တပ်ႉသိုၵ်းမိူင်းဢမေႊရိၵၼ်ႊ Delta Force ၶဝ်ႈမိူင်း ဝႅၼ်ႊၼီႊသွႆႊလႃႊ တီႉၺွပ်းၸွမ်ၸိုင်ႈ ၼီႊၶူဝ်ႊလၢတ်ႉသ် မႃႊၻူႊရူဝ်ႊလႄႈမေးၼၢင်းသေယိုတ်းဢဝ်မိူင်းဝႅၼ်ႊၼီႊသွႆႊလႃႊၶဝ်ႈပဵၼ်တႂ်ႈမိူင်းဢမေႊရိၵၼ်ႊပႅတ်ႈ။
ႁွင်ႈၵၢၼ်ၶၢဝ်ႇ BBC ပိုၼ်ၽၢဝ်ႇဝၼ်းတီႈ 2/1/2026 လၢတ်ႈဝႃႈ ၸွမ်ၸိုင်ႈထရမ်ႉ ပိုတ်ႇလၢတ်ႈပဵၼ်တၢင်းၵၢၼ်ဝႃႈ တပ်ႉသိုၵ်းဢမေႊရိၵၼ်ႊ ဢဝ်ဢဵၼ်ႁႅင်းၶဝ်ႈပိုတ်းယိုဝ်းမိူင်းဝႅၼ်ႊၼီႊသွႆႊလႃႊသေလႄႈတီႉၺွပ်းဢဝ်ၸွမ်ၸိုင်ႈၶဝ်ၼႂ်းဝၼ်းပီမႂ်ႇလုမ်ႈၾႃႉ ဝၼ်းတီႈ 1/1/2026 ၼၼ်ႉသေ ဢဝ်တၢင်ႇႁိူဝ်းသၢင်းၽေႃးလူင်ဢၼ်တၢင်ႇၶိူင်ႈမိၼ်ၼၼ်ႉယဝ်ႉ ၼႆသေ တၢင်ႇၶႅပ်းႁၢင်ႈ ၸွမ်ၸိုင်ႈဝႅၼ်ႊၼီႊသွႆႊလႃႊဢၼ်ဢဝ်ၽႃႈပိၵ်ႉမၢၵ်ႇတႃႇမၼ်းဝႆႉ ။
တပ်ႉသိုၵ်း Delta Force ဢၼ်ဝႃႈၼႆႉ ပဵၼ်တပ်ႉသိုၵ်းဢဵၼ်ႁႅင်းယႂ်ႇသုတ်းမိူင်းဢမေႊရိၵၼ်ႊ တွၼ်ႈတႃႇၽဵဝ်ႈမူၺ်ႉ လွင်ၵေႃႇၵၼ်ႁၢႆႉ။
ၸဵမ်မိူဝ်ႈလႂ်လႂ် တပ်ႉသိုၵ်းဢမေႊရိၵၼ်ႊၼႆႉ လႆႈပိုၼ်ၽၢဝ်ႇတႃႇတီႉၺွပ်းၸွမ်ၸိုင်ႈဝႅၼ်ႊၼီႊသွႆႊလႃႊ ဝႆႉဝႃႈ ၽႂ်ပၼ်ၶၢဝ်ႇလွင်ႈၸွမ်ၸိုင်ႈ တေပၼ်ငိုၼ်းသူး 50 လၢၼ်ႉၻေႃႊလႃႊဢမေႊရိၵၼ်ႊ ဝႃႈၼႆဝႆႉ။
တေႃႇထိုင်ယၢမ်းလဵဝ်တႄႉ ဢဝ်တူဝ်ၸွမ်ၸိုင်ႈ ဝႅၼ်ႊၼီႊသွႆႊလႃႊ လႄႈမေးၼၢင်း ဝႆႉတီႈလႂ်ၼႆ ဢမေႊရိၵၼ်ႊ ပႆႇပိုၼ်ၽၢဝ်ႇပဵၼ်တၢင်းၵၢၼ်။
ၼႂ်းဝၼ်းတီႈ 3/1/2026 ၸွမ်ၸိုင်ႈထရမ်ႉႁဵတ်းပၢင်သပ်းၸႅင်ႈၶၢဝ်ႇသေမၼ်းၸၢႆးလၢတ်ႈဝႃႈ တေၵူတ်ႇထတ်းတတ်းသိၼ်တြႃး ၸွမ်ၸိုင်ႈဝႅၼ်ႊၼီႊသွႆႊလႃႊ ၵႂႃႇတေႃႇထိုင်ၶၢဝ်းယၢမ်းဢၼ်လႅၵ်ႈလၢႆႈ ဢၼ်မီးလွင်ႈပဵၼ်ထမ်းတြႃးဢၼ်ၼိုင်ႈဝႃႈၼႆ။
ၵူၼ်းမိူင်းလုမ်ႈၾႃႉတႄႉထတ်းသၢင်ဝႃႈ ၸွမ်ၸိုင်ႈဢမေႊရိၵၼ်ႊ သူၼ်ၸႂ်ၼမ်ႉမၼ်းလိပ်းၼႂ်းၸိုင်ႈမိူင်း ဝႅၼ်ႊၼီႊသွႆႊလႃႊ ၼမ်လိူဝ် တႃႇႁဵတ်းသၢင်ႈလွင်ႈႁုၼ်ႈမုၼ်းမႂ်ႇသုင်ၸိုင်ႈမိူင်းလိူဝ် လႄႈၸင်ႇယိုတ်းဢဝ်မိူင်းဝႅၼ်ႊၼီႊသွႆႊလႃႊ ဝႃႈၼႆ။
ၵူၺ်းၵႃႈ ၵႅမ်ၸွမ်ၸိုင်ႈ မိူင်းဝႅၼ်ႊၼီႊသွႆႊလႃႊ – ၻႄလ်ႊသီႊ ရူဝ်ႊတရီႊၵၢတ်ႉသ် တႄႉပိုၼ်ၽၢဝ်ႇတီႈ ထီႊဝီႊ ဝႃႈ- ၸွမ်ၸိုင်ႈ မႃႊၻူႊရူဝ်ႊၼႆႉ ၺႃးတီႉၺွပ်းသေဢဝ်ၵႂႃႇပိုတ်ႇလိူင်ႈၸွႆးတြႃး ယွၼ်ႉယႃႈမဝ်းၵမ်လႄႈ ၶိူင်ႈၵွင်ႈၵၢင်ႇလၢၵ်ႈၼၢၵ်ႈ တီႈဝဵင်းလူင်ၼိဝ်ႊယွၵ်ႊယဝ်ႉ – ဝႃႈၼႆ။
ယၢမ်းလဵဝ်တႄႉၵၢၼ်ပၢၼ်ႇပွင်ၸိုင်ႈမိူင်း မိူင်းဝႅၼ်ႊၼီႊသွႆႊလႃႊၼႆႉ လႆႈၵိုတ်းဝႆႉမူတ်းသေ ထုၵ်ႇပိုၼ်ၽၢဝ်ႇပဵၼ်ငဝ်းလၢႆးၶိုၵ်ႉၶၵ်ႉဝႆႉ။ ၵူၼ်းမိူင်းဝႅၼ်ႊၼီႊသွႆႊလႃႊတႄႉသႄႉသွမ်းဢမေႊရိၵၼ်ႊဝႃႈ ပူၼ်ႉပႅၼ်တၢင်းၵၢၼ်သိုၵ်းသေ ၶဝ်ႈမႃးယိုတ်းၸွမ်ၸိုင်ႈၸိုင်ႈမိူင်းထိုင်ၼႂ်းမိူင်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ