ၸွမ်းၼင်ႇပၵ်းပိူင်မၢႆမီႈဢၼ်သိုၵ်းမၢၼ်ႈႁဵတ်းဢွၵ်ႇဝႆႉၼၼ်ႉသေ ၵူၼ်းမိူင်းၸိူဝ်းၺႃးတီႉယွၼ်ႉၶေႃႈမၢပ်ႇၼႄး သၢၼ်ၶတ်းယႃႉၵဝ်းပၢင်လိူၵ်ႈတင်ႈ ဢၼ်သိုၵ်းမၢၼ်ႈ ဢွၼ်ၼမ်းၸတ်း ႁဵတ်းၼၼ်ႉ တင်းမူတ်းမီးၵႂႃႇ 335 ၵေႃႉယဝ်ႉၼႆ ၵေႃႇမတီႇငဝ်ႈငုၼ်း ၾၢႆႇၵုမ်းၵမ်လွင်ႈႁူမ်ႇလူမ်ႈ ၼႂ်းၶၢဝ်းယၢမ်းၸတ်းႁဵတ်းပၢင်လိူၵ်ႈတင်ႈၼၼ်ႉ ၵဵပ်းၶေႃႈမုလ်းပိုၼ်ၽၢဝ်ႇဝႆႉၼင်ႇၼႆ။
တေႃႇထိုင်ဝၼ်းတီႈ 5/1/2026 ၼႆႉ ၼႂ်းတိူင်းလႄႈ ၸႄႈမိူင်းၵူႈတီႈတီႈ ၵူၼ်းၸိူဝ်းၺႃးဢဝ်လိူင်ႈဝႆႉ မီး 335 ၵေႃႉ ၼႂ်းၼၼ်ႉပဵၼ် ၸၢႆး 275 ၵေႃႉလႄႈ ယိင်း 60 ၵေႃႉ ၼႆ သိုၵ်းမၢၼ်ႈပိုၼ်ၽၢဝ်ႇၼႂ်းပၢင်ၵုမ် ၵမ်းထူၼ်ႈ 6 တီႈၼေႇပျီႇတေႃႇ ဢၼ်ၸတ်းႁဵတ်းၵႂႃႇၼႂ်းဝၼ်းတီႈ 6/1/2026 တႃႇႁူမ်ႇလူမ်ႈပၢင်လိူၵ်ႈတင်ႈ ၼၼ်ႉၵႂႃႇၼင်ႇၼႆ။
သိုၵ်းမၢၼ်ႈၼႆႉ ၸတ်းႁဵတ်းပၢင်လိူၵ်ႈတင်ႈ ပွၵ်ႈၵမ်းၼိုင်ႈ ယဝ်ႉတူဝ်ႈၵႂႃႇၼႂ်းဝၼ်းတီႈ 28/12/2025 ၸတ်းႁဵတ်းတႃႇ 102 ဝဵင်း။ မီးၵူၼ်းမႃးပၼ်သဵင်ၵၢင်ၸႂ် 52.13% ဝႃႈၼႆ။
ပၢင်လိူၵ်ႈတင်ႈပွၵ်ႈၵမ်းသွင်သမ်ႉ တေၸတ်းႁဵတ်းၵႂႃႇၼႂ်းဝၼ်းတီႈ 11/1/2026 လႄႈ ပွၵ်ႈၵမ်းသၢမ်သမ်ႉ တေၸတ်းႁဵတ်း ၼႂ်းဝၼ်းတီႈ 25/1/2026 ၼႆလႄႈ တႃႇပၢင်လိူၵ်ႈတင်ႈၶဝ်တေမီးလွင်ႈႁူမ်ႇလူမ်ႈၼၼ်ႉ ထုၵ်ႇလီ ႁဵတ်းႁိုဝ်ၼႆသေ ဢဝ်မႃးဢုပ်ႇၵုမ်ၵၼ်တီႈပၢင်ၵုမ် ဝၼ်းတီႈ 6/1/2026 ။
သိုၵ်းမၢၼ်ႈတႄႇပိုၼ်ၽၢဝ်ႇ ၸႂ်ႉတိုဝ်းပၵ်းပိူင်မၢႆမီႈ ၾၢႆႇၵႅတ်ႇၶႄႁေႉၵင်ႈ ပၢင်လိူၵ်ႈတင်ႈၼႆႉမႃး မိူဝ်ႈဝၼ်းတီႈ 29/7/2025။ သင်ဝႃႈသၢၼ်ၶတ်းယႃႉၵဝ်းပၢင်လိူၵ်ႈတင်ႈၸိုင် တေၺႃးတၢမ်ႇၼၵ်းၼႃ ၼင်ႇတၢမ်ႇၶွၵ်ႈ လႄႈ တၢမ်ႇတၢႆ တႅမ်ႈဝႆႉၼင်ႇၼႆသေ ဢႅဝ်ႇႁႃတီႉၺွပ်းၵူၼ်းၸိူဝ်း လၢတ်ႈၸႃ- ပၼ်တၢင်းႁၼ်ထိုင်ၼိူဝ်ပၢင်လိူၵ်ႈတင်ႈ။ ၵမ်ႈၽွင်ႈၵႂႃႇတဵၵ်း Like , Share – Post ပိူၼ်ႈတၢင်ႇမႃးလွင်ႈပၢင်လိူၵ်ႈတင်ႈၸိူဝ်းၼၼ်ႉၵေႃႈဢမ်ႇဝႆႉ ။ ပၼ်တူတ်ႈတၢမ်ႇၶွၵ်ႈ 3 ပီထိုင် တေႃႇၸူဝ်ႈၸိူဝ်းၼႆႉ။
ၵမ်ႈၽွင်ႈၵႂႃႇတဵၵ်း React ဢၼ်ပဵၼ်ၼႃႈၶႆႈၶူဝ် Ha Ha ၼၼ်ႉၵူၺ်းၵေႃႈတီႉၺွပ်း။ ၵူၼ်းမိူင်းဢမ်ႇမီးလွင်ႈလွတ်ႈလႅဝ်းၼႂ်းၵၢၼ်ၸႂ်ႉတိုဝ်းသိုဝ်ႇတူင်ႇဝူင်းသေဢိတ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ