ပၢင်လိူၵ်ႈတင်ႈဢၼ်သိုၵ်းမၢၼ်ႈယိုတ်းမိူင်း ဢွၼ်ၼမ်းၸတ်းႁဵတ်းယဝ်ႉတူဝ်ႈၵႂႃႇ ပွၵ်ႈၵမ်းၼိုင်ႈ မိူဝ်ႈဝၼ်းတီႈ 28/12/2025 ၼႆႉ မိူင်းတႆးပတ်းပိုၼ်ႉ ပႃး 12 ၸႄႈဝဵင်း၊ ၼႂ်းၼၼ်ႉ မိူင်းတႆးပွတ်းၸၢၼ်း 6 ၸႄႈဝဵင်း၊ မိူင်းတႆးပွတ်းႁွင်ႇ 3 ၸႄႈဝဵင်း လႄႈ မိူင်းတႆးပွတ်းဢွၵ်ႇ 3 ၸႄႈဝဵင်း။ ပႃႇတီႇသၢင်ႇသီႈ USDP ဢွင်ႇပေႉၵႂႃႇ 8 ၸႄႈဝဵင်း။
ၼႂ်းမိူင်းတႆးပတ်းပိုၼ်ႉ 12 ၸႄႈဝဵင်းၼႆႉ ႁူမ်ႈဝႃႈၼႂ်းမိူင်းတႆးပွတ်းႁွင်ႇ လႆႈၸတ်းႁဵတ်းပႃး သၢမ်ၸႄႈဝဵင်းၼႆ သေတႃႉ ၵူၺ်းလႆႈႁဵတ်းၵႂႃႇ ၸွမ်းပွၵ်ႉ၊ ၸွမ်းဢိူင်ႇ ၸိူဝ်းမီးၼႂ်းဝဵင်း ၵူၺ်း။ မိူင်းတႆးပွတ်းၸၢၼ်း လႄႈ မိူင်းတႆး ပွတ်းဢွၵ်ႇတႄႉ လႆႈၸတ်းႁဵတ်းၵႂႃႇ တဵမ်ၵူႈပွၵ်ႉ၊ ၵူႈဢိူင်ႇ၊ ၵူႈဝၢၼ်ႈ။ ၾၢႆႇၼိုင်ႈ ပၢင်လိူၵ်ႈတင်ႈပွၵ်ႈၼႆႉ ယွၼ်ႉပႃႇတီႇၵူႈၸုမ်းဢမ်ႇမီးသုၼ်ႇၶဝ်ႈႁူမ်ႈၸွမ်းလႄႈ ၵူၼ်းမိူင်းၼႂ်းပိုၼ်ႉတီႈတေႉတေႉၵေႃႈ ၸင်ႇဢမ်ႇသူၼ်ၸႂ်ၵႂႃႇသႂ်ႇ ၶႅပ်းၵၢင်ၸႂ်ၵၼ် ၼႆယဝ်ႉ။
ႁူဝ်ပီ 2026 ဝၢႆးလင်ဝၼ်းပၢင်လိူၵ်ႈတင်ႈယဝ်ႉတူဝ်ႈၵႂႃႇ ၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈမိူင်းႁူမ်ႈတုမ် တႂ်ႈဢၢမ်းၼၢတ်ႈသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ ၼေႃႇၽွင်းတႅၼ်း ၸိူဝ်းလႆႈလွင်ႈဢွင်ႇပေႉပၢင်လိူၵ်ႈတင်ႈၵႂႃႇ ဢွင်ႈတီႈၼင်ႈ သၽႃးၵူၼ်းမိူင်းၼႆႉ မိူင်းတႆး ပႃး 12 ၵေႃႉ လႆႈ 12 တီႈၼင်ႈ၊ ၼႂ်း 12 ၵေႃႉၼၼ်ႉ ပႃႇတီႇသၢင်ႇသီႈ (USDP)လႆႈၶႅပ်းၵၢင်ၸႂ်ၼမ်လိူဝ်ပိူၼ်ႈလႄႈ ပေႉၵႂႃႇၼႂ်းမိူင်းတႆးပွတ်းႁွင်ႇ တင်း 3 ဝဵင်း ၊ မိူင်းတႆးပွတ်းဢွၵ်ႇ 3 ဝဵင်း လႄႈ မိူင်းတႆးပွတ်းၸၢၼ်း 2 ဝဵင်း။
ၼႂ်းမိူင်းတႆး 8 ၸႄႈဝဵင်းၸိူဝ်းပႃႇတီႇသၢင်ႇသီႈပေႉၵႂႃႇၼၼ်ႉ ပဵၼ်ၸႄႈဝဵင်းပၢင်လႃႈ၊ ၸႄႈဝဵင်းၼမ်ႉၸၢင်၊ ဝဵင်းလႃႈသဵဝ်ႈ၊ ဝဵင်းမူႇၸေႊ၊ ဝဵင်းၼွင်ၶဵဝ်၊ ၸႄႈဝဵင်းၵဵင်းတုင်၊ ၸႄႈဝဵင်းတႃႈၶီႈလဵၵ်း လႄႈ ၸႄႈဝဵင်းမိူင်းသၢတ်ႇ။
ဢၼ်ၵိုတ်းလိူဝ် 4 ၸႄႈဝဵင်းၼၼ်ႉတႄႉ ပႃႇတီႇပဢူဝ်း (PNO) ပေႉၵႂႃႇ သၢမ်ၸႄႈဝဵင်း ပဵၼ်ၸႄႈဝဵင်းႁူဝ်ပူင်း၊ ၸႄႈဝဵင်းတူၼ်ႈတီး လႄႈ ၸႄႈဝဵင်း လွႆလႅမ်။ ပႃႇတီႇသိူဝ်ၽိူၵ်ႇ (SNDP) သမ်ႉပေႉၵႂႃႇတီႈၸႄႈဝဵင်းလၢင်းၶိူဝ်း ဝဵင်းလဵဝ် ၼႆယဝ်ႉ။
ၸွမ်းၼင်ႇၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈမိူင်းႁူမ်ႈတုမ် ပိုၼ်ၽၢဝ်ႇဢွၵ်ႇဝႆႉပဵၼ်တၢင်းၵၢၼ်ၼၼ်ႉ ပႃႇတီႇသၢင်ႇသီႈလႆႈၶႅပ်းၵၢင်ၸႂ်လူင်ႈၼႃႈ ၼိုင်ႈၸႄႈဝဵင်းလႂ် ဢေႇသုတ်း 2 ႁဵင်ၶႅပ်းလႄႈ ႁဵတ်းႁႂ်ႈပေႉၵိၼ်ၶၢတ်ႇၵႂႃႇၼိူဝ်တၢင်ႇပႃႇတီႇတေႉတေႉဝႃႈဝႃႈ။
ပႃႇတီႇၵၢၼ်မိူင်းၸိူဝ်းၶဝ်ႈလိူၵ်ႈတင်ႈၸွမ်းပၢင်လိူၵ်ႈတင်ႈဢၼ်သိုၵ်းမၢၼ်ႈယိုတ်းမိူင်း ၼမ်းၸတ်းၼႆႉ ပဵၼ်ပႃႇတီႇၸိူဝ်းမီးလွင်ႈၸမ်ၸႂ် လႄႈ ႁပ်ႉႁၼ်လီၸွမ်းလွင်ႈႁဵတ်းသၢင်ႈ သိုၵ်းမၢၼ်ႈၼၼ်ႉတင်းသဵင်ႈ ၼႆယဝ်ႉ။
ယွၼ်ႉသိုၵ်းမၢၼ်ႈယိုတ်းမိူင်း သိမ်းဢႃႇၼႃႇၸိုင်ႈမိူင်းသေ ၸုမ်းတူင်ႉၼိုင်တူင်ႇဝူင်းၵူၼ်း လႄႈ ၸုမ်းၵူၼ်းၼုမ်ႇ ဢွၼ်ၵၼ်လိူၵ်ႈ သဵၼ်ႈတၢင်း ယိပ်းၵွင်ႈၵၢင်ႇ လုၵ်ႉၽိုၼ်ႉၶိုၼ်း သိုၵ်းမၢၼ်ႈလႄႈ ၼႂ်းမိူင်းႁူမ်ႈတုမ်ၵိူတ်ႇပဵၼ် လွင်ႈသုၵ်ႉယုင်ႈမႃး။ ၵၢၼ်သိုၵ်းဢမ်ႇၼိမ်၊ ၵၢၼ်မိူင်းၵေႃႈလႅၵ်ႈလၢႆႈၵႂႃႇ တေႉတေႉသေ ဝၢၼ်ႈမိူင်းလုၵ်ႉႁိုၼ်ႇပဵၼ်ၾႆးပၢင်တိုၵ်းမႃးဢမ်ႇထၢတ်ႇ ႁၢၼ်ႉတေႃႇထိုင်ယၢမ်းလဵဝ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ