ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉ တိုၵ်းသူၼ်းႁႂ်ႈမိူင်းထႆး တင်း မိူင်းၵမ်ႊပေႃႊတီႊယိူဝ်ႊ (ၶမဵၼ်) ၼပ်ႉယမ်ႁဵတ်းသၢင်ႈၸွမ်းၼင်ႇၶေႃႈတူၵ်းလူင်းၵိုတ်းတိုၵ်းၵၼ်ဝႆႉ ဝႃႈၼႆ။

ၼႂ်းဝၼ်းတီႈ 7 -8/12/2025 ၼႆႉ မိူင်းထႆး တင်း မိူင်းၵမ်ႊပေႃႊတီႊယိူဝ်ႊ တႄႇမီးလွင်ႈၶဵင်ႈၶႅင်ၵၼ်မႃးၶိုၼ်း ၸွမ်းလႅၼ်လိၼ်။ ၾၢႆႇမိူင်းၵမ်ႊပေႃႊတီႊယိူဝ်ႊ ယိုဝ်းၶိူင်ႈၵွင်ႈလူင်၊ ၾၢႆႇမိူင်းထႆးၵေႃႈ ဢဝ်ႁိူဝ်းမိၼ်တိုၵ်း သႅၼ်း F-16 ၵႂႃႇပွႆႇမၢၵ်ႇသႂ်ႇ ဢွင်ႈတီႈတပ်ႉပၢင်သဝ်း လႄႈ ႁူင်းၵႃႇသီႇၼူဝ်ႇ မိူင်းၵမ်ႊပေႃႊတီႊယိူဝ်ႊ ၸိူဝ်းမီးဝႆႉၸွမ်းလႅၼ်လိၼ်။

ယွၼ်ႉပၼ်ႁႃ လွင်ႈထဵင်မေႃးၵၼ်ၸွမ်းလႅၼ်လိၼ်သေ ၼႂ်းလိူၼ်ၵျူႊလၢႆႊ ပူၼ်ႉမႃးၼႆႉၵေႃႈ သွင်ၾၢႆႇ လႆႈပဵၼ်ပၢင်တိုၵ်းၵၼ်မႃး ႁိုင်ၶၢဝ်းတၢင်း 5 ဝၼ်း။ ဝၢႆးလင်ၼၼ်ႉ ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉ လႄႈ ၸွမ်ၽွင်းလူင် မိူင်းမလေးသျႃး ဢီႊပရႃႊႁိၼ်ႊ ၶဝ်ႈၵႄႈၵၢင်ဢုပ်ႇဢူဝ်းငူပ်ႉငီႉပၼ်သေ သွင်ၾၢႆႇ လႆႈလူင်းလၢႆးမိုဝ်းၵိုတ်းတိုၵ်းၵၼ်မႃး။

ၵူၺ်းၵႃႈ ယၢမ်းလဵဝ် သွင်မိူင်း ၶိုၼ်းမီးလွင်ႈၶဵင်ႈၶႅင်ၵၢၼ်သိုၵ်းတေႃႇၵၼ်မႃး။ ၼႂ်းဝၼ်းတီႈ 9/12/2025 ၼႆႉ ၾၢႆႇထႆး ပိုၼ်ၽၢဝ်ႇဝႆႉဝႃႈ တေလိုပ်ႈလမ်းတပ်ႉသိုၵ်းမိူင်းၵမ်ႊပေႃႊတီႊယိူဝ်ႊ ၸိူဝ်းပူၼ်ႉပႅၼ်ၶဝ်ႈမႃး ၼႂ်းလႅၼ်လိၼ်ထႆး ႁႂ်ႈဢွၵ်ႇၵႂႃႇၶိုၼ်းတၢင်းသဵင်ႈ ဝႃႈၼႆ။

မိူင်းၵမ်ႊပေႃႊတီႊယိူဝ်ႊၵေႃႈ လၢတ်ႈဝႃႈ ၾၢႆႇထႆး တင်ႈၸႂ်ႁႃတၢင်းၽိတ်း ႁဵတ်းၶဵၼ်တေႃႇၵၼ်ၵူၺ်းၼႆသေ သွင်ၾၢႆႇ ၶဵင်ႇမၢပ်ႇၼေးၵၼ်ဝႆႉ။ ၽွင်းၼင်ႇၼႆ ၸွမ်ၸိုင်ႈမိူင်းဢမေႊရိၵၼ်ႊ ၸင်ႇလၢတ်ႈတိုၵ်းသူၼ်း ႁႂ်ႈသွင်ၸိုင်ႈမိူင်း ႁဵတ်းၸွမ်းၼင်ႇၶေႃႈတူၵ်းလူင်းၵၼ်ဝႆႉ ၼႆယဝ်ႉ။

ယွၼ်ႉပၢင်တိုၵ်း ၼႂ်းဝၼ်းတီႈ 7 လႄႈ ဝၼ်းတီႈ 8 ၼႆႉသေ သိုၵ်းထႆး တၢႆ 1 ၵေႃႉ၊ ၵူၼ်းမိူင်းၵမ်ႊပေႃႊတီႊယိူဝ်ႊ တၢႆ 6 ၵေႃႉ ၽူႈမီးပုၼ်ႈၽွၼ်းသွင်ၾၢႆႇ ပိုၼ်ၽၢဝ်ႇဝႆႉၼင်ႇၼႆ။
ၼႂ်းဝၼ်းတီႈ 9 (မိူဝ်ႈၼႆႉ)ၵၢင်ၼႂ်ၸဝ်ႉၵေႃႈ သွင်ၾၢႆႇ တိုၵ်ႉသိုပ်ႇယိုဝ်းတိုၵ်းၵၼ်ႁၢဝ်ႈႁႅင်း။ ယွၼ်ႉပၢင်တိုၵ်းတီႈလႅၼ်လိၼ်သေ ၼႂ်းၸႄႈတွၼ်ႈ 5တီႈ ၾင်ႇထႆးၼႆႉ လႆႈပိၵ်ႉဢိုတ်းဝႆႉႁူင်းႁဵၼ်း 641 လင်၊ ၵူၼ်းမိူင်းပိုၼ်ႉတီႈ မွၵ်ႈ 4သႅၼ် လႆႈငိူင်ႉပၢႆႈတီႈလွတ်ႈၽေးဝႆႉၼႆ ၶၢဝ်ႇထႆး ပိုၼ်ၽၢဝ်ႇဝႆႉ ၼင်ႇၼႆ။