ပီ 2025 ၼႆႉ ၵၢၼ်မိူင်းလၢႆၸိုင်ႈမိူင်းၵေႃႈ မီးလွင်ႈလႅၵ်ႈလၢႆႈတင်းၼမ် ၸိူဝ်းပဵၼ်ပၢင်တိုၵ်းၵေႃႈပဵၼ် ၊ ၸိူဝ်းဢွၵ်ႇသၢၼ်ၶတ်းလူင်ပွင်ၸိုင်ႈဝၢၼ်ႈမိူင်းၽႂ်မၼ်းၵေႃႈမီး ။ မိူၼ်မိူင်းႁူမ်ႈတုမ်မၢၼ်ႈၵေႃႈ သိုၵ်းမၢၼ်ႈ ၶိၼ်တေၸတ်းပၢင်လိူၵ်ႈတင်ႈ ။ မိူင်းထႆး ဢၼ်ပဵၼ်မိူင်းဢၼ်ယူႇဢိူမ်ႈၸမ်ၵၼ်တင်းမိူင်းႁူမ်ႈတုမ်မၢၼ်ႈၵေႃႈဝႃႈ ပိုၼ်ၽၢဝ်ႇတေၸတ်းပၢင်လိူၵ်ႈတင်ႈၶိုၼ်ႈမႃးထႅင်ႈ ။ ဢမ်ႇဝႃႈ ၵူၼ်းမိူင်းတႆး မိူင်းမၢၼ်ႈ ဢမ်ႇပူၼ်ႉလွတ်ႈလႆႈ လွင်ႈပၢင်လိူၵ်ႈၸိူဝ်းၼႆႉ ။

ၵူၼ်းမိူင်းတႆးမိူင်းမၢၼ်ႈ ၸိူဝ်းပၢႆႈသွၼ်ႈထိုင်မိူင်းထႆးၵေႃႈ ဝႄႈဢမ်ႇလွတ်ႈလႆႈၶေႃႈၵႂၢမ်းဢၼ်ဝႃႈ ပၢင်လိူၵ်ႈတင်ႈ ။ ၸင်ႇၼၼ် လွင်ႈပၢင်လိူၵ်ႈတင်ႈၼႂ်းမိူင်းထႆးၵေႃႈ ၵိုင်ႇလီႁူႉဝႆႉ ။ဝၢႆးသေ ၸွမ်ၽွင်းလူင်မိူင်းထႆး ဢၼုထိၼ်ႊ ၶျၢၼ်ႊဝီႊရၵုၼ်ႊ ၵိုတ်းပႅတ်ႈသၽႃးယဝ်ႉ ၶွမ်ႊမသျိၼ်ႊပၢင်လိူၵ်ႈတင်ႈမိူင်းထႆး ပိုၼ်ၽၢဝ်ႇဝႆႉဝႃႈ ဝၼ်းတီႈ 08/02/2026 ၼႆႉ တေၸတ်းပၢင်လိူၵ်ႈတင်ႈမႂ်ႇ ။

ဝၼ်းတီႈ 11/12/2025 ၼၼ်ႉ ၼႂ်းသၽႃးၸိုင်ႈထႆး မီးလွင်ႈဢုပ်ႇဢူဝ်းငူပ်ႉငီႉၵၼ် တႃႇမူၼ်ႉမႄး ပိူင်ငဝ်ႈပိုင်းမိူင်း မတ်ႉတႃ 256/28 ၊ ၵဵဝ်ႇလွင်ႈၼႆႉသေ ၾၢႆႇပႃႇတီႇပရႃႊၶျႃႊၶျူၼ်ႊ ဢွၵ်ႇသဵင်ဝႃႈ ဢမ်ႇမီးလွင်ႈယုမ်ႇယမ်ၼိူဝ် ၸွမ်ၽွင်းလူင် ဢၼုထိၼ်ႊ ၼႆသေလႄႈ ၸင်ႇၵိုတ်းပႅတ်ႈသၽႃး။

ၸွမ်းၼင်ႇ ပိူင်ငဝ်ပိုင်းမိူင်း ၸိုင်ႈထႆး 2016 ၼၼ်ႉတႄႉ ပိူင်းၼႄဝႆႉဝႃႈ ဝၢႆးၵိုတ်းသၽႃးယဝ်ႉ ၶၢဝ်းတၢင်း 60 ဝၼ်း တၵ်းတေလႆႈၸတ်းပၢင်လိူၵ်ႈတင်ႈမႂ်ႇၶိုၼ်း ။
ၼႂ်းၶၢဝ်းတၢင်း 2 ပီမႃးၼႆႉၵူၺ်း ၸွမ်ၽွင်းလူင်ၸိုင်ႈထႆး လႅၵ်ႈလၢႆႈ 3 ၵေႃႉ ပႃးၵေႃႉၼႆႉ ဝၢႆး ၸွမ်ၽွင်းလူင် (ၵေႃႉၵဝ်ႇ) မိူင်းထႆး ၽႄႊထွင်ႊထၢၼ်ႊသျိၼ်ႊၼဝပ်ႊ ထွၼ်တူဝ်ဢွၵ်ႇ။
ၸွမ်ၽွင်းလူင် ဢၼုထိၼ်ႊ ၶျၢၼ်ႊဝီႊရၵုၼ်ႊ ၼႆႉ ၶိုၼ်ႈပဵၼ် ၸွမ်ၽွင်းလူင်ၸိုင်ႈထႆး ၵေႃႉထူၼ်ႈ 32 တိုၵ်ႉမီးၶၢဝ်းတၢင်း 3 လိူၼ်ၵူၺ်း သမ်ႉပေႃးၵိုတ်းပႅတ်ႈသၽႃး ။
ၸင်ႇၼၼ်လႄႈ တေၶိုၼ်းၸတ်းပၢင်လိူၵ်ႈတင်ႈ ၼႆ ၾၢႆႇၶွမ်ႊမသျိၼ်ႊပၢင်လိူၵ်ႈတင်ႈၸိုင်ႈထႆး ပိုၼ်ၽၢဝ်ႇၵႂႃႇ မိူဝ်ႈဝၼ်းတီႈ 15/12/2025 ၼႆႉ ။

တႄႇဢဝ် ဝၼ်းတီႈ 20/12/2025 ထိုင် 05/01/2026 ၼႆႉ ႁႂ်ႈၵူၼ်းမိူင်းၵႂႃႇသႂ်ႇသဵၼ်ႈၸိုဝ်ႈတႃႇတွတ်ႈၶႅပ်းၵၢင်ၸႂ်လူင်ႈၼႃႈ ဢမ်ႇဝႃႈ ၵူၼ်းၼႂ်းမိူင်း ႁိုဝ် ၵူၼ်းမိူင်းၸိူဝ်းၵႂႃႇမီးတၢင်ႇတီႈသီႇလႅၼ် တီႈဢမ်ႇၸႂ်ႈၶဵတ်ႇပၢင်လိူၵ်ႈတင်ႈတူဝ်ၵဝ်ႇ ။ လႄႈၵူၼ်းမိူင်း ၸိူဝ်းၵႂႃႇတူၵ်းတၢင်ႇၸိုင်ႈမိူင်းၵေႃႈ ႁႂ်ႈတၢင်ႇသဵၼ်ႈမၢႆၼႂ်းၶၢဝ်းယၢမ်းဢၼ်လၢတ်ႈဝႆႉၼႆႉ ဝႃႈၼႆ။

ဝၼ်းတီႈ 27-31/12/2025 ၼႆႉ ႁႂ်ႈၼေႃႇၽူႈတႅၼ်း ၶဵတ်ႇလႂ်ၶဵတ်ႇၼၼ်ႉ ယိုၼ်ႈတၢင်ႇသဵၼ်ႈၸိုဝ်ႈ တႃႇၶဝ်ႈလိူၵ်ႈတင်ႈ ၊ ဝၼ်းတီႈ 28-31/12/2025 ၼႆႉသမ်ႉ ႁႂ်ႈၼေႃႇၽူႈတႅၼ်း ဢၼ်တေဢဝ်ၸိုဝ်ႈပႃႇတီႇသေ ၶဝ်ႈလိူၵ်ႈတင်ႈၼၼ်ႉ တၢင်ႇသဵၼ်ႈၸိုဝ်ႈလိူၵ်ႈတင်ႈ ။ လႄႈ ႁႂ်ႈၸႅင်ႈၼႄၵူၼ်းတင်းၼမ်ႁူႉဝႃႈ ၽူႈလႂ် ပဵၼ်ၵူၼ်းဢၼ်တေၵိုင်ႇထိူၵ်ႈပဵၼ် ၸွမ်ၽွင်းလူင် ၼႂ်းပႃႇတီႇၽႂ်မၼ်း။

ပေႃးထိုင်မႃး ဝၼ်းတီႈ 01/02/2026 ပဵၼ်ဝၼ်းဢၼ် တေလႆႈတွတ်ႈၶႅပ်းၵၢင်ၸႂ်လူင်ႈၼႃႈ လႄႈ ၸဵမ်ဢဝ်ၵူၼ်းယူႇတီႈၵႆ ဢမ်ႇၸၢင်ႈထိုင်လႆႈၶဵတ်ႇလိူၵ်ႈတင်ႈလႄႈသင် ၵူၼ်းၸိူဝ်းဢၼ်ဢမ်ႇပိုင်ႈတူဝ်ၵဝ်ႇလႆႈ( ပဵၼ်ၵူၼ်းဢမ်ႇၶႅင်ႁႅင်း) ၸိူဝ်းၼႆႉလႄႈသင် ႁႂ်ႈတွတ်ႈၶႅပ်းသဵင်လူင်ႈၼႃႈ။

ဝၼ်းတီႈ 08/02/2025 ၼႆႉသမ်ႉ ပဵၼ်ဝၼ်းလိူၵ်ႈတင်ႈ ပဵၼ်ဝၼ်းတွတ်ႈၶႅပ်းၵၢင်ၸႂ် ၸွမ်းၶဵတ်ႇလိူၵ်ႈတင်ႈၽႂ်မၼ်းမီးဝႆႉဝႃႈၼႆ။
ၸွမ်းၼင်ႇ သၽႃးမိူင်းထႆး ပိုၼ်ၽၢဝ်ႇ မိူဝ်ႈဝၼ်းတီႈ 22/02/2024 ၼၼ်တႄႉ ပႃႇတီႇဢၼ် တၢင်ႇမၢႆၾၢင်ၶဝ်ႈလိူၵ်ႈတင်ႈ မီး 76 ပႃႇတီႇ ၊ ၵိင်ႇၽႄပႃႇတီႇ မီး 709 ပႃႇတီႇ ၊ မီးၼေႃႇတႅၼ်းၽွင်း 709 ၵေႃႉ ။
ပႃႇတီႇဢၼ်ၽွမ်ႉလႄႈတူဝ်ႈတၼ်း တႃႇတေၶဝ်ႈပဵၼ်လူင်ပွင်ၸိုင်ႈ ထၢင်ႇၸႅင်ႈၼႆႉ ပဵၼ်ပႃႇတီႇၽိူဝ်ႉထႆး ၊ ပႃႇတီႇၽုမ်ႊၵျႆႊထႆး ၊ ပႃႇတီႇ ပရၶျႃႊၶျူၼ်ႊ ။ ဢၼ်ႁၢင်ႈႁႅၼ်းတူဝ်ႈတၼ်းသေ ဢၼ်ႁဵတ်းၼႄၵႃႈၶၼ်ပႃႇတီႇ ႁႂ်ႈၵူၼ်းၼမ်ႁပ်ႉလႆႈၼၼ်ႉၵေႃႈ ပဵၼ်ပႃႇတီႇပရၶျႃႊၶျူၼ်ႊ ၼႆ ၽူႈထတ်းသၢင်ၵၢၼ်မိူင်းၵေႃႉၼိုင်ႈ လၢတ်ႈတီႈ Thai PBS ၼင်ႇၼႆ။
ၽူႈထတ်းသၢင်ၵၢၼ်မိူင်းၼၼ်ႉသိုပ်ႇလၢတ်ႈဝႃႈ – ပဵၼ်ပႃႇတီႇလႂ်ၶိုၼ်ႈပဵၼ်မႃး လူင်ပွင်ၸိုင်ႈၵေႃႉယဝ်ႉ လွၵ်းၸုၵ်းၶဝ်မီးၸိူင်ႉႁိုဝ်ၵေႃႈယဝ်ႉ ၵၢၼ်ဢၼ်ၶဝ် တေဝႄႈဢမ်ႇလွတ်ႈတႄႉ ပဵၼ်ၵၢၼ်ႁႃၵိၼ်လဵင်ႉတွင်ႉၵူၼ်းမိူင်း ၊ လွင်ႈပၼ်ႁႃလႅၼ်လိၼ် ၊ လွင်ႈလွၵ်ႇလႅၼ်ၵိၼ်ငိုၼ်းဢွၼ်ႊလၢႆႊ လႄႈ ၽေးသၽႃႇဝႃႉ ၸိူဝ်းၼႆႉ။

ၵူၺ်းၵႃႈ ယူႇတီႈပႃႇတီႇလႂ်ပႃႇတီႇၼၼ်ႉသေ တေဢဝ်ႁူဝ်ၶေႃႈပၼ်ႁႃ လိူင်ႈလၢဝ်းၸိူဝ်းၼၼ်ႉမႃးႁႃသဵင်ၸိူင်ႉႁိုဝ် ၊ ၸွင်ႇသမ်ႉ တေၸၼ်ၸႂ်ၵူၼ်းမိူင်းလႆႈတႄႉ။
တူဝ်ယၢင်ႇမၼ်း ၼမ်ႉထူမ်ႈပွတ်းတၢင်းမိူင်းထႆးတွၼ်ႈတႂ်ႈ ႁၢဝ်ႈႁႅင်းၼၼ်ႉ ပႃႇတီႇလႂ်သမ်ႉတေႁတ်းႁပ်ႉပၢၵ်ႇဝႃႈ ပွၵ်ႈၼႃႈ တေဢမ်ႇႁႂ်ႈၼမ်ႉထူမ်ႈ ၊ ႁိုဝ်ဢမ်ႇၼၼ် ၵုင်းထဵပ်ႈ ၊ ၵဵင်းမႂ်ႇ ၸိူဝ်းၼႆႉတႄႇၵႂႃႇ တေႁဵတ်းႁိုဝ် ယႃႇႁႂ်ႈၵူၼ်းမိူင်းထူပ်းၽေးဢၢႆၵႂၼ်းၾုၼ်ႇ PM 2.5 ၼႆၸိူဝ်းၼႆႉ ဝႃႈၼႆ။

ၽူႈထတ်းသၢင်ၵၢၼ်မိူင်း မၢင်ၵေႃႉၵေႃႈဝႃႈ ပႃႇတီႇၽုမ်ႊၵျႆႊထႆး ဢၼ်ၵိုတ်းသၽႃးၵႂႃႇၼႆႉၵူၺ်း ဢၼ်တေမီးဢၢမ်းၼၢတ်ႈသေ ၶိုၼ်ႈမႃးပဵၼ်လူင်ပွင်ၸိုင်ႈထႅင်ႈၵမ်းၼိုင်ႈ ၼႆၸိူဝ်းၼႆႉၵေႃႈမီး။

ပႃႇတီႇလႂ် ပႃႇတီႇၼၼ်ႉတႄႉ လၢတ်ႈဝႃႈ တႃႇၵူၼ်းမိူင်းၼႆလွၼ်ႉလွၼ်ႉ ။ ၵူၺ်းၵႃႈ ဢိင်ၼိူဝ် ပေႃႊလသီႊၶဝ်လႄႈသင် ၊ ဢိင်ၼိူဝ်သဵင်ၵၢင်ၸႂ်ၵူၼ်းမိူင်းလႄႈသင်သေ သၽႃးမီးလွင်ႈပိၼ်ႇပၢႆႇလႅၵ်ႈလၢႆႈမႃးၶိူဝ်းယႂ်း။

ၼႂ်းသၽႃး မိူင်းထႆးၼႆႉ တီႈၼင်ႈ တႅၼ်းၽွင်း မီး 500 တီႈၼင်ႈ ၼႂ်းၼၼ်ႉ တီႈၼင်ႈဢၼ်လိူၵ်ႈတင်ႈၸွမ်းၶဵတ်ႇလိူၵ်ႈတင်ႈ မီး 400 တီႈ ၊ တီႈဢၼ် ဢဝ်ၸိုဝ်ႈပႃႇတီႇသေ လိူၵ်ႈတင်ႈၸွမ်းပုၼ်ႈသုၼ်ႇ သမ်ႉ မီး 100 တီႈ ။

သင်ဝႃႈ လိူၵ်ႈတင်ႈယဝ်ႉတူဝ်ႈလီငၢမ်းယဝ်ႉ ၾၢႆႇၶွမ်ႊမသျိၼ်ႊပၢင်လိူၵ်ႈတင်ႈမိူင်းထႆး တေပိုၼ်ၽၢဝ်ႇပၼ် သဵၼ်ႈမၢႆမၼ်း ၼႂ်းဝၼ်းတီႈ 03/04/2026 ဝႃႈၼႆ။
ဝၢႆးသေ ပိုၼ်ၽၢဝ်ႇ ၽွၼ်းပၢင်ႈပၢင်လိူၵ်ႈၼၼ်ႉယဝ်ႉ ၼပ်ႉဢဝ်ဝၼ်းၼၼ်ႉၵႂႃႇ 15 ဝၼ်း တေၶတ်းလိူၵ်ႈဢဝ် ႁူဝ်ပဝ်ႈသၽႃးၵေႃႉမႂ်ႇ ၊ ဝၢႆးၼၼ်ႉၵေႃႈ တေပၼ်သဵင်ၵၢင်ၸႂ် လိူၵ်ႈဢဝ် ၸွမ်ၽွင်းလူင်မိူင်းထႆး ၵေႃႉမႂ်ႇၵႂႃႇ ၼႆ – Thai PBS ႁၢႆးငၢၼ်းဝႆႉၼင်ႇၼႆ။

မိူင်းၸိုင်ႈထႆးၼႆႉၵေႃႈ ဝၢႆးလင်လႅၵ်ႈလၢႆႈလၢႆးပိူင်ၽွင်းငမ်းယဝ်ႉ ယၢမ်ႈမီးလွင်ႈယိုတ်းဢႃႇၼႃႇၸိုင်ႈမိူင်းမႃး 13 ၵမ်း ။
မိူဝ်ႈပၢၼ် ထၵ်းသိၼ် သျိၼ်ႊၼဝတ်ႊ ၸွမ်ၽွင်းလူင်ၸိုင်ႈထႆးၵေႃႉၵဝ်ႇၼၼ်ႉၵေႃႈ ထုၵ်ႇၼႄးဝႃႈ မၼ်းၸၢႆးၵိၼ်ငိုၼ်းသူးငိုၼ်းလၢပ်ႈ ႁဵတ်းႁႂ်ႈဝၢၼ်ႈမိူင်းဢမ်ႇၵတ်းယဵၼ်ၼႆသေ ၸွမ်သိုၵ်းလူင် သူၼ်ႊထိ ပုၼ်ႊယႃႊရတ်ႉ ၵလိၼ်ႊ ယိုတ်းဢႃႇၼႃႇၸိုင်ႈမိူင်းမိူဝ်ႈ 2006 သေ ဢဝ် သူႊရယုတ်ႉ ၵျုလႃႊၼူၼ်ႊ ၶိုၼ်ႈပဵၼ်ၸွမ်ၽွင်းလူင် ၵေႃႉထူၼ်ႈ 24 ၽွင်းပၢၼ်လူင်ပွင်ၸိုင်ႈပႂ်ႉႁိူၼ်း။

ဝၢႆးၼၼ်ႉ ၶိုၼ်းၸတ်းပၢင်လိူၵ်ႈတင်ႈသေ ဢဝ်ဢႃႇၼႃႇၸိုင်ႈမိူင်းမွပ်ႈပၼ်ၼႂ်းမိုဝ်းၵူၼ်းမိူင်းၶိုၼ်းယဝ်ႉသေတႃႉ လွင်ႈသုၵ်ႉယုင်ႈလူင်ၼႂ်းၸိုင်ႈထႆး ပၼ်ႁႃသိူဝ်ႈလႅင် သိူဝ်ႈလိူင်ႁိမ်ဢႃႇၼႃႇၵၼ်ဢမ်ႇယဝ်ႉဢမ်ႇတူဝ်ႈ ၼႄၵၢင်ၸႂ်တေႃႇၵၼ်ပတ်းပိုၼ်ႉၸိုင်ႈမိူင်း၊ ယူႇယူႇ ၶႃႈႁႅမ်ၵၼ်တၢႆ၊ ပွႆႇမၢၵ်ႇတေႃႇၵၼ်ၼႂ်းၵၢင်ဝဵင်း ၵူၼ်းမိူင်းၸိူဝ်းဢမ်ႇၵဵဝ်ႇၶွင်ႈၵၢၼ်မိူင်း ၵမ်းၵမ်းၺႃးၶႃႈႁႅမ် -ထိုင်တီႈ ၸွမ်သိုၵ်းလူင်ပရႃႊယုတ်းၸၼ်ႊဢူဝ်ႊၶျႃႊ ယိုတ်းဢႃႇၼႃႇထႅင်ႈၵမ်းၼိုင် ၽွင်းပီ 2014 ။ ၽွင်းၼၼ်ႉၵေႃႈ ၸွမ်ၽွင်းလူင်ၸိုင်ႈထႆး ပဵၼ်ၼၢင်းသၢဝ်ယိင်ႉလၵ်းသျိၼ်ႊၼဝတ်း (ၼွင်ႉယိင်း ထၵ်းသိၼ် သျိၼ်ႊၼဝတ်ႊ) ။

တူဝ် ထၵ်းသိၼ် သျိၼ်ႊၼဝတ်ႊ တႄႉၸဵမ်မိူဝ်ႈၺႃးယိုတ်းဢႃႇၼႃႇပွၵ်ႈဢွၼ်တၢင်းသေ ပၢႆႈဢွၵ်ႇၵႂႃႇယူႇၼွၵ်ႈမိူင်း မိူဝ်ႈပီ 2007 ။ ထိုင်မႃးပီ 2009 ႁူဝ်ပီ ထၵ်းသိၼ် ပွၵ်ႈၶိုၼ်းမိူင်းထႆးသေ ႁပ်ႉလွင်ႈထတ်းထွင်ထႅင်ႈ။ ဝၢႆးၼၼ်ႉ ဢမ်ႇႁိုင် ၶိုၼ်းဢွၵ်ႇၵႂႃႇယူႇဝဵင်းလူင်လၼ်ႊတၼ်ႊ မိူင်းဢိင်းၵလဵတ်ႈ။

ၵူၺ်းၵႃႈ ၼႂ်းၵၢၼ်မိူင်း မိူင်းထႆးတႄႉ ပီႈၼွင်ႉၶိူဝ်းလဵဝ်ၵၼ်တင်းထၵ်းသိၼ် ၶဝ်ႈပၢင်လိူၵ်ႈတင်ႈၸွမ်းၵူႈၵမ်း။ လႆႈၶိုၼ်ႈပဵၼ်ၸွမ်ၽွင်းလူင်ထႅင်ႈ 3 ၵေႃႉ။
ပီ 2008 ၼွင်ႉၶူၺ်မၼ်းၸၢႆး ဢၼ်ပဵၼ်သူမ်ၶျၢႆးဝူင်း သဝတ်ႇၼၼ်ႉ ၶိုၼ်ႈပဵၼ်ၸွမ်ၽွင်းလူင် တႃႇ 2 လိူၼ်ပၢႆ။ ပီ 2011 ထိုင် 2014 – ၼွင်ႉယိင်းမၼ်းၸၢႆး ဢၼ်ပဵၼ်ၼၢင်းသၢဝ် ယိင်ႉလၵ်း သျိၼ်ႊၼဝတ်ႊ ပဵၼ်ၸွမ်ၽွင်းလူင်။ ထိုင်မႃးပီ – 2024 ထိုင် 2025 လုၵ်ႈယိင်းမၼ်းၸၢႆး ဢၼ်ပဵၼ်ၼၢင်းသၢဝ် ၽႄးထွင်းထၢၼ်း သျိၼ်ႊၼဝတ်ႊ ၶိုၼ်ႈပဵၼ်ၸွမ်ၽွင်းလူင်တႃႇ 1 ပီ။

ၼၢင်းသၢဝ်ၽႄႊထွင်ႊထၢၼ်ႊ သျိၼ်ႊၼဝတ်ႊ ၼႆႉ ပဵၼ်လုၵ်ႈယိင်း ၸွမ်ၽွင်းလူင်ၵဝ်ႇ ထၵ်းသိၼ် သျိၼ်ႊၼဝတ်ႊ။ မၼ်းၼၢင်းၼႆႉပဵၼ်ၸွမ်ၽွင်းလူင်ၸိုင်ႈထႆးၵေႃႉထူၼ်ႈ 31 ၶွင်မိူင်းၸိုင်ႈထႆး။

22/10/2025 ၼႆႉ ဢိင်ၼိူဝ် ပၼ်ႁႃ ၶေႃႈမုလ်း သွင်ၸိုင်ႈမိူင်း ထႆးလႄႈၵမ်ႊပူႊၶျႃႊ ႁူဝ်ႈၼၼ်ႉသေ ၸွမ်ၽွင်းလူင် မိူင်းထႆး ၽႄႊထွင်ႊထၢၼ်ႊသျိၼ်ႊၼဝပ်ႊ ထွၼ်တူဝ်ဢွၵ်ႇတၼ်းႁဵင်း ။

ၵမ်းလိုၼ်း ၸင်ႇမီးမႃး ၸွမ်ၽွင်းလူင် ၵေႃႉထူၼ်ႈ 32 ဢၼုထိၼ်ႊ ၶျၢၼ်ႊဝီႊရၵုၼ်ႊ ။ သမ်ႉၵိုတ်းပႅတ်ႈသၽႃးယဝ်ႉလႄႈ ၸင်ႇဝႃႈ တေၸတ်းပၢင်လိူၵ်ႈတင်ႈထႅင်ႈ ဝၼ်းတီႈ 08/02/2026 ၼႆႉ ။ ႁဝ်းၶႃႈ ဢွၼ်ၵၼ် သိုပ်ႇပႂ်ႉတူၺ်းထႅင်ႈဝႃႈ ၽႂ်တေပဵၼ် ၸွမ်ၽွင်းလူင်မိူင်းၸိုင်ႈထႆး ၵေႃႉ ထူၼ်ႈ 33 ၼႆၼၼ်ႉၶႃႈၼေႃႈ။