ပေႃးၸႂ်ႉၶေႃႈၵႂၢမ်းဢၼ်ဝႃႈ ၽၢႆႈလူင် ႁိုဝ်ဢမ်ႇၼၼ် ၶီႈ ၼႆ ၵမ်ႈၼမ် တေႁၼ်ထိုင်ဝႃႈ ပဵၼ်မဵဝ်းဝူၺ်ႇ လီႁင်ႈ ၼႆသေ ဢမ်ႇသူႈလႆႈၸႂ်ထွမ်ႇငိၼ်းလၢတ်ႈၸႃၵၼ်။ ပေႃးပဵၼ်ၶီႈၵူၼ်းၼႆ ၵူၼ်းႁဝ်းယိင်ႈၶႅၼ်းမၵ်းမၼ်ႈဝႃႈ ပဵၼ်သိင်ႇၶွင်ၸၼ်ႉတႅမ်ႇသုတ်းၼႂ်းလေႃးၵ ၼႆႉဝႆႉ။ ၵူၺ်းၵႃႈ ပဵၼ်ဢၼ်ဝူၺ်ႇႁင်ႈ ဝႃႈၼႆသေတႃႉၵေႃႈ ၽၢႆႈလူင်ၵူၼ်းႁဝ်းၼႆႉ သမ်ႉတိုၵ်ႉမီးၽွၼ်းလီ တႃႇပၢႆးယူႇလီယူႇ- ပေႃးလၢတ်ႈဝႃႈၼႆ ၽႂ်ၵေႃႈတေၶႆႈၶူဝ်။ ၸႂ်ႈၶႃႈဢေႃႈ – ၶီႈၼႆႉ ၶဝ်ႈတၢင်းတိုဝ်းတႄႉၶႃႈဢေႃႈ။

သၽႃႇဝၵူၼ်းႁဝ်းၼႆႉ ပေႃးဢဝ် ပုတ်ႉထၽြႃးဝႃႈဝႆႉတႄႉ ပဵၼ်တူဝ်တူႇတူဝ်ၼဝ်ႈၼႆဝႆႉ တႅၵ်ႇလႅင်း ။ ၵူၺ်းၵႃႈ ၵူၼ်းႁဝ်းသမ်ႉ ပေႃးတူၵ်ႇထိုင် ဢၼ်တူႇဢၼ်ၼဝ်ႈၼႆ ဢမ်ႇသူႈမီးၽႂ်လႆႈၸႂ်။ ၶတ်းၸႂ် ႁဵတ်းႁႂ်ႈ တူဝ်ၶိင်း ၸဝ်ႈၵဝ်ႇ မူတ်းသႂ်ယူႇတႃႇသေႇ။

ၼႂ်းတွၼ်ႈၼႆႉတႄႉ ၵႃႈပေႉၶႂ်ႈဝႃႈ ၽၢႆႈလူင်ၵူၼ်းၼႆႉ ဝူၺ်ႇႁင်ႈၼႃႇၼႆၵေႃႈ တိုၼ်းတေလႆႈသပ်းၸႅင်ႈၼႄယူႇ ဝႃႈမၼ်း ၶဝ်ႈပဵၼ်ယႃႈယႃလႆႈ။
ၽၢႆႈလူင်ၵူၼ်း ဢၼ်ဝႃႈၼႆႉ ဢမ်ႇမီးၽႂ်ၶႂ်ႈလႆႈၶႂ်ႈဢဝ်ဝႃႈၼႆသေတႃႉ မၼ်းလုၵ်ႉတီႈ ဢၼ်ၸဝ်ႈၵဝ်ႇၵိၼ်ယမ်ႉၼၼ်ႉသေၶိုၼ်းဢွၵ်ႇမႃးတီႈ တူဝ်ၶိင်းၸဝ်ႈၵဝ်ႇ ၵူၺ်း။ ၵမ်ႈၼမ်တေဝႃႈ ပဵၼ်လွင်ႈဝူၺ်ႇႁင်ႈ မီးဢၢႆသႅဝ်မဵၼ်လႄႈ ၾၢင်ႁၢင်ႈႁၢင်ႈႁၢႆႉတႃၼႆသေ တေဢမ်ႇလၢတ်ႈထိုင် ဢမ်ႇဝႆႉတေႃႇၼႃႈတီႈၵူၼ်းႁၼ် ။

ၽၢႆႈလူင်ၼႆႉ ပဵၼ်ၶူဝ်းၶွင်ဢၼ်လိူဝ်ၼႂ်းတူဝ်ၶိင်းၵူၼ်းႁဝ်း။ လုၵ်ႉတီႈတၢင်းၵိၼ်တၢင်းယမ်ႉလႄႈၸိူဝ်ႉမႅင်းၼႂ်းတူဝ်ၵူၼ်းလၢႆသႅၼ်းလေႃးလႄးၵၼ်သေ ၸင်ႇပဵၼ်မႃး။ တူၺ်းၽၢႆႈလူင်ၼၼ်ႉသေ ယင်းႁပ်ႉႁူႉလႆႈဝႃႈ ပၢႆးယူႇလီၸဝ်ႈၵဝ်ႇပဵၼ်ႁိုဝ်ၼႆလူးၵွၼ်ႇ။

ၸင်ႇၼၼ်လႄႈ တႃႇတေႁူႉထိုင်ဝႃႈ ပၢႆးယူႇလီၵူၼ်းၵေႃႉလႂ်ၵေႃႉၼၼ်ႉပဵၼ်ႁိုဝ်ၼႆၼၼ်ႉ ၽူႈၶူၼ်ႉၶႂႃႉၶဝ် လႆႈၸႅၵ်ႇသႅၼ်းၽၢႆႈလူင်ၼၼ်ႉသေ ထတ်းတူၺ်း ။ တွၼ်ႈၼႆႉ ႁွင်ႉဝႃႈ Bristol Stool Chart ၼႆယဝ်ႉ။

ၼႂ်းႁူင်းယႃၵမ်ႈၼမ် တႃႇႁူႉလႆႈ ငဝ်းလၢႆးတၢင်းပဵၼ်ၵူၼ်းၼိုင်ႈၵေႃႉၼၼ်ႉ လႆႈၸႂ်ႉလၢႆး Bristol Stool Chart ၼႆႉ မိူၼ်ၵၼ်။ မၼ်းတေဢိင်ၼိူဝ် ဢူၼ်ႈ ၵႅၼ်ႇ ၶႅင် လေႃးထၢတ်ႈသင်ၼႆသေ ၸႅၵ်ႇဢွၵ်ႇ ၽၢႆႈလူင်ၼႆႉ ပဵၼ်ဝႆႉ 7 သႅၼ်း။

သႅၼ်း 1 ၼၼ်ႉတႄႉ ပဵၼ်ၽၢႆႈလူင်ဢၼ် ၵွၼ်ႈလဵၵ်ႉလဵၵ်ႉ ။ သႅၼ်း 2 ၼၼ်ႉသမ်ႉ ၵွၼ်ႈလဵၵ်ႉလဵၵ်ႉၸိူဝ်းၼၼ်ႉ တိတ်းၸပ်းၵၼ်ဝႆႉ ပဵၼ်ဝႆႉပုၵ်ႉလဵဝ်။ သႅၼ်း 3 သမ်ႉ ဢၼ်ဢွၵ်ႇမႃး ပဵၼ်တႅင်ႈလဵဝ် ၼႆၸိူဝ်းၼႆႉတႄႇၵႂႃႇ။

ပေႃးမႃးတူၺ်း သႅၼ်း 1 လႄႈ 2 ၼႆၸိုင် လၢတ်ႈလႆႈဝႃႈ ပဵၼ်ၵူၼ်းတွင်ႉၵႅၼ်ႇတွင်ႉၶျုၵ်ႈ ( တွင်ႉဢမ်ႇၵႂႃႇ) ။ မိူဝ်ႈၵႂႃႇၽၢႆႈၼၼ်ႉၵေႃႈ တွင်ႉတေၸဵပ်းတေၵႅၼ်း။ သမ်ႉလႆႈၼဵင်ႇတိုင်ႈသေ ၸင်ႇဢွၵ်ႇမႃးလႆႈ ယၢပ်ႇယၢပ်ႇယဵၼ်းယဵၼ်း။

ပေႃးပဵၼ်ၵူၼ်းဢၼ် တွင်ႉလူမ်လီ ပၢႆးယူႇလီၶႅမ်ႉတႄႉ တေပဵၼ်ၽၢႆႈလူင်သႅၼ်း 3 လႄႈ 4 ။ ပေႃးပဵၼ် သႅၼ်း 5 ထိုင် သႅၼ်း 7 တႄႉ မၵ်းမၼ်ႈလႆႈဝႃႈ ပဵၼ်ၵူၼ်းတွင်ႉႁႄႈတွင်ႉၵႂႃႇ ယွၼ်ႉဝႃႈ တေပဵၼ်ၽၢႆႈလူင်ဢၼ် လႅဝ်ႈလႄႈ လေႃးၼမ်ႉၸိူဝ်းၼႆႉ ။

လိူဝ်ၼၼ်ႉယဝ်ႉ ၽၢႆႈလူင်ၼႆႉ တူၺ်းသီမၼ်းသေ ၸႅၵ်ႇႁူႉလႆႈ ပၢႆးယူႇလီထႅင်ႈ ။ ပေႃးပဵၼ်ၵူၼ်းပၢႆးယူႇလီၶႅမ်ႉတႄႉ တေပဵၼ်ဝႆႉ သီလိူင်လႄႈ သီၵမ်ႇၸိူဝ်းၼႆႉသေ ဢၢႆသႅဝ်မၼ်းၵေႃႈ တေဢမ်ႇႁႅင်း ။

သင်ၽၢႆႈလူင်ၼၼ်ႉသမ်ႉ ပဵၼ်သီၽိူၵ်ႇဝႆႉ ယဝ်ႉၵေႃႈ ဢမ်ႇမီးၼမ်ႉၼၵ်းသေ ၽူးဝႆႉၼိူဝ်ၼမ်ႉၸိုင် ပွင်ႇဝႃႈ ပၢႆးယူႇလီဢမ်ႇၶႅမ်ႉ ။ မၼ်းၸီႉၼႄဝႃႈ လမ်းသႆႈႁိုဝ်ဢမ်ႇၼၼ် လွတ်ႇသဵၼ်ႈသၢႆ ဢၼ်ၵွင်ႉၼွင်ႇၵၼ်တင်း ထူင်လီ ၵူၼ်းႁဝ်း ဢမ်ႇၶႅမ်ႉ ။ လိူဝ်ၼၼ်ႉ မၢမ်ႉ ( သရက်ရွက် ) ၵေႃႈ ၸၢင်ႈပိူင်ႈ ၸၢင်ႈၸပ်းတၢင်းပဵၼ်ဝႆႉသေလွင်ႈလွင်ႈ ဝႃႈၼႆယဝ်ႉ။

သင်ၽၢႆႈလူင်ၼၼ်ႉသမ်ႉ ပဵၼ်ဝႆႉသီလမ်သေ ၶႂ်ႈယၢင်ယၢင်ဝႆႉၸိုင် လမ်းသႆႈၾၢႆႇၼိူဝ်ႁူင်းၶဝ်ႈၼၼ်ႉ သဵၼ်ႈလိူတ်ႈၸၢင်ႈတႅၵ်ႇႁူဝ်ႈဝႆႉလႄႈသင် တၼ်ဝႆႉလႄႈသင်ၸိူဝ်းၼႆႉ။ ပေႃးပဵၼ်ၼၼ် ၵိုင်ႇလီ ႁူပ်ႉထူပ်းမေႃဝႆးဝႆးယူႇ။

မိူဝ်ႈၽၢႆႈလူင်ၼၼ်ႉ သင်လိူတ်ႈဢွၵ်ႇမႃးပႃးၸွမ်းၼႆ လၢတ်ႈလႆႈဝႃႈ ၵူၼ်းၵေႃႉၼၼ်ႉ ပဵၼ်တၢင်းပဵၼ် သလိူၵ်ႈ(သႆႈလိူတ်ႈ)သႅၼ်းၼိုင်ႈယဝ်ႉ ၼႆယူႇ။ လိူဝ်ၼၼ်ႉ ၸၢင်ႈလၢမ်းပဵၼ်ပႃးလႆႈ ၶႅၼ်ႊသိူဝ်ႊလမ်းသႆႈ ၊ ၶႅၼ်ႊသိူဝ်ႊႁူင်းၶဝ်ႈၸိူဝ်းၼႆႉ။
ပေႃးႁႂ်ႈထုၵ်ႇၸွမ်းပၢႆးယူႇလီတႄႉ ၽၢႆႈလူင်ၼႆႉ ႁႂ်ႈပဵၼ်ၶၢဝ်းႁဝ်း တိုၼ်ႇမႃးၵၢင်ၼႂ် ။ ၼင်ႈမွၵ်ႈ 10 – 15 ၼႃးထီးၼႆႉသေ ၽၢႆႈဢွၵ်ႇႁႂ်ႈမူတ်းၵဵင်ႈၼၼ်ႉ ၸင်ႇမႅၼ်ႈၸွမ်းပၢႆးယူႇလီတီႈသုတ်းယဝ်ႉ။

ၵူၺ်းၵႃႈ မၢင်ၵေႃႉၵေႃႈ ၽၢႆႈလႆႈ ပဵၼ် ၼိုင်ႈဝၼ်း 2 – 3 ပွၵ်ႈၸိူဝ်းၼႆႉၵေႃႈ မီးယူႇၼင်ႇၵဝ်ႇ။ ပေႃး လိူဝ်သေ 3 ပွၵ်ႈတႄႉ ၸၢင်ႈပဵၼ်လႆႈ တွင်ႉႁႄႈတွင်ႉၵႂႃႇ တွင်ႉဢမ်ႇလီယဝ်ႉၼင်ႇၵဝ်ႇ။မၼ်းတေၵႂႃႇယူႇၼႂ်းၽၢႆႈလူင် သႅၼ်း 5 ထိုင် သႅၼ်း 7 ဢၼ်လၢတ်ႈမႃးၼၼ်ႉ။

မၢင်ၸိူဝ်းၵေႃႈ 2 ဝၼ်းၼိုင်ႈပွၵ်ႈ ၸင်ႇၽၢႆႈၵေႃႈမီး ။ ၵူၺ်းၵႃႈ ပေႃး ပူၼ်ႉ 3 ဝၼ်းၵႂႃႇလႄႈ ဢမ်ႇၽၢႆႈတႄႉ လီၾၢင်ႉယဝ်ႉ။ မၼ်းတေပႃး ၼႂ်းသႅၼ်းၽၢႆႈလူင် သႅၼ်း 1 လႄႈ 2 ၼၼ်ႉ။

ပေႃးပဵၼ်ၼၼ်ယဝ်ႉ ၵိုင်ႇလီ မႄးတၢင်းၵိၼ်တၢင်းယမ်ႉၸဝ်ႈၵဝ်ႇ ။ သင်ဝႃႈ မႄးယဝ်ႉလႄႈ ဢမ်ႇၶႅၼ်းတႄႉ တၵ်းလူဝ်ႇၵႂႃႇၼႄမေႃယႃယူႇ။
ဢၼ်လၢတ်ႈမႃးၸိူဝ်းၼႆႉ ပဵၼ်သႅၼ်းၽၢႆႈလူင်လႄႈ ဢၼ်ၸီႉၼႄတၢင်းပဵၼ်မၼ်း ။

ၵမ်းၼႆႉ မႃးႁဵၼ်းႁူႉတူၺ်းဝႃႈ ၽၢႆႈလူင် ၶဝ်ႈပဵၼ်ယႃႈယႃလႆႈၸိူင်ႉႁိုဝ် ၼႆၼၼ်ႉၵွၼ်ႇ။
တႃႇႁႂ်ႈၽၢႆႈလူင်ပေႃးတေၶဝ်ႈပဵၼ်ယႃႈယႃၼၼ်ႉတႄႉ လူဝ်ႇလႆႈပဵၼ် ၽၢႆႈလူင်သႅၼ်းဢၼ်လီဢၼ်ၶႅမ်ႉ ။

တႃႇတေပဵၼ်ၽၢႆႈလူင်ဢၼ်လီဢၼ်ၶႅမ်ႉမၼ်းၼၼ်ႉတႄႉ ပေႃးဢဝ်ၽူႈၶူၼ်ႉၶႂႃႉၶဝ်ဝႃႈဝႆႉတႄႉ ပၢၼ်ၵူၼ်းၼုမ်ႇဢၼ်မႃႇၶႅင်ႁႅင်းၵိုၼ်းၼႆႉ ဢွၵ်ႇလႆႈၽၢႆႈလူင်ဢၼ်ပႃး ၸိူဝ်ႉမႅင်း 4 လၢၼ်ႉလၢၼ်ႉ သႅၼ်း ၼႆယဝ်ႉ။

ၼႂ်း 4 လၢၼ်ႉလၢၼ်ႉ (4 trillion ) ၼၼ်ႉ တေပႃး ၸိူဝ်ႉမႅင်းလႄႈဝၢႆႊရတ်ႉလႄႈသင် ထၢတ်ႈလၢႆသႅၼ်းၸိူဝ်းၼႆႉလႄႈသင် တေႁူမ်ႈၵၼ်ဝႆႉပဵၼ်ဢၼ်လဵဝ်။ တေမီးထၢတ်ႈလၢႆသႅၼ်းႁူမ်ႈၵၼ်ဝႆႉသေ သင်ထၢတ်ႈၸိူဝ်းၼၼ်ႉ ၽဵင်ႇၵၼ်ဝႆႉၸိုင် လၢတ်ႈလႆႈဝႃႈ ပဵၼ်ၽၢႆႈလူင်ဢၼ်ၶဝ်ႈပဵၼ်ယႃႈယႃလႆႈ။

တူဝ်ယၢင်ႇမၼ်း ပေႃးပဵၼ်ၵူၼ်းတွင်ႉႁႄႈတွင်ႉၵႂႃႇၸိုင် တေပဵၼ်ၵူၼ်းဢၼ် ၸၢင်ႈတိတ်းၸပ်းၸိူဝ်ႉမႅင်း ဢၼ်ႁွင်ႉဝႃႈ C-diff ( Clostrioides difficle ) ။ ပဵၼ်မႅင်း ပႅတ်ႉတီႊရီႊယိူဝ်ႊ ဢၼ်ဢမ်ႇလီ ။

သင်ဝႃႈ ၵိၼ်ယႃသမ်းယႃသင်ၵေႃႈ ဢမ်ႇၸိုၼ်ႈၶႅၼ်းယဝ်ႉတႄႉ တေလႆႈႁႃတၢင်ႇလၢႆး ။ ဢၼ်ၽူႈၶူၼ်ႉၶႂႃႉၶဝ် ႁႃႁၼ်လွၵ်းလၢႆးမၼ်းဝႆႉၵေႃႈ လူဝ်ႇဢဝ် မႅင်းဢၼ်လီတေႃႇပၢႆးယူႇလီၵူၼ်းၼႆႉသႂ်ႇပၼ်ၶိုၼ်း ၸင်ႇၵႄႈလႆႈ တၢင်းပဵၼ်တွင်ႉႁႄႉတွင်ႉၵႂႃႇႁႅင်းႁႅင်း ဢၼ်ပႃးမႅင်း C-diff ဝႆႉ ၼၼ်ႉ။

ပေႃးပဵၼ်ၸိူဝ်ႉမႅင်းတၢင်ႇဢၼ်တႄႉ ႁႃၵိၼ်ယႃၶႃႈမႅင်းၵူႈသႅၼ်းသႅၼ်း ဢၼ်ၵိုင်ႇလႅပ်ႈလႆႈယူႇသေတႃႉ ၸိူဝ်ႉမႅင်း C-diff ၼႆႉတႄႉ ဢမ်ႇမီးတႃႇၶႃႈမၼ်းလႆႈ။
ၸင်ႇၼၼ် လႄႈ မေႃယႃလႄႈၽူႈၶူၼ်ႉၶႂႃႉၶဝ် ဢဝ်ၽၢႆႈလူင်ဢၼ် ၶတ်းလိူၵ်ႈဝႆႉဝႃႈ ပဵၼ်သႅၼ်းလီၼၼ်ႉ မႃးသႂ်ႇပၼ်ၼႂ်းတူဝ်ၵူၼ်းပဵၼ်ၼၼ်ႉ ။ ဢၼ်ၼၼ်ႉ ႁွင်ႉဝႃႈ Fecal microbiota Transplantation ။

တႃႇတေသႂ်ႇၼၼ်ႉၵေႃႈ တေလႆႈဢဝ် လွတ်ႇသႅၼ်းလဵၵ်ႉဢၼ်ၼိုင်ႈ သႂ်ႇတီႈပၢၵ်ႇ ႁိုဝ်ဢမ်ႇၼၼ် ႁူးၶူႈၼင် ၵူၼ်းပဵၼ်သေ ဢဝ်ၽၢႆႈလူင်သႅၼ်းဢၼ်ၶတ်းလိူၵ်ႈဝႆႉၼၼ်ႉသႂ်ႇပၼ် ။ မိူဝ်ႈသႂ်ႇပၼ်ၸိူင်ႉၼၼ် ဢၼ်ၵိုင်ႇလီၾၢင်ႉၵေႃႈ ယႃႇႁႂ်ႈမၼ်းႁူဝ်ႈဢွၵ်ႇမႃး ။

ၵၢပ်ႈပၢၼ်မႂ်ႇၼႆႉတႄႉ ၾၢႆႇလူင်ႉလႅၼ်ႇၶဝ် ႁဵတ်းဢွၵ်ႇမႃး ပဵၼ် လွတ်ႇမဵတ်ႉယႃ ဝႆႉ ႁွင်ႉဝႃႈ poop pill ။ ၶဝ်တေမီးပိူၵ်ႇ သႅၼ်းၼိုင်ႈ ႁေႃႇဝႆႉပၼ်လႄႈ တေၵိၼ်ငၢႆႈယူႇ။ ၵူၺ်းၵႃႈ တေလႆႈၾၢင်ႉ ၼင်ႇႁိုဝ်မၼ်းတေ ဢမ်ႇတႅၵ်ႇ ၼႂ်းသူပ်းၼႂ်းပၢၵ်ႇ ၽွင်းပႆႇလႆႈဢိုၼ်လူင်းၶေႃးလူင်းတွင်ႉ။ ဢၼ်လမ်ႇလွင်ႈသုတ်းတႄႉ ၵိၼ်ၼမ်ႉၸွမ်းၼမ်ၼမ် ႁႂ်ႈမၼ်းလူင်း ၵႂႃႇထိုင်ၼႂ်းလမ်းသႆႈၵမ်းလဵဝ် မၼ်းၸင်ႇတေမီးၽွၼ်းလီ။

ပေႃးၵိၼ်ပၼ် ယႃႈယႃ ဢၼ်ဢဝ်ၽၢႆႈလူင်ႁဵတ်းဝႆႉၼၼ်ႉယဝ်ႉ ၸင်ႇႁဵတ်းႁႂ်ႈ ၸိူဝ်ႉမႅင်း C-diff ၼၼ်ႉ မူတ်းႁၢႆလႆႈ။ ၼႂ်းႁူင်းၶဝ်ႈလႄႈလမ်းသႆႈၵူၼ်းၼႆႉ မၼ်းတိုၼ်းမီးဝႆႉ ၸိူဝ်ႉမႅင်းဝႆႉၸဵမ်ပိုင်း ။ တေမီးဝႆႉ ၸိူဝ်ႉမႅင်း ဢၼ်လီတေႃႇပၢႆးယူႇလီလႄႈ ဢၼ်ဢမ်ႇလီတေႃႇပၢႆးယူႇလီ။

သင်ဝႃႈ ၸိူဝ်ႉမႅင်းဢၼ်ဢမ်ႇလီၸိူဝ်းၼၼ်ႉ ပေႉပုၼ်ႈဝႆႉတႄႉ တၢင်းပဵၼ်ၵေႃႈတေၼမ် ။ ၸင်ႇၼၼ်လႄႈ ၽူႈၶူၼ်ႉၶႂႃႉၶဝ် ႁႃဢဝ်လွၵ်းလၢႆး ဢဝ်ၸိူဝ်ႉမႅင်းဢၼ်လီၼၼ်ႉ ထႅမ်သႂ်ႇပၼ် ၼႂ်းလမ်းသႆႈၵူၼ်းၶိုၼ်း ။

ပွၵ်ႈၼႆႉ ႁဝ်းႁဵၼ်းႁူႉလွင်ႈ ၽၢႆႈလူင် ၶဝ်ႈပဵၼ်ယႃႈယႃၵႂႃႇယဝ်ႉ ။ ၽၢႆႈၼွႆႉလူး ၸွင်ႇၶဝ်ႈပဵၼ်ယႃႈယႃလႆႈၼႆၼၼ်ႉ ပီႈၼွင်ႉၽူႈပၼ်ႁႅင်း ၸုမ်းၶၢဝ်ႇၽူႈတွႆႇႁွၵ်ႈႁဝ်းၶႃႈ လၢတ်ႈမႃးတူၺ်းၽွင်ႈၶႃႈလူး။

ပိၼ်ႇၽႃႇသႃႇ မႃးတီႈ – တွၵ်ႊတိူဝ်ႊ ၸူႉၸူႉမျၢတ်ႉ မေႃယႃၾၢႆႇယူတ်းယႃလမ်းသႆႈလႄႈႁူင်းၶဝ်ႈ တီႈ UK လၢတ်ႈဝႆႉတီႈ BBC