ၽူႈသိုဝ်ႇၶၢဝ်ႇ ၾၢႆႇသိုၵ်း ၵူၼ်းမိူင်းဢမေႊရိၵၼ်ႊ ၵေႃႉၼိုင်ႈ ၽွင်းမိူဝ်ႈလူင်းပိုၼ်ႉတီႈဢဝ်ၶၢဝ်ႇပၢင်တိုၵ်း ၼႂ်းၸႄႈဝဵင်း တီးတဵင်ႇ မိူင်းၶျၢင်းၼၼ်ႉ ယဵပ်ႇၺႃးမၢၵ်ႇၾင်လိၼ်သေ မၢတ်ႇၸဵပ်းႁၢဝ်ႈႁႅင်း၊ လႆႈၶၢမ်ႇယူတ်းယႃတူဝ်ဝႆႉ ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 18 လိူၼ်ၼူဝ်ႊဝႅမ်ႊပိူဝ်ႊ ၽူႈသိုဝ်ႇၶၢဝ်ႇၾၢႆႇသိုၵ်း ၵူၼ်းမိူင်းဢမေႊရိၵၼ်ႊ ၸိုဝ်ႈႁွင်ႉ ၵေႃႊလိၼ်ႊ မေႊၾီႊလ် လူင်းပိုၼ်ႉတီႈဢဝ်ၶၢဝ်ႇၸွမ်း သၢႆသိုၵ်း PDF – Zoland ႁိမ်းလွႆလူင် ၵၼေႊတီႊ ၼႂ်းၸႄႈဝဵင်းတီးတဵင်ႇ မိူင်းၶျၢင်း။

ပဵၼ်ဢွင်ႈတီႈၶဵင်ႈၶႅင်ၵၢၼ်သိုၵ်းၵၼ်ဝႆႉတင်း တပ်ႉသိုၵ်းမၢၼ်ႈ။ ၽွင်းၼၼ်ႉ မၼ်းၸၢႆး ယဵပ်ႇၺႃးမၢၵ်ႇၾင်လိၼ်သေ ၼိဝ်ႉတိၼ်ၾၢႆႇသၢႆႉ သွင်ၼိဝ်ႉ ပုတ်းၶၢတ်ႇၵႂႃႇ၊ တိၼ်ၾၢႆႇၶႂႃလႄႈ မိုဝ်းၾၢႆႇၶႂႃႇၵေႃႈ ၺႃးၸၢၵ်ႇမၢၵ်ႇသေ မၢတ်ႇၸဵပ်းႁႅင်း။ ဝၢႆးၼၼ်ႉ လႆႈသူင်ႇယူတ်းယႃတူဝ်ဝႆႉ တီႈႁူင်းယႃလူင် ၼႂ်းၸႄႈမိူင်း မီႊသူဝ်ႊရမ်ႊ မိူင်းဢိၼ်ႊတီႊယိူဝ်ႊ ဝႃႈၼႆ။

မေႊၾီႊလ် ၽူႈသိုဝ်ႇၶၢဝ်ႇၵၢၼ်သိုၵ်းၼႆႉ ယၢမ်ႈၵႂႃႇဢဝ်ၶၢဝ်ႇ ၼႂ်းပိုၼ်ႉတီႈပၢင်တိုၵ်း ရၢတ်ႉသျႃႊ တင်း ယူႇၶရဵၼ်ႊ ယိုဝ်းတိုၵ်းၵၼ်လႂ်၊ ၼႂ်းမိူင်း ႁေႊတီႊ ဢွင်ႈတီႈၵႂၢတ်ႇလၢင်ႉ ၸုမ်းၵေႃႇၵၢၼ်ႁၢႆႉလၢႆလၢႆတီႈလႂ်၊ ဢွင်ႈတီႈပၢင်တိုၵ်းသိုၵ်းသိူဝ် ၼႂ်းမိူင်းဢီႊရၢတ်ႉလႂ် ၸဵမ်ၸိူဝ်းၼႆႉ။

ပူၼ်ႉမႃးပႆႇပေႃးႁိုင်ၼႆႉ လႆႈမႃးဢဝ်ၶၢဝ်ႇ ၼႂ်းၸႄႈမိူင်းၶျၢင်း ဢွင်ႈတီႈ တပ်ႉသိုၵ်းမၢၼ်ႈ တင်း သိုၵ်းၶျၢင်း ၶဵင်ႈၶႅင်ၵၢၼ်သိုၵ်းတေႃႇၵၼ်။

ဝၢႆးၼၼ်ႉ ပိုၼ်ၽၢဝ်ႇႁၢႆးငၢၼ်းဢွၵ်ႇ ငဝ်းႁၢင်ႈသဵင်မၢႆတွင်း ဢၼ်မီးၸိုဝ်ႈဝႃႈ The Chin Resistance။ ၼႂ်းငဝ်းႁၢင်ႈသဵင်ၼၼ်ႉ တေပႃးႁၢင်ႈငဝ်းတူင်ႉၸုမ်းသိုၵ်းၶဝ် တူင်ႉၼိုင်ယူႇၼႃႈသိုၵ်း ၼႂ်းမိူင်းၶျၢင်း။ ငဝ်းႁၢင်ႈသဵင်ၼၼ်ႉ မၼ်းၸၢႆး လႆႈပိုၼ်ၽႄၵႂႃႇ ၼႂ်းသိုဝ်ႇတူင်ႇဝူင်း Qilo TV ဝႃႈၼႆ။