သိုၵ်းမၢၼ်ႈယိုတ်းမိူင်း ႁူမ်ႈတင်း ပျီႇတူႉၸိတ်ႉပဢူဝ်း PNO သေ ထႅမ်ႁႅင်းထူဝ်းသိုၵ်းၶဝ်ႈ တီႈမီးငဝ်ႈငုၼ်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLA ၼႂ်းဢိူင်ႇၵိူၼ်ႇတူလူင် ၸႄႈဝဵင်းမွၵ်ႇမႆႇ ၸိုင်ႈတႆးပွတ်းၸၢၼ်း၊ သွင်ၾၢႆႇလႆႈပဵၼ်ပၢင်တိုၵ်းၵၼ် လၢႆဝၼ်းယဝ်ႉ ဝႃႈၼႆ။

တႄႇဝၼ်းတီႈ 1 လိူၼ်ထူၼ်ႈၼိုင်ႈ သိုၵ်းမၢၼ်ႈ တင်း ပျီႇတူႉၸိတ်ႉပဢူဝ်း PNO လုၵ်ႉတီႈဢိူင်ႇႁူဝ်ၼမ်ႉသေ ထူဝ်းသိုၵ်းၶဝ်ႈၼႂ်းထိူၼ်ႇ မုင်ႈၼႃႈၸူး ငဝ်ႈငုၼ်း တပ်ႉသိုၵ်း PNLA တၢင်းဢိူင်ႇ ၵိူၼ်ႇတူလူင်။

သွင်ၾၢႆႇယိုဝ်းတိုၵ်းၵၼ်ႁၢဝ်ႈႁႅင်း။ ၼႂ်းဝၼ်းၼၼ်ႉ ၾၢႆႇသိုၵ်းမၢၼ်ႈ တင်း PNO တၢႆ 7 ၵေႃႉ၊ မၢတ်ႇၸဵပ်း 10 ပၢႆ။ သိုၵ်းမၢၼ်ႈၶဝ် တီႉၺွပ်းၵူၼ်းဝၢၼ်ႈသေ ၸႂ်ႉၼႄတၢင်း ထူဝ်းသိုၵ်းၶဝ်ႈမႃးၼႂ်းထိူၼ်ႇၼႂ်းၶိူဝ်းၼႆ ၶုၼ်ႇရဵၼ်းယႅၼ်ႇ ၽူႈၶၢၼ်ပၢၵ်ႇ တပ်ႉသိုၵ်း PNLA လၢတ်ႈၼင်ႇၼႆ။

လိူဝ်ၼၼ်ႉ သိုၵ်းမၢၼ်ႈ ဢၼ်ပၵ်းတပ်ႉဝႆႉတီႈၾၢႆႇတူၵ်းၼမ်ႉပွၼ် လၢမ်းယိုဝ်းၶိူင်ႈၵွင်ႈလူင်မႃး ၼႂ်းဢိူင်ႇ ၵိူၼ်ႇတူလူင် လၢႆလၢႆၵမ်း၊ မႅၵ်ႇသိုၵ်းမၢၼ်ႈ တူၵ်းတႅၵ်ႇၼႂ်းထိူၼ်ႇၼႂ်းသူၼ် လွင်ႈၵူၼ်းမိူင်း မၢတ်ႇၸဵပ်း လူႉတၢႆ တႄႉဢမ်ႇမီး ဝႃႈၼႆ။

ၼႂ်းဢိူင်ႇ ၵိူၼ်ႇတူလူင်ၼၼ်ႉ ၶွင်ႇသီႇဢဝ်ၶိုၼ်းၸိုင်ႈတႆး RCSS လႄႈ သိုၵ်းပဢူဝ်း PNLA ၶဝ်ယူႇသဝ်းတူင်ႉၼိုင်ဝႆႉ။

မီးၶၢဝ်ႇလိုဝ်းဢွၵ်ႇဝႆႉဝႃႈ တပ်ႉသိုၵ်းမၢၼ်ႈၼႆႉ လုၵ်ႉတၢင်း ၵိူၼ်ႇတူလူင် ၸႄႈဝဵင်းမွၵ်ႇမႆႇ ဢၢၼ်းတေထူဝ်းသိုၵ်းၶဝ်ႈထိုင် ဝဵင်းသျႃးတေႃး မိူင်းယၢင်းလႅင်၊ ၶၢမ်ႈၼမ်ႉၶူင်းသေ ႁႂ်ႈၵုမ်းလႆႈထိုင်တီႈလႅၼ်လိၼ် ယၢင်းလႅင် – မိူင်းထႆး ဝႃႈၼႆ။