တႃႇသူင်ႇၼႃႈသိုၵ်း ၼႆသေ ပျီႇတူႉၸိတ်ႉ PNO ၶၢၼ်းၵူၼ်းမိူင်းၼိုင်ႈဝၢၼ်ႈ 10 ၵေႃႉ တီႈထုင်ႉၸၢမ်ႈၵႃး ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇၵိၼ်းၸႂ် ဝႃႈၼႆ ။
တႄႇႁူဝ်လိူၼ် တီႊသႅမ်ႊပိူဝ်ႊၼႆႉမႃး ပျီႇတူႉၸိတ်ႉ PNO တဵၵ်းၶၢၼ်းၵူၼ်းဝၢၼ်ႈၸၢမ်ၵႃး 15 ၵေႃႉ ၊ ဝၢၼ်ႈတူင်ႈတႃႇ 10 ၵေႃႉ ၊ လိၼ်လမ် 10 ၵေႃႉလႄႈ သႄႇၵွင်း 10 ၵေႃႉတႃႇသူင်ႇၼႃႈသိုၵ်း သေ လွၵ်ႇငိုတ်ႈလၢတ်ႈဝႃႈ ၽႂ်ဢမ်ႇၵႂႃႇတေတီႉၺွပ်း ဝႃႈၼႆ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၼိုင်ႈဝၢၼ်ႈ 10 ၵေႃႉ ဢမ်ႇၵႂႃႇဢမ်ႇလႆႈၼႆ၊ ဢမ်ႇမီးၽႂ်ၶႂ်ႈၵႂႃႇလႄႈ ၵူၼ်းပိုၼ်ႉတီႈသၢၼ်ၶတ်းဝႆႉလွင်ႈၼႆႉ ၊ ၵၢင်ႉၵႄႇတိုၵ်ႉၵႂႃႇငူပ်ႉငီႉယူႇ ၶဝ်ပႆႇပွင်ႇၶၢဝ်ႇမႃးၶိုၼ်း ၊ ပေႃးၶဝ်ဢမ်ႇၽွမ်ႉတႄႉ ဢမ်ႇၸၢင်ႈႁဵတ်းႁိုဝ်ၵႃႈတေလႆႈၵႂႃႇ ”- ဝႃႈၼႆ ။
ၵဵဝ်ၵပ်းလွင်ႈၼႆႉ ယူႇတီႈၵၢင်ႉၵႄႇၼႂ်းဝၢၼ်ႈ ၵဵပ်းမၢႆၾၢင် ၊ သဵၼ်ႈမၢႆ မုင်ႉႁေႃႁိူၼ်း ၵူၼ်းၸၢႆးၼႂ်းဝၢၼ်ႈ ၸိူဝ်းမီးဢႃယု ၼႂ်းၵႄႈ18 ထိုင် 35 ။ သင်ဢမ်ႇငူပ်ႉငီႉလႆႈတင်းပျီႇတူႉၸိတ်ႉ PNO ၼႆၸိုင် တေလႆႈၸူၵ်းမႄးသေပၼ်ႇပုတ်ႈၵၼ်ၵႂႃႇ – ၵၢင်ႉၵႄႇလၢတ်ႈတီႈၵူၼ်းဝၢၼ်ႈၼင်ႇၼႆ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၵူဝ်ၵူၼ်းဝၢၼ်ႈပၢႆႈလႄႈ ဢဝ်ဝႆႉမၢႆၾၢင်သေ ၸႂ်ႉၵူၼ်းဝၢၼ်ႈလူင်းလၢႆးမိုဝ်းပႃးဝႆႉၵွၼ်ႇ ၊ လိူဝ်ၼၼ်ႉ တင်းၶဝ်ႈဢွၵ်ႇဝၢၼ်ႈၵေႃႈ ၵူတ်ႇထတ်းႁႅင်းၼႃႇ ဢမ်ႇၸၢင်ႈႁဵတ်းၸိူင်ႉႁိုဝ် ဢွၼ်ၵၼ်လႆႈမႆႈၸႂ်ဝႆႉ”– ဝႃႈၼႆ ။
မိူၼ်ၼင်ႇၼႆ ႁၢင်လိူၼ်ဢွၵ်ႉထူဝ်ႊပိူဝ်ႊၼၼ်ႉၵေႃႈ ပျီႇတူႉၸိတ်ႉ PNO တဵၵ်းၶၢၼ်းၵူၼ်းဝၢၼ်ႈထီႇရီး ၊ ၼမ်ႉပွၼ် ၊ ၼမ်ႉဢုၼ်ႇဢၼ်မီးၼႂ်းထုင်ႉၸၢမ်ၵႃး လႆႈၵႂႃႇၼႃႈသိုၵ်းၼိုင်ႈဝၢၼ်ႈ 20 ၵေႃႉ လႆႈၵႂႃႇၼႃႈသိုၵ်း ၼႂ်းၸႄႈဝဵင်းပၢင်လွင်း- ၾၢႆၶုၼ် လႅၼ်လိၼ် တႆး- ယၢင်းလႅင် ၸိူဝ်းၼၼ်ႉ ဝႃႈၼႆ ။
ယၢမ်းလဵဝ် ပျီႇတူႉၸိတ်ႉ PNO ၵဵပ်းသိုၵ်း ၼႂ်းၼႃႈတီႈၵုမ်းၵမ်သေ ထႅမ်ႁႅင်းသိုၵ်း ၵူတ်ႇထတ်းၵူၼ်းၶဝ်ႈၵူၼ်းဢွၵ်ႇႁၢဝ်ႈႁႅင်းပႃး ။ လိူဝ်ၼၼ်ႉၸႂ်ႉၵူၼ်းၼႂ်းဝၢၼ်ႈ သူင်ႇႁေႃႇၶဝ်ႈႁေႃႇၽၵ်း ပၼ်တီႈ လုၵ်ႈၸုမ်းပျီႇတူႉၸိတ်ႉ PNO ယူႇသဝ်းၵူႈဝၼ်း ႁဵတ်းႁႂ်ႈၵူၼ်းပိုၼ်ႉတီႈ ယူႇယၢပ်ႇၵိၼ်းၸႂ် ၼႆယဝ်ႉ ။
ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈၵပ်းသိုပ်ႇၸူး ၽူႈၶၢၼ်ပၢၵ်ႇ ပျီႇတူႉၸိတ်ႉပဢူဝ်း PNO ၵေႃႈ ဢမ်ႇလႆႈ။
တီႈထုင်ႉၸၢမ်ၵႃး ဝဵင်းၵဝ်ႇဢၼ်မီးပိုၼ်းလိုၵ်ႉလမ်ႇၼႂ်းမိူင်းတႆးၼႆႉ ၽွင်းလိူၼ်ၵျူႊလၢႆႊ ပီ2024 ၼၼ်ႉ သိုၵ်းမၢၼ်ႈတင်း ၸုမ်းၵႅတ်ႇၶႄၵူၼ်းမိူင်း PDF ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ႁဵတ်းႁႂ်ႈတုမ်ႉတိူဝ်ႉၵူၼ်းမိူင်း 2,000 ပၢႆ လႆႈငိူင်ႉပၢႆႈ ၽေးသိုၵ်း ။ ဝၢႆးၼၼ်ႉ ၼႂ်းလိူၼ်ဢေႃႊၵတ်ႉပျီႇတူႉၸိတ်ႉPNO ၶဝ်ႈဢဝ်တီႈယူႇၼႂ်းထုင်ႉၸၢမ်ၵႃးၶိုၼ်းသေ တဵၵ်းၸႂ်ႉၵူၼ်းပၢႆႈၽေးသိုၵ်းပွၵ်ႈၶိုၼ်းႁိူၼ်းယေးၽႂ်မၼ်းယဝ်ႉ ၵဵပ်း ၶွၼ်ႇတီႈၵူၼ်းပၢႆႈၽေးသိုၵ်းပွၵ်ႈႁိူၼ်း ၼိုင်ႈၵေႃႉ 5 သႅၼ်ပျႃး ပေႃးဢမ်ႇပၼ်လႆႈ လႆႈၼုင်ႈၶူဝ်းပျီႇတူႉၸိတ်ႉ PNO သေသူင်ႇၼႃႈသိုၵ်းၼႆယဝ်ႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ