တီႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇ တီႈယူႇတပ်ႉသိုၵ်းမၢၼ်ႈၵူႈႁွင်ႈၵၢၼ်ၼၼ်ႉ ယၢမ်းလဵဝ် ႁွင်ႈၵိၼ်ၵျေႃႇမူၼ်ႈသိူဝ်း KTV လိူင်ႇၼမ်မႃး ၊ ဢမ်ႇမီးၸုမ်းယိပ်းၵွယင်ႈၵၢင်ႇၸုမ်းလႂ်ၽဵဝ်ႈလၢင်ႉႁႂ်ႈထိုင်တီႈလႆႈလႄႈၵူၼ်းမိူင်း ပေႃႈမႄႈလုၵ်ႈဢွၼ်ႇဢွၼ်ၵၼ်မႆႈၸႂ် လွင်ႈယႃႈမဝ်းၵမ်ႁဵတ်းႁႂ်ႈတၢင်းယၢမ်ႈလုၵ်ႈဢွၼ်ႇလူႉ။
ၼႂ်းပီၼႆႉ ႁၢၼ်ႉၵိၼ်ၵျေႃႇ လိူင်ႇၼမ်မႃး မီးထိုင် 6 တီႈ။ ပၼ်ႁႃယႃႈမဝ်းၵမ်ဢၼ်မီးဝႆႉၸဵမ်ပိုင်းၵေႃႈ ယၢမ်းလဵဝ်ယိင်ႈၶႅၼ်းလိူင်ႇၼမ်သိုဝ်ႉငၢႆႈမႃးလိူဝ်ၵဝ်ႇထႅင်ႈ။ ပလိၵ်ႈမၢၼ်ႈသိုၵ်းမၢၼ်ႈၽဵဝ်ႈမူၺ်ႉဢမ်ႇထိုင်တီႈ ၽူႈၸၢႆးၼုမ်ႇၵူၼ်းမိူင်းသၢတ်ႇလၢတ်ႈၽူႈတွႆႇႁွၵ်ႈၼင်ႇၼႆ။
“ဢၼ်ဝႃႈပလိၵ်ႈမၢၼ်ႈ သိုၵ်းမၢၼ်ႈသင်ႇပိၵ်ႉႁၢၼ်ႉ KTV ၼႆဢမ်ႇမီးသေပွၵ်ႈ။ ၵူၺ်းၵႃႈ ႁိုင်ႁိုင်ၼိုင်ႈပွၵ်ႈတႄႉၶဝ်ႈထတ်းယူႇ။ ၵူၺ်းၵႃႈပေႃးတေမႃးထတ်းၵေႃႈၶဝ်ပေႃးသူင်ႇၶၢဝ်ႇလူင်ႈၼႃႈဝႆႉဢွၼ်တၢင်းယဝ်ႉ။ မဵဝ်းဢၼ်တေၽိတ်းမၢႆမီႈၵေႃႈၶဝ်ပေႃးၸၢင်ႈဢဝ်ငိူင်ႉဝႄႈဝႆႉထႃႈယဝ်ႉၼႃႇ။ ယၢမ်းလဵဝ် တီႈမိူင်းသၢတ်ႇၼႆႉ ႁၢၼ်ႉၵိၼ်ၵျေႃႇတႄႉ တေမီးယူႇမွၵ်ႈ 5-6 ႁၢၼ်ႉ။ မိူၼ်ၼင်ႇ ၼမ်ႉၵျၢမ်း၊ idol၊ Jocker၊ သူင်ႇၼေႇၵျႃႉ ယဝ်ႉၵေႃႈ ဢၼ်ပိုတ်ႇမႂ်ႇထႅင်ႈတီႈၼႆႉ၊ ၶႃႈတမ်ႉဢမ်ႇလႆႈႁူႉတီႈမၼ်း။ ”
ၵူၼ်းမိူင်းသၢတ်ႇလၢတ်ႈဝႃႈ ၸူဝ်ႈႁၢၼ်ႉ KTV လိူင်ႇၼမ်မႃးၼႆႉ ႁဵတ်းႁႂ်ႈၵူၼ်းၼုမ်ႇဢမ်ႇသူၼ်ၸႂ်ၼႂ်းၵၢၼ်ႁဵၼ်း၊ ဢမ်ႇပႃးၸႂ်ႁဵတ်းၵၢၼ်၊ ဢမ်ႇမီးၼမ်ႉၸႂ်ၸွႆႈတူင်ႇဝူင်းၵူၼ်း – ၵၢၼ်တူင်ႉၼိုင်ၼႂ်းပွၵ်ႉၼႂ်းယွမ်ႇလႄႈ ၶႅၵ်ႇလီပၢင်ၸႃႉၸိူဝ်းၼႆႉၵေႃႈ ဢမ်ႇသူၼ်ၸႂ် ဢမ်ႇၶဝ်ႈႁူမ်ႈ – တူင်ႇဝူင်းၵူၼ်းလႅၵ်ႈလၢႆႈမႃးတႄႉတႄႉၼႆ ၼုမ်ႇၸၢႆးတႆးၵူၼ်းမိူင်းသၢတ်ႇလၢတ်ႈထႅင်ႈၼင်ႇၼႆ။
“ မိူဝ်ႈလဵဝ်လႄႈ တင်းမိူဝ်ႈဢွၼ်တၢင်းၼႆ မၼ်းလႆႈႁၼ်ပႅၵ်ႇပိူင်ႈၵၼ်လီၼႃ ၽွၼ်းလီ ၽွၼ်းႁၢႆႉမၼ်း၊ ၽွၼ်းႁၢႆႉမၼ်းၼမ်လိူဝ်သေမိူဝ်ႈဢွၼ်တၢင်းၼၼ်ႉၼႃႇၼေႃႈ ။မိူဝ်ႈဢွၼ်တၢင်း မိူဝ်ႈ KTV ပႆႇမီးတေႉၵေႃႈ မိူၼ်ၸိူင်ႉၼင်ႇ ၵၢၼ်တူင်ႇဝူင်းၵူၼ်းလႄႈသင် ၶႅၵ်ႇလီပၢင်ၸႃႉလႄႈသင်၊ ၵူၼ်းၼုမ်ႇႁဝ်း ၵႆႉလႆႈႁၼ် ဢွၼ်ၵၼ်တူင်ႉၼိုင် ၸွႆႈထႅမ် ၊ ယၢမ်းလဵဝ်တႄႉဢမ်ႇမီးယဝ်ႉလွင်ႈႁူမ်ႈၵၼ်တူင်ႉၼိုင်ၸိူင်ႉၼၼ်။ ၵွပ်ႈၼႆပေႃးတေလၢတ်ႈသိုဝ်ႈသိုဝ်ႈတႄႉ ႁၢၼ်ႉ KTV ၼႆႉမၼ်းဢမ်ႇလီမီးၼႂ်းဝၢၼ်ႈၼႂ်းဝဵင်းသေဢိတ်းၶႃႈ။ ပေႃးမၼ်းၼမ်မႃးတိၵ်းတိၵ်းၼႆႉ လီမႆႈၸႂ်ဢေႃႈမိူဝ်းၼႃႈမႃး။ ”
ယွၼ်ႉႁၢၼ်ႉ KTV ၼမ်လိူင်ႇမႃးသေ ၵူၼ်းၼုမ်ႇဢမ်ႇသူၼ်ၸႂ်ၵၢၼ်တူင်ႇဝူင်းၵူၼ်းၵူၺ်းဢမ်ႇၵႃး ၼႂ်းၵၢၼ်ႁဵၼ်းလိၵ်ႈလၢႆးၵေႃႈ ဢမ်ႇသူၼ်ၸႂ်ၵၼ်။ ဢွၼ်ၵၼ် ၵႂႃႇၶဝ်ႈႁၢၼ်ႉၵျေႃႇမူၼ်ႈသေ သူႇသမ်းၵိၼ်ယႃႈလႄႈ ႁဵတ်းႁႂ်ႈၾိင်ႈၵူၼ်းၼႂ်းတူင်ႇဝူင်းလူႉပႃး။ လိူဝ်ၼၼ်ႉ ယွၼ်ႉဢမ်ႇမီးၸုမ်းလႂ်မႃးၵႅတ်ႇၶႄ ၵႄႈလိတ်ႈပၼ်ႁႃလႄႈ လွင်ႈႁဵတ်းၽိတ်းမၢႆမီးၵေႃႈ လိူင်ႇၼမ်မႃး ။
ၸၢႆးၼုမ်ႇ ၽူႈတူင်ႉၼိုင်တူင်ႇဝူင်းၵူၼ်း ၼႂ်းမိူင်းတႆးပွတ်းၸၢၼ်း လၢတ်ႈၼင်ႇၼႆ။
“လုၵ်ႈဢွၼ်သႅၼ်းပၢၼ်လူဝ်ႇႁဵၼ်းသမ်ႉၵႂႃႇမီးၼႂ်းႁၢၼ်ႉKTV။ ၵမ်ႈၽွင်ႈပဵၼ်ၵူၼ်းၵႂႃႇၵိၼ်ၵျေႃႇ ၵမ်ႈၽွင်ႈၵႂႃႇႁဵတ်းၵၢၼ်ၼႂ်းႁၢၼ်ႉၼၼ်ႉ။ တၢင်းသွင်ဢၼ်ၼႆႉ ပဵၼ်ဢၼ်တုမ်ႉတိူဝ်ႉထိုင် Generation ႁဝ်းၶိုၼ်း ။ သင်ဝႃႈ ၸိူဝ်းပဵၼ်ၽူႈယႂ်ႇၵူၼ်းလူင် ပေႃႈမႄႈၽူႈၵုမ်းထိင်းလုၵ်ႈဢွၼ်ႇ ဢမ်ႇမီးလွင်ႈတူင်ႉၼိုင်တူၵ်ႇတၵ်ႉ၊ ဢမ်ႇဝၢင်းၽႅၼ် ၵႄႈလိတ်ႈပၼ်ၵႂႃႇၸိုင် ၼႂ်းပိုၼ်ႉတီႈႁဝ်းတေမီးလွင်ႈၵေႃႇၵၢၼ်ႁၢႆႉမႃးတိၵ်းတိၵ်း။ တေႁၼ်ပုၼ်ႈသုၼ်ႇတူဝ်မႃးတိၵ်းတိၵ်း ဢဝ်တၢင်းၵျေႃႇပဵၼ်ယႂ်ႇၸိူဝ်းၼႆႉ တေမီးၼမ်မႃး ။”
ဝၢႆးသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃး ၶၢဝ်းတၢင်း 5 ပီၼႆႉ ႁၢၼ်ႉ KTV လႄႈ ႁၢၼ်ႉလဝ်ႈ ယႃႈမဝ်းၵမ်လိူင်ႇၼမ်မႃးႁႅင်းလႄႈ တႄႇဢဝ်လိူၼ်ၵျုၼ်ႊပီ 2025 ၼႆႉမႃး ၼၢင်းယိင်းဢွၼ်ႇၼႂ်းမိူင်းတႆး ဢၼ်လူႉတၢႆယွၼ်ႉ ယႃၶေႊ K၊ Happy Water ၸိူဝ်းၼႆႉ ဢမ်ႇယွမ်း 4 ၵေႃႉယဝ်ႉ။
မိူင်းသၢတ်ႇၼႆႉ မီးငဝ်ႈငုၼ်းၵုမ်းၵမ်ယၼ်ႇသိုၵ်း ၸၵၶ 14 ပၵ်းဝႆႉသေ မီးတပ်ႉၶလရ 49 လႄႈ 278 ၶမရ 333 ၊ 527 ဢိၵ်ႇတင်းတပ်ႉတေႃႉသူင်ႇ တပ်ႉၾၢႆႇပွင်ႇၶၢဝ်ႇသိုဝ်ႇသၢၼ်၊ တပ်ႉၾၢႆႇမၢၵ်ႇမိုဝ်ႈၸိုၼ်းယၢမ်း ၸိူဝ်းၼႆႉတင်းမူတ်းမီး 11 တပ်ႉ။ ၼွၵ်ႈလိူဝ်ၼၼ်ႉ မီးႁွင်ႈၵၢၼ်တႂ်ႈတပ်ႉသိုၵ်းထႅင်ႈလၢႆလၢႆႁွင်ႈၵၢၼ်။ လႄႈတပ်ႉပႂ်ႉလႅၼ်လိၼ် ဢိၵ်ႇပျီႇတူႉၸိတ်ႉထႅင်ႈ။ ၵူၺ်းၵႃႈ ဢမ်ႇၽဵဝ်ႈမူၺ်ႉပၼ်လွင်ႈၵိၼ်ၵျေႃႇ တေႃႇလွင်းလႄႈယႃႈမဝ်းၵမ်ၸိူဝ်းၼႆႉလႆႈသေၸုမ်း။
တႅမ်ႈ- ၶုၼ်ၶိင်း
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ