချုပ် – ကြည်း)။ ဢွင်ႈတီႈၸၼ်ႉၵႅမ်ၽူႈၵုမ်းၵၢၼ်ၾၢႆႇၵႅတ်ႇၶႄတပ်ႉပႆလိၼ်သမ်ႉ ၸွမ်သိုၵ်း ၵူဝ်ႇၵူဝ်ႇဢူး ၾၢႆႇငူပ်ႉငီႉၵုမ်းၵမ် တပ်ႉၼမ်ႉ၊ တပ်ႉလိၼ်၊ တပ်ႉလူမ်း (ညှိနှိုင်းကွပ်ကဲရေးမှူး ကြည်း၊ ရေ၊ လေ) ၸွမ်သိုၵ်းလူင် ၵူဝ်ႇၵူဝ်ႇဢူး ႁပ်ႉပုၼ်ႈၽွၼ်း ႁဵတ်းၵႂႃႇ။

ၸွမ်သိုၵ်းလူင် ယႄးဝိၼ်းဢူး ၵေႃႉၶိုၼ်ႈမႃးႁပ်ႉတၼ်းႁဵင်း ၸွမ်ၸိၵ်းသိုၵ်း ၸၼ်ႉၵဝ်ႇၶွင်မိၼ်းဢွင်ႇလၢႆႇ ၼၼ်ႉ မိူဝ်ႈႁူဝ်လိူၼ်မၢတ်ႉၶျ်ၼႆႉ လႆႈၶိုၼ်ႈၸၼ်ႉပဵၼ် ၽူႈၵုမ်းၵၢၼ်သုင်သုတ်း ၾၢႆႇႁူမ်ႇလူမ်ႈၵၢၼ်သိုၵ်း (စရဖ) သေ ယင်းပႆႇတဵမ်လိူၼ် သမ်ႉပေႃးလႆႈၶိုၼ်ႈၸၼ်ႉပဵၼ် ၸွမ်ၸိၵ်း သိုၵ်းမၢၼ်ႈ မႃးပုတ်ႈတီႈၼင်ႈ မိၼ်းဢွင်ႇလၢႆႇ ယူႇယဝ်ႉ။

ၵၢၼ်တီႈၵူၼ်းသိုၵ်းမၢၼ်ႈ လႄႈ ၵူၼ်းၼႂ်းပႃႇတီႇၸိူဝ်းၵမ်ႉထႅမ်သိုၵ်းမၢၼ်ႈယိုတ်းမိူင်း ၶိုၼ်ႈမႃးဢဝ်တီႈယူႇ လႆႈၸၼ်ႉၼႂ်းၸုမ်းလူင်ပွင်ၸိုင်ႈသိုၵ်း ၼႂ်းလုမ်းသၽႃးဢၼ်မီးပႃး ႁႅင်းတပ်ႉသိုၵ်း 25 % ၼႆႉတႄႉ ဢမ်ႇလၢၵ်ႇလၢႆးသင်မႃးမႂ်ႇမႂ်ႇတေႉၼင်ႇၵဝ်ႇ။ မိူဝ်ႈပီ 2011 ၼၼ်ႉၵေႃႈ ဢူးတဵင်း ၸဵင်ႇ ပဵၼ်မႃးၸွမ်ၸိုင်ႈ ၼင်ႇၽႅၼ်ၵၢၼ်ၶဝ်ဝၢင်းဝႆႉၼၼ်ႉယူႇ။

မိၼ်းဢွင်ႇလၢႆႇၼႆႉ ယိပ်းၵမ်ဢဝ်ဝႆႉၸၼ်ႉသုင်သုတ်း ၼႂ်းတပ်ႉသိုၵ်းမၢၼ်ႈ ယူႇပဵၼ်ၸွမ်ၸိၵ်းပိူၼ်ႈဝႆႉတင်း သဵင်ႈ ႁိုင်ၶၢဝ်းတၢင်း 15 ပီတဵမ်တဵမ်။ တၢမ်တူဝ် ၸွမ်ၸိၵ်းသိုၵ်းမၢၼ်ႈ ၵဝ်ႇ ဢူးတၢၼ်းသူၺ်ႇ ၵေႃႉမွပ်ႈဢၢပ်ႈဢႃႇၼႃႇပၼ်။ မိူဝ်ႈပီ 2021 တၢမ်တူဝ်မၼ်း ၵေႃႉၼမ်းၼႃႈသေ ယိုတ်း ဢဝ်ဢႃႇၼႃႇၸိုင်ႈမိူင်း ယဝ်ႉ ၶတ်းၸႂ်ၵူႈလၢႆးတၢင်း တႃႇႁႂ်ႈလႆႈၸၼ်ႉ ၸွမ်ၸိုင်ႈ ဢၼ်မီးဢႃႇၼႃႇသုင်သုတ်းလိူဝ်ပိူၼ်ႈ ၼႂ်းမိူင်းႁူမ်ႈ တုမ်။

ၼႂ်းၶၢဝ်းတၢင်း သိုၵ်းမၢၼ်ႈယိုတ်းမိူင်း ႁိုင်ၶၢဝ်းတၢင်း 5 ပီၼႆႉ ၵူၼ်းမိူင်းၺႃးၶႃႈႁႅမ်တၢႆ ပဵၼ်ၵေႃႇပဵၼ်ၵွင် ႁိူၼ်းယေးၺႃးယႃႉ လူႉၵွႆတင်းၼမ်တင်းလၢႆၼႆႉ ဢၼ်မီးပုၼ်ႈၽွၼ်းယႂ်ႇလူင်ၵေႃႈ ပဵၼ်မိၼ်းဢွင်ႇလၢႆ ၵေႃႉၶႂ်ႈပဵၼ် ၸွမ်ၸိုင်ႈမိူင်းသုင်သုတ်းၼၼ်ႉယဝ်ႉ။

ၽူႈမီးၸၼ်ႉၵဝ်ႇၼႂ်းတပ်ႉသိုၵ်းမၢၼ်ႈၶဝ်ၵေႃႈ ယင်းထတ်းသၢင်လၢတ်ႈဝႃႈ – ယွၼ်ႉမၼ်းၶႂ်ႈႁဵတ်းၸွမ်ၸိုင်ႈ လႄႈ ၸင်ႇဝၢင်းၽႅၼ်ၸတ်းၵၢၼ်ဢႃႇၼႃႇၵူၺ်း ဝႃႈၼႆ။

ၵူၼ်းၵေႃႉတေႁဵတ်းၸွမ်ၸိုင်ႈလႆႈၼႆႉ တေဢမ်ႇလႆႈပဵၼ်ၶႃႈႁၢပ်ႇၵၢၼ်ၶုၼ်ၸိုင်ႈမိူင်းလႄႈ ၸွမ်းၼင်ႇ လၵ်းမိူင်း 2008 ၾိင်ႈမိူင်းတွၼ်ႈ 63 ၼၼ်ႉၸိုင် တင်ႈတႄႇဝၼ်းလိူၵ်ႈတင်ႈ ၸွမ်ၸိုင်ႈ ၵႅမ်ၸွမ်ၸိုင်ႈၼၼ်ႉ ယဝ်ႉ တေလႆႈထွၼ်တူဝ်ဢွၵ်ႇၸၼ်ႉတူဝ်တႅၼ်းၼႂ်းသၽႃး လႄႈ ၸၼ်ႉၵၢၼ် ၶႃႈႁၢပ်ႇၵၢၼ်ၶုၼ်ၸိူဝ်းၼႆႉ တင်းသဵင်ႈသေ တေလႆႈပဵၼ် ၵူၼ်းၵေႃႉလိုဝ်ႈၵၢၼ်ၶုၼ်ဝႆႉ ၼႆယဝ်ႉ။

တႃႇပဵၼ်ၸွမ်ၸိုင်ႈၼႆႉ တေလႆႈမီးၸုမ်းၶတ်းလိူၵ်ႈ ၸွမ်ၸိုင်ႈယူႇ သၢမ်ၸုမ်း။ သၽႃးၵူၼ်းမိူင်း၊ သၽႃးၸိူဝ်ႉၸၢတ်ႈ၊ တူဝ်တႅၼ်းတပ်ႉသိုၵ်းၶဝ် တေလႆႈၶတ်းလိူၵ်ႈ သဵၼ်ႈမၢႆၵႅမ်ၸွမ် ၸိုင်ႈ သူင်ႇယိုၼ်ႈတၢင်ႇသဵၼ်ႈမၢႆၵႂႃႇတီႈ သၽႃးမိူင်းႁူမ်ႈတုမ်။

သဵၼ်မၢႆ ၵႅမ်ၸွမ်ၸိုင်ႈသၢမ်ၵေႃႉ ဢၼ်ၶတ်းလိူၵ်ႈလႆႈမႃးၼၼ်ႉ တေလႆႈတၢင်ႇယိုၼ်ႈၵႂႃႇၸူး ၼႃႇယၵ သၽႃးမိူင်းႁူမ်ႈတုမ်။ ပေႃးၼႃႇယၵ သၽႃးမိူင်းႁူမ်ႈတုမ် လႆႈသဵၼ်ႈၸိုဝ်ႈ ၸိူဝ်းၼၼ်ႉယဝ်ႉၸင်ႇ တေလႆႈသိုပ်ႇၶွတ်ႇၽွတ်ႈ ၸုမ်းၶတ်းလိူၵ်ႈ ၸွမ်ၸိုင်ႈ။

ၼႂ်းၸုမ်းၶတ်းလိူၵ်ႈၸွမ်ၸိုင်ႈၼၼ်ႉ တေလႆႈမီးပႃး ႁူဝ်ပဝ်ႈ ၵႅမ်ႁူဝ်ပဝ်ႈ သၽႃးၵူၼ်းမိူင်း သၽႃးၸိူဝ်ႉၸၢတ်ႈ 4 ၵေႃႉ လႄႈ တႅၼ်းၽွင်းၼႂ်းသၽႃးၵူၼ်းမိူင်း သၽႃးၸိူဝ်ႉၸၢတ်ႈ ၼိုင်ႈတီႈၼိုင်ႈၵေႃႉ တင်း တူဝ်တႅၼ်း ၼႂ်းတပ်ႉသိုၵ်းမၢၼ်ႈ ဢၼ်ၼင်ႈဢဝ်တီႈယူႇဝႆႉၼႂ်းသၽႃးၼိုင်ႈၵေႃႉ ႁူမ်ႈသဵၼ်ႈတေလႆႈမီးယူႇ 7 ၵေႃႉ ။

ၸုမ်းၶဝ် 7 ၵေႃႉၼႆႉ တေလႆႈၵူတ်ႇထတ်း ၼမ်ႉၵတ်ႉ ၵူၼ်းၸိူဝ်းထုၵ်ႇလိူၵ်ႈမႃး တႃႇပဵၼ်ၸွမ်ၸိုင်ႈၼၼ်ႉဝႃႈ ၸွင်ႇတေပဵၼ်လႆႈႁိုဝ် ဢမ်ႇပဵၼ်လႆႈ ၼႆယဝ်ႉ။ ၼမ်ႉၵတ်ႉ ၸွမ်ၸိုင်ႈ ဢၼ်မၵ်းမၼ်ႈဝႆႉဝႃႈ လူဝ်ႇလႆႈမီး ဢမ်ႇပႃးဢမ်ႇပဵၼ်ၼႆၼၼ်ႉတႄႉ

1- တေလႆႈပဵၼ်ၵူၼ်းမီးဢႃႇယု 45 ပီတဵမ်ယဝ်ႉ
2- တေလႆႈပဵၼ်ၵူၼ်းမီးၼမ်ႉၵတ်ႉ တၢင်းႁူႉပၢႆးမေႃ ႁူႉႁၼ်လွင်ႈၵၢၼ်မိူင်း၊ ၵၢၼ်ပၢႆးမၢၵ်ႈမီး၊ ၵၢၼ်ၽွင်းငမ်း လႄႈ ၵၢၼ်သိုၵ်း ၸဵမ်ၸိူဝ်းၼႆႉ။
3- တၢမ်တူဝ်ၵူၼ်းၵေႃႉၼၼ်ႉလႄႈ ပေႃႈမႄႈမၼ်း တေလႆႈပဵၼ် ၵူၼ်းမိူင်းမၢၼ်ႈ (မိူင်းႁူမ်ႈတုမ်) ၸႅတ်ႈၸၢင်ႇ။
4- တၢမ်တူဝ်ၵူၼ်းၵေႃႉတေပဵၼ်ၸွမ်ၸိုင်ႈၵေႃႉယဝ်ႉ လုၵ်ႈလၢင်းၼၢင်းမေး လုၵ်ႈပႂ်ႉလုၵ်ႈၶူၺ်မၼ်းၵေႃႈလီ တိုၼ်းတေဢမ်ႇလႆႈမီး ၵူၼ်းဢၼ်ႁပ်ႉၶၢမ်ႇပဵၼ် ၵူၼ်းၼွၵ်ႈမိူင်းဝႆႉ ၼၼ်ႉ။
5- ၽႂ်သေဢမ်ႇဝႃႈ ၵူၼ်းၼႂ်းၸိူဝ်ႉၶိူဝ်းၼိူဝ်ႉလိူတ်ႈၵူၼ်းၵေႃႉပဵၼ်ၸွမ်ၸိုင်ႈၼႆႉ တေဢမ်ႇလႆႈႁပ်ႉပူၺ်ႈ ၶၢမ်ႇဢေႃးၸႃႇ လူင်ပွင်ၸိုင်ႈၼွၵ်ႈမိူင်း။

ပေႃးၵူတ်ႇထတ်းယဝ်ႉလႄႈ ၵူၼ်းၸိူဝ်းထုၵ်ႇၶတ်းလိူၵ်ႈဝႆႉ ပဵၼ်ၼေႃႇၸွမ်ၸိုင်ႈၸိူဝ်းၼၼ်ႉ ၼမ်ႉၵတ်ႉတဵမ်ထူၼ်ႈ ၸွမ်းၼင်ႇမၵ်းမၼ်ႈၼၼ်ႉယဝ်ႉၸင်ႇ လုမ်းသၽႃးမိူင်းႁူမ်ႈတုမ် တေလႆႈၸတ်း ပၢင်ၶတ်းလိူၵ်ႈ ၸွမ်ၸိုင်ႈထႅင်ႈၵမ်းၼိုင်ႈ။

ၵူၼ်းၵေႃႉဢၼ်လႆႈသဵင်ၵၢင်ၸႂ်ၼမ်လိူဝ်ပိူၼ်ႈသုတ်းၼၼ်ႉ မီးသုၼ်ႇပဵၼ်လႆႈၸွမ်ၸိုင်ႈ ၵူၼ်းၵေႃႉဢၼ်လႆႈ သဵင်ၵၢင်ၸႂ် ၼမ်ထီႉသွင် တေလႆႈပဵၼ် ၵႅမ်ၸွမ်ၸိုင်ႈမၢႆ 1 ၵေႃႉလႆႈ သဵင်ၵၢင်ၸႂ် ၼမ်ထီႉသၢမ်သမ်ႉ တေလႆႈပဵၼ် ၵႅမ်ၸွမ်ၸိုင်ႈ မၢႆ 2 ။

တႅၼ်းၽွင်း ၼႂ်းလုမ်းသၽႃးမိူင်းႁူမ်ႈတုမ်ၼႆႉ တင်းသဵင်ႈမီး 586 ၵေႃႉ။ ၵူၼ်းၵေႃႉတေပဵၼ်လႆႈၸွမ်ၸိုင်ႈ ၼႆႉ လူဝ်ႇလႆႈသဵင်ၵၢင်ၸႂ် တႃႇ 294 ၵေႃႉ ၸင်ႇတေပဵၼ်ၸွမ်ၸိုင်ႈလႆႈ။ ၵူၺ်းၵႃႈ ၼႂ်းလုမ်းသၽႃးမိူင်းႁူမ်ႈ တုမ်သမ်ႉ တူဝ်တႅၼ်းတပ်ႉသိုၵ်းတင်းသဵင်ႈၼႆႉ မီး 166 ၵေႃႉၵူၺ်း။

တႃႇမိၼ်းဢွင်ႇလၢႆႇတေပဵၼ်ၸွမ်ၸိုင်ႈလႆႈၼႆႉ ၼွၵ်ႈလိူဝ်သဵင်ၵူၼ်းသိုၵ်း ၼႂ်းလုမ်းသၽႃးမိူင်းႁူမ်ႈတုမ် 166 ၵေႃႉယဝ်ႉ လူဝ်ႇသဵင်ၵၢင်ၸႂ်တီႈ တႅၼ်းၽွင်းပႃႇတီႇသၢင်ႇသီႈ လႄႈ ပႃႇတီႇၸၢဝ်းၶိူဝ်း ၵူႈၸုမ်း ၸိူဝ်းဢွင်ႇပေႉဝႆႉၸွမ်းပုၼ်ႈသုၼ်ႇ (PR) တႃႇ 128 ၵေႃႉ ၼႆယဝ်ႉ ။

သင်ဝႃႈ ၾၢႆႇတပ်ႉသိုၵ်း လႄႈ ပႃႇတီႇသၢင်ႇသီႈ USDP ယုၵ်ႉတၢင်ႇလိူၵ်ႈဢဝ် မိၼ်းဢွင်ႇလၢႆႇ ၶိုၼ်ႈမႃးပဵၼ်ၸွမ်ၸိုင်ႈတေႉၸိုင် ငဝ်းလၢႆးၵၢၼ်မိူင်း မိူင်းႁူမ်ႈတုမ်ၵေႃႈ တေဢမ်ႇပေႃးမီးလွင်ႈပႅၵ်ႇလၢၵ်ႇသင်မႃးတေႉတေႉ။

ၼႂ်းလၵ်းမိူင်း 2008 ဢၼ်ၸုမ်းသိုၵ်းမၢၼ်ႈယိုတ်းမိူင်း ႁူမ်ႈၵၼ်ႁဵတ်းသၢင်ႈဢွၵ်ႇဝႆႉပၵ်းပိူင်ၼၼ်ႉ ၵူၼ်းၵေႃႉ တေပဵၼ်ၸွမ်ၸိုင်ႈၼႆႉ သင်ပဵၼ်ၵူၼ်းမီးၸၼ်ႉဝႆႉ ၼႂ်းႁွင်ႈၵၢၼ်လူင် ပွင်ၸိုင်ႈ ဢမ်ႇၼၼ် ၼႂ်းတပ်ႉသိုၵ်းၸိုင် တိုၼ်းတေလႆႈထွၼ်တူဝ်ဢွၵ်ႇၵမ်းသိုဝ်ႈၼႆလႄႈ မိၼ်းဢွင်ႇလၢႆႇၵေႃႈ ယွၼ်ႉမၼ်းၶႂ်ႈဢဝ်ၸၼ်ႉၼႃႈတီႈ ၸွမ်ၸိုင်ႈလႄႈ ၸင်ႇယွမ်းၸုၼ်ႉပွႆႇဢႃႇၼႃႇ ၸွမ်ၸိၵ်းသိုၵ်း ဢၼ်မၼ်းၵမ်မႃးႁိုင်ၶၢဝ်းတၢင်း 15 ပီ တဵမ်တဵမ် ပၼ် လုၵ်ႈၼွင်ႈတပေးတမ်းၸႂ်မၼ်းၼၼ်ႉယဝ်ႉ။

ၵဵဝ်ႇၵပ်းလူၺ်ႈ ၵၢၼ်ၼႂ်းတပ်ႉသိုၵ်းသေ ၵေႃႉပဵၼ်ၸွမ်ၸိုင်ႈၼႆႉ ဢမ်ႇမီးသုၼ်ႇလႆႈၵႂႃႇၵွင်ႉၵဵဝ်ႇၸွမ်း သုၼ်ႇလႆႈၸတ်းၵၢၼ်ၼႆ ၼႂ်းလၵ်းမိူင်း 2008 ဢၼ်သိုၵ်းမၢၼ်ႈ ၶဵၼ်ႇတႅမ်ႈမႃးၼင်ႇၵၢင်ၸႂ်ၶဝ်ၼၼ်ႉ လၢတ်ႈဝႆႉၼင်ႇၼႆ။

ၵူၺ်းၵႃႈ လုၵ်ႉတီႈၸွမ်ၸိုင်ႈသေ ၼင်ႇႁိုဝ်တေၵုမ်းၵၢၼ် ၸွမ်ၸိၵ်းသိုၵ်းလႆႈၵမ်းသိုဝ်ႈၼၼ်ႉ မိၼ်းဢွင်ႇလၢႆႇ လႆႈၸတ်းၽႅၼ်ႁၢင်ႈႁႅၼ်းဝႆႉ လူင်ႈၼႃႈယဝ်ႉၼႆ ၽူႈလူင်ႉလႅၼ်ႇ လႄႈ လဵပ်ႈႁဵၼ်း ၵၢၼ်မိူင်း ၵၢၼ်သိုၵ်း မိူင်းႁူမ်ႈတုမ်ၶဝ်ထတ်းသၢင် ပိူင်းၸႅင်ႈၼႄဝႆႉ။

မိူဝ်ႈလိူၼ်ၾႅပ်ႊပိဝ်ႊရီႇ ဝၼ်းတီႈ 3 ပူၼ်ႉမႃးၼႆႉ ၸႂ်ႉတိုဝ်းတၼ်းႁဵင်း ၽူႈၵိူဝ်းၵုမ်ၶွင်ႇသီႇမိူင်းႁူမ်ႈတုမ် (ပြည်ထောင်စုအတိုင်ပင်ခံကောင်စီ) သေ တၢမ်တူဝ် မိၼ်းဢွင်ႇလၢႆႇ ၵေႃႉ လူင်းလၢႆးမိုဝ်း မၵ်းမၼ်ႈ မူၼ်ႉမႄး ပၵ်းပိူင်ၾိင်ႈမိူင်းၵႂႃႇ – လွင်ႈဝႃႈ ၶွင်ႇသီႇၼႆႉ မီးသုၼ်ႇလႆႈႁဵတ်းသၢင်ႈ ပၼ်တၢင်းႁၼ်ထိုင် လႄႈ ငူပ်ႉငီႉ ၼႂ်းၵၢၼ်ႁူမ်ႇလူမ်ႈ၊ ၵၢၼ်ၵပ်းသိုပ်ႇၵပ်းသၢၼ်ၼွၵ်ႈမိူင်း၊ ၵၢၼ်ငမ်းယဵၼ် လႄႈ ၵၢၼ်မူၼ်ႉမႄးမၵ်းမၼ်ႈ ၾိင်ႈမိူင်း ၼႆယဝ်ႉ။