ၼႂ်းႁူဝ်လိူၼ်တီႊသႅမ်ႊပိူဝ်ႊၼႆႉ သိုၵ်းၵဝ်ႈၵၢင်ႉ (MNDAA) ၵဵပ်းသိုၵ်းမႂ်ႇထႅင်ႈ ၵူၺ်းဢမ်ႇၵႃး ႁွင်ႉဢဝ်ပႃး ၵူၼ်းသိုၵ်းသေ ႁႃၵူတ်ႇထတ်းၵူၼ်း ၵဵပ်းသဵၼ်ႈမၢႆၶႅၵ်ႇ/ ၵူၼ်းပႅၵ်ႇၼႃႈ ၶၢဝ်း ၵၢင်ၶမ်ႈ ၵၢင်ၶိုၼ်းလႄႈ ႁဵတ်းႁႂ်ႈၵူၼ်းမိူင်းၸိူဝ်းယူႇသဝ်းၼႂ်းပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈ ။
ၸူဝ်ႈသိုၵ်းၵဝ်ႈၵၢင်ႉ ၶဝ်ႈမႃးၵုမ်းၸႄႈဝဵင်းသႅၼ်ဝီ ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်းၼိုင်ႈ ႁိုင်ၶၢဝ်းတၢင်း မွၵ်ႈ 2 ပီၼႆႉ ၵူၼ်းမိူင်းၸိူဝ်းယူႇၸွမ်းဝၢၼ်ႈလႆႈႁႃ ၵူၼ်းပၼ် တႃႇၵႂႃႇႁဵတ်းသိုၵ်းမႂ်ႇယူႇတိၵ်းတိၵ်း ထိုင်တီႈၼုမ်ႇယိင်းၼုမ်ႇၸၢႆး ၼႂ်းဝဵင်းသႅၼ်ဝီ ငိူင်ႉပၢႆႈဢွၵ်ႇဝဵင်းၵႂႃႇၼမ်တေႉတေႉ ။
ၼၢင်းၸၢမ်ႇ ၵေႃႉတူင်ႉၼိုင်ႁဵတ်းၵၢၼ်တူင်ႇဝူင်းၵူၼ်း ၼႂ်းၸႄႈဝဵင်းသႅၼ်ဝီ လၢတ်ႈၼႄတီႈ ၽူႈတွႆႇႁွၵ်ႈဝႃႈ “ၶဝ်မႃးဢုပ်ႉဝဵင်း မွၵ်ႈ 1 ပီပၢႆ ၸမ် 2 ပီၵူၺ်း ၵူၼ်းၼႆႉ ယွၼ်းဢဝ် ယွၼ်းဢဝ်။ ၼိုင်ႈပွၵ်ႈၼႆႉ ႁဝ်းလႆႈႁႃပၼ်ၶဝ် ၼိုင်ႈဝၢၼ်ႈၼႆႉဢေႇသုတ်း 2 ၵေႃႉ သၢမ်ၵေႃႉႁဵတ်းၼႆယူႇတိၵ်းတိၵ်း။ မိူဝ်ႈလဵဝ်ၵေႃႈ ယွၼ်းမႃးထႅင်ႈ ယဝ်ႉ။ ၵူၼ်းၼုမ်ႇၼႂ်းဝၢၼ်ႈၵေႃႈ ဢမ်ႇမီးၽႂ်ယဝ်ႉ။ ၶဝ်ၵဵပ်းၵူၼ်းသိုၵ်းမႂ်ႇၼိုင်ႈပွၵ်ႈ ၵူၼ်းၼုမ်ႇ ပၢႆႈဢွၵ်ႇဝၢၼ်ႈ တင်းၼမ် ။ တီႈဝဵင်းႁဝ်းၼႆႉ ၵမ်ႈၼမ်ၵိုတ်းၵူၼ်းၶၢဝ်ႉၵူၼ်းၵႄႇၵူၺ်းယဝ်ႉ။ ဢမ်ႇမီးၽႂ်ၶႂ်ႈၵႂႃႇႁဵတ်း သိုၵ်းလႄႈ ထိုင်တီႈၵူၼ်းဝၢၼ်ႈပေႃးလႆႈၵဵပ်းငိုၼ်းၵၼ် ၼိုင်ႈႁိူၼ်း ၼိုင်ႈပွၵ်ႈ ႁူဝ်မိုၼ်ႇ ႁူဝ်သႅၼ်မၼ်းႁႄ ၸၢင်ႈၵၼ်ၵႂႃႇဢဝ်။ ပၢႆလိူဝ်ၵၢၼ်ၵေႃႈဢမ်ႇပဵၼ်တေႉတေႉဝႃႈဝႃႈ။ ႁႃၵိၼ်လဵင်ႉတွင်ႉၵူၺ်းပေႃးယၢပ်ႇ။ သမ်ႉလႆႈႁႃပၼ်တႃႇသိုၵ်းၶဝ်ထႅင်ႈ” ဝႃႈၼႆ။
ၸူဝ်ႈမႃးၵုမ်းဝဵင်းသႅၼ်ဝီၼႆႉ သိုၵ်းၵဝ်ႈၵၢင်ႉ ၵဵပ်းၵူၼ်းသိုၵ်းမႂ်ႇၼႆႉ ပေႃးပႃးပွၵ်ႈၼႆႉ ဢမ်ႇယွမ်း 5 ၵမ်းယဝ်ႉလႄႈ ၵူၼ်းမိူင်းၸိူဝ်း ယူႇၼႂ်းပိုၼ်ႉတီႈ ႁူပ်ႉတၢင်းယၢပ်ႇၵိၼ်းၸႂ်ႁၢဝ်ႈႁႅင်း။ ယွၼ်ႉဢမ်ႇမီးၵူၼ်းတဵမ်ၸႂ်ၶႂ်ႈၵႂႃႇၶဝ်ႈႁၢပ်ႇၵၢၼ်သိုၵ်း လႄႈ တႃႇၸၢင်ႈၵၼ်ၵႂႃႇႁဵတ်းသိုၵ်းၼၼ်ႉ မၢင်ဝၢၼ်ႈ လႆႈၵဵပ်းငိုၼ်းၵၼ် ၼိုင်ႈႁိူၼ်းလႂ် ဢေႇသုတ်း 1 သႅၼ်ပျႃး ထိုင် 2 သႅၼ်ပျႃးၸဵမ်ၸိူဝ်းၼႆႉ ဝႃႈၼႆ။
ၽွင်းသိုၵ်းၵဝ်ႈၵၢင်ႉ ၵုမ်းၵမ် ၼႂ်းၸႄႈဝဵင်းသႅၼ်ဝီၼႆႉ ပၵ်းပိူင် ဢၼ်တေၵႅတ်ႇၶႄႁေႉၵင်ႈႁႂ်ႈၵူၼ်းမိူင်း ယူႇသဝ်းၵႂႃႇလႆႈငၢႆႈလူမ် လႄႈ လွတ်ႈၽေး ၼၼ်ႉၵေႃႈ ဢမ်ႇမီးသေဢိတ်း။
ပၵ်းပိူင်ၾိင်ႈမိူင်း ဢၼ်တေႁူမ်ႇငမ်းပၼ် လုၵ်ႈဢွၼ်ႇ လႄႈ ၵူၼ်းမိူင်း ႁႂ်ႈမီးလွင်ႈႁူမ်ႇလူမ်ႈၼၼ်ႉ ယိင်ႈၶႅၼ်းဢမ်ႇမီး။ ယွၼ်ႉၼၼ် ၼင်ႇႁိုဝ် လုၵ်ႈဢွၼ်ႇ လႄႈ ၵူၼ်းၼုမ်ႇၸိူဝ်းမီးယူႇ ၼႂ်းၼႃႈတီႈၸုမ်းယိပ်းၵွင်ႈၵၢင်ႇတင်းသဵင်ႈ တေလွတ်ႈၽေးၶဵၼ် မီးပိုၼ်ႉႁူႉၵႅမ်တူဝ် ယႃႇႁႂ်ႈၾိင်ႈယၢမ်ႈ လူႉၼၼ်ႉ ပေႃႈမႄႈ၊ ၽူႈယႂ်ႇၵူၼ်းလူင် ၸိူဝ်းၵဵဝ်ႇၵွင်ႉလႄႈ မီးပုၼ်ႈ ၽွၼ်းတင်းသဵင်ႈ တေလႆႈပၵ်းတႃလူလွမ် တူၺ်းထိုင်ပၼ် ယႃႇႁႂ်ႈၽၢတ်ႇသၢႆတႃၼၼ်ႉယဝ်ႉ။
ၸဵမ်မိူဝ်ႈသိုၵ်းၵဝ်ႈၵၢင်ႉ တႄႇၵဵပ်းသဵၼ်ႈမၢႆႁူဝ်ၼပ်ႉၵူၼ်းၼႂ်းၸႄႈဝဵင်းသႅၼ်ဝီသေ ၸီႉသင်ႇႁႂ်ႈၵၢင်ႉၵႄႇ ၼႂ်းပွၵ်ႉၼႂ်းဢိူင်ႇ ၵဵပ်းၵူၼ်းၼုမ်ႇၼႂ်းဝၢၼ်ႈၶဝ်ႈႁၢပ်ႇထၢမ်းၵၢၼ်သိုၵ်းၼၼ်ႉ ၵူၼ်းၼုမ်ႇၵမ်ႈၼမ် ၼႂ်းၸႄႈ ဝဵင်းသႅၼ်ဝီ ဢွၼ်ၵၼ်ငိူင်ႉဢွၵ်ႇပၢႆႈ ၵႂႃႇယူႇတၢင်ႇဝၢၼ်ႈတၢင်ႇမိူင်း ႁၢၼ်ႉတေႃႇထိုင်ယၢမ်းမိူဝ်ႈလဵဝ်။
တင်ႈတႄႇသိုၵ်းၵဝ်ႈၵၢင်ႉ MNDAA ၶဝ်ႈၵုမ်းၵမ် ၼႂ်းၸႄႈဝဵင်းသႅၼ်ဝီမႃးၼႆႉ ပၼ်သုၼ်ႇလႆႈ တိုဝ်ႉတၢင်း ၸဝ်ႈငိုၼ်းသႃးၶဝ် ပိုတ်ႇပၢင်တေႃႇလွင်း ပဵၼ်တၢင်းၵၢၼ်၊ တဵၵ်းႁႂ်ႈၵူၼ်းဝၢၼ်ႈၶၢတ်ႈပၼ်သူၼ်ႁႆႈၼႃး တွၼ်ႈတႃႇ ၸဝ်ႈငိုၼ်းသႃးၶႄႇ၊ ယႃႉပႅတ်ႈၵၢတ်ႇလူင် (ၵၢတ်ႇၵဝ်ႇ) ၵၢင်ဝဵင်းသႅၼ်ဝီ၊ တဵၵ်းႁႂ်ႈ ၵူၼ်းမိူင်းၵႂႃႇႁဵတ်းဝႂ်ၶပ်းရူတ်ႉၶပ်းၵႃးၵူၺ်းဢမ်ႇၵႃး ယွၼ်းပႃးၶွၼ်ႇ ရူတ်ႉၵႃး ထေႃႈလႃႈၵျီႈ ပႃးၸဵမ်ၵႃႈယုၵ်းယၢၵ်း၊ တဵၵ်းႁႂ်ႈၵူၼ်းမိူင်း လႅၵ်ႈပၢႆႉႁၢၼ်ႉတၢင်းၶၢႆ မွတ်ႇပႅတ်ႈလိၵ်ႈတႆး၊ လိၵ်ႈဢိင်းၵလဵတ်ႈသေ ၸႂ်ႉတိုဝ်းလိၵ်ႈၶႄႇ ၵူၺ်း။ သင်ၶႂ်ႈသႂ်ႇပႃးလိၵ်ႈမၢၼ်ႈၸိုင် ၸိမ်သႂ်ႇလေႃးလႆႈယူႇဢိတ်းဢီႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ