မိူဝ်ႈၼႆႉ ဝၼ်းတီႈ 28/12/2025 ၼႂ်းဝၼ်းပၢင်လိူၵ်ႈတင်ႈ သိုၵ်းမၢၼ်ႈယိုတ်းမိူင်း လူတ်းယွမ်းပႅတ်ႈ ႁႅင်းဝႆး ဢိၼ်ႊတိူဝ်ႊၼႅတ်ႉ (Internet) ၵူၺ်းဢမ်ႇၵႃး မၢင်ၸႄႈဝဵင်း ၼႂ်းမိူင်းတႆး ၺႃးဢိုတ်းလႅင်းၾူၼ်းၵႂႃႇပဵၼ်ၵမ်း ပဵၼ်တွၼ်ႈ ၼႆယဝ်ႉ။
သိုၵ်းမၢၼ်ႈၼႆႉ လၢတ်ႈဝႃႈ ၼင်ႇႁိုဝ်ႁူင်းပၼ်သဵင် တေမီးလွင်ႈႁူမ်ႇလူမ်ႈၼႆသေ ၸီႉသင်ႇ ပလိၵ်ႈ၊ ၾၢႆႇၶႄၾႆး လႄႈ ပျီႇတူႉၸိတ်ႉ ပႃးၵွင်ႈၵၢင်ႇ ၵႂႃႇပႂ်ႉဢဝ်ႁူမ်ႇလူမ်ႈ ၸွမ်းသဵၼ်ႈ တၢင်း ၼႂ်းပွၵ်ႉၼႂ်းယွမ်ႇ ၸိူဝ်းမီး ႁူင်းပၼ်သဵင် တီႈၵူၼ်းမိူင်းတေၵႂႃႇပၼ်သဵင်ၵၢင်ၸႂ်ၼၼ်ႉဝႆႉတင်းၼမ် ၼႆယဝ်ႉ။
ၵူၼ်းမိူင်းၵေႃႉယူႇၼႂ်းၸႄႈဝဵင်းလၢင်းၶိူဝ်းၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “တႄႇမိူဝ်ႈဝႃး 27/12/2025 တေႃႇထိုင် မိူဝ်ႈၼႆႉ 28/12/2025 ၼႆႉ လႅင်းၾူၼ်းဢမ်ႇလီသေဢိတ်း။ ဢိၼ်ႊတိူဝ်ႊၼႅတ်ႉၵေႃႈ ဢမ်ႇၸႂ်ႉလႆႈ။ တိတ်းတေႃႇၵၼ်ယၢပ်ႇႁႅင်းၼႃႇ။ သိုၵ်းဝႃႇ၊ ယႄးဝႃႇၸိူဝ်းၼႆႉ ပႃးၵွင်ႈပႃးၵၢင်ႇႁႄ ပႂ်ႉဝႆႉသမ်ႉပေႃးၸွတ်ႇၵႂႃႇမူတ်း။ ၾူၼ်းၵေႃႈၶဝ်ဢမ်ႇပၼ်ႁဝ်းဢဝ်ၵႂႃႇပႃး ။ ၵူၼ်းၵႂႃႇပၼ်သဵင်ၵေႃႈ ဢမ်ႇပႃးၸႂ်ပႃးၶေႃးၵၼ်- ဢမ်ႇၵႂႃႇဢမ်ႇလႆႈလႄႈၵႃႈလႆႈၵႂႃႇၵူၺ်းၼႃႇ ” ၼႆယဝ်ႉ။
ၼႂ်းဝဵင်းတႄႉ ၽွင်းၵၢင်ၼႂ်ၸဝ်ႉၼၼ်ႉမီးရူတ်ႉၵႃးသိုၵ်း 2-3 လမ်းလဵပ်ႈပၼ်ႇၵႂႃႇမႃးယူႇ။ တီႈႁူင်းပၼ်သဵင်ၵေႃႈ ၶဝ်လၢတ်ႈဝႃႈႁၢမ်ႈဢဝ်ၾူၼ်းၶဝ် ႁၢမ်ႈထၢႆႇၶႅပ်းႁၢင်ႈၼႆဝႆႉလႄႈ လႆႈ ႁဵတ်းၸွမ်းတႂ်ႈၶေႃႈပူင်ၶေႃႈတဵၵ်းတဵင် ၵူႈလွင်ႈ ၵူၼ်းလၢင်းၶိူဝ်းလၢတ်ႈၼင်ႇၼႆ။
တီႈဝဵင်းလၢင်းၶိူဝ်းၼႆႉ ဢၼ်ၶဝ်ႈၶႄႉၶႅင်ႇပၢင်လိူၵ်ႈတင်ႈ မီးပႃႇတီႇသၢင်ႇသီႈလႄႈ ပႃႇတီႇသိူဝ်ၽိူၵ်ႇ 2 ဢၼ်ၵူၺ်း။ ၼႂ်းဝဵင်းဢၼ်ပဵၼ်ပွၵ်ႉၶႃႈႁၢပ်ႇၵၢၼ်ၶုၼ်ၶဝ်ယူႇသဝ်းၼၼ်ႉပွၵ်ႉလဵဝ်ပဵၼ်သဵင်ပႃႇတီႇသၢင်ႇသီႈ- ဢၼ်လိူဝ် 11 ပွၵ်ႉလႄႈ ဝၢၼ်ႈဢိူင်ႇတၢင်းၼွၵ်ႈတႄႉ လႆႈႁၼ်ပဵၼ်ႁႅင်းပႃႇတီႇသိူဝ်ၽိူၵ်ႇဝႆႉၼႆ ၵူၼ်းမိူင်းဝဵင်းလၢင်းၶိူဝ်းၵေႃႉၼိုင်ႈလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ