ၼေႃႈၽူႈတႅၼ်းၽွင်း ပႃႇတီႇသိူဝ်ၽိူၵ်ႇ SNDP ဢူးဝေႇလိၼ်းထႅတ်ႉ (ဦးဝေလင်းထက်) ၸႄႈဝဵင်းပၶူၵ်ႉၵူႇ တိူင်းမၵူၺ်းၼၼ်ႉ ၺႃးၸုမ်းယိပ်းၵွင်ႈၵၢင်ႇ တီႉၺွပ်းတူဝ်ၵႂႃႇဝႃႈၼႆ။

ဢူးဝေႇလိၼ်းထႅတ်ႉၼႆႉ ယူႇတီႈဝၢၼ်ႈ ဢေးၵျုၼ်း ၸႄႈဝဵင်းပၶူၵ်ႉၵူႇ တိူင်းမၵူၺ်း။ မၼ်းၸၢႆး ယူႇၼႂ်းပႃႇတီႇသိူဝ်ၽိူၵ်ႇသေ တေၶဝ်ႈၶႅင်ႇ တီႈၶဵတ်ႇလိူၵ်ႈတင်ႈတိူင်း မၢႆ ၼိုင်ႈ ၸွမ်းပိူင်ပုၼ်ႈသုၼ်ႇ PR။

မိူဝ်ႈပူၼ်ႉမႃး ဝၼ်းတီႈ 29 လိူၼ်ၼူဝ်ႊဝႅမ်ႊပိူဝ်ႊ ၵၢင်ၶမ်ႈ ၸုမ်းယိပ်းၵွင်ႈၵၢင်ႇၸုမ်းၼိုင်ႈ ၶဝ်ႈတီႉၺွပ်းတူဝ် ထိုင်ၼႂ်းႁိူၼ်း၊ ႁိုင်ၶၢဝ်းတၢင်းၼိုင်ႈဝူင်ႈယဝ်ႉသေတႃႉ ပႆႇလွတ်ႈမႃးၶိုၼ်း။

ၽူႈမီးပုၼ်ႈၽွၼ်း ၼႂ်းပႃႇတီႇသိူဝ်ၽိူၵ်ႇၵေႃႉၼိုင်ႈၵေႃႈ ယိုၼ်ယၼ်တွပ်ႇဝႆႉတီႈသိုဝ်ႇ ဢေႊရႃႊဝတီႇ ဝႃႈ – ဢူးဝေႇလိၼ်းထႅတ်ႉ ၺႃးတီႉၺွပ်းဝႆႉသေ ၶၢတ်ႇလွင်ႈၵပ်းသိုပ်ႇဝႆႉ။ တေႃႇထိုင်ဝၼ်းၽတ်းၼႆႉ ပႆႇလွတ်ႈမႃးၶိုၼ်း ဝႃႈၼႆ။

ဢိင်ၼိူဝ်လွင်ႈၼႆႉသေ ၽူႈမီးပုၼ်ႈၽွၼ်း ၾၢႆႇၵႅတ်ႇၶႄၵူၼ်းမိူင်း ပၵၽ ၸႄႈဝဵင်းပၶူၵ်ႉၵူႇ လၢတ်ႈဝႃႈ – ၸုမ်းယိပ်းၵွင်ႈတီႉၺွပ်းၵႂႃႇ ၼႆသေတႃႉ ပဵၼ်ၸုမ်းလုၵ်ႉၽိုၼ်ႉတီႉၺွပ်းၼႆ ဢမ်ႇဝႃႈလႆႈ။ ယွၼ်ႉပိူဝ်ႈ ပိုၼ်ႉတီႈၼၼ်ႉ ပဵၼ်တပ်ႉသိုၵ်းမၢၼ်ႈ ၵုမ်းဝႆႉ။ ၸုမ်းပိဝ်ႇသေႃးထီးၶဝ် တီႉၺွပ်းၵေႃႈ ၸၢင်ႈပဵၼ်လႆႈ။ ဢမ်ႇၼၼ် တင်ႈၸႂ်ႁဵတ်းၸိူင်းလႅၼ်ၵေႃႈ ၸၢင်ႈပဵၼ်လႆႈယူႇ ဝႃႈၼႆ။

ဢိင်ၼိူဝ်လွင်ႈၼႆႉသေ ၸုမ်းလႂ်တီႉၺွပ်းၵႂႃႇဢၼ်ဝႃႈၼၼ်ႉတႄႉ ပႆႇမီးၽႂ်ယိုၼ်ယၼ်။

ၼႂ်းၸႄႈဝဵင်း ပၶူၵ်ႉၵူႇ ပႃႇတီႇၵၢၼ်မိူင်း ဢၼ်တေၶဝ်ႈလိူၵ်ႈတင်ႈၼႆႉ ပဵၼ်ပႃႇတီႇသၢင်ႇသီႈ USDP ၊ ပႃႇတီႇသိူဝ်ၽိူၵ်ႇ လႄႈ ပဵၼ်ပႃႇတီႇၽွမ်ႉႁူမ်ႈၸၢဝ်းၶိူဝ်း (တသၺ) ၸိူဝ်းၼႆႉ ၼႆယဝ်ႉ။