ႁၢင်လိူၼ်ၼူဝ်ႊဝႅမ်ႊပိူဝ်ႊမႃးၼႆႉ သိုၵ်းၵဝ်ႈၵၢင်ႉ MNDAA ႁွင်ႉဢဝ်ၵူၼ်းမိူင်းၼႂ်းပိုၼ်ႉတီႈ ၸိူဝ်းမီးယူႇ ၼႂ်းၸႄႈဝဵင်းသႅၼ်ဝီ မိူင်းတႆးပွတ်းႁွင်ႇ ၵႂႃႇႁဵတ်းမၢႆၾၢင် လႄႈ ဝႂ်မုင်ႉႁေႃ ႁိူၼ်း တီႈလုမ်း (လဝၵ)၊ ၵူၼ်းမိူင်းလႆႈပၼ်ၵႃႈႁဵတ်း ၼိုင်ႈၵေႃႉလႂ် 20,000 ပျႃးပၢႆ ။
တႃႇႁဵတ်းမၢႆၾၢင် လႄႈ ဝႂ်မုင်ႉႁေႃႁိူၼ်းၼႆႉ ၾၢႆႇၸဝ်ႈၼႃႈတီႈၼႂ်းၸုမ်းသိုၵ်းၵဝ်ႈၵၢင်ႉၶဝ် ႁပ်ႉႁဵတ်းပၼ် ၼိုင်ႈဝၼ်းလႂ် 200 ၵေႃႉၼႆ ၼၢင်းလႅင် ၵူၼ်းမိူင်းသႅၼ်ဝီ လၢတ်ႈၽူႈတွႆႇ ႁွၵ်ႈ ၼင်ႇၼႆ။
“ၶဝ်တႄႇႁွင်ႉဢဝ် ၵူၼ်းဝၢၼ်ႈၸိူဝ်းယူႇၼႂ်းပွၵ်ႉ 1 ၵႂႃႇႁဵတ်းဢွၼ်တၢင်း။ ၼိုင်ႈဝၼ်းၼႆႉ ၶဝ်ႁဵတ်းပၼ်တႃႇ 200 ၵေႃႉၵူၺ်း။ ၶႅပ်းမၢႆၾၢင်မၼ်းတႄႉ ဢမ်ႇလႆႈၵမ်းလဵဝ်။ တႃႇႁဵတ်းမၢႆၾၢင်ၼႆႉ ၶဝ်လူင်းၵဵပ်းသဵၼ်ႈမၢႆမၼ်း ဝႆႉ ၸဵမ်မိူဝ်ႈၼႂ်းဝႃႇပုၼ်ႉယဝ်ႉ။ မိူဝ်ႈလဵဝ်ၵေႃႈ လႆႈမႃးသႂ်ႇသဵၼ်ႈမၢႆ ၶဝ်ပေႃႉသႂ်ႇၼႂ်းၶွမ်းၶဝ်ဝႆႉ ၵၢတ်ႉမၼ်းတႄႉ လႆႈပႂ်ႉမွၵ်ႈ ၼိုင်ႈဝၼ်းယဝ်ႉ ၸွင်ႇၵွႆႈတေလႆႈ။”
လႆႈႁူႉဝႃႈ သင်ၼႂ်းမုင်ႉႁေႃႁိူၼ်းၼိုင်ႈလင် မီးၵူၼ်းၵႂႃႇႁဵတ်းၼမ်လိူဝ်ၼိုင်ႈၵေႃႉၸိုင် လႆႈပၼ် 24,000 ပျႃး၊ သင်ၵႂႃႇႁဵတ်းၵေႃႉလဵဝ်ၸိုင် လႆႈပၼ် 25,000 ပျႃး ၼႆယဝ်ႉ။
ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်းသွင်ယဝ်ႉၼႆႉ ၸုမ်းသိုၵ်းၵဝ်ႈၵၢင်ႉ လူင်းၵဵပ်းသဵၼ်ႈမၢႆ တႃႇႁဵတ်းဝႂ်မုင်ႉႁေႃႁိူၼ်း လႄႈ မၢႆၾၢင်ၵူၼ်းမိူင်းၸိူဝ်းယူႇၼႂ်းပိုၼ်ႉတီႈၼႂ်းၸႄႈဝဵင်းသႅၼ်ဝီၵူၺ်းဢမ်ႇၵႃး တၢင်းဢိူင်ႇႁူဝ်ယ ၸႄႈဝဵင်းမိူင်းယႆ ၼၼ်ႉၵေႃႈ လူင်းၵဵပ်းမိူၼ်ၵၼ်။ တၢင်းၸႄႈဝဵင်းမိူင်းယႆတႄႉ ၵႃႈႁဵတ်းမၢႆၾၢင် ၼိုင်ႈႁိူၼ်းလႂ် လႆႈပၼ် 18,000 ပျႃး၊ ဝႂ်မုင်ႉႁေႃႁိူၼ်းသမ်ႉ လႆႈပၼ်ယူႇ 6,000 ပျႃး ၼႆယဝ်ႉ။
လွင်ႈႁဵတ်းမၢႆၾၢင် လႄႈ ဝႂ်မုင်ႉႁေႃႁိူၼ်းၼႆႉ ဢမ်ႇၵႃးၸုမ်းသိုၵ်းၵဝ်ႈၵၢင်ႉၵူၺ်း ႁႂ်ႈၵူၼ်းမိူင်းပိုၼ်ႉတီႈၵႂႃႇ ႁဵတ်း။ ၸုမ်းသိုၵ်းတဢၢင်းၵေႃႈ ၸီႉသင်ႇႁႂ်ႈၵူၼ်းမိူင်းၸိူဝ်းယူႇၼႂ်းၼႃႈတီႈၶဝ်ၵုမ်းၵမ်ၵႂႃႇႁဵတ်းမိူၼ်ၵၼ် ၼၼ်ႉယဝ်ႉ။
ၸႄႈဝဵင်းၸိူဝ်းလႆႈပၼ်သဵၼ်ႈမၢႆၵူၼ်း လႄႈ ႁဵတ်းဝႂ်မုင်ႉႁေႃႁိူၼ်း တင်း မၢႆၾၢင်မႂ်ႇမႂ်ႇ ၼႂ်းမိူင်းတႆးပွတ်းႁွင်ႇ ၼႃႈတီႈၸုမ်းသိုၵ်းၸၢဝ်းၶိူဝ်းၵုမ်းၵမ်ၼႆႉ ပဵၼ်ၵူၼ်းမိူင်းၼႂ်းၸႄႈဝဵင်းသႅၼ်ဝီ၊ ထုင်ႉမၢၼ်ႈၸၢမ် ၸႄႈဝဵင်းၼမ်ႉတူႈ၊ ဢိူင်ႇႁူဝ်ယ ၸႄႈဝဵင်းမိူင်းယႆ ၸဵမ်ၸိူဝ်းၼႆႉ။
ၼွၵ်ႈလိူဝ်ၼၼ်ႉ ၵူၼ်းမိူင်းၼႂ်းၸႄႈဝဵင်းၼမ်ႉၶမ်းၵေႃႈ လႆႈထုၵ်ႇၸုမ်းသိုၵ်းတဢၢင်းၸီႉသင်ႇ တဵၵ်းႁႂ်ႈႁဵတ်း ဝႂ်လၢႆႊသိၼ်ႊႁေႃႈရူတ်ႉၵႃး၊ ဝႂ်ယိုၼ်ယၼ် တႃႇႁေႃႈရူတ်ႉၵႃး လတ်း ၽၢၼ်ႇၵဵတ်ႉလၢၼ်ႇ ၸဵမ်ၸိူဝ်းၼႆႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ