ဝၢႆးသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်း လင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃးၼႆႉ ႁူင်းပျေႃႇမူၼ်ႈၼမ်၊ ယႃႈမဝ်းၵမ်လိူင်ႇၶိုၼ်ႈမႃးၵူႈမိုဝ်ႉၵူႈဝၼ်းလႄႈ ၵူၼ်းၼုမ်ႇ ၸိူဝ်းမီးယူႇၼႂ်းၸႄႈဝဵင်းတၢင်ႉယၢၼ်း ၾိင်ႈယၢမ်ႈလူႉႁႅင်း ၼႆယဝ်ႉ။

ၼႂ်းဝဵင်းတၢင်ႉယၢၼ်းၼႆႉ ႁူင်းပျေႃႇမူၼ်ႈ KTV မီးၼပ်ႉထိုင် 100 တီႈပၢႆယဝ်ႉလႄႈ ယႃႈမဝ်းၵမ်၊ ၵၢၼ်လွၵ်ႇငိုတ်ႈ လႅၼ်ၵိၼ်ငိုၼ်းၵၼ်၊ ၽူႈလၵ်ႉၵူၼ်းၸူၼ်၊ ၵူၼ်းပႅၵ်ႇၼႃႈတၢင်ႇဝၢၼ်ႈတၢင်ႇဝဵင်း ၶဝ်ႈယူႇဝႆႉၼႂ်းဝဵင်းတၢင်ႉယၢၼ်းၼမ်ႁႅင်းတေႉတေႉၼႆ ၵူၼ်းမိူင်းပိုၼ်ႉတီၵေႃႉၼိုင်ႈလၢတ်ႈၼႄၼင်ႇၼႆ။

ၸၢႆးၼုမ်ႇ ဢႃႇယု 30 ပၢႆ ၵေႃႉယူႇဝႆႉၼႂ်းဝဵင်းတၢင်ႉယၢၼ်းလၢတ်ႈၼႄတီႈၽူႈတွႆႇႁွၵ်ႈဝႃႈ “ ၶႂ်ႈႁႂ်ႈၽူႈယႂ်ႇၵူၼ်းလူင်၊ ၽူႈမီးပုၼ်ႈၽွၼ်း ၼႂ်းပွၵ်ႉ၊ ၼႂ်းဢိူင်ႇ၊ ၼႂ်းဝဵင်းႁဝ်းၶဝ် ႁေႉႁၢမ်ႈပၼ် လွင်ႈပိုတ်ႇလၢၼ်ႉ KTV၊ လၢၼ်ႉမိပ်ႇၼူတ်ႈ၊ လၢၼ်ႉမႄႈမွၵ်ႇယႃႈၶၢႆတူဝ်၊ ပၢင်တေႃႇပၢင်လွင်းၸိူဝ်းၼႆႉ ၶႂ်ႈႁႂ်ႈဢဝ်လိူင်ႈပၼ်တူတ်ႈတၢမ်ႇတေႉတေႉဝႃႈဝႃႈဢေႃႈ။ မိူဝ်ႈလဵဝ် ၸိူဝ်း ၼႆႉၼမ်မႃးႁႅင်းၼႃႇလႄႈ ႁဵတ်းႁႂ်ႈၵူၼ်းၼုမ်ႇၼႂ်းပိုၼ်ႉတီႈၾိင်ႈယၢမ်ႈလူႉ၊ ဢၵျၢင်ႉလူႉ၊ ၸၢတ်ႈပၢၼ်လူႉၼမ်ႁႅင်းၼႃႇဢႃးလႃး။ မိူဝ်းၼႃႈၼႆႉ ၵူၼ်းၼုမ်ႇၸိူဝ်းတေႁဵတ်းပၼ်ၽွၼ်းလီတႃႇတူင်ႇဝူင်းၵူၼ်းႁဝ်း တေမူၺ်ႉမူတ်းယဝ်ႉဢေႃႈ။ ပၼ်ႁႃလွင်ႈၼႆႉၼႆႉ တိူဝ်းလမ်ႇလွင်ႈလိူဝ်ပၢင်လိူၵ်ႈတင်ႈလူင်ဢၼ်ၼႆႉဢေႃႈ” ဝႃႈၼႆ။

ၼင်ႇႁိုဝ် တေၵုမ်းလႆႈ ၵၢၼ်ပိုတ်ႇႁူင်းပျေႃႇမူၼ်ႈ လႄႈ ၵႄႈလိတ်ႈပၼ်ႁႃယႃႈမဝ်းၵမ် ၼႂ်းပိုၼ်ႉတီႈလႆႈၼႆႉ ပဵၼ်ၸဝ်ႈၼႃႈတီႈ ၽူႈမီးပုၼ်ႈၽွၼ်း ၶဝ်ၵူၺ်းၼႆလႄႈ ၶႂ်ႈႁႂ်ႈသႂ်ႇၸႂ်သႂ်ႇ ၶေႃး ဝႆႉပၵ်းၼၵ်းၼႃ ၸွႆႈၵႄႈလိတ်ႈပၼ်ႁႃလူင်ဢၼ်ၼႆႉၵႂႃႇတေႉတေႉၼႆ ၸၢႆးၼုမ်ႇသိုပ်ႇတုၵ်းယွၼ်းဝႆႉ။

မိူဝ်ႈပူၼ်ႉမႃး ၼႂ်းၵၢင်လိူၼ်တီႊသႅမ်ႊပိူဝ်ႊ ပီ 2025 ၼၼ်ႉ ၸုမ်းၼုမ်ႇၸၢႆးမွၵ်ႈ 6 ၵေႃႉ ႁူမ်ႈၵၼ် လွၵ်ႇလႅၼ်ဢဝ် ၼၢင်းယိင်းတႆးဢွၼ်ႇၵေႃႉၼိုင်ႈ ဢၼ်တူၵ်းၵၢၼ်တူၵ်းငၢၼ်းဝႆႉၼၼ်ႉဝႃႈ မီးၵၢၼ်တႃႇႁႂ်ႈမၼ်းၼၢင်းႁဵတ်းၼႆသေ လွၵ်ႇႁွင်ႉၵႂႃႇတီႈၼႂ်းဝဵင်းတၢင်ႉယၢၼ်းယဝ်ႉ တီႉၺွပ်းမတ်ႉၶင်ဝႆႉသေ ယွၼ်းၵႃႈထုတ်ႇတူဝ်တီႈပေႃႈမႄႈၼၢင်းယိင်းဢွၼ်ႇ ၼၼ်ႉၶိုၼ်း။

ၼႂ်းၸႄႈဝဵင်းတၢင်ႉယၢၼ်းၼႆႉ မီး ၸုမ်းသိုၵ်းပျီႇတူႉၸိတ်ႉယူႇတႂ်ႈဢၢမ်းၼၢတ်ႈသိုၵ်းမၢၼ်ႈၵုမ်းၵမ်ဝႆႉ လႄႈ သိုၵ်းမၢၼ်ႈယိုတ်းမိူင်း တင်း ၸုမ်းသိုၵ်းဝႃႉ (UWSA)၊ ၸုမ်းသိုၵ်းတႆး (SSPP/SSA) ယူႇသဝ်းဝႆႉလၢႆၸုမ်းသေတႃႉ ဢၼ်ၵုမ်းၵမ် ပၼ်ၵၢၼ်ၽွင်းငမ်းၼႂ်းဝဵင်းဝႆႉပဵၼ်တၢင်းၵၢၼ်တႄႉ ပဵၼ်သိုၵ်းမၢၼ်ႈယိုတ်းမိူင်း ၼႆယဝ်ႉ။

ၵၢၼ်ပိုတ်ႇပၢင်တေႃႇလွင်း၊ ႁူင်းပျေႃႇမူၼ်ႈ KTV ၸိူဝ်းၼႆႉ လႆႈၸႅင်ႈလူင်ႈၼႃႈၸူး ၸဝ်ႈၼႃႈတီႈၽူႈမီးပုၼ်ႈ ၽွၼ်း ဢၼ်ၵုမ်းၵမ် ဝဵင်းဝႆႉ ပဵၼ်တၢင်းၵၢၼ်ၵမ်းသိုဝ်ႈၼၼ်ႉဢွၼ် တၢင်းလႄႈ သင်ၶႃႈႁၢပ်ႇၵၢၼ်ၶုၼ် တႂ်ႈသိုၵ်းမၢၼ်ႈယိုတ်းမိူင်း လႄႈ ၸုမ်းယိပ်းၵွင်ႈၵၢင်ႇၸိူဝ်းၵဵဝ်ႇၵွင်ႉ ၼႃႈတီႈလႂ်ၼႃႈတီႈၼၼ်ႉ ဢမ်ႇပၼ်သုၼ်ႇလႆႈပိုတ်ႇၸိုင် ပၼ်ႁႃယႃႈမဝ်းၵမ် လႄႈ ၾိင်ႈယၢမ်ႈၵူၼ်းမိူင်း တင်း ၵူၼ်းၼုမ်ႇ ၼႂ်းပိုၼ်ႉတီႈၵေႃႈ ၸၢင်ႈမီးလွင်ႈလႅၵ်ႈလၢႆႈမႃးယူႇၼႆ ၵူၼ်းၼုမ်ႇ ၵေႃႉတူင်ႉၼိုင်ၵၢၼ်တူင်ႇဝူင်းၵူၼ်း ၼႂ်းၸႄႈဝဵင်းတၢင်ႉယၢၼ်း လၢတ်ႈၼႄဝႆႉၼင်ႇၼႆ။