ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉ လၢတ်ႈဝႃႈ – ၼႂ်းဝၼ်းတီႈ 25/12/2025 ၼႆႉ လႆႈတင်ႈပဝ်ႉမၢႆသိုၵ်းသေ ပိုတ်းယိုဝ်းတိုၵ်းတေႃး ၸုမ်း IS ဢၼ်မီးၼႂ်းမိူင်း ၼၢႆႊၵျီႊရီႊယိူဝ်ႊၼၼ်ႉ ႁၢဝ်ႈႁႅင်း ဝႃႈၼႆ။
ၸွမ်ၸိုင်ႈထရမ်ႉ လၢတ်ႈဝႃႈ ၸုမ်း IS ပဵၼ်ၸုမ်းၵေႃႇၵၢၼ်ႁၢႆႉသေ ၶႃႈႁႅမ်တၢႆၵူၼ်းမိူင်း ၸိူဝ်းပဵၼ်ၶရိတ်ႉယၼ်ႇ။
ၽႅၼ်ၵၢၼ်တိုၵ်းၼႆႉ ယူႇတီႈႁွင်ႈၵၢၼ်ၾၢႆႇၵုမ်းၵမ်ၽႅၼ်ၵၢၼ်သိုၵ်း ဢႃႊၾရိၵ (Africom) ၶွင်မိူင်းဢမေႊရိၵၼ်ႊ လႄႈ တပ်ႉသိုၵ်းမိူင်းၼၢႆႊၵျီႊရီႊယိူဝ်ႊ လႆႈႁူမ်ႈၵၼ်သေႁဵတ်း သၢင်ႈၵႂႃႇ တီႈၼႂ်းၸႄႈတွၼ်ႈ သူဝ်ႊၵူဝ်ႊတူဝ်ႊ(Sokoto)၊ မိူင်းၼၢႆႊၵျီႊရီႊယိူဝ်ႊ ၼႆယဝ်ႉ။
ၵဵဝ်ႇလူၺ်ႈလွင်ႈၼႆႉသေ ၽွင်းလူင်ၾၢႆႇၼွၵ်ႈမိူင်း မိူင်းၼၢႆႊၵျီႊရီႊယိူဝ်ႊၵေႃႈ လၢတ်ႈဝႃႈ – လႆႈႁူမ်ႈၵၼ်တင်း မိူင်းဢမေႊရိၵၼ်ႊသေ ႁဵတ်းသၢင်ႈၽႅၼ်ၵၢၼ်တိုၵ်းတေႃးၵႂႃႇ ဝႃႈၼႆ။ ၽႅၼ်ၵၢၼ်တိုၵ်း ၸွင်ႇတေၸၢင်ႈမီးမႃးလႆႈထႅင်ႈ ဢၼ်ဝႃႈၼၼ်ႉတႄႉ ယူႇတီႈၽူႈဢွၼ်ႁူဝ်သွင်ၸိုင်ႈမိူင်း တေႁူမ်ႈၵၼ် တႅပ်းတတ်းၵႂႃႇ ၼႆယဝ်ႉ။
ဝၢႆးသေ ၵူၼ်းသိုၵ်း လႄႈ ၵူၼ်းမိူင်းဢမေႊရိၵၼ်ႊ 3 ၵေႃႉ ၺႃးၸုမ်း IS ၶႃႈႁႅမ်တၢႆ တီႈမိူင်းသီႊရီႊယိူဝ်ႊယဝ်ႉ ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉ ၸင်ႇပၵ်းၸႂ်မႃးၼိူဝ်လွင်ႈၸုမ်း IS။
မိူၼ်ၼႆ မိူဝ်ႈဝူင်ႈပူၼ်ႉမႃးၼႆႉၵေႃႈ ႁွင်ႈၵၢၼ်ငဝ်ႈငုၼ်းၵုမ်းၵမ်ၽႅၼ်ၵၢၼ်သိုၵ်း ဢမေႊရိၵၼ်ႊ (Centcom) ပိုၼ်ၽၢဝ်ႇဝႃႈ လႆႈႁဵတ်းသၢင်ႈၽႅၼ်ၵၢၼ်သိုၵ်းယႂ်ႇလူင်ဢၼ်ၼိုင်ႈသေ ပိုၼ်းယိုဝ်းတိုၵ်းတေႃးပဝ်ႉမၢႆၵၢၼ်သိုၵ်း ၸုမ်း IS 70 ပၢႆ။ ၼႂ်းၽႅၼ်ၵၢၼ်တိုၵ်းၼၼ်ႉ ႁိူဝ်းမိၼ်တိုၵ်း တပ်ႉၵၢင်ႁၢဝ် မိူင်းၵျေႃႊတၼ်ႊ (Jordan)ၵေႃႈ ၶဝ်ႈႁူမ်ႈၸွႆႈထႅမ်ပႃး ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ