ၼႂ်းဝၼ်းၶွပ်ႈၶူပ်ႇတဵမ် 81 ပီ တဵမ် တပ်ႉသိုၵ်းမၢၼ်ႈၼႆႉ သိုၵ်းမၢၼ်ႈယိုတ်းမိူင်း ၸတ်းပၢင်ၼႄၵၢၼ်သိုၵ်းၵႂႃႇ ၶိုၵ်ႉယႂ်ႇလူင် တီႈဝဵင်းလူင်ၼႄႇပျီႇတေႃႇ ၽူႈၼမ်းၵၢၼ်သိုၵ်းယၢမ်းလဵဝ် လႄႈ မိူဝ်ႈပူၼ်ႉမႃး ဢိၵ်ႇ ၽူႈယႂ်ႇၵူၼ်းလူင် ၼႂ်းတပ်ႉသိုၵ်း ဢၼ်ၵဝ်ႇ ဢၼ်မႂ်ႇ ၶဝ်ႈႁူမ်ႈၸွမ်း။

ၼႂ်းပၢင်ၵႅဝ်ၼၼ်ႉ မိၼ်းဢွင်ႇလၢႆႇ ၸွမ်ၸိၵ်းသိုၵ်းမၢၼ်ႈ ၽူႈၵွၼ်းၵၢၼ်သိုၵ်းသုင်သုတ်း ၵေႃႉယုၵ်ႉယွင်ႈၸဝ်ႈၵဝ်ႇၶိုၼ်ႈပဵၼ်ၸၼ်ႉၵႅမ်ၸွမ်ၸိုင်ႈႁင်းၵူၺ်းသေ ၸတ်းပၢင်လိူၵ်ႈတင်ႈ ပိုၼ်ၽၢဝ်ႇႁွင်ႉပၢင်ၵုမ်လူင်လုမ်းတႅၼ်းၽွင်းၵူႈၸၼ်ႉသေ ၶိုင်ၶွတ်ႇၽွတ်ႈၸုမ်းလူင်ပွင်ၸိုင်ႈမႂ်ႇ ယူႇၼၼ်ႉ မွၵ်ႇလၢတ်ႈၵႂႃႇဝႃႈ – တပ်ႉသိုၵ်းတေၵမ်ႉထႅမ်ပၼ်ၸုမ်းလူင်ပွင်ၸိုင်ႈမႂ်ႇ ဢၼ်တေၶိုၼ်ႈမႃးၼႆႉၵႂႃႇ တေႃႇပေႃးထိုင်ၸၼ်ႉပၼ်ႇၵၢၼ်ၽွင်းငမ်းၵႂႃႇလႆႈ မၼ်ႈၵႅၼ်ႇၼၼ်ႉ ဝႃႈၼႆ။

မိၼ်းဢွင်ႇလၢႆႇသိုပ်ႇလၢတ်ႈဝႃႈ – ၼႂ်းလၵ်းမိူင်း 2008 ဢၼ်လႆႈသႂ်ႇဝႆႉပႃးၶၵ်ႉတွၼ်ႈ တပ်ႉသိုၵ်းၼႆႉ ယွၼ်ႉလူဝ်ႇလူလွမ်ပႂ်ႉပႃးထိင်းသိမ်း ပၵ်းပိူင်ၾိင်ႈမိူင်းၵႂႃႇ။ ၼႆႉလမ်ႇလွင်ႈတီႈ သုတ်း ဢမ်ႇသႂ်ႇပႃးဝႆႉ ဢမ်ႇလႆႈ။ တပ်ႉသိုၵ်းဢမ်ႇလႆႈဢွၼ်ၼမ်းၵၢၼ်မိူင်း မိူင်းႁူမ်ႈတုမ်ဝႆႉ ၸွမ်းၼင်ႇ ၵူၼ်းၸိူဝ်းမီးပၢႆးဝူၼ်ႉ ယုမ်ႇယမ်ၼိူဝ်လွင်ႈႁုၵ်းႁၢႆႉၼၼ်ႉ။ တပ်ႉသိုၵ်းၼႆႉ ၵူၺ်းၶဝ်ႈႁူမ်ႈႁဵတ်းသၢင်ႈၸွမ်းၵႂႃႇၼႂ်းၶၵ်ႉၵၢၼ်မိူင်း ၸွမ်းၼင်ႇလွင်ႈတၢင်းလူဝ်ႇၵၢၼ်ၸိူဝ်ႉၸၢတ်ႈမီးဝႆႉၼၼ်ႉၵူၺ်း – ဝႃႈၼႆ။

လိူဝ်ၼၼ်ႉ ယင်းမၢပ်ႇၼေးလၢတ်ႈထႅင်ႈဝႃႈ ၸုမ်းၵေႃႇၵၢၼ်ႁၢႆႉၶဝ်ၼႆႉ ဢမ်ႇယွမ်းၸုၼ်ႉပွႆႇဝၢင်းၶိူင်ႈၵွင်ႈၵၢင်ႇသေ ပႆၼိူဝ်သဵၼ်ႈတၢင်းၵၢၼ်မိူင်းၵူၺ်းဢမ်ႇၵႃး ယင်းပၢႆႁဵတ်းၵၢၼ် ၵႃႉၶၢႆယႃႈမဝ်းၵမ်၊ ႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆး ၵျႃႊၽျႅၼ်ႉသေ ႁႃငိုၼ်းၶဝ်ႈတႃႇမုၵ်ႉၸုမ်းႁင်းၽႂ်မၼ်း ပူၼ်ႉပႅၼ်ႁဵတ်းၽိတ်းပၵ်းပိူင်ၾိင်ႈမိူင်းယူႇ ၼႆယဝ်ႉ။

ၵၢၼ်တီႈမိၼ်းဢွင်ႇလၢႆႇ ၸႂ်ႉၸၼ်ႉၸွမ်ၸိၵ်းသိုၵ်းသေ ၶဝ်ႈႁူမ်ႈမွၵ်ႇလၢတ်ႈၶေႃႈၵႂၢမ်း ၼႂ်းဝၼ်းပၢင်ၵႅဝ်ႈ ဝၼ်းၶွပ်ႈၶူပ်ႇတပ်ႉသိုၵ်းမၢၼ်ႈ တဵမ် 81 ပီၼႆႉ တေပဵၼ်ၵမ်းလိုၼ်းသုတ်းသေ ဝၢႆးလင်ၼႆႉယဝ်ႉ ယူင်ႉသၢင်ႈၼႃႈတီႈပုၼ်ႈၽွၼ်း ဢွင်ႈတီႈၽူႈမီးၸၼ်ႉ ၼႂ်းတပ်ႉသိုၵ်းမၢၼ်ႈ ၸၢင်ႈမီးလွင်ႈလႅၵ်ႈလၢႆႈၵႂႃႇၼႆ ၵႅမ်ၽူႈၼမ်းသိုၵ်းမၢၼ်ႈသုင်သုတ်း ၸူဝ်းဝိၼ်း လၢတ်ႈၵႂႃႇပဵၼ်တၢင်းၵၢၼ်ၼင်ႇၼႆ။

မိူဝ်ႈဝႃး (27/3/2026) ၼႆႉၵေႃႈ ယင်းမီးၶၢဝ်ႇႁူင်လိုဝ်းဢွၵ်ႇမႃးဝႃႈ ၸွမ်ႁၢၼ်ၸေႃႇမိၼ်းထုၼ်း ၵေႃႉႁပ်ႉပုၼ်ႈၽွၼ်းပဵၼ် ၽူႈၶၢၼ်ပၢၵ်ႇတပ်ႉသိုၵ်းမၢၼ်ႈဝႆႉၼၼ်ႉ ၺႃးပူတ်းၸၼ်ႉ ဢွၵ်ႇသေ ၼႂ်းဝၼ်းပၢင်ၵႅဝ်ႈၶွပ်ႈၶူပ်ႇတပ်ႉသိုၵ်းမၢၼ်ႈၵေႃႈ ဢမ်ႇလႆႈၵႂႃႇၶဝ်ႈႁူမ်ႈၸွမ်း မိူၼ်ၵူႈပီသေ ႁၢင်ႈႁႅၼ်းတူဝ် တႃႇၶဝ်ႈဢဝ်တီႈယူႇ ၽွင်းလူင် ၼႂ်းၸုမ်းလူင်ပွင်ၸိုင်ႈမႂ်ႇယူႇ ၼႆယဝ်ႉ။