ပၢင်လိူၵ်ႈတင်ႈ ဢၼ်သိုၵ်းမၢၼ်ႈဢွၼ်ၼမ်းၸတ်းႁဵတ်း ပွၵ်ႈၵမ်းသၢမ်ၼႆႉပႃးဝဵင်းၾၢႆၶုၼ် ၸိုင်ႈတႆးပွတ်းၸၢၼ်း၊ ပၢင်တိုၵ်းၵေႃႈတိုၵ်ႉပဵၼ်ယူႇပႆႇထၢတ်ႇ  တေမီးပႃႇတီႇသၢင်ႇသီႈ ဢၼ်လဵဝ် ဢမ်ႇမီးၽႂ်ၶႅင်ႇ  ။

ပၢင်လိူၵ်ႈတင်ႈ ပွၵ်ႈၵမ်း 3 ၼႆႉ  မိူင်းႁူမ်ႈတုမ်ပတ်းပိုၼ်ႉ တေၸတ်းႁဵတ်း 63 ၸႄႈဝဵင်း ၼႂ်းမိူင်းတႆး ပႃး 9 ၸႄႈဝဵင်း ပဵၼ် ၸႄႈဝဵင်းမၢၵ်ႇမၢင်၊ ၸႄႈဝဵင်းပၢင်လွင်း၊ ၸႄႈဝဵင်းယွင် ႁူၺ်ႈ၊ ၸႄႈဝဵင်းၾၢႆၶုၼ်၊ ၸႄႈဝဵင်းမိူင်းၼၢႆး၊ ၸႄႈဝဵင်းၵေးသီး၊ ၸႄႈဝဵင်းမိူင်းသူႈ၊ ၸႄႈဝဵင်းသီႇပေႃႉ လႄႈ ၸႄႈဝဵင်းၵျွၵ်ႉမႄး ။

ၸုမ်းၵူၼ်းၼုမ်ႇဝဵင်းၾၢႆၶုၼ်လၢတ်ႈၽူႈတွႆႇႁွၵ်ႈဝႃႈ -“တီႈၾၢႆၶုၼ်ၼႆႉ မီးပႃႇတီႇသၢင်ႇသီႈ ဢၼ်လဵဝ် ဢမ်ႇမီးၽႂ်ၶႅင်ႇၸွမ်းၶဝ်ၶႃႈ ။ ယွၼ်ႉၼၼ်လွင်ႈသူၼ်းတုမ်ၵေႃႈ ဢမ်ႇမီး၊     ၶဝ်ၵေႃႈဢမ်ႇသူၼ်ၸႂ်ၵူၼ်းမိူင်း ၵူၼ်းမိူင်းၵေႃႈဢမ်ႇသူၼ်ၸႂ်ၶဝ် မီးပႃႇတီႇလဵဝ် တွတ်ႈဢမ်ႇတွတ်ႈၵေႃႈ တေမီးတီႈပွင်ႇသင်”- ဝႃႈၼႆ ။

ယူႇတီႈ ပႃႇတီႇသၢင်ႇသီႈသေ တေၶဝ်ႈလိူၵ်ႈတင်ႈ တီႈဝဵင်းၾၢႆၶုၼ်ၼႆႉမီး 3 ၵေႃႉ ။  ၼေႃႇတႅၼ်းၽွင်းသၽႃးၵူၼ်းမိူင်း ပဵၼ် တေႃႇယီႇယီႇလၢႆႇ  ၊ ၼေႃႇတႅၼ်းၽွင်းသၽႃးၸႄႈမိူင်း (FPTP) ပဵၼ်ၸၢႆးၵျေႃႇယိၼ်ႇ ၊ ၼေႃႇၽူႈတႅၼ်းၸၢဝ်းၶိူဝ်းဢယၢၼ်းပဵၼ် တေႃႇဢေးၶဵဝ်ႇၸိင်ႇ   ။

 ဝဵင်းၾၢႆၶုၼ်ၼႆႉ သိုၵ်းမၢၼ်ႈၶိုၼ်းယိုတ်းလႆႈဝႆႉယဝ်ႉဝႃႈၼႆသေတႃႉ ငဝ်းလၢႆးပၢင်တိုၵ်းသိုၵ်းသိူဝ်ပႆႇယဵၼ် ၵူၼ်းမိူင်းပႆႇမီးလွင်ႈႁူမ်ႇလူမ်ႈ  ၸိူဝ်းပၢႆႈၽေးသိုၵ်းပႆႇလႆႈပွၵ်ႈယူႇႁိူၼ်းၶိုၼ်းမူတ်း။

 ပၢင်လိူၵ်ႈတင်ႈၵမ်းၼႆႉ ၵူၼ်းမိူင်း ၾၢႆႇပွၵ်းဢွၵ်ႇၼွင်မိူင်းပၢႆးလႄႈ ၸွမ်းဝၢၼ်ႈဢိူင်ႇ ဢၼ်မီး တၢင်းၼွၵ်ႈဝဵင်းတႄႉ ဢမ်ႇမီးသုၼ်ႇတွတ်ႈၶႅပ်းၵၢင် ၊ ၵူၼ်းဢၼ်မီးသုၼ်ႇၵႂႃႇတွတ်ႈ ၶႅပ်းၵၢင်ၸႂ် ၼႆႉ ပဵၼ်ၼႂ်းပွၵ်ႉၼႂ်းဝဵင်းလႄႈ ႁိမ်းႁွမ်းတပ်ႉသိုၵ်းမၢၼ်ႈၸိူဝ်းၼၼ်ႉၵူၺ်း – ၵူၼ်းပိုၼ်ႉတီႈ လၢတ်ႈၼင်ႇၼႆ ။

ၸုမ်းၵူၼ်းၼုမ်ႇဝဵင်းၾၢႆၶုၼ်လၢတ်ႈၽူႈတွႆႇႁွၵ်ႈဝႃႈ- “ ၵူၼ်းၼႂ်းတပ်ႉၸိူဝ်းၼၼ်ႉ လႆႈသႂ်ႇ ၶႅပ်းၵၢင်ၸႂ် လူင်ႈၼႃႈယဝ်ႉ၊ ၼေႃႇၽူႈတႅၼ်းၽွင်းသၽႃးမိူင်းတႆး လုင်းၵျေႃႇယိၼ်ႇၼႆႉ ယၢမ်ႈပဵၼ်ၽူႈတူင်ႉၼိုင်ၼႂ်းၵေႃလိၵ်ႈလၢႆးတႆးမႃးတင်းႁိုင် မၼ်းၸၢႆးဝူၼ်ႉၸိူင်ႉႁိုဝ် မီးလွင်ႈၸိူင်ႉႁိုဝ်ၵေႃႈဢမ်ႇႁူႉၵႂႃႇၶဝ်ႈၼႂ်းပႃႇတီႇသၢင်ႇသီႈသေယဝ်ႉယိုင်”- ဝႃႈၼႆ ။

တီႈဝဵင်းၾၢႆၶုၼ်ၼႆႉ ႁူင်းတွတ်ႈၶႅပ်းၵၢင်ၸႂ်မီး 6 တီႈ ။ ယွၼ်ႉမီးပႃႇတီႇသၢင်ႇသီႈ ဢၼ်လဵဝ်ၵူၺ်းလႄႈ ဢမ်ႇမီးလွင်ႈ သူၼ်းတုမ်သင်။ တေႃႇထိုင်ဝၼ်းမိူဝ်ႈၼႆႉ ၼွၵ်ႈဝဵင်းၼႂ်းဝဵင်းၵေႃႈ ယူႇယူႇ ၵႆႉလႆႈယိၼ်းသဵင်ၵွင်ႈသဵင်မၢၵ်ႇလႄႈ ႁဵတ်းႁႂ်ႈ ၵူၼ်းမိူင်းမႆႈၸႂ်လွင်ႈႁူမ်ႇလူမ်ႈဝႆႉ ဝႃႈၼႆ ။

ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၵူၼ်းမိူင်းၵူႈၵေႃႉ ဢမ်ႇမီးသုၼ်ႇလႆႈသႂ်ႇၶႅပ်းၵၢင်ၸႂ် ၊ ၵူၼ်းပၢႆႈၽေးသိုၵ်းပွၵ်ႈမႃးၼႆႉ တိုၵ်ႉမီးမွၵ်ႈ 25 ပႃႊသႅၼ်ႊၵူၺ်းၶႃႈ ၊ ၵူၼ်းၼုမ်ႇၵေႃႈ ၵမ်ႈၼမ်ပၢႆႈဢွၵ်ႇၼွၵ်ႈမိူင်းမူတ်းယဝ်ႉ ၊  ႁၼ်ထိုင်ဝႃႈ မၼ်းဢမ်ႇၸႂ်ႈပၢင်လိူၵ်ႈတၢင်ႈ ဢၼ်လွတ်ႈလႅဝ်းၽဵင်ႇပဵင်း”- ဝႃႈၼႆ ။

မိူၼ်ၼင်ႇၼႆ မိူဝ်ႈဝႃးဝၼ်းတီႈ 8/1/2026 ယၢမ်းၵၢင်ၼႂ် သိုၵ်းမၢၼ်ႈဢဝ်မၢၵ်ႇလူင်ပွႆႇ 2 လုၵ်ႈ တီႈၾၢႆႇတူၵ်းဝဵင်းၾၢႆၶုၼ် ႁဵတ်းႁႂ်ႈႁိူၼ်းယေးလူႉၵွႆလႄႈ ၼၢင်းယိင်းၼိုင်ႈၵေႃႉ မၢတ်ႇၸဵပ်း ဝႃႈၼႆ။

သိုၵ်းမၢၼ်ႈၼႆႉ ၸတ်းႁဵတ်းပၢင်လိူၵ်ႈတင်ႈၸုမ်ႇၵူႈ ၼႂ်းမိူင်းႁူမ်ႈတုမ်ပတ်းပိုၼ်ႉၵႂႃႇ သၢမ်ၸုပ်ႈ။ ၸုပ်ႈၼိုင်ႈ ၸတ်းႁဵတ်း ဝၼ်းတီႈ 28 လိူၼ်တီႊသႅမ်ႊပိူဝ်ႊ ပီ 2025၊ ၸုပ်ႈသွင် ပဵၼ်ဝၼ်းတီႈ 11 လိူၼ်ၵျႅၼ်ႊၼိဝ်ႊရီႊ ပီ 2026 ၊ ၸုပ်ႈသၢမ်ပဵၼ်ဝၼ်းတီႈ 25 လိူၼ်ၵျႅၼ်ႊၼိဝ်ႊရီႊ ပီ 2026 ။