တႄႇႁူဝ်လိူၼ် တီႊသိၼ်ႊပိူဝ်ႊၼႆႉမႃး ၾိင်ႈၾႃႉရႃႇသီႇလႅၵ်ႈလၢႆႈၵတ်းႁႅင်း ႁဵတ်းႁႂ်ႈၵူၼ်းပၢႆႈ ၽေးသိုၵ်း ႁဵင်ပၢႆ ဢၼ်မီးၼႂ်းၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း လူဝ်ႇတၢင်းၸွႆႈထႅမ် ၽႃႈၽႅၼ်ႇ ၊ သိူဝ်ႈၶူဝ်းဢုၼ်ႇ ၶဝ်ႈၼမ်ႉတၢင်းၵိၼ် ၸိူဝ်းၼႆႉ ဝႃႈၼႆ ။  

ပၢင်သဝ်းၵူၼ်းပၢႆႈၽေးသိုၵ်းၼႂ်းၸႄႈဝဵင်းပၢင်လွင်းၼႆႉမီး 5 တီႈ ။ ၼိုင်ႈတီႈၼႆႉ ႁူဝ်ၵူၼ်း မီး 200 ပၢႆ ၊ ၵမ်ႈၼမ်တေပဵၼ် ၵူၼ်းထဝ်ႈလႄႈ လုၵ်ႈဢွၼ်ႇ ၊ ယွၼ်ႉၾိင်ႈၾႃႉရႃႇသီႇလႅၵ်ႈလၢႆႈၵတ်းႁႅင်းလႄႈ ဢွၼ်ၵၼ်ပဵၼ်ဢမ်ႇယူႇလီ လူဝ်ႇတၢင်းၸွႆႈထႅမ် ယႃႈယႃ ၸိူဝ်းၼႆႉပႃး  ။  

ၵူၼ်းၸွႆႈထႅမ်ၵူၼ်းပၢႆႈၽေးသိုၵ်းၼႂ်းၸႄႈဝဵင်းပၢင်လွင်းလၢတ်ႈၽူႈတွႆႇႁွၵ်ႈဝႃႈ -“ တီႈပၢင်လွင်းၼႆႉ ဢမ်ႇမိူၼ်တၢင်ႇတီႈ မၼ်းၵတ်းႁႅင်းၼႃႇ။ ၵူၼ်းပၢႆႈၽေး ၵမ်ႈၼမ် ပဵၼ်ၵူၼ်းထဝ်ႈလႄႈ လုၵ်ႈဢွၼ်ႇလဵၵ်ႉ ။ ၶဝ်ဢမ်ႇပေႃးၶၢမ်ႇ ၵတ်းလႆႈ။  ၵူၼ်းဢမ်ႇယူႇလီဝႆႉၵေႃႈၼမ်ၼႃႇ လူဝ်ႇတင်းၸွႆႈထႅမ်ၽႃႈႁူမ်ႇ ၊ သိူဝ်ႈၼႃ ၊ ၶဝ်ႈၼမ်ႉတင်းၵိၼ် ၊ ယႃႈယႃ ၸိူဝ်းၼႆႉ”- ဝႃႈၼႆ ။

ပၢင်သဝ်းၵူၼ်းပၢႆႈၽေးသိုၵ်းဢၼ်မီးယူႇၼႂ်းၸႄႈဝဵင်းပၢင်လွင်းၼႆႉတေပဵၼ်တၢင်း ဝၢၼ်ႈဝႃးလီး ၊ ဝၢၼ်ႈ ၵွင်လိူဝ်း၊ ဝၢၼ်ႈပၢင်ၶွၼ်ႇ ၊ ဝၢၼ်ႈၼမ်ႉၽိူၵ်ႇ ၊ ၼွင်တယႃး လႄႈ ႁိမ်းၸမ်ဝဵင်းပၢင်လွင်း  ယၢၼ်ၵႆၵၼ် မွၵ်ႈ 8 လၵ်းၸိူဝ်းၼႆႉ  ။ ၼိုင်ႈတီႈၼႆႉႁူဝ်ၵူၼ်းမီး 200 ပၢႆ – ၵူၼ်းၸွႆႈထႅမ်ၵူၼ်းပၢႆႈ ၽေးသိုၵ်းလၢတ်ႈ ။

တီႈပၢင်သဝ်းၵူၼ်းပၢႆႈၽေးသိုၵ်းၼၼ်ႉ ၵမ်ႈၼမ်ပဵၼ်ၵူၼ်းမိူင်း ၼႂ်းၸႄႈမိူင်းယၢင်းလႅင် လႄႈ ၸႄႈဝဵင်းၾၢႆၶုၼ် ၊ မိူင်းပၢႆး ယူႇသဝ်းဝႆႉ။ ဢိင်ၼိူဝ်ငဝ်းလၢႆးပိုၼ်ႉတီႈပႆႇၼိမ်သဝ်းလႄႈ ၵူၼ်းပၢႆႈ ၽေးသိုၵ်း ၼပ်ႉႁူဝ်ႁဵင်ၵေႃႉ ပႆႇၸၢင်ႈပွၵ်ႈၶိုၼ်းႁိူၼ်း ၽႂ်မၼ်း လႆႈႁဵတ်းၵၢၼ်ႁႃၸဝ်ႉၵိၼ်ၶမ်ႈ  သေၵႄႈလိတ်ႈပၼ်ႁႃဝႆႉယူႇ ။

ၵူၼ်းပိုၼ်ႉတီႈ ဝဵင်းပၢင်လွင်း လၢတ်ႈၽူႈတွႆႇႁွၵ်ႈဝႃႈ  -“ၼိုင်ႈတီႈသွင်ပၢၵ်ႇပၢႆၼႆႉ ပဵၼ်တီႈပၢင်သဝ်းပၢႆႈၽေးသိုၵ်းၵူၺ်းဢမ်ႇပႃးၵူၼ်းမႃးၶၢတ်ႈႁိူၼ်းယူႇၸိူဝ်းၼၼ်ႉၶႃႈ ၊ ယွၼ်ႉဢမ်ႇမီးၵူၼ်းမႃးၸွႆႈထႅမ်လႄႈ ၵိၼ်ၸၢင်ႈ ၽုၵ်ႇသွမ်ႈ ၊ ႁဵတ်းၵၢၼ်ၵေႃႇသၢင်ႈ ၸိူဝ်းၼၼ်ႉဝႆႉ ၵႃႈၸၢင်ႈ ၼိုင်ႈဝၼ်းလႆႈ 1မိုၼ်5 ႁဵင်ပျႃးၵူၺ်း ဢမ်ႇပေႃးၵိၼ်ပေႃးၸႂ်ႉယၢပ်ႇၽိုတ်ႇဝႆႉဢေႃႈ ”- ဝႃႈၼႆ ။

ၸွမ်းၼင်ႇ ၵူၼ်းၼုမ်ႇဝဵင်းၾၢႆၶုၼ်လႆႈၵဵပ်းၶေႃႈမုလ်းဝႆႉၼၼ်ႉတႄႉ ၵူၼ်းပၢႆႈၽေးသိုၵ်း ၼႂ်းၸႄႈဝဵင်းပၢင်လွင်း- ၾၢႆၶုၼ် ႁူဝ်ၵူၼ်းမီးၸမ် 7 ႁဵင် ပၢႆ ။  မၢင်ၸိူဝ်းပၢႆႈၵႂႃႇယူႇ ၼႂ်းထိူၼ်ႇၼႂ်းၶိူဝ်း လႄႈ ပၢႆႈယူႇႁိူၼ်းပီႈႁိူၼ်းၼွင်ႉ ၸိူဝ်းၼၼ်ႉၵေႃႈမီး ဝႃႈၼႆ ။

ၼႂ်းလိူၼ် ၼူဝ်ႊဝႅမ်ႊပိူဝ်ႊ ၾိင်ႈၾႃႉရႃႇသီႇလႅၵ်ႈလၢႆႈ  ၼႂ်းမိူင်းတႆးၵတ်းလိူဝ်ၸႂ်ႁႅင်းလႄႈ ၼႂ်းၶၢဝ်းတၢင်းလိူၼ်လဵဝ်ၵူၺ်း ၵူၼ်းပၢႆႈၽေးသိုၵ်း တီႈဝၢၼ်ႈၼွင်တယႃးလႄႈ ဝၢၼ်ႈၼွင်ၶႃႇ ၊ ဝၢၼ်ႈပၢင်ၶွၼ် တၢႆ 6 ၵေႃႉ ပဵၼ် ထဝ်ႈယိင်း 4 ၵေႃႉ လႄႈ ထဝ်ႈၸၢႆး 2 ၵေႃႉ   ။  

ၼႂ်းႁူဝ်ပီၼႆႉ သိုၵ်းမၢၼ်ႈ ထႅမ်ႁႅင်းသိုၵ်း ႁႅင်းၵွင်ႈၵၢင်ႇ ႁူမ်ႈတင်း ပျီႇတူႉၸိတ်ႉပဢူဝ်းသေ ထူဝ်းသိုၵ်းလေႃႇတိုၵ်းၸုမ်းလုၵ်ႉၽိုၼ်ႉႁၢဝ်ႈႁႅင်း ယဝ်ႉယိုတ်းၵုမ်းလႆႈၶိုၼ်း  တၢင်းဝၢၼ်ႈ ၵေႃမႆႉသၢင်း၊ ဝၢၼ်ႈၼမ်ႉၼဵင်ႈ ၊  ဝၢၼ်ႈပၢင်ပုမ်ႇ ၊ လူင်ပႅၼ်ႈ ၼႂ်းၸႄႈဝဵင်းပၢင်လွင်းသေ ႁဵတ်းႁႂ်ႈၵူၼ်းမိူင်းလႆႈငိူင်ႉပၢႆႈၽေးသိုၵ်းထိုင်ဝၼ်းမိူဝ်ႈၼႆႉ ။