ၼင်ႇႁိုဝ်ပေႃးတေဢွၵ်ႇၾၢင်ႁၢင်ႈ မီးၵူၼ်းမိူင်းၵႂႃႇပၼ်သဵင်ၵၢင်ၸႂ် (တွၼ်ႈၶႅပ်းမႄး) ၼမ် ၼႂ်းဝၼ်းပၢင်လိူၵ်ႈတင်ႈ ဝၼ်းတီႈ 28 လိူၼ်တီႊသႅမ်ႊပိူဝ်ႊၼၼ်ႉ သိုၵ်းမၢၼ်ႈယိုတ်းမိူင်း ငူပ်ႉငီႉၵၼ်တင်း သိုၵ်းၵဝ်ႈၵၢင်ႉသေ ႁႂ်ႈၽူႈမီးပုၼ်ႈၽွၼ်းၼႂ်းၸုမ်းသိုၵ်းၵဝ်ႈၵၢင်ႉ တီႈထုင်ႉၼမ်ႉပွင်ႈ ၸႄႈဝဵင်းလႃႈသဵဝ်ႈ ပၢဝ်ႇသေႃႇထိုင်ၵူၼ်းမိူင်း တႃႇၵႂႃႇပၼ်သဵင်ၵၢင်ၸႂ်လူင်ႈၼႃႈ ၼႆယဝ်ႉ။

မိူဝ်ႈၼႆႉ ဝၼ်းတီႈ 25 လိူၼ်တီႊသႅမ်ႊပိူဝ်ႊ ၽူႈမီးပုၼ်ႈၽွၼ်း ၾၢႆႇၽွင်းငမ်း ၼႂ်းထုင်ႉၼမ်ႉပွင်ႈ ပၢဝ်ႇသေႃႇ ႁႂ်ႈၵူၼ်းမိူင်း ၸိူဝ်းယူႇသဝ်းၼႂ်းထုင်ႉၼမ်ႉပွင်ႈ ႁၢင်ႈႁႅၼ်းတူဝ် တႃႇၵႂႃႇပၼ်သဵင် တီႈၼႂ်းဝဵင်းလႃႈသဵဝ်ႈ ၼႆယဝ်ႉ။

ၸၢႆးလႅင်း ၵူၼ်းမိူင်းပိုၼ်ႉတီႈ ၵေႃႉယူႇဝႆႉၼႂ်းဝဵင်းၼမ်ႉပွင်ႈလၢတ်ႈၼႄတီႈ ၽူႈတွႆႇႁွၵ်ႈဝႃႈ “မိူဝ်ႈၼႆႉ (25/12/2025) ၵၢင်ၼႂ် ၵူၼ်းလူင်ၵဝ်ႈၵၢင်ႉၶဝ် ပၢဝ်ႇႁႂ်ႈၵူၼ်းဝၢၼ်ႈ ၵႂႃႇၶွၼ်ႈတုမ် ၵၼ် တီႈႁိမ်းၶူဝ်ၼၼ်ႉ။ မိူဝ်ႈၽုၵ်ႈမႃး ၵႃးတၢင်းလႃႈသဵဝ်ႈ တေမႃးႁပ်ႉၵႂႃႇ” ၼႆယဝ်ႉ။

မိူဝ်ႈႁူဝ်လိူၼ်တီႊသႅမ်ႊပိူဝ်ႊ ဝၼ်းတီႈ 4 ယၢမ်းၵၢင်ၼႂ်ၼၼ်ႉ သိုၵ်းမၢၼ်ႈ ႁွင်ႉဢဝ်ၸုမ်းပွင်ၵၢၼ်ပၢင်လိူၵ်ႈတင်ႈသေ ၶဝ်ႈၵႂႃႇထိုင် ၼႂ်းဝဵင်းၼမ်ႉပွင်ႈ လူင်းၵဵပ်းၶေႃႈမုၼ်းၵူၼ်းမိူင်း တႃႇပၢင်လိူၵ်ႈတင်ႈ ဢၼ်တေၸတ်း ႁဵၼ်းၼႂ်းဝၼ်းတီႈ 28 ဝၼ်းဢႃးတိတ်ႉတေမႃးၼႆႉ။

ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃး ထုင်ႉၼမ်ႉပွင်ႈၼႆႉ တူၵ်းယူႇတႂ်ႈသိုၵ်းၵဝ်ႈၵၢင်ႉ (MNDAA) ၵုမ်းၵမ်ဝႆႉ ႁိုင်ၶၢဝ်းတၢင်းၸမ် 2 ပီယဝ်ႉ။ ၽွင်းသိုၵ်းမၢၼ်ႈ တေၶဝ်ႈ ၵႂႃႇ ၵုမ်းၵမ်ပၼ်ႇၵၢၼ်ၽွင်းငမ်းၶိုၼ်း ဝဵင်းလႃႈသဵဝ်ႈၼၼ်ႉၵေႃႈ သိုၵ်းၵဝ်ႈၵၢင်ႉလႆႈဢဝ်ႁူမ်ႇလူမ်ႈပၼ်ၸွမ်းသဵၼ်ႈတၢင်း လႄႈ ပၼ်ရူတ်ႉၵႃးသိုၵ်းမၢၼ်ႈ လတ်းၶၢမ်ႈၵႂႃႇ ၼႂ်းဝဵင်းၼမ်ႉပွင်ႈ ၵမ်းသိုဝ်ႈ ၼႆယဝ်ႉ။

ယွၼ်ႉလူင်ပွင်ၸိုင်ႈမိူင်းၶႄႇ ယူႇၵၢင်ႁဵတ်းၶဵဝ်ပၼ်သေ သိုၵ်းမၢၼ်ႈ တင်း သိုၵ်းၵဝ်ႈၵၢင်ႉ တူၵ်းလူင်း ၵိုတ်းတိုၵ်းၵၼ်ယဝ်ႉ ဝၢႆးလင်ၶၢဝ်းသွၼ်းၼမ်ႉယဝ်ႉဢမ်ႇႁိုင် သိုၵ်းၵဝ်ႈၵၢင်ႉလႆႈထွၼ်ႁႅင်းသိုၵ်း ဢွၵ်ႇဝဵင်းလႃႈသဵဝ်ႈၵႂႃႇ။ ႁၢင်လိူၼ်ဢေႊပရိူဝ်ႊမႃး သိုၵ်းမၢၼ်ႈၸင်ႇၼမ်းႁႅင်းသိုၵ်း လႄႈ ၶိူင်ႈၵွင်ႈၵၢင်ႇလုၵ်ႉတၢင်း ဝဵင်းမိူင်းယႆ လတ်းၶဝ်ႈၵႂႃႇၼႂ်းၼမ်ႉပွင်ႈသေ ၶဝ်ႈ ၵႂႃႇၼႂ်းဝဵင်းလႃႈသဵဝ်ႈၶိုၼ်း ၼႆယဝ်ႉ။

တႃႇၸတ်းႁဵတ်းပၢင်လိူၵ်ႈတင်ႈၼႆႉ သိုၵ်းမၢၼ်ႈယိုတ်းမိူင်း သႂ်ႇသဵၼ်ႈၸိုဝ်ႈဝဵင်းလႃႈသဵဝ်ႈၶဝ်ႈပႃးၼႂ်း ၸုပ်ႈၼိုင်ႈ။

တႄႇႁူဝ်လိူၼ်တီႊသႅမ်ႊပိူဝ်ႊမႃး ၶႃႈႁၢပ်ႇၵၢၼ်ၶုၼ် လႄႈ ၽူႈမီးပုၼ်ႈၽွၼ်း တႂ်ႈဢၢမ်းၼၢတ်ႈသိုၵ်းမၢၼ်ႈ တႄႇၶဝ်ႈႁိူၼ်းၼိုင်ႈလူင်းႁိူၼ်းၼိုင်ႈသေ ၵူတ်ႇထတ်းသဵၼ်ႈၸိုဝ်ႈ ၵူၼ်းၸိူဝ်းတေလႆႈပၼ်သဵင်ၵူၺ်းဢမ်ႇၵႃး ႁူၺ်းသူၼ်းႁႂ်ႈၵူၼ်းမိူင်းၵႂႃႇပၼ်သဵင်ထႅင်ႈ ၼႆယဝ်ႉ။

ၵွၼ်ႇပႆႇထိုင် ဝၼ်းၸတ်းပၢင်လိူၵ်ႈတင်ႈဢၼ်တေႉမၼ်းၼႆႉ သိုၵ်းမၢၼ်ႈ ၸတ်းပၢင်လိူၵ်ႈတင်ႈလူင်ႈၼႃႈ ၸွမ်းဝဵင်းမူႇၸေႊ၊ ဝဵင်းလႃႈသဵဝ်ႈ၊ ဝဵင်းၼွင်ၶဵဝ် လႄႈ ၸႄႈဝဵင်းၸိူဝ်းပႃးတႃႇၸတ်းၼႂ်းၸုပ်ႈၼိုင်ႈၼၼ်ႉ တင်ႈတႄႇဝၼ်းတီႈ 18 တေႃႇထိုင် 27 လိူၼ်တီႊသႅမ်ႊပိူဝ်ႊ ၼႆယဝ်ႉ။

လႆႈႁူႉဝႃႈ ၵူၼ်းၸိူဝ်းတေလႆႈသႂ်ႇၶႅပ်းၵၢင်ၸႂ်လူင်ႈၼႃႈၼၼ်ႉ ပဵၼ်ၶႃႈႁၢပ်ႇၵၢၼ်ၶုၼ်သိုၵ်းမၢၼ်ႈ လႄႈ ပျီႇတူႉၸိတ်ႉ တင်း ၵူၼ်းၸိူဝ်းလႆႈႁပ်ႉပုၼ်ႈၽွၼ်းဝႆႉ ၼႂ်းႁူင်းပၼ်သဵင် (မဲရုံ) ၵူၺ်း။ ယၢမ်းလဵဝ်သမ်ႉ ၵူၼ်းမိူင်း ၼႂ်းထုင်ႉၼမ်ႉပွင်ႈ ၸိူဝ်းယူႇဝႆႉၼႂ်းၼႃႈတီႈ သိုၵ်းၵဝ်ႈၵၢင်ႉၵုမ်းၵမ်ၵေႃႈ တေလႆႈၵႂႃႇပၼ်သဵင်ပႃး ၼႆယဝ်ႉ။