မိူဝ်ႈၼႆႉ 9/1/2026 ယၢမ်းၵၢင်ၼႂ် 10 မူင်းၶိုင်ႈ သိုၵ်းမၢၼ်ႈဢဝ်ႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ႁိမ်းဝၢၼ်ႈ သႅၼ်တေႃ ဢၼ်မီးၼိူဝ်သဵၼ်ႈတၢင်းၸႄႈဝဵင်းမိူင်းယႆၵႂႃႇတၢင်း ဝဵင်းသီႇပေႃႉ ပဵၼ်ဢွင်ႈတီႈသိုၵ်းၵဝ်ႈၵၢင်ႉ (MNDAA) တူင်ႉၼိုင်ယူႇသဝ်းဝႆႉ ။
သိုၵ်းမၢၼ်ႈဢဝ်ႁိူဝ်းမိၼ်တိုၵ်း Jet Fighter မိူဝ်းပၼ်ႇလဵပ်ႈၸွမ်းဝၢၼ်ႈ ႁိမ်းႁွမ်းထုင်ႉသႅၼ်တေႃသေ ၶိုၼ်းသူင်ႇႁိူဝ်းမိၼ်သႅၼ်း Y-12 ၵႂႃႇပွႆႇမၢၵ်ႇ တူၵ်းသႂ်ႇ ၼႂ်းထိူၼ်ႇ ႁိမ်းဝၢၼ်ႈ ၼမ်ႉၸၢမ် လႄႈ ဝၢၼ်ႈၼမ်ႉၵူမ်ႇ ဢမ်ႇယွမ်း 5 လုၵ်ႈ။ ဢွင်ႈတီႈမၢၵ်ႇတူၵ်းသႂ်ႇၼၼ်ႉ ႁၢင်ႇၵႆၵၼ်တင်း ဝၢၼ်ႈသႅင်ၵႅဝ်ႉ မွၵ်ႈ 10 လၵ်းၼႆ ၵူၼ်းမိူင်းပိုၼ်ႉတီႈလၢတ်ႈၼင်ႇၼႆ။
ၼုမ်ႇၸၢႆး ဢႃႇယု 30 ပီ ၵေႃႉယူႇဝႆႉၼႂ်းထုင်ႉဝၢၼ်ႈသႅၼ်တေႃသေ ႁူႉႁၼ်ၸွမ်းပိူင်ပဵၼ်ၼႆႉ လၢတ်ႈၼႄတီႈ ၽူႈတွႆႇႁွၵ်ႈဝႃႈ “ႁိူဝ်းမိၼ်မႃး သွင်လမ်း။ သဵင်မၼ်းလင်ႁႅင်းၼႃႇ။ ႁိမ်း ႁွမ်းမၢၵ်ႇၵႂႃႇတူၵ်းသႂ်ႇၼၼ်ႉ မီးၶႄႇ(ၵဝ်ႈၵၢင်ႉ)ၶဝ် ယူႇဝႆႉၼမ် တၢၼ်ႇတၢၼ်ႇယူႇ။ ငိၼ်းၶၢဝ်ႇဝွင်းဝႅင်းဝႃႈတႄႉ ပဵၼ်ၸုမ်းၵျႃႊၽျႅၼ်ႉၼႆဢေႃႈ” ဝႃႈၼႆ။
ဝၢႆးလင်ႁိူဝ်းမိၼ်သိုၵ်းမၢၼ်ႈယိုတ်းမိူင်း ပွႆႇမၢၵ်ႇယဝ်ႉဢမ်ႇႁိုင် မီးၵူၼ်းမၢတ်ႇၸဵပ်းၸၢၵ်ႇမၢၵ်ႇ ႁွတ်ႈၵႂႃႇထိုင်တီႈ ႁူင်းယႃလူင် ၼႂ်းဝဵင်းမိူင်းယႆ ၼႆ ၵူၼ်းမိူင်းပိုၼ်ႉတီႈၵေႃႉယူႇဝႆႉၼႂ်း မိူင်းယႆ လၢတ်ႈၼႄၼင်ႇၼႆ။
“ႁၼ်ၵူၼ်းပဵၼ်ၶဝ်ႈမႃးၼႂ်းႁူင်းယႃမိူင်းယႆၼႆႉ ပဵၼ်ၶႄႇလၢႆလၢႆ။ ပဵၼ်လိူတ်ႈပဵၼ်ယၢင်ႁႄ မိူၼ်ၺႃးၸၢၵ်ႇမၢၵ်ႇ မႃးဝႆႉ။ တူၺ်းၾၢင်ႁၢင်ႈၶဝ်တႄႉ ဢမ်ႇၸႂ်ႈၵူၼ်းဝၢၼ်ႈၼႂ်းပိုၼ်ႉတီႈ ၸွမ်းႁိမ်းႁွမ်းၼႆႉ။”
ၵွၼ်ႇၼႃႈလႄႈ ဝၢႆးလင် မၢၵ်ႇတေတႅၵ်ႇၼၼ်ႉ ႁိူဝ်းမိၼ်သိုၵ်းမၢၼ်ႈ ပၼ်ႇလဵပ်ႈတၢင်းဝၢၼ်ႈပုင်ႇလႅၼ်း လႄႈ ဝၢၼ်ႈပၢင်ႇလဝ်ႇ ထိုင်မွၵ်ႈ 11 မူင်းၶိုင်ႈ တေႃႇ 12 မူင်း။ လိူဝ်ၼၼ်ႉ ၸွမ်းဝၢၼ်ႈၼမ်ႉတႆႈၾႆး ၸိူဝ်းမီးႁူင်းၵၢၼ် ၵျႃႊၽျႅၼ်ႉဝႆႉၼၼ်ႉၵေႃႈ သိုၵ်းမၢၼ်ႈယိုတ်းမိူင်းဢဝ်ႁိူဝ်းမိၼ်မိူဝ်းပၼ်ႇလဵပ်ႈပႃး ဝႃႈၼႆ။
တႄႇၵၢင်ပီ 2025 လိူၼ်ဢေႃးၵၢတ်ႉသ်မႃး ၸုမ်းၵျႃႊၽျႅၼ်ႉ ၵႂႃႇတင်ႈႁူင်းႁဵတ်းၵၢၼ်ဝႆႉ ၸွမ်းထုင်ႉၼႂ်းၼႃႈတီႈ သိုၵ်းၵဝ်ႈၵၢင်ႉၵုမ်းၵမ် တီႈလႅၼ်လိၼ် ဝဵင်းသီႇပေႃႉ- မိူင်းယႆ ၸဵမ်ၸိူဝ်းၼႆႉ လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ