ႁႅင်းၵၢၼ်ယၢၼ်မိူင်းၼိုင်ႈၵေႃႉၼႆႉ ၼွၵ်ႈလိူဝ်တႃႇႁႃၵိၼ်လဵင်ႉတွင်ႉယဝ်ႉ တႃႇယူႇသဝ်းလႆႈလူၺ်ႈႁူမ်ႇလူမ်ႈလႄႈ လွတ်ႈၽေးၼၼ်ႉၵေႃႈၵႃႈလႆႈႁဵတ်းႁႂ်ႈၶဝ်ႈပၵ်းပိူင်ၸိုင်ႈမိူင်းတီႈဢၼ်ႁဝ်းႁႃၵိၼ်လဵင်ႉတွင်ႉၼၼ်ႉ။ ၼႂ်းၵၢပ်ႈပၢၼ် ဝၼ်းမိူဝ်ႈၼႆႉ မိူင်းထႆး- မိူင်းၶႄႇ ပဵၼ်ဝၢၼ်ႈမိူင်းဢၼ်ၶိုတ်းၵၢပ်ႈတၼ်းပၢၼ် – ၼႂ်းၵၢၼ်တႃငၢၼ်း ၵူႈလွင်ႈလွင်ႈ ၸႂ်ႉဢိၼ်ႊထိူဝ်ႊၼႅတ်ႊ – လဵၵ်ႉယႂ်ႇၼုမ်ႇထဝ်ႈၵူႈသႅၼ်းပၢၼ် ၸႂ်ႉဢႅပ်ႊပလီႊၶေႊသျိၼ်ႊတႂ်ႈတႂ်ႈၼိူဝ်ၼိူဝ် သိုဝ်ႉၸၢႆႇ ၵႃႉၶၢႆ တိတ်းတေႃႇသိုဝ်ႇသၢၼ်ၵၼ်။ တွၼ်ႈတႃႇႁႅင်းၵၢၼ်ယၢၼ်မိူင်း ၼႂ်းၵၢၼ်ႁဵတ်းဝတ်းဝႂ်တႃႇယူႇသဝ်းတႃႇ ႁဵတ်းၵၢၼ်ၼၼ်ႉၵေႃႈ မၢင်တီႈ မၢင်ၶၵ်ႉတွၼ်ႈလႆႈၸႂ်ႉဢႅပ်ႊ ၸႂ်ႉလၢႆႊ ။

ၵွပ်ႈၼႆလႄႈ ၼင်ႇႁိုဝ်တေယူႇႁူမ်ႈၵူမ် ၵဵဝ်ပိူၼ်ႈလႆႈၼႂ်းဝၢၼ်ႈမိူင်းပိူၼ်ႈၼၼ်ႉ ၵူၼ်းမိူင်းႁဝ်းၵူႈၵေႃႉထုၵ်ႇလီႁူႉလွင်ႈၶိူင်ႈမိုဝ်းသိုဝ်ႇသၢၼ် ဢၼ်ၵူၼ်း ၵူႈၵေႃႉၸႂ်ႉၼႂ်းၵၢၼ်ႁႃၵိၼ်လဵင်ႉတွင်ႉ။ ပေႃးဢမ်ႇၼၼ် ၵူဝ်ထုၵ်ႇလွၵ်ႇလႅၼ် သုမ်းငိုၼ်းတွင်းၶူဝ်းၶွင် ထိုင်တီႈၵိၼ်းၸႂ် ၼႂ်းဝၢၼ်ႈပိူၼ်ႈမိူင်းပိူၼ်ႈ။

ၼႂ်းႁူဝ်လိူၼ် ၼူဝ်ႊဝႅမ်ႊပိူဝ်ႊ 2025 ၼႆႉ ၼၢင်းယိင်းႁႅင်းၵၢၼ်ၵေႃႉၼိုင်ႈ ၵႂႃႇႁဵတ်းဝႂ်သီႊဢၢႆႊ (ပပ်ႉၶဵဝ်) ၼၼ်ႉသေ သမ်ႉၺႃး ၸဝ်ႈၼႃႈတီႈ ၼႂ်းသုၼ်သီႊဢၢႆႊၼၼ်ႉ ယွၼ်းၾူၼ်းသေ လူတ်ႇဢႅပ်ႊပလီႊၶေႊသျိၼ်ႊသႅၼ်းၼိုင်ႈ သႂ်ႇၼႂ်းၾူၼ်းႁႅင်းၵၢၼ် – ၼႆ သုၼ်ၶေႃႈမုၼ်း ႁႅင်းၵၢၼ်ယၢၼ်မိူင်း MIC တႂ်ႈ MAP Foundation ဢွၵ်ႇဝႆႉၼင်ႇၼႆ။

ႁႅင်းၵၢၼ်ယိင်းၵေႃႉၼိုင်ႈ လၢတ်ႈၼႄတူဝ်ထူပ်း တီႈ MIC ဝႆႉၼင်ႇၼႆ – “ ထၢမ်ၵႂႃႇဝႃႈ မိူဝ်ႈလဵဝ်ၼႆႉ လူတ်ႇဢီႈသင်ပၼ်ၶႃႈႁဝ်း ႁဵတ်းဢီႈသင်ပၼ်ၶႃႈႁဝ်း။ ၶဝ်လၢတ်ႈဝႃႈ ဢေႃႈ ဢမ်ႇၸႂ်ႈဢီႈသင် ။ ဢၼ်ၼႆႉ လူတ်ႇပၼ် ပၼ်းသျီး ထၼႃးၶၢၼ်း( ယေးငိုၼ်းမိူင်းမၢၼ်ႈ) ၼႆၶႃႈဝႃႈ။ တူဝ်ၶႃႈတႄႉ လၢတ်ႈဝႃႈ ၶႃႈႁဝ်းဢမ်ႇလႆႈဢူၼ်းငိုၼ်းမိူဝ်းၶႃႈ။ ဢမ်ႇပဵၼ်သင် လူတ်ႇဝႆႉၸိူင်ႉၼၼ် ၵေႃႈလႆႈ ၼႆၶႃႈဝႃႇ။ ပေႃးလူတ်ႇယဝ်ႉ ၶဝ်ၵေႃႈ ၸႂ်ႉမိူဝ်းလႆႈယဝ်ႉၼႆသေ ၸႂ်ႉဢွၵ်ႇမႃးၵမ်းသိုဝ်ႈၶႃႈ ။
လွင်ႈၼႆႉ ႁႅင်းၵၢၼ် ဢမ်ႇလႆႈႁူႉသင်ဝႆႉ လူင်ႈၼႃႈ လႄႈမႆႈၸႂ်ၵူဝ်ဢမ်ႇမီးလွင်ႈႁူမ်ႇလူမ်ႈၶေႃႈမုလ်းသုၼ်ႇတူဝ်။ ပိူင်ပဵၼ်ဢၼ်ၼႆႉ ပႆႇမီးလွင်ႈလူႉသုမ်းသင်သေတႃႉ မၼ်းပဵၼ်မိုဝ်းထိုဝ်သုၼ်ႇတူဝ်ႁႅင်းၵၢၼ်လႄႈ သင်ၸဝ်ႈၼႃႈတီႈ ၶဝ် သပ်းလႅင်း မွၵ်ႇလၢတ်ႈပၼ် ႁႂ်ႈပေႃးလူင်ႉလႅင်းပွင်ႇၸႅင်ႈသေ ၸင်ႇလူတ်ႇပၼ်သၢင်ႈပၼ်တႄႉယိင်ႈၶႅၼ်းတေလီ။ လွင်ႈထၢင်ႇထိူမ် ၶဝ်ႈၸႂ်ပိူင်ႈၵၼ်ၵေႃႈတေဢမ်ႇမီး ” – ဝႃႈၼႆ။

ႁႅင်းၵၢၼ်ၵမ်ႈၼမ် ၵုမ်ႇမၢင်ႉႁဵတ်းၵၢၼ် ၵႂႃႇၸဝ်ႉမႃးၶမ်ႈၵူၺ်းလႄႈ တေဢမ်ႇသူႈပွင်ႇၼႂ်းၸႂ်ၶၵ်ႉၵၢၼ်လုမ်းၵၢၼ်ၸႆး ။ ယွၼ်ႉၼၼ် မီးသင်ၵေႃႈ တိုၼ်းလူဝ်ႇလၢတ်ႈလူင်ႈၼႃႈပၼ်ယူႇ ။ တေဝႃႈ ႁႂ်ႈၸုမ်းလူလွမ်ႁႅင်းၵၢၼ် ၶဝ်ႈတူၺ်းၸွႆႈၼႆၵေႃႈ ယွၼ်ႉ ဢမ်ႇၶဝ်ႈၼႂ်းဢွင်ႈတီႈ ႁဵတ်းဝတ်းဝႂ်ၼၼ်ႉလႆႈၵမ်းသိုဝ်ႈ ၼႆ ထွင်းၶမ်း ၽူႈၵိူဝ်းၵုမ် ၸုမ်းႁႅင်းၵၢၼ်ႇ ယၢၼ်မိူင်း MAP Foundation တႄႉလၢတ်ႈၼင်ႇၼႆ –

“ ႁဝ်းၵေႃႈ ဢမ်ႇလႆႈယူႇၼႂ်းႁဵတ်ႇၵၢၼ်ၼၼ်ႉ ။ တၢမ်ၼင်ႇ ႁႅင်းၵၢၼ်လၢတ်ႈၼႄၼၼ်ႉၵူၺ်းၶႃႈၼႃႇ ။ ဢမ်ႇၸၢင်ႈႁဵတ်းႁိုဝ် ။ ယွၼ်ႉဝႃႈ တၢင်းၼႂ်းမၼ်း ႁဝ်းၶဝ်ႈဢမ်ႇလႆႈ။ ပေႃးဢမ်ႇၸႂ်ႈၵႂႃႇႁဵတ်းဝတ်းႁဵတ်းဝႂ် ၶဝ်ဢမ်ႇပၼ်ၶဝ်ႈ ။ ယၢမ်ႈၶဝ်ႈၵႂႃႇပွၵ်ႈၼိုင်ႈယဝ်ႉ မိူဝ်ႈၶဝ် တႄႇပိုတ်ႇၼၼ်ႉ ၶဝ်ၵေႃႈလၢတ်ႈဝႃႈ ႁႂ်ႈၵႂႃႇပႂ်ႉတၢင်းၼွၵ်ႈ ၊ ယႃႇၶဝ်ႈမႃးတၢင်းၼႂ်း ၼႆဢေႃႈ ၶဝ်ဝႃႈ။ပေႃးလူဝ်ႇဝတ်းဝႂ်တႄႉ ႁႂ်ႈတူဝ်ၼၢႆးၸၢင်ႈမႃး ၼႆၵူၺ်းဢေႃႈ
ပိူင်ပဵၼ်ၵမ်းၼႆႉ ၵေႃႈ ၸွမ်းၼင်ႇ ႁႅင်းၵၢၼ်ယိင်းၼၼ်ႉ လၢတ်ႈၼႄတူဝ်ထူပ်းတႄႉ ၸဝ်ႈၼႃႈတီႈၶဝ် လူတ်ႇ ဢႅပ်ႊပလီႊၶေႊသျိၼ်ႊ ဢၼ်ၵဵဝ်ႇၶွင်ႈယေးငိုၼ်းမိူင်းမၢၼ်ႈ ။ မိူဝ်ႈဢွၼ်တၢင်းၵေႃႈ သမ်ႉဢမ်ႇၸႂ်ႈၵူၼ်းယၢမ်ႈဢူၼ်းငိုၼ်းမၢၼ်ႈ ၼႂ်းၾူၼ်းသေပွၵ်ႈလႄႈ ၸင်ႇဝႃႈမႆႈၸႂ် ” – ဝႃႈၼႆ။

ပေႃးတူၺ်း ၵၢပ်ႈဝၢၼ်ႈ ပၢၼ်မိူင်း မိူဝ်ႈလဵဝ်သမ်ႉ လႆႈၵူဝ် ၽေးလွၵ်ႇလႅၼ်ငိုၼ်း တၢင်းဢွၼ်ႊလၢႆႊ ။ ၸင်ႇဝႃႈ ၽႂ်တေသႂ်ႇသင်ပၼ်ၼႂ်းၾူၼ်းႁဝ်းၼႆၼၼ်ႉ ႁႂ်ႈမေႃတွင်ႈမေႃထၢမ် ႁႂ်ႈလူင်ႉလႅင်း ။ ပေႃးပဵၼ်မႃးသေၸိူဝ်ႉသေပိူင် တေလႆႈႁူႉတီႈၵႂႃႇတီႈမႃးမၼ်း ၼႆ ထွင်းၶမ်း ၽူႈၵိူဝ်းၵုမ် ၸုမ်းႁႅင်းၵၢၼ်ႇ ယၢၼ်မိူင်း MAP Foundation လၢတ်ႈပၼ်ၾၢင်ႉဝႆႉၼင်ႇၼႆ –

“ ၵၢပ်ႈပၢၼ် မိူဝ်ႈလဵဝ် ပဵၼ်ၵၢပ်ႈပၢၼ် သူဝ်ႊသျႄႊမီႊတီႊယိူဝ်ႊ ယဝ်ႉၵေႃႈ ပဵၼ်ပၢၼ်ဢၼ် ၵူၼ်းတႆးၼင်ႇၵၼ် လွၵ်ႇၵၼ် ၵူၼ်းမၢၼ်ႈၼင်ႇၵၼ်လွၵ်ႇၵၼ်ၵေႃႈ မီးတင်းၼမ်။ ႁႂ်ႈၾၢင်ႉသတိ ႁင်းၽႂ်ႁင်းမၼ်း ။ႁႂ်ႈယူႇလႅတ်းလႅတ်းသႅဝ်းသႅဝ်းဢိၼ်ႉ ။ ပေႃးပိူၼ်ႈယွၼ်းၾူၼ်းႁဝ်းၵႂႃႇၼႆ ယႃႇပေႇၵိုင်ႉၵၢင်ႉပၼ်ၵမ်းလဵဝ် ။ ႁႂ်ႈႁူႉတီႈၵႂႃႇတီႈမႃး လွင်ႈတၢင်းမၼ်းသေ ၸင်ႇၵွႆႈပၼ် ႁဵတ်းၼႆ။
ၵၢၼ်ယူႇၵိၼ်ၼႂ်းမိူင်းထႆးၼႆႉ ပေႃးၸွမ်းပိူင်ၾိင်ႈမိူင်းၵေႃႈ ယူႇငၢႆႈ ၊ ပေႃးဢမ်ႇၸွမ်းပိူင်ၵေႃႈ ယူႇယၢပ်ႇလႄႈ ႁႅင်းၵၢၼ်လူဝ်ႇလႆႈသႂ်ႇၸႂ်ၼိူဝ်ပၵ်းပိူင်ၸိုင်ႈထႆး။ ပေႃးဢမ်ႇပွင်ႇၸႂ်တွၼ်ႈလႂ် လွင်ႈႁႅင်းၵၢၼ်ၼႆႉ တိတ်းတေႃႇၵပ်းသိုပ်ႇလႆႈ တီႈ သုၼ်ၶေႃႈမုၼ်း ႁႅင်းၵၢၼ်ယၢၼ်မိူင်း MIC MAP Foundation” – ၶႃႈဢေႃႈ။