မိူဝ်ႈၼႆႉဝၼ်းတီႈ 15/12/2025 ပဵၼ်ဝၼ်းၸိူဝ်ႉၸၢတ်ႈမိူင်းရၶႅင်ႇ ၶွပ်ႈၶူပ်ႇ 51 ပီတဵမ် မိၼ်းဢွင်ႇလၢႆႇ ၸွမ်ၸိၵ်းသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇ ၽိုၼ်လိၵ်ႈမၢႆတွင်း – ၼႂ်းၼၼ်ႉလၢတ်ႈဝႆႉပႃးဝႃႈ ႁႂ်ႈဝၢင်းၶိူင်ႈသေ မႃးဢုပ်ႇၵၼ် ၼိူဝ်ၽိူၼ် လူၺ်ႈလၢႆးတၢင်းၵႄႈလိတ်ႈပၼ်ႁႃၵၢၼ်မိူင်း ဝႃႈၼႆ။

ၼႂ်းလိၵ်ႈသူင်ႇယိုၼ်ႈထိုင်ၸူး မၢႆတွင်းဝၼ်းၸိူဝ်ႉၸၢတ်ႈမိူင်းရၶႅင်ႇ ၶွပ်ႈတဵမ် 51 ပီၼၼ်ႉ မိၼ်းဢွင်ႇလၢႆႇ လၢတ်ႈၵႂႃႇဝႃႈ – “လွင်ႈႁဵတ်းသၢင်ႈၸုမ်းသိုၵ်းၵဝ်ႈၵၢင်ႉ MNDAA ၊ သိုၵ်းတ ဢၢင်း (TNLA) ၊ သိုၵ်းရၶႅင်ႇ (AA) ၼႆႉ ႁဵတ်းႁႂ်ႈတုမ်ႉတိူဝ်ႉၵၢၼ်ယူႇသၢင်ႈထင်သဝ်းလႄႈ ပၢႆးမၢၵ်ႈမီးၵူၼ်းမိူင်းမႃးလိူဝ်ၵဝ်ႇ။ တႃႇသၢင်ႈမိူင်းႁူမ်ႈတုမ်ၸွမ်းၵႂႃႇၼၼ်ႉ ထုၵ်ႇလီဝၢင်းၶိူင်ႈ သေ မႃးဢုပ်ႇဢူဝ်းၵႄႈလိတ်ႈပၼ်ႁႃၵၼ်ၵႂႃႇ ၼိူဝ်ၽိူၼ်ၵၢၼ်မိူင်း လူၺ်ႈၵတ်းၵတ်းယဵၼ်ယဵၼ်။ ပိူဝ်ႈတႃႇမိူင်းႁူမ်ႈတုမ် တေမီးလွင်ႈၵတ်းယဵၼ်ၼၼ်ႉ ၶႂ်ႈႁႂ်ႈၵူႈမူႇၵူႈၸုမ်း ပႆၸွမ်းသဵၼ်ႈတၢင်း NCA ၵႂႃႇ” ၼႆယဝ်ႉ။

လိူဝ်ၼၼ်ႉ သိုၵ်းမၢၼ်ႈယိုတ်းမိူင်း ယင်းပိုၼ်ၽၢဝ်ႇဝႆႉထႅင်ႈဝႃႈ တႃႇၽဵဝ်ႈမူၺ်ႉ ၸုမ်းၵေႃႇၵၢၼ်ႁၢႆႉၼၼ်ႉ လႆႈႁူမ်ႈမိုဝ်းၵၼ်တင်း သိုၵ်းရတ်ႉသျႃႊသေ ၶွတ်ႇၽွတ်ႈပဵၼ်ၶွမ်ႊမတီႊဝႆႉ။ တႃႇသိုပ်ႇႁဵတ်းၵၢၼ်ၵႂႃႇၼၼ်ႉ ၾၢႆႇမိူင်းရတ်ႉသျႃႊ တေၸွႆႈထႅမ်လွင်ႈပၢႆးသၢင်ႈ (IT) ပၼ်ၸုမ်းသိုၵ်းမၢၼ်ႈ ၼႆယဝ်ႉ။

ၼႂ်းပၢႆးၸၢၵ်ႈ လွၵ်ႈလၢႆးပၢႆးသၢင်ႈ ၼၼ်ႉဢမ်ႇၵွမ်ႉၵႃႈ ပႃးသိုဝ်ႇၼႅင်ႈသၢၼ်ၵူၺ်း မိူၼ်ၼင်ႇ ၶိူင်ႈမႆႉၶိူင်ႈမိုဝ်း လွင်ႈမၢၵ်ႇမိုဝ်ႉၸိုၼ်းယၢမ်းၸိူဝ်းၼႆႉၵေႃႈ ၶဝ်ႈပႃးဝႆႉတႂ်ႈ IT။

သိုၵ်းမၢၼ်ႈ တင်း ၸုမ်းသိုၵ်းၸၢဝ်းၶိူဝ်း သၢမ်ၸုမ်းၼႆႉ တႄႇယိုဝ်းၵၼ်မႃးႁၢဝ်ႈႁႅင်း တင်ႈတႄႇ ဝၼ်းတီႈ 27 လိူၼ်ဢွၵ်ႉထူဝ်ႊပိူဝ်ႊ ပီ 2023 ၸွမ်းမိူင်းတႆးပွတ်းႁွင်ႇ ဢွၼ်တၢင်း။ ဝၢႆးလင်ၼၼ်ႉ သဵင်ၵွင်ႈ တႅၵ်ႇပၼ်း လၼ်ႈၸွတ်ႈတူဝ်ႈပတ်းမိူင်းႁူမ်ႈတုမ် ၶပ်ႉၶပ်ႉတၢမ်းတၢမ်းၵၼ်မႃး ႁၢၼ်ႉတေႃႇထိုင်ယၢမ်းလဵဝ်။

မိူဝ်ႈဝၼ်းတီႈ 10 လိူၼ်တီႊသႅမ်ႊပိူဝ်ႊ ဝၼ်းသုၼ်ႇလႆႈၵူၼ်းလုမ်ႈၾႃႉၼႆႉ သိုၵ်းမၢၼ်ႈယိုတ်းမိူင်း ဢဝ်ႁိူဝ်း မိၼ်တိုၵ်းပွႆႇမၢၵ်ႇသႂ်ႇ တီႈႁူင်းယႃလူင်ၵူၼ်းမိူင်း တီႈမိူင်းရၶႅင်ႇ လုၵ်ႈဢွၼ်ႇလႅင်၊ မႄႈမၢၼ်း (မႄႈပႃးတွင်ႉ)၊ ၼၢင်းယိင်း လႄႈ ၵူၼ်းမိူင်း လူႉတၢႆမၢတ်ႇၸဵပ်းၵႂႃႇၸွမ်း 100 ၵေႃႉပၢႆ။

သိုၵ်းမၢၼ်ႈတင်း သိုၵ်းရၶႅင်ႇ (AA) ၼႆႉ တႄႇပဵၼ်ပၢင်တိုၵ်းၵၼ်မႃး မိူဝ်ႈလိူၼ်ၼူဝ်ႊဝႅမ်ႊပိူဝ်ႊ ပီ 2023 ။ သိုၵ်းမၢၼ်ႈလႆႈႁူၼ်လင်တပ်ႉထွႆဢွၵ်ႇပၼ်သိုၵ်းရၶႅင်ႇ ၶဝ်ႈၵုမ်းၵမ်ၵႂႃႇလႆႈတႃႇ 14 ၸႄႈဝဵင်း။ သိုၵ်းရၶႅင်ႇ ၶဝ်ႈယိုဝ်းတိုၵ်းသိမ်းဢဝ်လႆႈ ဝဵင်းမျွၵ်ႉဢူး ဢၼ်ပဵၼ်ငဝ်ႈၸိုင်ႈ ဝဵင်းလူင် ၼႂ်းမိူင်းရၶႅင်ႇၵႂႃႇမိူဝ်ႈ လိူၼ်ၵျူႊလၢႆႊ ပီ 2024။

ၼင်ႇႁိုဝ်ၸုမ်းသိုၵ်းၸၢဝ်းၶိူဝ်း သၢမ်ၸုမ်း တေၵိုတ်းပၢင်တိုၵ်း လိုဝ်ႈၵၢၼ်လုၵ်ႉၽိုၼ်ႉၵႂႃႇၼၼ်ႉ သိုၵ်းမၢၼ်ႈ ၶတ်းၸႂ်ၶိုင်ပွင်ၵူႈလၢႆးတၢင်း။ ၶဝ်ႈႁႃၸူး လူင်ပွင်ၸိုင်ႈမိူင်းၶႄႇသေ ပၼ်တိုဝ်ႉတၢင်းႁႂ်ႈလူင်ပွင်ၸိုင်ႈမိူင်းၶႄႇ ပွႆႇတူဝ်တႅၼ်း မႃးဢုပ်ႇဢူဝ်းငူပ်ႉငီႉ ႁဵတ်းၶဵဝ်ပၼ်တီႈ ၸုမ်းသိုၵ်းၵဝ်ႈၵၢင်ႉ တင်း ၸုမ်းသိုၵ်းတဢၢင်း ဢွင်ႇမၢၼ်ၵႂႃႇပဵၼ်ၶၵ်ႉပဵၼ်တွၼ်ႈသေတႃႉ တင်းသိုၵ်းရၶႅင်ႇတႄႉ ယင်းပႆႇႁႃလၢႆးတၢင်း ၶဝ်ႈငူပ်ႉငီႉ ဢုပ်ႇဢူဝ်းလႆႈပဵၼ်တၢင်းၵၢၼ်တေႉတေႉဝႃႈဝႃႈ။