ပေႃးထိုင်သႅပ်ႊထႅမ်ႊပိူဝ်ႊ ဝၼ်းတီႈ 25 ၼႆ ၵူႈပီပီ ၵူၼ်းလၢႆၸိုင်ႈမိူင်း တေဢွၼ်ၵၼ် ႁူမ်ၸူမ်းၸွမ်း ဝၼ်းမၢႆတွင်း ၶရိတ်ႉသ်မၢတ်ႉ Christmas ။ ၾိင်ႈဢၼ်ၼႆႉ တူဝ်ႈထိုင်လုမ်ႈၾႃႉယဝ်ႉလႄႈ မိူင်းတႆးၵေႃႈ ႁိုဝ်တေလွတ်ႈၾိင်ႈဢၼ်ၼႆႉ။ ၵမ်ႈၼမ် ႁပ်ႉႁူႉဝႃႈ မၼ်းပဵၼ်ၾိင်ႈသႃသၼႃၶရိတ်ႉသ် ဝႃႈၼႆၵူၺ်း ။ ထိုင်ၵၢပ်ႈပၢၼ်မႂ်ႇၼႆႉတႄႉ ဢမ်ႇလိူၵ်ႈၽႃသႃလႄႈၸၢဝ်းၶိူဝ်း ဢွၼ်ၵၼ်ႁပ်ႉဢဝ်ၾိင်ႈဢၼ်ၼႆႉ ပဵၼ်ဝၼ်းလိုဝ်ႈ ႁိုဝ်ဢမ်ႇၼၼ် ဝႆႉပဵၼ်ဝၼ်းမၢႆတွင်းယူႇဝၼ်းၼိုင်ႈ ။

Christmas ၼႆႉ လုၵ်ႉမႃးတီႈ ၶေႃႈၵႂၢမ်း ဢင်းၵိတ်ႉပၢၼ်ၵဝ်ႇ ဢၼ်ဝႃႈ ၶရိတ်ႉသ် မႅတ်ႉသီႊ Christes Maesse ။ ပွင်ႇဝႃႈ ပူႇၸေႃႇၼပ်ႉယမ်ၽြႃးၶရိတ်ႉသ် ၼႆယူႇ။ ပေႃးၸမ်ထိုင်ဝၼ်းၶရိတ်ႉသ်မၢတ်ႉသ်လႄႈသင် ထိုင်ယဝ်ႉလႄႈသင် ၸိူဝ်းၼပ်ႉထိုဝ်ၶဝ် တေဢွၼ်ၵၼ် တူင်ႉတၵ်ႉၵၼ်ဝႃႈ “Merry Christmas” ။

(ပၢၼ်မႂ်ႇၼႆႉ တေယေႃႈတူဝ်လိၵ်ႈမၼ်းသေ တႅမ်ႈပဵၼ် “Merry X’mas” ။ တူဝ်ၶရိတ်ႉသ်ၼၼ်ႉ ဢဝ် X သေတႅမ်ႈတၢင်ဝႆႉ။ တူဝ် X ၼၼ်ႉ ဢဝ်မႃးတီႈၽႃသႃၵရိၵ်ႊ ဢၢၼ်ႇဢွၵ်ႇသဵင်ဝႃႈ ၶရိတ်ႉသ် ။)

ပေႃးယူႇတီႈၸဵင်ႇသႃသၼႃၶရိတ်ႉသ်သေ လၢတ်ႈတႄႉ ဝၼ်းၼႆႉ ဢမ်ႇၸႂ်ႈဝၼ်းဢၼ်တေလႆႈၵျေႃႇလႆႈမူၼ်ႈၵူၺ်း ၊ ဢမ်ႇၸႂ်ႈဝၼ်းဢၼ် တေလႆႈယူႇမဝ်ၵိၼ်မၢင် ။ မၼ်းပဵၼ်ဝၼ်းဢၼ် ၽြႃးၸဝ်ႈယေႇသူႉ ၵိူတ်ႇဢွၵ်ႇမႃး တႃႇၶျွတ်ႈဢဝ်ၵူၼ်းမိူင်းၶူင်းၵၢင် လွတ်ႈတၢင်းတုၵ်ႉၶၶၢၼ်ၸႂ်လူင်ၼႆႉ ၼႆယူႇ။

ၸွမ်းၼင်ႇ ၵူၼ်းသိုပ်ႇၵူၼ်း ၵႂၢမ်းသိုပ်ႇၵႂၢမ်း လၢတ်ႈၵၼ်မႃးတႄႉ မိူဝ်ႈပူၼ်ႉမႃး 2000 ႁဵင်ပီၼၼ်ႉ ၽြႃးၸဝ်ႈဢၼ်ယူႇမိူင်းၵၢင်ႁၢဝ်ၼၼ်ႉ ဝူၼ်ႉၶွပ်ႈ တႃႇၵႄႇၶျွတ်ႈဢဝ် ၵူၼ်းၼႂ်းလူၵ်ႈၼႆႉၼႆသေ ၸင်ႇဢဝ်လုၵ်ႈၸၢႆးမၼ်းၸဝ်ႈ သူင်ႇလူင်း မႃးတႄႇသၼ်ႇထႄႇၼႂ်းမိူင်းၵူၼ်း ။

ၸင်ႇၼၼ်လႄႈ ၽြႃးဢၼ်ႁပ်ႉတူဝ်ၸဝ်ႈၵဝ်ႇဝႃႈပဵၼ် Eternal God (ထာဝရ ဘုရား) ဢၼ်မီးၼိူဝ်ၵၢင်ႁၢဝ်ၼၼ်ႉ ၸင်ႇသူင်ႇႁႂ်ႈလုၵ်ႈၸၢႆးမၼ်း လူင်းမႃးတႄႇသၼ်ႇထႄႇ ၼႂ်းတွင်ႉၼၢင်းယိင်းၵေႃႉၼိုင်ႈ ၸိုဝ်ႈႁွင်ႉဝႃႈ ၼၢင်းသၢဝ် မႃႊရီႊ ။

ၼၢင်းမႃႊရီႊၼၼ်ႉ ၸင်ႇၵိူတ်ႇဢွၵ်ႇမႃး လုၵ်ႈၸၢႆးၵေႃႉၼိုင်ႈ တီႈၼႂ်းၶွၵ်ႈဝူဝ်း ၶွင် ၸဝ်ႈႁူင်းႁႅမ်းလဵၵ်ႉလဵၵ်ႉဢွၼ်ႇတီႈၼိုင်ႈ ၼႂ်းမိူင်းပဵတ်ႉၶျ်လေႊႁဵမ်ႊ ၼႂ်းၸိုင်ႈမိူင်းဢီႊသရႃႊဢဵဝ်လ်ႊ ။

လုၵ်ႈၸၢႆးမၼ်းၼၼ်ႉ ၸင်ႇတၢင်ႇၸိုဝ်ႈႁွင်ႉဝႃႈ ၵျီႊသတ်ႉသ် ၶရၢႆႉသ်ထ် (Jesus Christ) ဢၼ်ၵူၼ်းမၢၼ်ႈဢၢၼ်ႇဢွၵ်ႇဝႃႈ – ယေႇသူႉ ။ မီးတီႈပွင်ႇဝႃႈ ၽူႈၸွႆႈလွတ်ႈပူၼ်ႉ ၼႆယူႇ။ မိူဝ်ႈဢႃႇယု ၸဝ်ႈ ၵျီႊသတ်ႉသ် ၶရၢႆႉသ်ထ် ၼႆႉ ထူၼ်ႈထိုင် 30 ပီယဝ်ႉၼၼ်ႉ မၼ်းၸဝ်ႈတႄႇဢဝ်ၶေႃႈသင်ႇသွၼ်ဢွၼ်လီ မႅင်ႇယိုၼ်ႈပၼ်ၵူၼ်းၼမ်။

ၽွင်းၼၼ်ႉ ၵျီႊသတ်ႉသ် ၶရၢႆႉသ်ထ် ယူတ်းယႃတူဝ်ပၼ်ၵူၼ်းပဵၼ်ၵူႈၸိူဝ်းၸိူဝ်း ၊ ၵႄႈလိတ်ႈပၼ်ႁႃၼႂ်းၵႄႈၵူၼ်းတေႃႇၵူၼ်း ၊ ၸုမ်းတေႃႇၸုမ်း ၸိူဝ်းၼႆႉ။ ႁဵတ်းႁႂ်ႈ ၵူၼ်းတင်းၼမ်တင်းလၢႆ လႆႈၸႂ် ပၵ်းၸႂ်ၼိူဝ်မၼ်းၸဝ်ႈမႃး ။
လွင်ႈတၢင်းမၼ်းၸဝ်ႈၼႆႉ ထိုင်ႁူ ၶုၼ်ၽွင်းငမ်း ဝၢၼ်ႈမိူင်းၼၼ်ႉလႄႈ သိုၵ်းႁၢၼ်ရူဝ်ႊမၼ်ႊ ၶဝ်။ လိူဝ်ၼၼ်ႉ ၸၢဝ်းၵျူႊ ( Jew ) ၸုမ်းၼိုင်ႈၵေႃႈ ဢမ်ႇထုၵ်ႇၸႂ် ၼိူဝ်ၶေႃႈသင်ႇသွၼ်ၸဝ်ႈယေႇသူႉၼၼ်ႉ ။

ၸင်ႇဢွၼ်ၵၼ် ဝၢင်းၽႅၼ် ႁႃလၢႆး ယႃႉၵဝ်းၸဝ်ႈယေႇသူႉၶိူဝ်းယႂ်း ။ ၵမ်းလိုၼ်းၵေႃႈ တဵၵ်းႁႃတၢင်းၽိတ်း ၸဝ်ႈယေႇသူႉသေ တီႉၺွပ်းဢဝ် ၸဝ်ႈယေႇသူႉၼၼ်ႉ ဢဝ်ၸိူၵ်ႈမတ်ႉသေဢမ်ႇၵႃး ဢဝ်လဵၵ်းတွၵ်ႇၵိုၵ်းလၵ်း သဝ်ဝႃးမိုဝ်းၼၼ်ႉ ။

ၸဝ်ႈယေႇသူႉၵေႃႈ ပွႆႇႁႂ်ႈၶဝ် တီႉၺွပ်းဢဝ်လီလီ လူၺ်ႈဢမ်ႇထဵင်ဢမ်ႇလႃႇ။ ၵွပ်ႈၶႂ်ႈၼႄဝႃႈ မၼ်းၸဝ်ႈ ႁၼ်ထိုင်ၵၢင်ၸႂ်ၵူၼ်းၵူႈၵေႃႉ၊ တႃႇၵႅတ်ႇၵင်ႈ တႃႇႁပ်ႉၶၢမ်ႇဢဝ်တၢင်းၽိတ်းၵူၼ်းမိူင်း ၼႆၼၼ်ႉယူႇ။

ၼုမ်ႇၸၢႆးဢၼ် ၼပ်ႉယမ်သႃသၼႃၶရိတ်ႉသ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈ ဝႃႈ –

ဢိင်ၼိူဝ် ၸဝ်ႈယေႇသူႉ ဝႆႉၵူၼ်းတင်းၼမ်လမ်ႇလွင်ႈသေ ႁပ်ႉၶၢမ်ႇဢဝ်တၢင်းၽိတ်းပၼ်လႄႈ ၵူၼ်းၵၢပ်ႈပၢၼ်ၼႆႉၵေႃႈ ၸင်ႇယုမ်ႇယမ်ၼိူဝ်ၸဝ်ႈယေႇသူႉ။ တိုၼ်းယုမ်ႇဝႆႉဝႃႈ ၸဝ်ႈယေႇသူႉတေမႃးလၢင်ႉပၼ်တၢင်းၽိတ်းဢၼ်မီးဝႆႉ ။ သင်ဝႃႈ ႁပ်ႉဢဝ်ၶေႃႈသင်ႇသွၼ်ၸဝ်ႈယေႇသူႉၶဝ်ႈမႃးၼႂ်းၸႂ် ၊ သင်ဝႃႈ ၶဝ်ႈႁပ်ႉၼပ်ႉထိုဝ်ၼိူဝ်သႃသၼႃႇၶရိတ်ႉသ်ယဝ်ႉ ၵႃႈမီးတၢင်းၽိတ်းဝႆႉၸိူဝ်းၼၼ်ႉ ၸဝ်ႈယေႇသူႉတေမႃးၵႄႇၶျွတ်ႈဢဝ် တေပူၼ်ႉလွတ်ႈလႆႈတၢင်းၽိတ်းၸိူဝ်းၼၼ်ႉမူတ်းသဵင်ႈ။ ၸင်ႇၼၼ်လႄႈ ဝႆႉဝၼ်းၶရိတ်ႉသ်မၢတ်ႉသ်ၼႆႉ လမ်ႇလွင်ႈ – ဝႃႈၼႆ။

ၸွမ်းၼင်ႇ ၵႂၢမ်းသိုပ်ႇၵႂၢမ်းလႄႈသင် ၼႂ်းပပ်ႉပိုၼ်းၵႅပ်ႈလၢႆဢၼ်လႄႈသင် ဝႃႈဝႆႉတႄႉ ဝၼ်းတီႈ 25 တီႊသႅမ်ႊပိူဝ်ႊ ၼႆႉ ပဵၼ်ဝၼ်း ၸၢဝ်းရူဝ်ႊမၼ်ႊၶဝ် လူႇဝႆႈၽီၵၢင်ဝၼ်း ။ ၵူၺ်းၵႃႈ ၸၢဝ်းရူဝ်ႊမၼ်ႊၶဝ် ၶဝ်ႈၼပ်ႉယမ် ၸဝ်ႈယေႇသူႉမႃးလွႆးလွႆးလႄႈ ၸင်ႇဢဝ် ဝၼ်းဢၼ်ၼႆႉ မၵ်းမၼ်ႈပဵၼ်ဝၼ်းဢၼ် ၸဝ်ႈယေႇသူႉၵိူတ်ႇဢွၵ်ႇ ၼႆၵေႃႈ ဝႃႈဝႆႉ။
ၸင်ႇၼၼ်လႄႈ ပေႃးထိုင်မႃး ဝၼ်းတီႈ 25 လိူၼ်တီႊသႅမ်ႊပိူဝ်ႊ ၵူႈပီပီၸိုင် ၸင်ႇမီးပၢင်ႁူမ်ႈၸူမ်း ပၢင်မူၼ်ႈသိူဝ်းၸွမ်း ဝၼ်းၵိူတ်ႇၸဝ်ႈယေႇသူႉႁိုဝ်ဢမ်ႇၼၼ် ဝၼ်းၶရိတ်ႉသ်မၢတ်ႉသ်မႃး တႄႇၸဵမ်မိူဝ်ႈ ပီၶရိတ်ႉသ် 336 ၼၼ်ႉမႃး။

မၢင်ၸိူဝ်းၵေႃႈဝႃႈ ၸဝ်ႈယေႇသူႉဢမ်ႇလႆႈၵိူတ်ႇၶၢဝ်းၵတ်းၼႆသေ မိူဝ်ႈဢွၼ်တၢင်း ဝၼ်းၵိူတ်ႇၸဝ်ႈယေႇသူႉၼႆႉ ၸတ်းၼႂ်းလိူၼ်မေႊၵေႃႈ ယၢမ်ႈမီးမႃး ။ ဝၢႆးၼၼ်ႉ ၸင်ႇၶၢႆႉမႃးပဵၼ်ၼႂ်းလိူၼ်ဢေႊပရိူဝ်းလ် ၊ ယဝ်ႉၵေႃႈ ၶၢႆႉမႃးပဵၼ်ၼႂ်းလိူၼ်ၵျၼ်ႊၼိဝ်ႊရီႊ ။ ၵမ်းလိုၼ်းသုတ်းၶၢႆႉမႃးပဵၼ် ၼႂ်းလုၵ်ႈလိူၼ် တီႊသႅမ်ႊပိူဝ်ႊ။ဝၢႆးလင် ၸဝ်ႈယေႇသူႉလူႉသဵင်ႈ သေ ၶၢဝ်းတၢင်း 300 ပီၼၼ်ႉ မီးလွင်ႈလႅၵ်ႈလၢႆႈဝၼ်းမၼ်းမႃးၶိူဝ်းယႂ်း။

ပိုၼ်းၸဝ်ႈယေႇသူႉ ပိုၼ်းၶရိတ်ႉသ်မၢတ်ႉသ် ၼႆႉ မီးပပ်ႉပိုၼ်းမၼ်းလၢႆပပ်ႉလၢႆၵျၢမ်း ၸွတ်ႇတူဝ်ႈလၢႆဝၢၼ်ႈလၢႆမိူင်း လၢႆၸၢဝ်းၶိူဝ်း။
မၢင်ပွတ်းမၢင်တွၼ်ႈၵေႃႈ တေမီးလွင်ႈပိူင်ႈႁွႆႈၵၼ်ဢိတ်းဢီႈ ။ ၵူၺ်းၵႃႈ ဢၼ်လၢတ်ႈလႆႈတဵမ်ပၢၵ်ႇတႄႉ ဝၼ်းၼႆႉ ပဵၼ်ဝၼ်းဢၼ် ၸၢဝ်းသႃသၼႃၶရိတ်ႉသ်ၶဝ် တႄႇဢွၼ်ၼမ်းၸတ်းမႃးဢွၼ်တၢင်း လႄႈ ပဵၼ်ၾိင်ႈဢၼ်ႁိူဝ်ႈႁိူင်းၼႂ်းလုမ်ႈၾႃႉၼႆႉ ဢၼ်ၼိုင်ႈ။
ၵွၼ်ႇပႆႇထိုင် ဝၼ်းၶရိတ်ႉသ်မၢတ်ႉၼႆႉ တေလႆႈႁၼ်ၸၢဝ်းၶရိတ်ႉသ်ၶဝ် ႁၢင်ႈႁႅၼ်းတူဝ်ႈတၼ်းပႂ်ႉထႃႈ ။ ၸဵမ်ဢဝ် တီႈယူႇတၼ်းသဝ်းၸိူဝ်းၼႆႉ တေဢဝ်တူၼ်ႈဢဝ်မႂ် မႃးႁၢင်ႈၶိူင်ႈဝႆႉ ႁႂ်ႈလီတူၺ်းလီလွမ် ။

တေတႆႈၾႆးလၢႆသီသေ ၼႄတၢင်းႁၢင်ႈလီ ။ ႁၢင်ႈၶိူင်ႈသင်သေဢမ်ႇဝႃႈ သီဢၼ်ၵႆႉပႃးတႃႇသေတႄႉ ပဵၼ်သီၶဵဝ်သီလႅင် သီၶၢဝ် သီလိူင်ၶမ်း ။ သီၶဵဝ်ၼၼ်ႉ ပဵၼ်ပိူင်ၾၢင်တူၼ်ႈမႆႉလၢႆသႅၼ်း လႄႈ ပဵၼ်သီဢၼ်မီးတီႈပွင်ႇဝႃႈ မီးတၢင်းမုင်ႈမွင်း လႄႈ သိုပ်ႇပၼ်သၢႆၸႂ် ၼႆယဝ်ႉ ။
သီလႅင်သမ်ႉ ပဵၼ်သီမၢၵ်ႇမႆႉသႅၼ်းၼိုင်ႈ ဢၼ်ႁွင်ႉႁွၼ်ႊလီႉ ပဵၼ်သီဢၼ်ၼႄပိူင်ၾၢင် လိူတ်ႈၸဝ်ႈယေႇသူႉ ဢၼ်တေမႃးလၢင်ႉပႅတ်ႈတၢင်းၽိတ်းလူင်ၵူၼ်းၵူႈၵေႃႉ ။ ၸင်ႇၼၼ်လႄႈ သီလႅင်ၼၼ်ႉ မၢႆထိုင် ပဵၼ်တၢင်းႁၵ်ႉမႅတ်ႉတႃႇၸဝ်ႈယေႇသူႉ ဝႃႈၼႆ ။
သီၶၢဝ်သမ်ႉ တေပဵၼ်သီမူၺ်ၽွင် ၵွပ်ႈဝႃႈမိူင်းဢၼ်ယေႇသူႉၵိူတ်ႇၼႆႉ ပဵၼ်မိူင်းၵတ်း မူၺ်ၽွင်တူၵ်းၼမ်။ သီဢၼ်ၼႆႉၵူၺ်းၼင်ႇၵဝ်ႇ ၵူၼ်းပၢၼ်ၼႆႉ ဢဝ်မႃး ၼႄပိူင်ၾၢင်လွင်ႈမူတ်းသႂ်ၸဝ်ႈယေႇသူႉ ၼႆထႅင်ႈ။

သီလိူင်ၶမ်းၼၼ်ႉသမ်ႉ ၼႄၵႃႈၶၼ်ၸဝ်ႈယေႇသူႉ ၊ ၼႄလွင်ႈယိုင်ႈယႂ်ႇၸဝ်ႈယေႇသူႉဝႃႈၼႆဝႆႉ ။ၸင်ႇၼၼ်လႄႈ ၵႂႃႇတၢင်းလႂ်ၵေႃႈ ပေႃးမီးႁိူၼ်းၸၢဝ်းၶရိတ်ႉသ်ၼႆၸိုင် တေလႆႈႁၼ်တၢင်းႁၢင်ႈလီၸေးသီၸိူဝ်းၼႆႉ။
ၶၢဝ်းၶရိတ်ႉသ်မၢတ်ႉၼႆႉ ၵူၼ်းႁူမ်ႈႁိူၼ်းလဵဝ်ၵၼ်ၵေႃႈ သင်ဝႃႈ မီးတီႈၵႆၼႆ တေဢွၼ်ၵၼ်ပွၵ်ႈႁူပ်ႉႁၼ်ၼႃႈၵၼ် ၵိၼ်ၶဝ်ႈႁူမ်ႈမူႇၵၼ် ပိုတ်ႇဢူၵ်းပိုတ်ႇၸႂ်ၼႄၵၼ် ႁၵ်ႉႁွမ်ၵၼ် ပၼ်လွင်ႈဢုၼ်ႇၸႂ်ၵၼ်။

ၵူၼ်းယူႇႁိမ်းၸမ်ၵၼ်ၵေႃႈ တေၶဝ်ႈဢွၵ်ႇၵၼ် ၾၢၵ်ႇတွၼ်ႈၶူဝ်းမၢႆတွင်းၵၼ် ။ မၢင်တီႈၵေႃႈ တင်ႈၸႂ်ႈႁဵတ်းဝႆႉ တီႈလဵၼ်ႈလုၵ်ႈဢွၼ်ႇႁိူၼ်းၽႂ်မၼ်းဝႆႉ ။ ပေႃးထိုင်ဝၼ်းၼၼ်ႉမႃး ပၼ်ၶႂၢင်ႉႁႂ်ႈ လုၵ်ႈဢွၼ်ႇႁိမ်းႁွမ်းၼၼ်ႉ မႃးလဵၼ်ႈၵေႃႉၵၼ် မူၼ်ႈၵၼ်ၸိူဝ်းၼႆႉ ။

ၼႂ်းပၢင်ၶရိတ်ႉသ်မၢတ်ႉသ်ၼႆႉ တေလႆႈႁၼ်ပႃးႁၢင်ႈလူၼ်ႉ ၵူၼ်းထဝ်ႈၼူတ်ႈၶၢဝ်ၵေႃႉၼိုင်ႈ ။ ၵူၼ်းၵေႃႉ ၼႆႉ ၼႂ်းပိုၼ်းတႄႉ မၼ်းမီးၸိုဝ်ႈဝႃႈ ၸၼ်ႊတႃႊၵလေႃႉ မိူဝ်ႈပၢၼ် ရူမ်ႊ( ရောမခေတ်) ။ မၼ်းၸဝ်ႈၼႆႉ မိူဝ်ႈမၼ်းတိုၵ်ႉမီးသၢႆၸႂ် မၼ်းတေႁၢင်ႈႁႅၼ်းၶူဝ်းတွၼ်ႈပၼ်လုၵ်ႈဢွၼ်ႇ ၽွင်းၶရိတ်ႉသ်မၢတ်ႉသ်။ မၼ်းၸဝ်ႈပဵၼ်ၸဝ်ႈၼႄတြႃး ႁိုဝ်ဢမ်ႇၼၼ် မုၼ်ၸဝ်ႈၶရိတ်ႉသ်ၵေႃႉၼိုင်ႈ ။ လွင်ႈႁဵတ်းသၢင်ႈမၼ်း ပၼ်တၢင်းဢုၼ်ႇၸႂ်ၵူၼ်းလႆႈလႄႈ ၸင်ႇဢွၼ်ၵၼ်ႁဵတ်းၸွမ်း ထိုင်ႁၢၼ်ႉၼႆႉ ဝႃႈၼႆ။

ၾိင်ႈယုမ်ႇယမ် ၶိူဝ်းၵူၼ်းတီႈၼိုင်ႈလႄႈတီႈၼိုင်ႈ ၶၢဝ်းၼိုင်ႈလႄႈၶၢဝ်းၼိုင်ႈဢမ်ႇမိူၼ်ၵၼ် ၊ လွင်ႈႁဵတ်းသၢင်ႈ တူင်ႉၼိုင်ၵူၼ်းၶိူဝ်းလႂ်ၶိူဝ်းၼၼ်ႉၵေႃႈ ဢမ်ႇမိူၼ်ၵၼ် ။ ၵူၺ်းၵႃႈ လူဝ်ႇႁူႉႁၼ်ဝႃႈ ႁဝ်းပဵၼ်ၶိူဝ်းၵူၼ်းၼႂ်းလုမ်ႈၾႃႉၼင်ႇၵၼ် ။ လူဝ်ႇပိၼ်ႇပၢႆႇၼပ်ႉယမ်ၵၼ် ။ ၵွပ်ႈၼၼ် ၸဵမ်ၾိင်ႈပိူၼ်ႈၾိင်ႈႁဝ်း ႁႂ်ႈမေႃဝႆႉၵႃႈၶၼ် ။ ပေႃးၶႂ်ႈႁႂ်ႈပိူၼ်ႈဝႆႉၵႃႈၶၼ်ၾိင်ႈႁဝ်း ႁဝ်းၵေႃႈ လူဝ်ႇမေႃဝႆႉၵႃႈၶၼ်ၾိင်ႈပိူၼ်ႈၼႆ – ဢႃးၸၢရ် ၶိုၼ်းသႂ်ၸႂ်ယဵၼ် လၢတ်ႈၼင်ႇၼႆ။

ဢၢင်ႈဢိင်မႃးတိႈ – คริสต์มาส ให้ด้วยรัก
wikipedia.org