မိူဝ်ႈဝၼ်းတီႈ 18 လိူၼ်တီႊသႅမ်ႊပိူဝ်ႊ ၸုမ်းပၵ်းတႃပႂ်ႉတူၺ်း လွင်ႈႁဵတ်းသၢင်ႈသိုၵ်းမၢၼ်ႈ Justice For Myanmar ပိုၼ်ၽၢဝ်ႇဢွၵ်ႇဝႃႈ ၶွမ်ႊပၼီႊသိုဝ်ႇၼႅင်ႈသၢၼ်လၢႆလၢႆဢၼ် ပူတ်းထွၼ်ပႅတ်ႈ ၼႃႈလိၵ်ႈသိုဝ်ႇၼႅင်ႈသၢၼ်ၶွင်သိုၵ်းမၢၼ်ႈတၢင်းဝႅပ်ႉသၢႆႉလႄႈ သိုဝ်ႇတူင်ႇဝူင်းဝႃႈၼႆ။
ယွၼ်ႉသိုၵ်းမၢၼ်ႈပူၼ်ႉပႅၼ် သုၼ်ႇလႆႈၵူၼ်းႁၢဝ်ႈႁႅင်းသေ ၸုမ်းပၵ်းတႃပႂ်ႉတူၺ်းလွင်ႈတူင်ႉၼိုင်သိုၵ်းမၢၼ်ႈ Justice For Myanmar ၸင်ႇလႆႈတႅမ်ႈလိၵ်ႈသူင်ႇထိုင် ၶွမ်ႊပၼီႊလွၵ်းလၢႆးပၢႆးသၢင်ႊ IT လၢႆလၢႆဢၼ်ႁႂ်ႈပၼ်တူတ်ႈတၢမ်ႇဢိုတ်းႁႅတ်ႉသိုၵ်းမၢၼ်ႈ။
ဝၢႆးၼၼ်ႉဢမ်ႇႁိုင်သင်ၶွမ်ႊပၼီႊ Amazon ဢၼ်ၵဵပ်းၶေႃႈမုၼ်းၼၼ်ႉၵေႃႈ ယူႇတီႈ Twitch သေ ထွၼ်ပႅတ်ႈ ၼႃႈလိၵ်ႈသိုဝ်ႇထီႊဝီႊ MRTV လႄႈ ႁူင်းပွႆႇသဵင်ၶွင်သိုၵ်းမၢၼ်ႈ 14 ဢၼ် ။ ၼွၵ်ႈလိူဝ်ၼၼ်ႉ ယႃႇထွၼ်ပႅတ်ႈပႃး Mobile App ၶွင်သိုၵ်းမၢၼ်ႈလၢႆလၢႆဢၼ် ဢၼ်မီးၼႂ်း App Stores၊ Google ၸိူဝ်းၼႆႉ – ဝႃႈၼႆ။
ယူႇတီႈ ၶွမ်ႊပၼီႊ Meta လႄႈ Mediafire သမ်ႉပူတ်းပိၵ်ႉပႅတ်ႈ MITV – Page ၾၢႆႇဢိင်းၵလဵတ်ႈၶွင်သိုၵ်းမၢၼ်ႈ၊ ႁၢမ်ႈပႅတ်ႈပႃး Page – Account ၽိုၼ်ၶၢဝ်ႇ ရတၼႃႇပူင်ႇ (သိုဝ်ႇၶၢဝ်ႇတႂ်ႈ ႁွင်ႈၵၢၼ်ၶၢဝ်ႇ မျႃႉဝတီႇ- ၶွင်တပ်ႉသိုၵ်းမၢၼ်ႈ)။ ယွၼ်ႉဝႃႈ ၶေႃႈမုလ်းလႄႈၶႅပ်းႁၢင်ႈၶွင်ၸုမ်းသိုၵ်းမၢၼ်ႈသမ်ႉ ၵဵပ်းဝႆႉၼႂ်း Mediafire လႄႈ ၸင်ႇလႆႈပိၵ်ႉပႅတ်ႈပႃး Account – Mediafire ၶွင်သိုၵ်းမၢၼ်ႈ။
ယူႇတီႈ Youtube သေ ပိၵ်ႉႁၢမ်ႈပႅတ်ႈ ၼႃႈလိၵ်ႈၶျွင်ႉၶၢဝ်ႇၶွင်ၾၢႆႇပွင်ႇၶၢဝ်ႇသိုၵ်းမၢၼ်ႈဢၼ်ၼိုင်ႈ။
ၼွၵ်ႈလိူဝ်ႈတီႈၸိူဝ်းၼႆႉယဝ်ႉ JFM လႆႈတႅမ်ႈလိၵ်ႈသူင်ႇၸူး ၶွမ်ႊပၼီႊ Alphabet၊ Apple၊ TikTok၊ X ၊ Telegram၊ Cloudflare လႄႈ ApkPure ၶဝ်ၸိူဝ်းၼႆႉပႃးယူႇ – တႃႇႁႂ်ႈပူတ်း/ပိၵ်ႉ/ပၢၵ်ႈ ပႅတ်ႈ ၶျွင်ႉသိုဝ်ႇၼႅင်ႈသၢၼ်ၶွင်ၸုမ်းသိုၵ်းမၢၼ်ႈ ။ ၵူၺ်းၵႃႈ တၢင်းၶွမ်ႊပၼီႊၸိူဝ်းၼႆႉ ပႆႇတွပ်ႇလိၵ်ႈမႃးၶိုၼ်းဝႃႈႁိုဝ် – ဝႃႈၼႆ။
ၼင်ႇႁိုဝ် တေပိုၼ်ၽႄႈလႆႈ ၶေႃႈမုၼ်းၶၢဝ်ႇသၢၼ် လွင်ႈပၢင်လိူၵ်ႈတင်ႈပွမ်၊ ႁူၺ်းသူၼ်းႁႂ်ႈၵူၼ်းၵူႈၸၢဝ်းၶိူဝ်း ၼႂ်းသိုဝ်ႇတူင်ႇဝူင်းၵူၼ်းတႅၵ်ႇယၢႆႈၵၼ်၊ ႁႂ်ႈၵူၼ်းမိူင်းၽိတ်းၽႅၵ်ႇၵၼ်၊ ပွႆႇၶၢဝ်ႇပွမ် ၶၢဝ်ႇၽၢမ်းၸိူဝ်းၼႆႉ သိုၵ်းမၢၼ်ႈယိုတ်းမိူင်း တင်ႈၸႂ် ၶွတ်ႇၽွတ်ႈပဵၼ်ၸုမ်းသေ သၢင်ႈၼႃႈလိၵ်ႈသိုဝ်ႇတူင်ႇဝူင်းၵူၼ်းမႃး ၼမ်ႁႅင်းတေႉတေႉ ၼႆယဝ်ႉ။
တႃႇၵိုတ်းယိုတ်းႁေႉႁၢမ်ႈလႆႈ ၵၢၼ်ႁူၺ်းသူၼ်း၊ ပၢဝ်ႇသေႃႇ ႁႂ်ႈၵူၼ်းမိူင်းပႅင်းၸင်းတေႃႇၵၼ် ၼႂ်းၽႅၼ်ၵၢၼ် ၶွင်သိုၵ်းမၢၼ်ႈ ၼၼ်ႉ ၵၢၼ်ဢိုတ်းပႅတ်ႈသိုဝ်ႇၼႅင်ႈသၢၼ်ၼႆႉ ပဵၼ်လၢႆးတၢင်းလမ်ႇလွင်ႈပိူင်ၼိုင်ႈၼႆ ၸုမ်း ပၵ်းတႃပႂ်ႉတူၺ်း လွင်ႈႁဵတ်းသၢင်ႈသိုၵ်းမၢၼ်ႈ ပိုၼ်ၽၢဝ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ