ဝၢႆးလင် ၸုမ်းလုၵ်ႉၽိုၼ်ႉထွႆဢွၵ်ႇ ဝဵင်းၾၢႆၶုၼ်ယဝ်ႉ တႄႇဢဝ်လိူၼ်ၵျူႊလၢႆႊၼႆႉမႃး သိုၵ်းမၢၼ်ႈႁူမ်ႈပျီႇတူႉၸိတ်ႉ ၶဝ်ႈပၵ်းတပ်ႉ ၼႂ်းဝၢၼ်ႈ သင်ႇႁႂ်ႈၵူၼ်းပၢႆႈၽေးသိုၵ်း မႃးဢဝ်ဝႂ်ႁပ်ႉႁွင်းတီႈလုမ်းၵူတ်ႇထတ်းသဵၼ်ႈမၢႆႁူဝ်ၵူၼ်းသေ ပွၵ်ႈယူႇႁိူၼ်းယေးၽႂ်မၼ်းၶိုၼ်း ။
ပေႃး လဝၵ ထတ်းလႄႈ ဢမ်ႇၸႂ်ႈ ၵူၼ်းၼႂ်းၸႄႈဝဵင်းၾၢႆၶုၼ် ဢမ်ႇပၼ်ၶဝ်ႈယူႇၶိုၼ်းၼႂ်းဝဵင်း ဝႃႈၼႆ။
ၵူၼ်းၸွႆႈထႅမ် ၵူၼ်းပၢႆႈၽေးသိုၵ်းပၢင်လွင်း-ၾၢႆၶုၼ်လၢတ်ႈၽူႈတွႆႇႁွၵ်ႈဝႃႈ -“ၶဝ်( သိုၵ်းမၢၼ်ႈ ) ႁွင်ႉပွၵ်ႈမိူဝ်းၶိုၼ်းႁိူၼ်း။ ၵူၼ်းပၢႆႈၽေးသိုၵ်း မၢင်ၸိူဝ်း ဢမ်ႇမီးႁိူၼ်းတႃႇယူႇယဝ်ႉ တေမိူဝ်းယူႇတီႈလႂ်။ လိူဝ်ၼၼ်ႉ သမ်ႉၸႂ်ႉၵႂႃႇဢဝ်ဝႂ်ႁပ်ႉႁွင်းထႅင်ႈတီႈလဝၵ ထႅင်ႈ။ ထတ်းထတ်းထၢမ်ထၢမ် ပေႃးဢမ်ႇၸႂ်ႈၵူၼ်းမိူင်းၾၢႆၶုၼ် ဢမ်ႇပၼ်ၶဝ်ႈဝဵင်း”- ဝႃႈၼႆထႅင်ႈ။
ၵူၼ်းပၢႆႈၽေးသိုၵ်းၸိူဝ်းပွၵ်ႈၶိုၼ်းၼၼ်ႉ ႁိူၼ်းယေးမၢင်လင် ၺႃးၽဝ်ပႅတ်ႈ။ မၢင်လင် ၺႃးမၢၵ်ႇလူင်တူၵ်းသႂ်ႇ မႆႈၶိုင်ႈ ၵွႆၶိုင်ႈၵေႃႈမီး။ ဢမ်ႇၸၢင်ႈၶိုၼ်းမႄး ပူၵ်းပွင် ၵုမ်းၵေႃႇၵမ်းလဵဝ်။ လႆႈၵႂႃႇၼွၼ်းတီႈၵျွင်းမုၼ်ၸဝ်ႈၵေႃႈမီး ၵူၼ်းပိုၼ်ႉတီႈလၢတ်ႈၼင်ႇၼႆ။
လိူဝ်ၼၼ်ႉ သိုၵ်းမၢၼ်ႈႁႄႉႁၢမ်ႈသဵၼ်ႈတၢင်းၼမ်ႉ တၢင်းဝၢၼ်ႈၺွင်ႇမူၼ်း ၊ ဝၢၼ်ႈလိၼ်ပူၵ်ႇလူင် ၸိူဝ်းမီးၾၢႆႇဢွၵ်ႇၼမ်ႉၾၢႆၶုၼ် ဢမ်ႇပၼ်ဢဝ်ႁိူဝ်းၸၢၵ်ႈ ၵႂႃႇၼႂ်းဝဵင်းၾၢႆၶုၼ် ႁဵတ်းႁႂ်ႈ ၵူၼ်းမိူင်းပိုၼ်ႉတီႈ ယၢပ်ႇၽိုတ်ႇတႃႇ ႁႃၵိၼ်လဵင်ႉတွင်ႉ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ၶဝ်ႁၢမ်ႈတၢင်းၼမ်ႉၼႆႉ ၸဵမ်မိူဝ်ႈပဵၼ် ပၢင်တိုၵ်း ၵၼ်ယဝ်ႉ ဢမ်ႇၸၢင်ႈၵႂႃႇမႃး ။ ပေႃးၶႂ်ႈၵႂႃႇ လႆႈၵႂႃႇသဵၼ်ႈတၢင်းရူတ်ႉၵႃးၵူၺ်း ၊ သဵၼ်ႈတၢင်း ရူတ်ႉၵႃးသမ်ႉၶဝ်ၵူတ်ႇထတ်းႁႅင်းၼႃႇ ၊ ၸုမ်းလုၵ်ႉၽိုၼ်ႉၶဝ် ၸႂ်ႉသဵၼ်ႈတၢင်းၼမ်ႉသေ ၵႆႉၵႂႃႇယိုဝ်း တပ်ႉၶဝ်ၸိူဝ်းၼၼ်ႉလႄႈ ၶဝ်ပိၵ်ႉပႅတ်ႈ ၼႂ်းဝဵင်းၾၢႆၶုၼ်ၵေႃႈ ဢမ်ႇၸၢင်ႈၵႂႃႇၶႃႈ ”- ဝႃႈၼႆ ။
ဝၢၼ်ႈၺွင်ႇမူၼ်းလႄႈ ဝၢၼ်ႈလိၼ်ပူၵ်ႇလူင် ဢၼ်သိုၵ်းမၢၼ်ႈႁႄႉႁၢမ်ႈသဵၼ်ႈတၢင်းၼမ်ႉၼႆႉ မီးၾၢႆႇဢွၵ်ႇဝဵင်းၾၢႆၶုၼ် ယၼ်ၵႆၵၼ် 6 လၵ်း ။
ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၾၢႆၶုၼ် မိူၼ်ၼင်ႇ ဝၢၼ်ႈလွႆပဝ်း ၊ ၼမ်ႉသွင်ၼမ်ႉၵႄး၊ လႁႄႇ ၊ ၼႃးၵူင်း ၊ ၺွင်ႇမူၼ်း ၊ ဝၢၼ်ႈလွႆပူၵ်ႇ( တွင်ႇပူဝ်ႉၵျီး) ၊ ၸၢင်ႉၽိူၵ်ႇ ၊ ငႃးမူး လႄႈ ၵူၼ်းပၢႆႈၽေးသိုၵ်း ၼႂ်းၸႄႈဝဵင်း ယွင်ႁူၺ်ႈ မိူၼ်ၼင်ႇ ဝၢၼ်ႈလိၼ်ပူၵ်ႇတႅၵ်ႇ ၊ လွႆလူင် ၸိူဝ်းၼႆႉ ႁူဝ်ၵူၼ်း ၸမ်မိုၼ်ႇ ဢွၼ်ၵၼ်ပွၵ်ႈယူႇၶိုၼ်းႁိူၼ်းယေး ဝႃႈၼႆသေတႃႉ မိူၼ်ၼင်ဝၢၼ်ႈသူၺ်ႇသၼ်ႉ ၊ ၼွင်လႅင် ၸိူဝ်းပဵၼ်ဝၢၼ်ႈယၢင်းလႅင်ၸိူဝ်းၼၼ်ႉတႄႉ ထိုင်ဝၼ်းမိူဝ်ႈၼႆႉ ပႆႇၸၢင်ႈပွၵ်ႈၶိုၼ်းႁိူၼ်းယေး ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၵူၼ်းပၢႆႈၽေးသိုၵ်း ၼႂ်းဝဵင်းၾၢႆၶုၼ်ၼႆႉတင်းပႆႇပွၵ်ႈမိူဝ်းသဵင်ႈၶႃႈ မႃးၶမ်ဝႆႉၸွမ်းဝၢၼ်ႈၼႆႉၵေႃႈမီးတင်းၼမ် ။ ၶဝ် (သိုၵ်းမၢၼ်ႈ) ႁွင်ႉမိူဝ်းၶိုၼ်းသေတႃႉၵေႃႈ ဢမ်ႇမီးၵၢၼ်ႁႃၵိၼ်လဵင်ႉတွင်ႉ ၊ ဢမ်ႇမီးလွင်းႁူမ်ႇလူမ်ႈလႄႈ လႆႈႁဵတ်းၵၢၼ်ႁႃၸဝ်ႉၵိၼ်ၶမ်ႈ ယူႇဝႆႉၸွမ်း ႁိမ်းႁွမ်းဝၢၼ်ႈၵေႃႈမီးတင်းၼမ် ”- ဝႃႈၼႆ ။
တႄႇဢဝ် ႁူဝ်ပီ 2025 ၼၼ်ႉမႃး တေႃႇထိုင်လိူၼ်ၵျူႊလၢႆႊၼႆႉ သိုၵ်းမၢၼ်ႈတင်း ၸုမ်း ပျီႇတူႉၸိတ်ႉ ပဢူဝ်း PNO ႁူမ်ႈၵၼ်သေ လေႃႇတိုၵ်းၸုမ်းလုၵ်ႉၽိုၼ်ႉ ၼႂ်းပိုၼ်ႉတီႈမႃးႁၢဝ်ႈ ႁႅင်း ။ ဝၢႆးၼၼ်ႉ ၼႂ်းဝၼ်းတီႈ 07/07/2025 သိုၵ်းမၢၼ်ႈ ပိုၼ်ၽၢဝ်ႇယိုတ်းၵုမ်းလႆႈၶိုၼ်း ဝဵင်းမိူင်းပၢႆးတင်းသဵင်ႈယဝ်ႉသေ ၸႂ်ႉၵူၼ်းပိုၼ်ႉတီႈ ပွၵ်ႈယူႇၶိုၼ်းႁိူၼ်းၽႂ်မၼ်းၶိုၼ်း ၼႆယဝ်ႉ ။
ယၢမ်းလဵဝ်ၵေႃႈ သိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း တင်း ၸုမ်းလုၵ်ႉၽိုၼ်ႉ ၵႆႉတုမ်ႉတိူဝ်ႉပဵၼ်ပၢင်တိုၵ်းၵၼ်တၢင်းပွတ်းၸႄႈဝဵင်းပၢင်လွင်း- ၾၢႆၶုၼ် လႄႈ ၵူၼ်းပၢႆႈၽေးသိုၵ်းပွၵ်ႈၶိုၼ်းႁိူၼ်းယေးဝဵင်းၾၢႆၶုၼ် ၵႆႉလႆႈယိၼ်း သဵင်မၢၵ်ႇလူင် ၊ သဵင်ႁိူဝ်းမိၼ်ၵူႈဝၼ်း ႁဵတ်းႁႂ်ႈၵူၼ်းပိုၼ်ႉတီႈမႆႈၸႂ်လွင်ႈႁူမ်ႇလူမ်ႈဝႆႉ – ၵူၼ်းပိုၼ်ႉတီႈလၢတ်ႈ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ