ၵူၼ်းပၢႆႈၽေးသိုၵ်း ဝဵင်းၾၢႆၶုၼ် ၸိုင်ႈတႆးပွတ်းၸၢၼ်း ပွၵ်ႈမိူဝ်းဢဝ် ၶဝ်ႈၵၢပ်ႇ တီႈႁိူၼ်း သေ မႃးၶိုၼ်း တီႈပၢင်သဝ်းၼၼ်ႉ ႁၢႆၵႂႃႇၵၢင်တၢင်း လႆႈၶၢဝ်းတၢင်း ဝူင်ႈၼိုင်ႈၸင်ႇမီးၵူၼ်း သိုပ်ႇၾူၼ်း မႃးႁႂ်ႈဢဝ်ငိုၼ်းမႃးထုတ်ႇဢဝ် ။
မၼ်းၸၢႆး ၸိုဝ်ႈႁွင်ႉ – ၵူဝ်ႇဢွင်ႇၵူဝ်ၵူဝ်ႇ ဢႃယု 25 ပီ ယူႇဝဵင်းၾၢႆၶုၼ် ။ ပီၵၢႆ 2024 ၽွင်း သိုၵ်းမၢၼ်ႈတင်း ၸုမ်းလုၵ်ႉၽိုၼ်ႉပဵၼ်ပၢင်တိုၵ်းၵၼ် တၢင်းဝဵင်းၾၢႆၶုၼ်ၼၼ်ႉ ပၢႆႈၽေးသိုၵ်း မႃးယူႇဝႆႉတီႈၼွင်ႁၢႆးယႃႈ ၸႄႈဝဵင်းယွင်ႁူၺ်ႈ လႆႈပီၼိုင်ႈယဝ်ႉ ။
ၼႂ်းဝၼ်းတီႈ 11 လိူၼ် တီႊသႅမ်ႊပိူဝ်ႊၼႆႉ မၼ်းၸၢႆး ပွၵ်ႈမိူဝ်းဢဝ်ၶဝ်ႈၵၢပ်ႇၶိုၼ်း တီႈသူၼ် ဢၼ်မီးတီႈဝၢၼ်ႈၼွင်လႅင် ဝဵင်းၾၢႆၶုၼ် ။ ထိုင်မႃးၼႂ်းဝၼ်းတီႈ18 လိူၼ်တီႊသႅမ်ႊပိူဝ်ႊ ၽွင်းမၼ်းၸၢႆး ပွၵ်ႈမႃးၶိုၼ်း တီႈၼွင်ႁၢႆးယႃႈၼၼ်ႉ ႁၢႆၵႂႃႇၵၢင်တၢင်း ဝႃႈၼႆ ။
ၵူၼ်းၸမ်ၸႂ် ၵူဝ်ႇဢွင်ႇၵူဝ်ႇၵူဝ်ႇ လၢတ်ႈၽူႈတွႆႇႁွၵ်ႈဝႃႈ -“ မိူဝ်ႈမိူဝ်းတႄႉပႃးၵေႃႉမိူဝ်းယူႇ မိူဝ်ႈ ပွၵ်ႈမႃးတႄႉ မၼ်းမႃးၶိုၼ်းၵေႃႉလဵဝ် ၊ ဝၼ်းတီႈ18 ၽွင်းဢဝ်ၶဝ်ႈၵၢပ်ႇယဝ်ႉၼၼ်ႉ မႃးၼွၼ်း တီႈၸၢမ်ၵႃးၼႆဢေႃႈ ။ ဝၼ်းတီႈ19 ၵၢင်ၼႂ် 6 မူင်း ၼၼ်ႉသိုပ်ႇၾူၼ်ႊ လၢတ်ႈမႃးဝႃႈ တေပွၵ်ႈ မႃးၶိုၼ်းၼႆသေ ထိုင်ဝၼ်းမိူဝ်ႈၼႆႉ ဢမ်ႇလႆႈတင်းၵပ်းသိုပ်ႇ ၺႃးတီႉၺွပ်းၵႂႃႇႁႃႉၵေႃႈဢမ်ႇႁူႉ”- ဝႃႈၼႆ ။
မိူဝ်ႈၼႆႉ ဝၼ်းတီႈ 23/12/2025 ယၢမ်းၵၢင်ၼႂ် မီးၵူၼ်းသိုပ်ႇၾူၼ်ႊလၢတ်ႈမႃးဝႃႈ တီႉၺွပ်းဝႆႉ ၵူဝ်ႇဢွင်ႇၵူဝ်ႇၵူဝ်ႇတီႈ ဝဵင်းမဵၵ်ႉထီႇလႃႇၼႆသေ ၸႂ်ႉဢဝ်ငိုၼ်း 7 သႅၼ် မႃးလႅၵ်ႈဢဝ်တူဝ်မၼ်းၶိုၼ်း ဝႃႈၼႆ ။
ၵူၼ်းၸမ်ၸႂ်ၵူဝ်ႇဢွင်ႇၵူဝ်ႇၵူဝ်ႇ လၢတ်ႈဝႃႈ -“ မိူဝ်ႈၼႆႉမီးၵူၼ်းသိုပ်ႇၾူၼ်ႊလၢတ်ႈမႃးဝႃႈ ၊ မၼ်း ပဵၼ်ၸွမ်သိုၵ်းတီႈဝဵင်းမဵၵ်ႉထီႇလႃႇ ၊ မၼ်းထၢမ်ၶႃႈဝႃႈ ၶႃႈပဵၼ်သင်ၵၼ်တင်း ဢွင်ႇၵူဝ်ႇၵူဝ်ႇ ၼႆဝႃႇ၊ မၼ်းလၢတ်ႈဝႃႈ ပေႃးၶႂ်ႈလႆႈတူဝ် ဢွင်ႇၵူဝ်ႇၵူဝ်ႇၶိုၼ်းၼႆတေလႆႈဢဝ်ငိုၼ်း 7 သႅၼ်ပျႃး မႃးထုၵ်ႈဢဝ်တီႈမဵၵ်ႉထီႉလႃႇၼႆဢေႃႈ။ မိူဝ်ႈသိုပ်ႇၾူင်းလၢတ်ႈမႃးတႄႉ ၶႃႈဢမ်ႇလႆႈလၢတ်ႈတေႃႇ ၵၼ် တင်း ဢွင်ႇၵူဝ်ႇၵူဝ်ႇ တေဝႃႈဢမ်ႇယုမ်ႇၼႆၵေႃႈ သမ်ႉလၢတ်ႈၼႄမၢႆၾၢင်ၸိူဝ်းၼႆႉပႃး ဢမ်ႇပေႃးႁတ်းယုမ်ႇတေႉတေႉၵူဝ်ႇၺႃးၵူၼ်းလႅၼ် ”- ဝႃႈၼႆ ။
ငဝ်းလၢႆးဝၢၼ်ႈမိူင်းဢမ်ႇလီၸိူင်ႉၼႆႉ လုၵ်ႈဢွၼ်ႇၸၢႆး လုၵ်ႈဢွၼ်ႇယိင်းၵေႃႈ မီးၽေးၼမ်၊ ၵႆႉႁၢႆ ၼႃႇ၊ ၽေးၵၢၼ်လၵ်ႉၵူၼ်း ၵႃႉၶၢႆၵူၼ်း ႁူၺ်းႁွင်ႉၵႂႃႇႁဵတ်းၵၢၼ်ၵျႃႊၽျႅၼ်ႉ၊ တီႉၺွပ်း ၵႂႃႇၾိုၵ်း ၵၢၼ်သိုၵ်း ၸဵမ် ၸိူဝ်းၼႆႉ။ ၵွပ်ႈၼႆ ယူႇတီႈပေႃႈမႄႈၽူႈၵုမ်းတူၺ်းသေ ႁႂ်ႈၾၢင်ႉ လုၵ်ႈၽႂ်လၢင်းမၼ်းလီလီ – ၵူၼ်းၸွႆႈထႅမ်ၵူၼ်းပၢႆႈၽေးသိုၵ်းၵေႃႉၼိုင်ႈၵေႃႈလၢတ်ႈၼင်ႇၼႆ ။
ၵဵဝ်ၵပ်းလွင်ႈၼႆႉ ၼၢင်းယိင်းႁဵတ်းၵၢၼ်သုၼ်ႇလႆႈသုၼ်ႇပဵၼ်ၵူၼ်းပၼ်ၾၢင်ႉလၢတ်ႈဝႃႈ -“ပေႃးမႃးတူၺ်း ငဝ်းလၢႆး ပိုၼ်ႉတီႈတလဵဝ်ၼႆႉ ပေႃးဢမ်ႇပိုၼ်ၽၢဝ်ႇႁဵတ်းၼၼ်ၵေႃႈ ဢမ်ႇၸၢင်ႈ ပိုင်ႈဢိင်ၽႂ် ဢမ်ႇၸၢင်ႈႁဵတ်း ၸိူင်ႉႁိုဝ်လႆႈ ။ ၵူၺ်းၵႃႈ လူဝ်ႇဝူၼ်ႉလွင်ႈႁူမ်ႇလူမ်ႈဢွၼ်တၢင်း သုတ်း ၊ ၶေႃႈမုလ်းၸိူဝ်းၼႆႉၵေႃႈ လမ်ႇလွင်ႈ ၊ ယွၼ်ႉၼၼ် ပေႃးတေတၢင်ႇ ၼိူဝ်သိုဝ်ႇၵေႃႈ မီးလွင်ႈလီ ၊ လွင်ႈႁၢႆႉပႃးမႃးၸွမ်း။ လွင်ႈၼႆႉၵေႃႈ ၶႂ်ႈႁႂ်ႈ ၵူၼ်းပိုၼ်ႉတီႈ ဝူၼ်ႉသွၼ်ႇပႃး ။ ၽွၼ်းလီမၼ်းတႄႉၵေႃႈ ၶဝ်ႈထိုင်လႆႈၵူၼ်းဝႆး ၊ ၽွၼ်းၸႃႉမၼ်း တႄႉၵေႃႈ ၶေႃႈမုလ်း တီႈယူႇ ၸဝ်ႈၵဝ်ႇ ၵူၼ်းတင်းၼမ်တေႁူႉလႄႈ တေဢမ်ႇမီးလွင်ႈႁူမ်ႇလူမ်ႈ ၸၢင်ႈမီး လွင်ႈၶဵင်ႇတႃႉ မႃးၸွမ်း”- ဝႃႈၼႆ ။
မိူၼ်ၼင်ႇၼႆ ၼႂ်းဝၼ်းတီႈ 12/10 /2025 ယၢမ်းၵၢင်ၼႂ် 11 မူင်း ၵူဝ်ႇယႄးတူႇရဢွင်ႇ 28 ပီ ယူႇပွၵ်ႉၵျွင်းၵျီးၸူႉ ဝဵင်းတူၼ်ႈတီး မၼ်းၸၢႆးလၢတ်ႈၵူၼ်းတီႈႁိူၼ်းဝႃႈ တေၵႂႃႇတၢင်းၼွၵ်ႈၵမ်းၼိုင်ႈၼႆသေ ႁၢႆၵႂႃႇ ႁိုင်ထိုင်ဝၼ်းမိူဝ်ႈၼႆႉ ပႆႇပွၵ်ႈမႃးႁိူၼ်းၶိုၼ်း ၵူၼ်းႁိူၼ်းမႆႈၸႂ်ဝႆႉ ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ