ပိုတ်ႇႁူဝ်ၶေႃႈဝႆႉဝႃႈ “သဵင်ၶဵင်ႇတႃႉႁႅင်း လွႆတႆးလႅင်း” ၼႆသေ ၽူႈသူင်ႁၵ်ႉပၼ်ႇရူတ်ႉထိပ်ႇၶဝ် တေႁူမ်ႈႁႅင်းၵၼ် ၶိုၼ်ႈလွႆတႆးလႅင်း တႃႇမၢႆတွင်းဝၼ်းၸိူဝ်ႉၸၢတ်ႈၸိုင်ႈတႆး ။ လွင်ႈၼိုင်ႈသွင်တၢင်း တႃႇ ပၢႆးယူႇလီၵေႃႈ ႁႂ်ႈၶႅမ်ႉ ၵၢၼ်ၵမ်ႉထႅမ်ၸိူဝ်ႉၸၢတ်ႈၵေႃႈ ႁႂ်ႈပဵၼ် လႄႈ ၸင်ႇၶတ်းၸႂ်သႂ်ႇႁႅင်းသေ ၸတ်းမႃး။ ဢမ်ႇဝႃႈ ယူႇမိူင်းတႆးမိူင်းထႆး ၽႂ်သူၼ်ၸႂ်ၵေႃႈ ႁူမ်ႈပၼ်ႇရူတ်ႉထိပ်ႇၶိုၼ်ႈလွႆတႆးလႅင်းၸွမ်းၵၼ်ၼႆ ၽူႈသူင်ႁၵ်ႉပၼ်ႇရူတ်ႉထိပ်ႇၶဝ် ႁူၺ်းသူၼ်းဝႆႉၼင်ႇၼႆ။

တႃႇပဵၼ်တီႈမၢႆတွင်း ၼႂ်းဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 79 ပီၼႆသေ ၽူႈသူင်ႁၵ်ႉပၼ်ႇရူတ်ႉထိပ်ႇ တေႁူမ်ႈၵၼ် ပၼ်ႇရူတ်ႉထိပ်ႇ ၶိုၼ်ႈလွႆတႆးလႅင်း ၊ ပီၼႆႉ ပဵၼ်ပွၵ်ႈၵမ်း 3 ။
တၢင်းယိူင်းဢၢၼ်းသုင်သုတ်းတႄႉ ပၼ်ႇပိူဝ်ႈတႃႇပၼ်ႁႅင်းၼေႃႇတႅၼ်းၶိူဝ်း ပၼ်ႇပိူဝ်ႈတႃႇႁူမ်ႈသၢင်းၽွၼ်းလီ ပၼ်ႇပိူဝ်ႈတႃႇ ပဵၼ်တီႈမၢႆတွင်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 79 ပီ ၼႆသေ တင်ႈႁူဝ်ၶေႃႈ ၶၢဝ်းတၢင်းဝႆႉဝႃႈ သဵင်ၶဵင်ႇတႃႉႁႅင်း လွႆတႆးလႅင်း ဝႃႈၼႆ။
ပိူင်လူင်တႄႉ ၶိုၼ်ႈမိူဝ်းပၼ်ႁႅင်းၸႂ် လုၵ်ႈႁဵၼ်းၸိူဝ်ႉၸၢတ်ႈၼိူဝ်လွႆတႆးလႅင်း လႄႈ ႁႃတၢင်းၵမ်ႉထႅမ် ပၼ်ၼႂ်း ၵၢၼ်ႁဵၼ်း ၵၢၼ်သွၼ်လုၵ်ႈႁဵၼ်းၸွမ်းၼင်ႇယိုၼ်းမိုဝ်းထိုင်လႆႈၼႆယဝ်ႉ။

တေႃႈၼင်ႇ မိူဝ်ႈပီၵၢႆၵေႃႈ ၼိူဝ်လွႆတႆးလႅင်း ဢမ်ႇလႆႈၸတ်းပၢင်ဝၼ်းၸိူဝ်ႉၸၢတ်ႈၸိုင်ႈတႆးၶိုၵ်ႉယႂ်ႇသေတႃႉ ၽူႈသူင်ႁၵ်ႉပၼ်ႇရူတ်ႉထိပ်ႇ ယင်းဢွၼ်ၵၼ်ၶတ်းၸႂ်သႂ်ႇႁႅင်းၶိုၼ်ႈပဵၼ် ပွၵ်ႈၵမ်း 2 ။

ပၢင်ပၼ်ႇရူတ်ႉထိပ်ႇၼႆႉ ဢမ်ႇလႆႈတတ်းမၵ်းႁူဝ်ၼပ်ႉၵူၼ်းဝႆႉ ပီႈၼွင်ႉတီႈၸမ်တီႈၵႆ ႁၢင်းႁႅၼ်းတူဝ်မႃးၶဝ်ႈႁူမ်ႈၸွမ်းလႆႈ ဢမ်ႇဝႃႈ ၼႂ်းမိူင်းၼွၵ်ႈမိူင်း ဢမ်ႇလိူၵ်ႈၸၢဝ်းၶိူဝ်း ဢမ်ႇလိူၵ်ႈၽႃသႃ သႃသၼႃ ။

မိူဝ်ႈပၼ်ႇရူတ်ႉထိပ်ႇၶိုၼ်ႈလွႆတႆးလႅင်း ပွၵ်ႈၵမ်း 2 ၼၼ်ႉ ဢမ်ႇၵွမ်ႉၵူၺ်း ပီႈၼွင်ႉတႆးၵူၺ်း ပီႈၼွင်ႉထႆးၵေႃႈ မႃးပၼ်ႇၸွမ်း ။ပွၵ်ႈၼၼ်ႉ ႁူမ်ႈၵၼ် တင်းမူတ်း 14 ၵေႃႉ( ရူတ်ႉထိပ်ႇ14 လမ်း) ။
လိူဝ်သေ ဢဝ်တူဝ်ဢဝ်ၸႂ် မိူဝ်းပၼ်ႁႅင်း ၸုမ်းလုၵ်ႈႁဵၼ်း သႅၼ်းႁုၼ်ႈမႂ်ႇၶဝ်တီႈၼိူဝ်လွႆယဝ်ႉ ၽူႈသူင်ႁၵ်ႉရူတ်ႉထိပ်ႇၶဝ် တေဢွၼ်ၵၼ် ႁူမ်ႈငိုၼ်းၵၼ်သေ ၵမ်ႉထႅမ်ပၼ်လွၵ်းပဝ်ႇ တီႈႁူင်းႁဵၼ်းလႄႈႁူင်းယႃၸိူဝ်းၼႆႉထႅင်ႈ ။
ပီ ပွၵ်ႈၵမ်း 2 ၼၼ်ႉ သမ်ႉပၢႆမီး ၽူႈၸႂ်လီ မီးၼမ်ႉၸႂ်ၶဝ် ၾၢၵ်ႇငိုၼ်းမိူဝ်းႁူမ်ႈႁွမ်း ၵမ်ႉၸွႆႈ ၼႂ်းၵၢၼ်ႁဵၼ်းၵၢၼ်သွၼ်လႄႈ တႃႇပၢႆးယူႇလီလုၵ်ႈႁဵၼ်းၸိူဝ်းၼႆႉထႅင်ႈလူးၵွၼ်ႇ။

ပွၵ်ႈၵမ်း 3 ၼႆႉၵေႃႈ ၽူႈလႂ်ၽႂ် သူၼ်ၸႂ်ၶႂ်ႈပၼ်ႇရူတ်ႉထိပ်ႇ ၶိုၼ်ႈလွႆတႆးလႅင်း ႁိုဝ်ဢမ်ႇၼၼ် သင်ၶႂ်ႈႁူမ်ႈႁွမ်းၵမ်ႉၸွႆႈမိူဝ်းၼိူဝ်လွႆၼႆၵေႃႈ ၵပ်းသိုပ်ႇတိတ်းတေႃႇၸူး ၽူႈႁပ်ႉပုၼ်ႈၽွၼ်းၼႂ်းၸုမ်းပၼ်ႇရူတ်ႉထိပ် ၸၢႆးသႅင်ႁၢၼ် မၢႆၾူၼ်း 098 757 7080 လႄႈ ၸၢႆးဢွၼ်ႇ မၢႆၾူၼ်း 092 450 4672 လႆႈၵမ်းသိုဝ်ႈ။
ၶပ်းမၢႆ ၶၢဝ်းတၢင်းပၼ်ႇရူတ်ႉထိပ်ႇတႄႉ ဝၼ်းတီႈ 30/01/2026 ၼႆႉ ႁူမ်ႈတူဝ်ၵၼ် တီႈဝဵင်းမႄႈသၢႆ ၊ ဢုပ်ႇဢူဝ်းၵၼ်လူင်ႈၼႃႈတႃႇဢွၵ်ႇၶၢဝ်းတၢင်း။
ဝၼ်းတီႈ 31/01/2026 ၼၼ်ႉ တေတႄႇဢွၵ်ႇ မႄႈသၢႆ – ထိုင်ဝဵင်းပႃႇပဝ်ႉ ။ ဝၼ်းတီႈ 01/02/2026 ၼၼ်ႉ လုၵ်ႉဝဵင်းပႃႇပဝ်ႉ – ဢွၵ်ႇထိုင်ၵဵင်းမႂ်ႇ ။ ဝၼ်းတီႈ 02/02/2026 ၼၼ်ႉ ၵဵင်းမႂ်ႇ – မိူင်းပၢႆး ။ ဝၼ်းတီႈ 03/02/2026 ၼၼ်ႉ မိူင်းပၢႆး – ပၢင်မၢၵ်ႇၽႃႈ ။

ဝၼ်းတီႈ 04/02/2026 ၼၼ်ႉ ပၢင်မၢၵ်ႇၽႃႈ – ပၢင်ၶမ်း ။ ဝၼ်းတီႈ 05/02/2026 ၼၼ်ႉ ပၢင်ၶမ်း – လွႆတႆးလႅင်း ။ ဝၼ်းတီႈ 6 -7 ၼၼ်ႉ တေၶဝ်ႈႁူမ်ႈပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆး ။
ဝၼ်းတီႈ 8 ၼၼ်ႉ ဢႅဝ်ႇယဵမ်ႈပၼ်ႁႅင်းႁူင်းႁဵၼ်းၸိူဝ်ႉၸၢတ်ႈ ။ ဝၼ်းတီႈ 9/02/2026 ၼၼ်ႉ ပိၼ်ႇဝၢႆႇပွၵ်ႈၶိုၼ်း ။

ဢၼ်လူဝ်ႇႁၢင်ႈႁႅၼ်းတူဝ် တႃႇဢွၵ်ႇၶၢဝ်းတၢင်းတႄႉ ပပ်ႉၶၢမ်ႈမိူင်းၽၢတ်ႉသ်ပွတ်ႇ ႁိုဝ်ဢမ်ႇၼၼ် ဝတ်းဝႂ်တူဝ်ၵဝ်ႇ ၊ တႃႇၼွၼ်းပွတ်းတၢင်းၼၼ်ႉ လူဝ်ႇဢဝ်ၵႂႃႇပႃး တဵၼ်ႉ Tent , Sleeping bag ၸိူဝ်းၼႆႉ။

ၸၢႆးသႅင်ႁၢၼ် ၵေႃႉႁၵ်ႉပၼ်ႇရူတ်ႉထိပ်ႇ လၢတ်ႈတီႈၽူႈတွႆႇႁွၵ်ႈဝႃႈ –

ၶႂ်ႈၽိတ်ႈမွၵ်ႇတိုၵ်းသူၼ်းထိုင် ပီႈၼွင်ႉၼႂ်းမိူင်းတႆးႁဝ်းၼေႃႈ။ ၼႂ်းမိူင်းတႆးႁေဢမ်ႇဝႃႈ ၼွၵ်ႈမိူင်းဢမ်ႇဝႃႈ ။ သင်ၸိူဝ်ႉဝႃႈ ပၼ်ၶၢဝ်းယၢမ်းလႆႈၼႆ။ ႁဝ်းမႃးႁူမ်ႈၵၼ်သေ ပၼ်ႇလူတ်ႉထိပ်ႇၶိုၼ်ႈၼိူဝ်လွႆတႆးလႅင်း ။ ၼႆႉပဵၼ်တီႈမၢႆတွင်း ဝၼ်းၸိူဝ်ႉၸၢတ်ႈ 79 ပီ။ႁႂ်ႈပဵၼ်တီႈမၢႆတွင်းယႂ်ႇလူင်ႁေ ။ ႁႂ်ႈပဵၼ်ပႃးလွင်ႈၵမ်ႉထႅမ် ၼေႃႇတႅၼ်းၶိူဝ်းႁဝ်းတီႈႁူင်းႁဵၼ်းၸိူဝ်ႉၸၢတ်ႈလွႆတႆးလႅင်းၼႆ

လွင်ႈပၼ်ႇရူတ်ႉထိပ်ႇ ဢွၵ်ႇၶၢဝ်းတၢင်းၶိုၼ်ႈလွႆတႆးလႅင်းၼႆႉ မိူဝ်ႈပီ 2020 ၼၼ်ႉၵေႃႈ လႆႈၸတ်းမႃးယဝ်ႉ ပွၵ်ႈၵမ်းၼိုင်ႈ ၼၼ်ႉတႄႉ မီးႁႅင်းၵူၼ်းပၼ်ႇရူတ်ႉထိပ်ႇ 20 ပၢႆ။ ထိုင်မႃး ပီ 2024 ၼႆႉ ၸင်ႇမႃးၸတ်းၶိုၼ်းထႅင်ႈ ပွၵ်ႈၵမ်း 2 တႃႇပဵၼ်မၢႆ တွင်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 77 ပီလႄႈ တႃႇပဵၼ်ႁႅင်းၸႂ် လုၵ်ႈႁဵၼ်းၼိူဝ်လွႆ – ၼႆ ၸၢႆးသႅင်ႁၢၼ် သိုပ်ႇလၢတ်ႈ။

ဢၼ်ပဵၼ်မႃး ပၢင်ပၼ်ႇရူတ်ႉထိပ်ႇ ဢၼ်ၼႆႉတႄႉ လွင်ႈတၢင်းမၼ်း တႄႇမႃး မိူဝ်ႈ 2019 ၼၼ်ႉ ။ ဢၼ် ၸၢႆးဢွၼ်ၶိူဝ်း ၸၢႆးသႅင်ႁၢၼ် သွင်ပီႈၼွင်ႉ လုၵ်ႉဢဝ် ဝဵင်းၵဵင်းမႂ်ႇ ၸိုင်ႈထႆး ပၼ်ႇရူတ်ႉထိပ်ႇၵႂႃႇၵဵင်းႁၢႆး၊ မႄႈသၢႆသေ ၶၢမ်ႈလႅၼ်လိၼ် ပၼ်ႇရူတ်ႉထိပ်ႇၼႂ်းမိူင်းတႆးပွတ်းဢွၵ်ႇ၊ ပၼ်ႇၵႂႃႇမိူင်းတႆးပွတ်းၸၢၼ်းလႄႈ ပွတ်းႁွင်ႇ။ ယင်းပၢႆပၼ်ႇလူင်းၵႂႃႇ ၸႄႈမိူင်း ယၢင်းလႅင်၊ ၸႄႈမိူင်းမွၼ်း၊ တိူင်းတႃႈၵုင်ႈ၊ ၼေႇပျီႇတေႃႇ၊ ဝဵင်းလိူဝ်ႇလႄႈ ပူးၵမ်ႇ ၸဵမ်ၸိူဝ်းၼႆႉ ။ ၽွင်းၼၼ်ႉ လႆႈၸႂ်ႉၶၢဝ်းယၢမ်း ပဵၼ် မွၵ်ႈ 3 လိူၼ် ။ ဝၢႆးလင်ၼၼ်ႉယဝ်ႉ ၸင်ႇမီးမႃး ပၢင်ပၼ်ႇရူတ်ႉထိပ်ႇ ဢၼ်မီး သလူဝ်ႊၵႅၼ်ႊ ၶေႃႈယၼ်ႇၸႂ်ဝႃႈ သဵင်ၶဵင်ႇတႃႉႁႅင်း လွႆတႆးလႅင်းၼႆၼၼ်ႉယူႇ။

ဢၼ်လႆႈပၼ်ႇရူတ်ႉထိပ်ႇၼႆႉ ပၼ်ၶၢဝ်းယၢမ်း ၼိုင်ႈဝၼ်းလႂ် ၼိုင်ႈၸူဝ်ႈမူင်းၵူၺ်းၵေႃႈ မီးၽွၼ်းလီ တႃႇပၢႆးယူႇလီတႄႉတႄႉ ၼႆယူႇ။

1)ၵၢမ်ႈၼိူဝ်ႉတေၵႅၼ်ႇၶႅင်မႃးလိူဝ်ၵဝ်ႇ 2)ပေႃးလဵၼ်ႈႁႅင်းတၢင်ႇၸိူဝ်ႉတၢင်ႇပိူင် တေတိူဝ်းငၢႆႈမႃး ၵွပ်ႈတေဢမ်ႇႁိူဝ်ႉငၢႆႈ 3)မီးႁႅင်းၸၢင်ႈၶၢမ်ႈၼမ်မႃး 4)ဢၼ်ၵႆႉၶႆႈၵႆႉၼၢဝ်တေဢမ်ႇသူႈမီး 5)လူတ်းယွမ်း ၼမ်ႉၼၵ်းတူဝ်ၶိင်းလႆႈ ။
ၼွၵ်ႈလိူဝ်ၼၼ်ႉ ပၼ်ႇရူတ်ႉထိပ်ႇၼႆႉ ႁဵတ်းႁႂ်ႈယၢၼ်ၵႆၽေးယႃႈမဝ်းၵမ်လႄႈ ၽေးသႅၼ်ပိူင် ဢၼ်တေယႃႉၸၢတ်ႈပၢၼ်ၵူၼ်းၼုမ်ႇ ။

သင်ဝႃႈ လႆႈပၼ်ႇရူတ်ႉထိပ်ႇယူႇၵူႈဝၼ်းတႄႉ ပၢႆးယူႇလီၸႂ် တေၶႅမ်ႉမႃး ၊ တူဝ်ၶိင်းၵႅၼ်ႇၶႅင်မႃး ၊ တူဝ်မဝ်မႃး (တေဢမ်ႇၼဵတ်းဢမ်ႇသၢၼ်ႈ) ၊ လုပ်ႇၵပ်းလုပ်ႇတေႃႇ ၵႅၼ်ႇၶႅင်လီ ၊ လူတ်းယွမ်းလႆႈၸႂ်ႁိပ်ႇႁွမ်ႈ ၊ တူဝ်ၶိင်းႁၢင်ႈလီမႃး ၊ လုပ်ႇၵႅၼ်ႇၶႅင်မႃး ၊ ၶႆမၼ်းလူတ်းယွမ်းမႃး လႄႈ ႁူဝ်ႊမူင်ႊ ဢၼ်ႁဵတ်းႁႂ်ႈၸႂ်သိူဝ်းၼၼ်ႉ တေၼမ်မႃး ၼႆ ၼႂ်းဝႅပ်ႉသၢႆႉ hellosayarwon ၵေႃႈလၢတ်ႈဝႆႉၼင်ႇၼႆ။