ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ လၢတ်ႈဝႃႈ – ႁူဝ်ၼႃႈၸုမ်းသိုၵ်းၸၢဝ်းၶိူဝ်းၵမ်ႈၽွင်ႈ ၶဝ်ႈပႃးလူင်းလၢႆးမိုဝ်းလိၵ်ႈႁူမ်ႈမၢႆၵိုတ်းတိုၵ်း NCA ယူႇသေတႃႉ လုၵ်ႈၸုမ်းၵမ်ႈၽွင်ႈတႄႉ တိုၵ်ႉသိုပ်ႇပႆသဵၼ်ႈတၢင်းၽိတ်းယူႇ ဝႃႈၼႆ။

ၸွမ်ၸိၵ်းသိုၵ်းမၢၼ်ႈယိုတ်းမိူင်းၼႆႉ သူင်ႇၽိုၼ်လိၵ်ႈႁူမ်ၸူမ်း ဝၼ်းပီမႂ်ႇယၢင်း 2765 ၼီႈဢၼ်တူၵ်းမႅၼ်ႈၼႂ်းဝၼ်းမိူဝ်ႈၼႆႉ 19/12/2025 သေတႅမ်ႈသႂ်ႇဝႆႉပႃးၼင်ႇၼၼ်။

ၼႂ်းလိၵ်ႈၼၼ်ႉပႃးဝႆႉထႅင်ႈဝႃႈ – “ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၵမ်ႈၽွင်ႈၵေႃႈထုၵ်ႇလီႁၼ်ထိုင်တွၼ်ႈတႃႇၵူၼ်းမိူင်းလႄႈ ၸိုင်ႈမိူင်းသေ ထုၵ်ႇလီပႆၼိူဝ်သဵၼ်ႈတၢင်းငမ်းယဵၼ်ယဝ်ႉ။ သင်ဝႃႈပၢင်လိူၵ်ႈတင်ႈဢၼ်သိုၵ်းမၢၼ်ႈဢွၼ်ၼမ်းၸတ်းႁဵတ်းၼႆႉဢွင်ႇမၢၼ်ၸိုင် ၸုမ်းယိပ်းၵွင်ႈၵၢင်ႇၵေႃႈ ၶိုၼ်းယူႇတီႈၵူၼ်းမိူင်းသေ ႁူမ်ႈၵၼ်ၸွႆႈၵၼ်ပူၵ်းပွင်ၸိုင်ႈမိူင်းၵႂႃႇ”- ဝႃႈၼႆ။

ၸွမ်ၸိၵ်းသိုၵ်းမၢၼ်ႈၼႆႉ ၽွင်းပၢင် NCA ၶွပ်ႈတဵမ် 10 ပီၼၼ်ႉၵေႃႈ မၼ်းၸၢႆးလၢတ်ႈဝႃႈ – “ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၶႂ်ႈလႆႈသင်ၵေႃႈ ပႂ်ႉယူႇၼႂ်းသၽႃးသေလၢတ်ႈၸႃတုၵ်းယွၼ်းဢဝ်လႄႈ”- ဝႃႈၼႆ။

ၽွင်းပၢင် NCA ၶွပ်ႈတဵမ် 10 ပီၼၼ်ႉ ဢၼ်ပဵၼ်ၸေႃးမူႇတူးသေးၽူဝ်း ႁူဝ်ပဝ်ႈၵဝ်ႇ KNU လႄႈ ၸေႃးသူၺ်ႇမွင်း ႁူဝ်ပဝ်ႈၸႄႈတွၼ်ႈၵေႃႉၵဝ်ႇ ၶဝ်ၵေႃႈၶဝ်ႈႁူမ်ႈ။ဝၢႆးၼၼ်ႉဢမ်ႇႁိုင် KNU ပိုၼ်ၽၢဝ်ႇပူတ်းၶဝ်တင်းသွင်ၵေႃႉဢွၵ်ႇၸုမ်း။

ၵွၼ်ႇၼႃႈပၢင် NCA ၶွပ်ႈတဵမ် 10 ပီ ၽွင်းလိူၼ် ဢေႃႊၵတ်ႉသ်ၼၼ်ႉသမ်ႉ သိုၵ်းမၢၼ်ႈယိုတ်းမိူင်းပိုၼ်ၽၢဝ်ႇ ၸုမ်းယၢင်း KNU (ဢၼ်လူင်းလၢႆးမိုဝ်း NCA )ၼၼ်ႉ ပဵၼ်ၸုမ်းၵေႃႇၵၢၼ်ႁၢႆႉ ၸုမ်းၼွၵ်ႈမၢႆမီႈ ဝႃႈၼႆဝႆႉ။