ၸွမ်ၸိုင်ႈ သိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ လၢတ်ႈၼႂ်းပၢင်ၵုမ်ၸုမ်းလူင်ပွင်ၸိုင်ႈ ဢၼ်ၸတ်းႁဵတ်းတီႈၼေႇပျီႇတေႃႇ ဝၼ်းတီႈ 27 လိူၼ်မေႊ ၼႆႉဝႃႈ ၼႂ်းၶၢဝ်းတၢင်း 5 ပီၼႆႉ တေဢၢၼ်းၶတ်းၸႂ် ႁဵတ်းႁႂ်ႈလႆႈလွင်ႈငမ်းယဵၼ်။ ယၢမ်းလဵဝ်ၵေႃႈ လႆႈမွၵ်ႇႁွင်ႉတႃႇဢုပ်ႇၵုမ်လွင်ႈငမ်းယဵၼ်ဝႆႉ ၼႂ်းၶၢဝ်းတၢင်းၽႅၼ်ၵၢၼ် 100 ဝၼ်း၊ မီးလွင်ႈဢုပ်ႇၵုမ်ၵၼ်တင်းၽူႈမီးပုၼ်ႈၽွၼ်း ၼႂ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း (EAO) ၵမ်ႈၽွင်ႈဝႆႉယူႇ ဝႃႈၼႆ။

ၸွမ်ၸိုင်ႈ သိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ လၢတ်ႈဝႃႈ ၶႂ်ႈၵေႃႈတင်ႈမိူင်းႁူမ်ႈတုမ် ဢၼ်ၶၢမ်ႇပိုၼ်ႉၼိူဝ်ပိူင် တီႊမူဝ်ႊၶရေႊသီႊလႄႈၾႅတ်ႊတရႄႊၼႆသေတႃႉ ပဵၼ်ပိူင်ၾႅတ်ႊ တရႄႊ ဢၼ်ပၼ်ၸွမ်းပိုၼ်ႉတီႈၼႃႈလိၼ်ၵူၺ်း၊ ဢမ်ႇၸႂ်ႈဢၼ်ပၼ်တီႈၶိူဝ်းၵူၼ်း ဝႃႈၼႆ။

ယွၼ်ႉၼၼ်ႉလႄႈ တေပဵၼ်ၾၢင်ႁၢင်ႈၾႅတ်ႊတရႄႊ ဢၼ်ယူႇတီႈၼေႇပျီႇတေႃႇ ပဵၼ်ၵေႃႉၵုမ်းၵမ်ဝႆႉ။

ၵူၺ်းၵႃႈ ၾၢႆႇၸုမ်းယိပ်းၵွင်ႈၵၢင်ႇၸၢဝ်းၶိူဝ်း တင်း ၸုမ်းလုၵ်ႉၽိုၼ်ႉ ဢၼ်သၢၼ်ၶတ်းသိုၵ်းမၢၼ်ႈၶဝ်တႄႉ ဢွၼ်ၵၼ်မုင်ႈမွင်း ၶႂ်ႈလႆႈ သုၼ်ႇလႆႈၽဵင်ႇပဵင်း၊ ပိူင်ၽွင်းငမ်းႁင်းၶေႃ၊ တီႇမူဝ်ႇၶရေႇသီႇၸႅတ်ႈၸၢင်ႇ လႄႈ မိူင်းႁူမ်ႈတုမ် ၾႅတ်ႊတရႄႊ တီႊမူဝ်ႊၶရေႊသီႊ ဢၼ်ဢိင်ၼိူဝ်သုၼ်ႇလႆႈသုၼ်ႇပဵၼ်ၵူၼ်းသေ ႁပ်ႉပၢၵ်ႇလႆႈၸိူဝ်းၼၼ်ႉ ဝႃႈၼႆ။

ယွၼ်ႉၼၼ် ၾႅတ်ႊတရႄႊ တီႊမူဝ်ႊၶရေႊသီႊ ဢၼ်ၸုမ်းသိုၵ်းမၢၼ်ႈ ယူႇတီႈၼေႇပျီႇတေႃႇ ၽေႃႇၼမ်ႉၼႄတူဝ် လႄႈ ဢၼ်ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တင်း ၸုမ်းလုၵ်ႉ ၽိုၼ်ႉၶဝ် ၽေႃႇၼမ်ႉၼႄတူဝ်ယူႇၼႆႉ မီးလွင်ႈပႅၵ်ႇပိူင်ႈၵၼ်ဝႆႉ – ၽူႈတူင်ႉၼိုင်ၵၢၼ်မိူင်းၶဝ် ထတ်းသၢင်လၢတ်ႈဝႆႉ ၼင်ႇၼႆ။