ဝၼ်းတီႈ 7/1/2026 ဝၼ်းပုတ်ႉပူၼ်ႉမႃးၼႆႉ ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉ လၢတ်ႈဝႃႈ – တေထွၼ်တူဝ်ဢွၵ်ႇၼႂ်းၸုမ်းၵူႈမိူင်းမိူင်း တႃႇ 66 ၸုမ်း ၸိူဝ်းဢမ်ႇမီးၽွၼ်းလီ ဢမ်ႇၵိုင်ႇငၢမ်ႇၵၼ်တင်း မိူင်းဢမေႊရိၵၼ်ႊ ဝႃႈၼႆ။

တီႈၼႂ်းလိၵ်ႈ ဢၼ်ၸွမ်ၸိုင်ႈထရမ်ႉ သူင်ႇယိုၼ်ႈထိုင်တီႈ ၽူႈမီးၸၼ်ႉသုင်ၾၢႆႇဢုပ်ႉပိူင်ႇၽွင်းငမ်းၶဝ်ၼၼ်ႉ ပႃးဝႆႉသဵၼ်ႈမၢႆ ၸုမ်းၸိူဝ်းဢမ်ႇၵဵဝ်ႇၶွင်ႈၵၼ်တင်း ၸၢတ်ႈၸိုင်ႈလုမ်ႈ ၾႃႉ 35 ၸုမ်းလႄႈ ၸုမ်းၸိူဝ်းယူႇဝႆႉ ၾၢႆႇတႂ်ႈၸၢတ်ႈၸိုင်ႈလုမ်ႈၾႃႉ တႃႇ 31 ၸုမ်း။

ၼႂ်းၸုမ်းဢၼ်ဢမေႊရိၵၼ်ႊတေထွၼ်တူဝ်ဢွၵ်ႇၼၼ်ႉ ၶဝ်ႈပႃးဝႆႉသဵၼ်ႈမၢႆၸုမ်းၸိူဝ်းလမ်ႇလွင်ႈ မိူၼ်ၼင်ႇ ၾၢႆႇၾိင်ႈၾႃႉရႃႇသီႇ (UNFCCC)၊ ၾၢႆႇယုၵ်ႉမုၼ်းၼမ်ႉၵတ်ႉၼၢင်းယိင်းလႄႈ သုၼ်ႇလႆႈ ယိင်းၸၢႆးၽဵင်ႇပဵင်းၵၼ်၊ ၺီႇလႃႇၶၢမ်ႇၾၢႆႇႁုၼ်ႈမုၼ်းလႄႈ ၵၢၼ်ၵပ်းသိုပ်ႇၵႃႉၶၢႆ (UNCTAD)၊ ၾူဝ်ႊရမ်ႊ ဢဵၼ်ႁႅင်းၵူႈမိူင်းမိူင်း (IEF) လႄႈ ၵေႃႇမသျိၼ်ႇၾၢႆႇၵေႃႇသၢင်ႈလွင်ႈငမ်းယဵၼ် ၶွင်ၸုမ်းၸၢတ်ႈၸိုင်ႈလုမ်ႈၾႃႉ ၸိူဝ်းၼႆႉ။

ႁိူၼ်းႁေႃၶၢဝ် မိူင်းဢမေႊရိၵၼ်ႊ ပိုၼ်ၽၢဝ်ႇဝႃႈ – လွင်ႈ ဢမေႊရိၵၼ်ႊ လႆႈထွၼ်တူဝ်ဢွၵ်ႇၼႆႉ ပိူဝ်ႈတႃႇတေႁုပ်ႈသိမ်းၶိုၼ်းငိုၼ်းၵွင်ႈၵၢင် ၸိူဝ်းဢဝ်ၵႂႃႇၸႂ်ႉတိုဝ်း ဢွင်ႈတီႈဢမ်ႇလမ်ႇလွင်ႈ။ ၼင်ႇႁိုဝ် ပေႃးတေၸၢင်ႈဢဝ် ငိုၼ်းၶွၼ်ႇ ဢၼ်ၵူၼ်းမိူင်းဢမေႊရိၵၼ်ႊသႂ်ႇဝႆႉၼၼ်ႉ ၵႂႃႇၸႂ်ႉတိုဝ်း ၼႂ်းဢွင်ႈတီႈ ဢၼ်တေမီးၽွၼ်းလီ ဝႃႈၼႆ။

ၶေႃႈတႅပ်းတတ်း ၸွမ်ၸိုင်ႈထရမ်ႉ ၼႂ်းဝၼ်းတီႈ 7/1/2026 ၼႆႉ ႁဵတ်းႁႂ်ႈမီးလွင်ႈတုမ်ႉယွၼ်ႈယႂ်ႇလူင် ၼိူဝ်လွင်ႈၵပ်းသိုပ်ႇၵႄႈၵၢင် ဢမေႊရိၵၼ်ႊ လႄႈတင်း ၵူႈမိူင်းမိူင်း။

ၵဵဝ်ႇလူၺ်ႈလွင်ႈဢမေႊရိၵၼ်ႊတေထွၼ်တူဝ်ဢွၵ်ႇ ၼႂ်းလၢႆလၢႆၸုမ်းၼႆႉသေ ၾၢႆႇၸၢတ်ႈၸိုင်ႈလုမ်ႈၾႃတႄႉ ပႆႇပိုၼ်ၽၢဝ်ႇတုမ်ႉတွပ်ႇဝႆႉသင် – ၶၢဝ်ႇ Reuters ႁၢႆးငၢၼ်းဝႆႉၼင်ႇၼႆ။