ၸွမ်းၼင်ႇ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ မွၵ်ႇႁွင်ႉသေ ၼႂ်းဝၼ်းတီႈ 27/11/2025 ယၢမ်းႁူဝ်ၶမ်ႈၼၼ်ႉ လူႊၵႃႊသျႅၼ်ႊ ၸွမ်ၸိုင်ႈမိူင်း ပႄႊလႃႊရုတ်ႉသ် လႄႈ ၸုမ်းဢွၵ်ႇၶၢဝ်းတၢင်းၶဝ် မႃးႁွတ်ႈထိုင်တီႈဝဵင်းလူင်ၼေႇပျီႇတေႃႇ။
ၽွင်းမိူဝ်ႈႁိူဝ်းမိၼ် ၸွမ်ၸိုင်ႈမိူင်းပႄႊလႃႊရုတ်ႉသ် ထိုင်မႃးၼႂ်းၶွပ်ႇလႅၼ်ၵၢင်ႁၢဝ်မိူင်းႁူမ်ႈတုမ် မၢၼ်ႈၼၼ်ႉ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်းသႅၼ်း Su-30 SME သၢမ်လမ်း ဢၼ်မိူင်းရၢတ်ႉသျႃး ႁဵတ်းဢွၵ်ႇ မိၼ်ဢဝ်ႁူမ်ႇလူမ်ႈႁပ်ႉတွၼ်ႈ ဝႃႈၼႆ။
ၼႂ်းၵၢၼ်ဢွၵ်ႇၶၢဝ်းတၢင်းပွၵ်ႈၼႆႉ ၸွမ်ၸိုင်ႈမိူင်းပႄႊလႃႊရုတ်ႉသ် တေႁူပ်ႉၵၼ်တင်း ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇသေ တေဢုပ်ႇဢူဝ်းၵၼ်လွင်ႈသွင်ၸိုင်ႈမိူင်း တေႁူမ်ႈသၢင်ႈၵႂႃႇမိူဝ်းၼႃႈလႄႈ တေလူင်းလၢႆးမိုဝ်းတူၵ်းလူင်းၵၼ်ၼႆ သိုၵ်းမၢၼ်ႈပိုၼ်ၽၢဝ်ႇဝႆႉ ၼင်ႇၼႆ။
ၸွမ်ၸိုင်ႈ မိူင်းပႄႊလႃႊရုတ်ႉသ်ၼႆႉ ပဵၼ်ၸွမ်ၸိုင်ႈၵေႃႉဢွၼ်တၢင်းသုတ်း ဢၼ်ဢွၵ်ႇၶၢဝ်းတၢင်းမႃးတီႈ မိူင်းႁူမ်ႈတုမ်မၢၼ်ႈ ဝၢႆးလင်သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်း မိူဝ်ႈပီ 2021။ ၸွမ်ၸိုင်ႈ မိူင်းပႄႊလႃႊရုတ်ႉသ်ၼႆႉၵေႃႈ လိုဝ်းလင်ဝႃႈပဵၼ်ၸဝ်ႈဢႃႇၼႃႇၵေႃႇၵၢၼ်ႁၢႆႉ မႃးမိူၼ်ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ – သိုဝ်ႇၶၢဝ်ႇယႂ်ႇလုမ်ႈၾႃႉလၢႆလၢႆဢၼ်ၵေႃႈတႅမ်ႈဝႆႉၼင်ႇၼႆ။
ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇၵေႃႈ ဢိင်ၼိူဝ်ၸွမ်ၸိုင်ႈမိူင်းပႄႊလႃႊရုတ်ႉသ် မွၵ်ႇႁွင်ႉသေ ၼႂ်းပီ 2025 ၼႆႉ လႆႈဢွၵ်ႇၶၢဝ်းတၢင်းၵႂႃႇတီႈ ပႄႊလႃႊရုတ်ႉသ် 2 ပွၵ်ႈယဝ်ႉမိူၼ်ၵၼ်။
လူႊၵႃႊသျႅၼ်ႊ ၼႆႉ ပဵၼ်ၸွမ်ၸိုင်ႈမိူင်းပႄႊလႃႊရုတ်ႉသ်မႃး ၸဵမ်မိူဝ်ႈပီ 1994။ ၸိုဝ်ႈလိုဝ်းလင်ဝႃႈ ပဵၼ်ၸဝ်ႈဢႃႇၼႃႇသိုၵ်းၵေႃႉၼိုင်ႈ ၼိူဝ်လုမ်ႈၾႃႉသေ ၵုမ်းၵမ်မိူင်းပႄႊလႃႊရုတ်ႉသ်မႃး တေႃႇထိုင်ယၢမ်းလဵဝ်။
ၵဵဝ်ၵပ်းလွင်ႈႁဵတ်းႁၢႆႉတေႃႇ ၵူၼ်းၼႄၵၢင်ၸႂ်၊ ၸုမ်းသၢၼ်ၶတ်းလႄႈ မိပ်ႇငႅၼ်းတဵၵ်းတဵင်ၼိူဝ် ၽူႈသိုဝ်ႇၶၢဝ်ႇႁၢဝ်ႈႁႅင်းၸိူဝ်းၼႆႉသေ မိူင်းဢမေႊရိၵၼ်ႊ တင်း မိူင်းယူႊရူပ်ႊ EU ၶဝ် ပိုၼ်ၽၢဝ်ႇႁႅတ်ႉႁၢမ်ႈၼိူဝ်မၼ်းၸၢႆးဝႆႉ။
ဝၢႆးလင်သိုၵ်းမၢၼ်ႈ ယိုတ်းဢဝ်ဢႃႇၼႃႇၸိုင်ႈမိူင်းၼႆႉ ၸွမ်ၸိၵ်းသိုၵ်း မိၼ်းဢွင်ႇလၢႆႇ တိူဝ်းၵွင်ႉသၢၼ်ၵၼ်တင်း မိူင်းၶႄႇ၊ ရၢတ်ႉသျႃႊ တင်း မိူင်းပႄႊလႃႊရုတ်ႉသ်၊ ၼႂ်းၵႄႈၸိုင်ႈမိူင်းၼင်ႇၵၼ်ၵေႃႈ မီးလွင်ႈလႆႈၸႂ် လူင်းလၢႆးမိုဝ်းတေႃႇၵၼ်ဝႆႉလၢႆလၢႆလွင်ႈ။
လိူဝ်ၼၼ်ႉ တီႈၸၼ်ႉၸွမ်မိူင်းပႄႊလႃႊရုတ်ႉသ်ၼၼ်ႉ သိုၵ်းမၢၼ်ႈ ဢဝ်ၵူၼ်းသိုၵ်း ၼႂ်းတူင်ႇဝူင်း ၾၢႆႇၶူင်သၢင်ႈႁဵတ်းဢွၵ်ႇၶိူင်ႈၵွင်ႈၵၢင်ႇ သူင်ႇၵႂႃႇၾိုၵ်းႁဵၼ်းဝႆႉတင်းၼမ်ၼႆ Justice for Myanmar (JFM) ႁၢႆးငၢၼ်းဢွၵ်ႇဝႆႉ မိူဝ်ႈလိူၼ်ၵျုၼ်ႊပူၼ်ႉမႃးၼႆႉ ၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ