တီႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်းၼႆႉ လုၵ်ႈဢွၼ်ၸိူဝ်းတေၵႂႃႇႁဵၼ်းလိၵ်ႈတီႈၸၼ်ႉၸွမ်ၼၼ်ႉ လႆၵႂႃႇပၼ်ၶႅပ်းၵၢင်ၸႂ်လိူၵ်ႈတင်ႈလူင်ႈၼႃႈၵွၼ်ႇၸင်ႇလႆႈဝႂ်ႁပ်ႉႁွင်းၵႂႃႇႁဵၼ်းလိၵ်ႈၸၼ်ႉၸွမ်တီႈဢၼ်ၸဝ်ႈၵဝ်ႇၶႂ်ႈႁဵၼ်းဝႃႈၼႆ။
တႄႇၵၢင်လိူၼ် ၼူဝ်ႊဝႅမ်ႊပိူဝ်ႊၼႆႉမႃး ႁွင်ႈၵၢၼ်ၾၢႆႇၽွင်းငၢမ်းၵူႈလွင်ႈလႄႈ ၵၢင်ႉၵႄႇလၢတ်ႈ ၵူၼ်းၼႂ်းပွၵ်ႉၼႂ်းယွမ်ႇဝႃႈ လုၵ်ႈႁဵၼ်းၸၼ်ႉၸွမ်ၸိူဝ်းတေၵႂႃႇၶိုၼ်ႈႁဵၼ်းလိၵ်ႈ တီႈၸၼ်ႉၸွမ် တၢင်ႇတီႈတၢင်ႇဝဵင်းၸိူဝ်းၼၼ်ႉ တေလႆႈမႃးသႂ်ႇဝႂ်ၶႅပ်းၵၢင်ၸႂ်လူင်ႈၼႃႈ တီႈလုမ်းၼႂ်း ပွၵ်ႉၽႂ် ပွၵ်ႉမၼ်းၵွၼ်ႇၸင်ႇတေပၼ်ဝႂ်ႁပ်ႉႁွင်းၵႂႃႇႁဵၼ်းလိၵ်ႈဝႃႈၼႆ။
လုၵ်ႈႁဵၼ်းၸၼ်ႉၸွမ်ဝဵင်းၼမ်ႉၸၢင်လၢတ်ႈၽူႈတွႆႇႁွၵ်ႈဝႃႈ -“ ပေႃးဢမ်ႇၵႂႃႇသႂ်ႇဝႂ်ၶႅပ်းၵၢင်ၸႂ်လိူၵ်ႈတင်ႈလူင်ႈၼႃႈ ဢမ်ႇၸၢင်ႈၵႂႃႇၶိုၼ်ႈႁဵၼ်း ၊ ပေႃးၵႂႃႇသႂ်ႇၶႅပ်းၵၢင်ၸႂ်ယဝ်ႉၼၼ်ႉ ၶဝ်တေပၼ်မႃးဝႂ်ႁပ်ႉႁွမ်းဢၼ်ၼိုင်ႈ ၊ တႃႇတေၵႂႃႇၶိုၼ်ႈႁဵၼ်းၼၼ်ႉ တေလႆႈပႃး ဝႂ်ႁပ်ႉႁွင်း ဢၼ်ၼၼ်ႉ။ ဢမ်ႇၶႆႈသႂ်ႇၵေႃႈဢမ်ႇလႆႈ။ ဢမ်ႇႁူႉဝႃႈတေလႆႈသႂ်ႇပၼ်ၽႂ် ပႃႇတီႇသင်သိင်လၢႆလၢႆၵေႃႈ ဢမ်ႇႁူႉဢမ်ႇသူၼ်ၸႂ်။ ႁၼ်ဢၼ်လႂ်သႂ်ႇမႃးဢၼ်ၼၼ်ႉႁေယဝ်ႉဢိူဝ်ႈ ။ သႂ်ႇဢမ်ႇသႂ်ႇၵေႃႈဢမ်ႇလၢၵ်ႇလၢႆးသင်လူး ”- ဝႃႈၼႆ ။
တႄႇၼႂ်းဝၼ်းတီႈ 17/11/2025 ထိုင် ဝၼ်းတီႈ 21/11/2025 မီး လုၵ်ႈႁဵၼ်ႈၸၼ်ႉၸွမ် ဢၼ်ၵႂႃႇပၼ်ၶႅပ်းၵၢင်ၸႂ်လူင်ႈၼႃႈ တီႈဝဵင်းၼမ်ႉၸၢင်မီးၸမ် 80 ၵေႃႉၼႆယဝ်ႉ ။
မိူၼ်ၼင်ႇၼႆ တီႈဝဵင်းလွႆၶေႃ လႅၼ်လိၼ်တႆး- ယၢင်းလႅင် ၵေႃႈ တႄႇ ၼႂ်းလိူၼ် ၼူဝ်ႊဝႅမ်ႊပိူဝ်ႊ မႃး သိုၵ်းမၢၼ်ႈလႄႈ ႁွမ်ႈၵၢၼ်ၾၢႆႇၽွင်းငမ်းၵူႈလွင်ႈ လၢတ်ႈတီႈလုၵ်ႈႁဵၼ်းပိုၼ်ႉတီႈဝႃႈ ပေႃးၶႂ်ႈၶိုၼ်ႈႁဵၼ်းၼႆၸိုင် တေလႆႈသႆႇၶႅပ်းၵၢင်ၸႂ် လူင်ႈၼႃႈယဝ်ႉ ၸင်ႇတေလႆႈၶိုၼ်ႈႁဵၼ်းၼႆယဝ်ႉ ။
ၼၢင်းယိင်းပိုၼ်ႉတီႈဝဵင်းလွႆၶေႃ လၢတ်ႈၽူႈတွႆႇႁွၵ်ႈဝႃႈ -“ၸၼ်ႉၸွမ် ပိုတ်ႇတင်းပႆႇႁိုင် ၊ ၵူၼ်းၶိုၼ်ႈႁဵၼ်း တေလႆႈ ၵႂႃႇသႆႇၶႅပ်းၵၢင်ၸႂ်ဝႃႇ ၊ ပေႃးဢမ်ႇသႆႇၼႆႉ တေဢမ်ႇလႆႈၶိုၼ်ႈႁဵၼ်းၼႆ ၊ ၵူၼ်းဢၼ်တေၶႂ်ႈၶိုၼ်ႈႁဵၼ်းၼႆႉ တိုၼ်းတေလႆႈသႆႇၶႅပ်းၵၢင်ၸႂ်ၼႆ”- ဝႃႈၼႆ ။
ယွၼ်ႉ ပၢင်တိုၵ်း ၼႂ်းၵႄႈသိုၵ်းမၢၼ်ႈလႄႈ ၸုမ်းလုၵ်ႉၽိုၼ်ႉ လႄႈၸၼ်ႉၸွမ် ဝဵင်းလွႆၶေႃ ၼႆႉ လႆႈပိုတ်ႉဢိုတ်းၵႂႃႇ ႁိုင်ၶၢဝ်းတၢင်းၸမ် 2 ပီ ၊ ဝၢႆးလင်သိုၵ်းမၢၼ်ႈၶဝ်ႈၵုမ်းၶိုၼ်း ဝဵင်းလွႆၶေႃ ၼႂ်းႁူဝ်ပီ 2025 ၼႆႉ သိုၵ်းမၢၼ်ႈ တဵၵ်းႁွင်ႉလုၵ်ႈႁဵၼ်းၸၼ်ႉၸွမ် ဢၼ်ၶိုၼ်ႈႁဵၼ်းဝႆႉတီႈၸၼ်ႉၸွမ် တူၼ်ႈတီးသေ မႃးတွပ်ႇလိၵ်ႈတီႈ ၸၼ်ႉၸွမ် ဝဵင်းလွႆၶေႃၶိုၼ်း ၼႆယဝ်ႉ ။
ၶွမ်ႊမသျိၼ်ႊပၢင်လိူၵ်ႈတင်ႈ သိုၵ်းမၢၼ်ႈပိုၼ်ၽၢဝ်ႇ လၢတ်ႈဝႆႉၼႂ်းဝၼ်းတီႈ 21/11/2025 ၼၼ်ႉဝႃႈ လုၵ်ႈႁဵၼ်းၸၼ်ႉၸွမ်ပတ်ႉပိုၼ်ႉ ၸိုင်ႈမိူင်း သႆႇၶႅပ်းၵၢင်ၸႂ်လူင်ႈၼႃႈ တႃႇပၢင်လိူၵ်ႈ တင်ႈ မီး 2 မိုၼ်8 ႁဵင် ပၢႆ ( 28339 ) ၵေႃႉၼႆယဝ်ႉ ။
ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်း တေဢွၼ်ၼမ်းၸတ်းႁဵတ်းၼႆႉ တေပဵၼ် ဝၼ်းတီႈ 28/12/2025 ။ ၼႂ်းၸႄႈဝဵင်းဢၼ်သိုၵ်းမၢၼ်ႈတေႁဵတ်းၸုတ်ႈတီႈၼိုင်ႈၼၼ်ႉပႃး ၸႄႈဝဵင်းၼမ်ႉၸၢင်ႇလႄႈ ၸႄႈဝဵင်းလွႆၶေႃ ၼႆယဝ်ႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ