သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း PNO ပွႆႇမၢၵ်ႇလူင် ၼႂ်းၸႄႈဝဵင်းၾၢႆၶုၼ်  ၸၢၵ်ႇမၢၵ်ႇ တိူဝ်ႉသႂ်ႇ ၼၢင်းယိင်း ၵူၼ်းပၢႆႈၽေးသိုၵ်း တၢႆ  ထင်တီႈ 3 ၵေႃႉ ဝႃႈၼႆ ။

ၼႂ်းဝၼ်းတီႈ 22 /11/2025 ယၢမ်းၵၢင်ၼႂ် 10 မူင်း သိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း PNO လၢမ်းပွႆႇမၢၵ်ႇလူင် ႁိမ်းဝၢၼ်ႈဝေႃႉယၢၼ် ဢၼ်မီးၾၢႆႇတူၵ်း ဝဵင်းၾၢႆၶုၼ်ၼၼ်ႉသေ တိူဝ်ႉသႂ်ႇၼၢင်းယိင်းၵူၼ်းပၢႆႈၽေးသိုၵ်း တၢႆထင်တီႈ 3 ၵေႃႉ။  

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ ပဵၼ်ၽွင်းၶဝ်ၵႂႃႇသူၼ်။  တီႈမၢၵ်ႇတူၵ်းသႂ်ႇၼၼ်ႉ ၵူၼ်းပၢႆႈၽေးသိုၵ်း မီး7 ၵေႃႉ ၊ တိူဝ်ႉသႂ်ႇ ၼၢင်းယိင်း 3 ၵေႃႉ  တၢႆထင်တီႈ ၊ ထိုင်ဝၼ်းမိူဝ်ႈၼႆႉ ပၢင်တိုၵ်းသိုပ်ႇပဵၼ် ယူႇၵူႈဝၼ်း ၊ ၾၢႆႇသိုၵ်းမၢၼ်ႈၵေႃႈ လၢမ်းယိုဝ်း ၵွင်ႈလူင် ၶိူင်ႈတရူၼ်ႊ ဢမ်ႇထၢတ်ႇ”- ဝႃႈၼႆ ။

ၼၢင်းယိင်းပၢႆႈၽေးသိုၵ်းဢၼ်လႆႈလူႉတၢႆၵႂႃႇ 3 ၵေႃႉၼၼ်ႉ ပႃးၵူၼ်းထဝ်ႈ ဢႃယု 60 ပီ ၵေႃႉၼိုင်ႈလႄႈ ၼၢင်းယိင်းဢႃယု ၼႂ်းၵႄႈ 20 ပီထိုင် 30 ပီ သွင်ၵေႃႉ  ။

ယၢမ်းလဵဝ် ယွၼ်ႉသိုၵ်းမၢၼ်ႈႁူမ်ႈပျီႇတူႉၸိတ်ႉ PNO သိုပ်ႇပဵၼ်ပၢင်တိုၵ်းၵၼ်ဝႆႉတင်း ၸုမ်းၵႅတ်ႇၶႄ ၵူၼ်းမိူင်း ၼႂ်းၸႄႈဝဵင်းၾၢႆၶုၼ်ၶိုၼ်းလႄႈ ႁဵတ်းႁႂ်ႈ ၵူၼ်းပၢႆႈၽေးဢၼ်ပွၵ်ႈယူႇႁိူၼ်းၶိုၼ်း မႆႈၸႂ်လွင်ႈႁူမ်ႇလူမ်ႈဝႆႉ – ၵူၼ်းပိုၼ်ႉတီႈလၢတ်ႈ ။ 

လုၵ်ႈၸုမ်းၵႅတ်ႇၶႄႇၵူၼ်းမိူင်းလၢတ်ႈၽူႈတွႆႇႁွၵ်ႈဝႃႈ -“ ပၢင်တိုၵ်းပဵၼ်ၶိုၼ်း မီး 3 – 4 ဝၼ်းယဝ်ႉ။  ပဵၼ်ၶိုၼ်းၶိုၼ်းဝၼ်းဝၼ်း ၊ ၾၢႆႇတင်းသိုၵ်းမၢၼ်ႈၶဝ်ႈၵေႃႈၸႂ်ႉ ၵွင်ႈလူင် ၶိူင်ႈတရူၼ်ႊ ပိုတ်းယိုဝ်းပႃး ၊ ၾၢႆႇတင်းသိုၵ်းမၢၼ်ႈၶဝ်ၵေႃႈမီးၵူၼ်းလူႉတၢႆ ၊ ၾၢႆႇတင်းႁဝ်းၶႃႈၵေႃႈမီးလွင်ႈလူႉတၢႆ လူႉသုမ်းယူႇ”- ဝႃႈၼႆ။  

တႄႇႁူဝ်လိူၼ် ဢွၵ်ႉထူဝ်ႊပိူဝ်ႊ ၼႆႉမႃး သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း  PNO ထူဝ်းသိုၵ်းၶဝ်ႈၼႂ်းဝၢၼ်ႈၵေႃမႆႉသၢင်း ဝၢၼ်ႈဝေႃႉယၢၼ် သေ ပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉမႃးၶိုၼ်း ။ လိူဝ်ၼၼ်ႉ သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း PNO ၵႆႉၶဝ်ႈတဝ်ၼႂ်းဝၢၼ်ႈၼႂ်းႁိူၼ်းၵူၼ်းမိူင်းသေ ၽဝ်ႁိူၼ်းယေးၵူၼ်းမိူင်းလူႉၵွႆပႃး – ၵူၼ်းပိုၼ်ႉတီႈလၢတ်ႈ ။

မိူၼ်ၼင်ႇၼႆ ၼႂ်းဝၼ်းတီႈ 13/10/2025 ယၢမ်းဝၢႆးဝၼ်း 4 မူင်းၼၼ်ႉၵေႃႈ သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း PNO ၶဝ်ႈၽဝ်ႁိူၼ်းၵူၼ်းဝၢၼ်ႈဝေႃႉယၢၼ်ႇ လူႉၵွႆ 30 လင်ပၢႆ   ။