ႁိူဝ်းမိၼ်သိုၵ်းမၢၼ်ႈပွႆႇမၢၵ်ႇၼႂ်းၸႄႈဝဵင်းမိူင်းမိတ်ႈ တူၵ်းသႂ်ႇတီႈဝၢၼ်ႈမျိတ်ႉသူင်ႇ တိူဝ်ႉၵူၼ်းဝၢၼ်ႈလႄႈၵူၼ်းပၢႆႈၽေးသိုၵ်း တၢႆ 11 ၵေႃႉ။

ၼႂ်းဝၼ်းတီႈ 6/12/2025 ယၢမ်းၵၢင်ၼႂ် 9 မူင်း ႁိူဝ်းမိၼ်သိုၵ်းမၢၼ်ႈပွႆႇမၢၵ်ႇ တီႈဝၢၼ်ႈမိတ်ႉသူင်ႇ (မြစ်ဆုံရွာ) ဢၼ်မီးၼႂ်းၵႄႈ ဝဵင်းမိူင်းမိတ်ႈလႄႈ မၢၼ်ႈပဵင်း  ။ မၢၵ်ႇလူင်တူၵ်း 8 လုၵ်ႈ တႅၵ်ႇ 7 လုၵ်ႈ  တိူဝ်ႉၵူၼ်းတၢႆ 11 ၵေႃႉ။  ပဵၼ်ၵူၼ်းၸၢႆး 2 ၵေႃႉ ၵူၼ်းယိင်း 9 ၵေႃႉ  ။  ၼႂ်းၵူၼ်းလူႉတၢႆၼၼ်ႉ ပႃး လုၵ်ႈဢွၼ်ႇ လႄႈ မႄႈမၢၼ်း  – လႆႈႁူႉၼင်ႇၼႆ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“  ၼႂ်းၵူၼ်းလူႉတၢႆၼၼ်ႉ ပႃးၵူၼ်းပၢႆႈၽေးသိုၵ်းမႃးယူႇဝႆႉ တီႈဝၢၼ်ႈၼၼ်ႉပႃး ၊ မိူဝ်ႈဝႃးၵေႃႈ မႃးပွႆႇထႅင်ႈယူႇ ”- ဝႃႈၼႆ ။

ဢွင်ႈတီႈဢၼ်သိုၵ်းမၢၼ်ႈမႃးပွႆႇမၢၵ်ႇၼၼ်ႉ ယၼ်ၵႆၵၼ်တင်း ဝဵင်းမိူင်းမိတ်ႈ 18 လၵ်း ၊ ပဵၼ်ၼႃႈတီႈသိုၵ်းၶၢင် KIA လႄႈ KPDF ၵုမ်းၵမ်။  ႁိမ်းဝၢၼ်ႈၼၼ်ႉသမ်ႉမႃးပႃး မေႃႇၶမ်း ဢၼ်သိုၵ်းၶၢင်ၵုမ်းဝႆႉ –    ၵူၼ်းပိုၼ်ႉတီႈလၢတ်ႈၼင်ႇၼႆ ။

ယၢမ်းလဵဝ်တီႈတၢင်းၼႂ်းၸႄႈဝဵင်းမိူင်းမိတ်ႈ လႅင်းၾူင်း  ဢိၼ်ႊတိူဝ်ႊၼႅတ်ႊ ၶၢတ်ႇဝႆႉ။  ၵူၼ်းဝၢၼ်ႈလႆႈၸႂ်ႉလွၵ်းလၢႆးၽႂ်မၼ်းသေ ၸင်ႇၸၢင်ႈတူၺ်း/တၢင်ႇ/ၵပ်းသိုပ်ႇတိတ်းတေႃႇၵၼ်။ ၽွင်းၼင်ႇၼႆ ၽႂ်တၢင်ႇလွင်ႈပိူင်ပဵၼ်ၼႂ်းပိုၼ်ႉတီႈၶိုၼ်ႈမႃးၵေႃႈ သိုၵ်းမၢၼ်ႈပၵ်းတႃပႂ်ႉတူၺ်းသေ တီႉၺွပ်းဢဝ်လိူင်ႈပႃး။ ၼႂ်းပိုၼ်ႉတီႈၼႆႉ သိုၵ်းမၢၼ်ႈလႄႈၸုမ်းသိုၵ်းၸၢဝ်းၶိူဝ်းၵေႃႈ ၵႆႉတုမ်ႉတိူဝ်ႉပဵၼ်ပၢင်တိုၵ်းၵၼ်  လႆႈႁူႉၼင်ႇၼႆ ။

ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၼႂ်းထိူၼ်ႇ ပွတ်းၾၢႆႇႁွင်ႇဝဵင်းၼၼ်ႉသိုၵ်းၶၢင်လႄႈ ၸုမ်း PDF ၵေႃႈ တူင်ႉၼိုင်ၵႂႃႇမႃး ယူႇ ။ ပေႃးၶဝ်ၽႃႇၺႃး သၢႆသိုၵ်းမၢၼ်ႈၵေႃႈ ပဵၼ်ပၢင်တိုၵ်းၵၼ်   ၊ ၵူၼ်းမိူင်း ၸိူဝ်း ပၢႆႈၵႂႃႇယူႇ ၼႂ်းသူၼ်ၼႂ်းထိူၼ်ႇသမ်ႉ-  သိုၵ်းၶၢင်လႄႈ ၸုမ်းယိပ်းၵွင်ႈၵၢင်ႇတၢင်ႇၸုမ်းဝႃႈ  တေၶဝ်ႈတိုၵ်း သိုၵ်းမၢၼ်ႈလႄႈ ၵူၼ်းဝၢၼ်ႈယႃႇၼႅတ်ႈမိူဝ်း ဝႃႈၼႆထႅင်ႈ ၊ ၾၢႆႇသိုၵ်းမၢၼ်ႈသမ်ႉ ၸႂ်ႉပွၵ်ႈယူႇႁိူၼ်း။ ၵူၼ်းပၢႆႈၽေး ပၢင်တိုၵ်းၼႆႉ လႆႈထူပ်းလွင်ႈ လွၵ်ႇငိုတ်ႈ လၢႆၾၢႆႇဝႆႉ”- ဝႃႈၼႆ ။

မိူဝ်ႈဝၼ်းတီႈ 30 /11/2025  တႄႇယၢမ်းတၢမ်းၶမ်ႈ မွၵ်ႈ 5 မူင်းၵႂႃႇ သိုၵ်းမၢၼ်ႈ တင်း ၸုမ်းသိုၵ်းၸၢဝ်းၶိူဝ်း ၸိူဝ်းထွႆဢွၵ်ႇၵႂႃႇပၵ်းတပ်ႉပၢင်သဝ်း တၢင်းၼွၵ်ႈဝဵင်းၼၼ်ႉ ပဵၼ်ပၢင်တိုၵ်းၵၼ်ၾၢႆႇတူၵ်းဝဵင်း မိူင်းမိတ်ႈ ။

ယၢမ်းလဵဝ် ၸွမ်းသၢပ်ႇဝဵင်းမိူင်းမိတ်ႈၼႆႉ မီးဝႆႉၸုမ်းသိုၵ်းၶၢင် (KIA) ၊ တပ်ႉသိုၵ်းရၶႅင်ႇ (AA) ၊ တပ်ႉသိုၵ်းတႅဝ်းႁူမ်ႈၻီႊမူဝ်ႊၶရႅတ်ႉတိၵ်ႉလုၵ်ႈႁဵၼ်းမိူင်းမၢၼ်ႈပတ်းပိုၼ်ႉ (ABSDF) လႄႈ တပ်ႉၸုမ်း ပၵၽ ၶဝ်ၸိူဝ်းၼႆႉ  ။

ယွၼ်ႉလူင်ပွင်ၸိုင်ႈမိူင်းၶႄႇ ၶဝ်ႈၵၢင်ႁဵတ်းၶဵဝ်ပၼ်သေ သိုၵ်းမၢၼ်ႈ တင်း သိုၵ်းတဢၢင်း (TNLA) တူၵ်းလူင်းၵိုတ်းတိုၵ်းၵၼ် လူၺ်ႈဢမ်ႇမၵ်းမၼ်ႈၶၢဝ်းႁိုင်ၵူၺ်းဢမ်ႇၵႃး သိုၵ်းတဢၢင်း တေထွႆသၢႆသိုၵ်း ဢွၵ်ႇပၼ်ၶိုၼ်း ၼႂ်းၸႄႈဝဵင်းမိူင်းၵုတ်ႈ – ၸႄႈဝဵင်းမိူင်းမိတ်ႈၼႆ – ၾၢႆႇသိုၵ်းတဢၢင်း ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉ မိူဝ်ႈဝၼ်းတီႈ 29 /10/ 2025   ဝႆႉ။

ပိုၼ်ႉတီႈဢၼ်သိုၵ်းတေဢမ်ႇလႆႈယိုဝ်းလႃးလႃး ႁိုဝ် တေဢမ်ႇလႆႈတိူဝ်ႉလႃးလႃးၼႆႉပဵၼ် -ႁိူၼ်းယေးၵူၼ်းမိူင်း၊ ႁူင်းယႃ ႁွင်ႈယႃ၊ ႁူင်းႁဵၼ်း၊ ဝတ်ႉဝႃး ၽႃသိူဝ်ႇ ဢွင်ႈတီႈၵိူဝ်းယမ်၊ သိင်ႇဝႅတ်ႉလွမ်ႉဝၢၼ်ႈသူၼ်၊ ႁႆႈၼႃးမၢၵ်ႇၶဝ်ႈတဝ်ႈၼမ်ႉ၊ ႁူင်းၵၢၼ်ႁူင်းၸၢၵ်ႈဢၼ်ၸၢင်ႈတႅၵ်ႇပဵၼ်ၵွင်ႉငူၼ်ႉမီးၽေးတေႃႇၵူၼ်းမိူင်း ၸဵမ်ၸိူဝ်းၼႆႉ – ပႃးၼႂ်းလိၵ်ႈၵိၼ်ၵႅၼ်ႇ ၵျီႊၼီႊဝႃႊ ၶွၼ်ႊဝႅၼ်ႊသျိၼ်ႊ ၼင်ႇၼႆ။