ၸွမ်ၽွင်းလူင် မိူင်းဢိၼ်ႊတီႊယိူဝ်ႊ သျှရီႊၼႃႊရၼ်ႊတရႃႇ မူဝ်ႇတီႇ မွၵ်ႇႁွင်ႉၸွမ်ၸိုင်ႈယိုတ်းမိူင်း မိၼ်းဢွင်ႇလၢႆႇ ဢႅဝ်ႇယဵမ်ႈဢိၼ်ႊတီႊယိူဝ်ႊ ပဵၼ်တၢင်းၵၢၼ် လႄႈ ၸွမ်ၸိၵ်း သိုၵ်းမၢၼ်ႈတူၵ်းလူင်းတေၵႂႃႇ ဝႃႈၼႆမႃးလႄႈ ၼႂ်းၶၢဝ်းတၢင်းဝူင်ႈဝၢင်ႈၼႆႉ ၸင်ႇလႆႈၸတ်းၽႅၼ် တႃႇဢွၵ်ႇၶၢဝ်းတၢင်းၵႂႃႇ မိူင်းဢိၼ်ႊတီႊယိူဝ်ႊ ၼႆယဝ်ႉ။

ၼႂ်းၶၢဝ်းတၢင်း ဢိၼ်ႊတီႊယိူဝ်ႊၼႆႉ မိၼ်းဢွင်ႇလၢႆႇ တေၵႂႃႇႁူပ်ႉ ၸွမ်ၸိုင်ႈမိူင်းဢိၼ်ႊတီႊယိူဝ်ႊ ၊ ၸွမ်ၽွင်းလူင် ၼႂ်းၸုမ်းလူင်ပွင်ၸိုင်ႈ ။ တင်းသွင်ၾၢႆႇ တေဢုပ်ႇဢူဝ်းၵၼ်သေ တေသိုပ်ႇႁူပ်ႉထူပ်းၸွမ်း ၸဝ်ႈၵၢၼ် ၸဝ်ႈပၢႆးမၢၵ်ႈမီး ၼႂ်းမိူင်းဢိၼ်ႊတီႊယိူဝ်ႊပႃးထႅင်ႈ ။

ၵဵဝ်ႇလူၺ်ႈ မိၼ်းဢွင်ႇလၢႆႇ တေဢွၵ်ႇၶၢဝ်းတၢင်းၵႂႃႇ မိူင်းဢိၼ်ႊတီႊယိူဝ်ႊၼၼ်ႉသေ ၸုမ်းတူင်ႉၼိုင်တူင်ႇဝူင်းၵူၼ်း လႄႈ ၵူၼ်းမိူင်းမၢၼ်ႈ ၸိူဝ်းႁွတ်ႈၽႅဝ်ယူႇသဝ်းဝႆႉၼႂ်းမိူင်းဢိၼ်ႊတီႊယိူဝ်ႊ ပိုၼ်ၽၢဝ်ႇပဵၼ်တၢင်းၵၢၼ်ဝႆႉဝႃႈ – တေ ၼႄၵၢင်ၸႂ်တေႃႇ ၸွမ်ၸိုင်ႈ(သိုၵ်းထၢၵ်ႈ)မိၼ်းဢွင်ႇလၢႆႇ – ယွၼ်ႉပိူဝ်ႈ ၸွမ်ၸိၵ်းသိုၵ်းမၢၼ်ႈယိုတ်းမိူင်းသေ ႁဵတ်းႁႂ်ႈလုၵ်ႈဢွၼ်ႇ – ၵူၼ်းၼုမ်ႇ – ၵူၼ်းမိူင်း လႆႈဢွၼ်ၵၼ်ပၢႆႈဢွၵ်ႇဝၢၼ်ႈဢွၵ်ႇမိူင်း ၊ ၺႃးပိူၼ်ႈလူမဝ်ႈတဵၵ်းတဵင်ၵူၼ်းမိူင်းမၢၼ်ႈ ဝႃႈၼႆ။

ၶၢဝ်းတၢင်းဢိၼ်ႊတီႊယိူဝ်ႊ ဝၼ်းတီႈ 31/5/2026 ၼႆႉ တေပဵၼ်ၶၢဝ်းတၢင်းႁႅၵ်ႈ တွၼ်ႈတႃႇ မိၼ်းဢွင်ႇလၢႆႇ ဝၢႆးလင်ၶိုၼ်ႈပဵၼ်ၸွမ်ၸိုင်ႈ (သိုၵ်းထၢၵ်ႈ) ၼႆ သိုဝ်ႇၶၢဝ်ႇ The Economic Times ႁၢႆးငၢၼ်းဝႆႉၼင်ႇၼႆ။