ၸွမ်ၸိုင်ႈ မိူင်းဢမေႊရိၵၼ်ႊ တေႃႊၼႄႊလ်ထရမ်ႉ ယိုၼ်ယၼ်လၢတ်ႈဝႃႈ တေႁပ်ႉသိုဝ်ႉ ၼမ်ႉမၼ်းမဵၼ်  မိူင်း ဝႅၼ်ႊၼီႊသွႆႊလႃႊ တႃႇ 30 လၢၼ်ႉထိုင် 50 လၢၼ်ႉပုင်း   ၸွမ်းၼင်ႇၵႃႈၶၼ်လုမ်ႈၾႃႉမၵ်းမၼ်ႈဝႆႉ ဝႃႈၼႆ။

 ဝၼ်းတီႈ 3/1/2026 ၼၼ်ႉသိုၵ်းဢမေႊရိၵၼ်ႊ ၶဝ်ႈထိုင်ၼႂ်းမိူင်း ဝႅၼ်ႊၼီႊသွႆႊလႃႊသေ တီႉၺွပ်းတူဝ် ၸွမ်ၸိုင်ႈ မႃႊတူႊရူဝ်ႊၵူဝ်ႊ။ ဝၢႆးလင်ၼၼ်ႉ မိူင်းဝႅၼ်ႊၼီႊသွႆႊလႃႊ ၶွတ်ႇၽွတ်ႈၶိုၼ်း လူင်ပွင်ၸိုင်ႈၸူဝ်ႈၶၢဝ်းသေ ဢုပ်ႇဢူဝ်းၵၼ်တင်း ၸွမ်ၸိုင်ႈထရမ်ႉ။ လႆႈၶေႃႈတူၵ်းလူင်းၵၼ် တႃႇတေဢဝ်ၼမ်ႉမၼ်းမဵၼ် တီႈမိူင်းဝႅၼ်ႊၼီႊသွႆႊလႃႊ တႃႇ 30 လၢၼ်ႉထိုင် 50 လၢၼ်ႉ   ၶဝ်ႈမိူင်းဢမေႊရိၵၼ်ႊ ဝႃႈၼႆ။

ၵွၼ်ႇပႆႇလႆႈၶေႃႈတူၵ်းလူင်းၼႆႉ ၸွမ်ၸိုင်ႈထရမ်ႉ လၢတ်ႈဝႆႉဝႃႈ – ၼႂ်းၵၢၼ်ၸတ်း ၼမ်ႉမၼ်းမဵၼ် ၼႂ်းမိူင်း ဝႅၼ်ႊၼီႊသွႆႊလႃႊၼၼ်ႉ ၸွင်ႇတေပၼ် ၶွမ်ႊပၼီႊ မိူင်းဢမေႊရိၵၼ်ႊ ၸတ်းၵၢၼ်ၸွမ်း၊ ထႅင်ႈၶေႃႈၼိုင်ႈသမ်ႉ တေႁပ်ႉတေႃႇသူႈၵၢၼ်သိုၵ်း ဢၼ်မိူင်းဢမေႊရိၵၼ်ႊ တေႁႅၼ်းသိုၵ်းထႅင်ႈႁိုဝ် ဝႃႈၼႆ။

ယၢမ်းလဵဝ် တီႈမိူင်း ဝႅၼ်ႊၼီႊသွႆႊလႃႊ  –  တႄႊလ်သီႊ ရူဝ်ႊတရီႊၵုတ်ႊ ႁပ်ႉၼႃႈတီႈ ၸွမ်ၸိုင်ႈၸူဝ်ႈၶၢဝ်းသေ ပၼ်ႇၵၢၼ် ၸုမ်းလူင်ပွင်ၸိုင်ႈၸူဝ်ႈၶၢဝ်းဝႆႉ။

တႄႇၵၢင်လိူၼ် တီႊသႅမ်ႊပိူဝ်ႊ ပူၼ်ႉမႃးၼၼ်ႉ ဢမေႊရိၵၼ်ႊ ႁႅတ်ႉႁၢမ်ႈပိၵ်ႉဢိုတ်း ၵၢၼ်ၸတ်းသူင်ႇၼမ်ႉမၼ်းမဵၼ် မိူင်းဝႅၼ်ႊၼီႊသွႆႊလႃႊ။ ယွၼ်ႉၼၼ် ၼမ်ႉမၼ်းမဵၼ်ၸိူဝ်းၼၼ်ႉ ဢမ်ႇၸၢင်ႈတေႃႉသူင်ႇၵႃႉၶၢႆထိုင် မိူင်းၶႄႇ ဢၼ်ပဵၼ်မိူင်းႁပ်ႉသိုဝ်းၼမ်ႉမၼ်းမဵၼ်ၼမ်သုတ်းသေ ၵိုတ်းၶမ်ဝႆႉ မီးၼပ်ႉႁူဝ်လၢၼ်ႉ။

ယၢမ်းလဵဝ် ၼမ်ႉမၼ်းမဵၼ်ၸိူဝ်းၼၼ်ႉ ဢမေႊရိၵၼ်ႊ တေႁပ်ႉသိုဝ်ႉ ၸွမ်းၼင်ႇၵႃႈၶၼ်မၵ်းမၼ်ႈဝႆႉ ။ ငိုၼ်းတွင်း ဢၼ်တေလႆႈမႃးၸိူဝ်းၼၼ်ႉတႄႉ ၸွမ်ၸိုင်ႈထရမ်ႉ ၵေႃႉတေၸတ်းၵၢၼ်ၵႂႃႇ ၼင်ႇႁိုဝ်တေမီးၽွၼ်းလီတေႃႇ မိူင်းဢမေႊရိၵၼ်ႊ တင်း မိူင်းဝႅၼ်ႊၼီႊသွႆႊလႃႊ ဝႃႈၼႆ။

ဢိင်ၼိူဝ်လွင်ႈ ၸွမ်ၸိုင်ႈထရမ်ႉ ယိုၼ်ယၼ်လၢတ်ႈဝႆႉၼၼ်ႉသေ ၾၢႆႇၸုမ်းလူင်ပွင်ၸိုင်ႈၸူဝ်ႈၶၢဝ်း မိူင်းဝႅၼ်ႊၼီႊသွႆႊလႃႊတႄႉ ပႆႇပိုၼ်ၽၢဝ်ႇတုမ်ႉတွပ်ႇ ႁၼ်လီႁၼ်ၸႃႉၸွမ်းသင်ၶိုၼ်း။

Ref; CNA