ၵူၼ်းပၢႆႈၽေးသိုၵ်း ႁူဝ်ၵူၼ်း 500 ပၢႆ ဢၼ်မီးတီႈၼႂ်းၸႄႈဝဵင်း ပၢင်လွင်း – ၾၢႆၶုၼ် ၸိုင်ႈတႆးပွတ်းၸၢၼ်း လူဝ်ႇတၢင်းၸွႆႈထႅမ် ၶူဝ်း လႄႈ ယႃႈယႃ ။
ၼႂ်းလိူၼ် သႅပ်ႊထႅမ်ႊပိူဝ်ႊ ပူၼ်ႉမႃးၼႆႉ သိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း ထူဝ်းသိုၵ်းၶဝ်ႈ ၼႂ်းဝၢၼ်ႈဝေႃႉယၢၼ်ႇ ဢၼ်မီးၾၢႆႇႁွင်ႇ ၾၢႆၶုၼ်ၼၼ်ႉသေ တုမ်ႉတိူဝ်ႉပဵၼ်ပၢင်တိုၵ်းၵၼ် တင်းၸုမ်းလုၵ်ႉၽိုၼ်ႉႁၢဝ်ႈႁႅင်း ႁဵတ်းႁႂ်ႈ ၵူၼ်းဝၢၼ်ႈဝေႃႉယၢၼ်ႇလႄႈ ဝၢၼ်ႈႁိမ်းႁွမ်း 10 ဝၢၼ်ႈ လႆႈငိူင်ႉပၢႆႈၽေးသိုၵ်းထႅင်ႈ ၼႆယဝ်ႉ ။
ၼႂ်းၼၼ်ႉ ၵူၼ်းပၢႆႈၽေးသိုၵ်း ႁူဝ်ၵူၼ်း 500 ပၢႆ ၸိူဝ်းပၢႆႈၵႂႃႇယူႇတီႈတၢင်းၼႂ်းၸႄႈဝဵင်း ပၢင်လွင်း – ၾၢႆၶုၼ် ၼၼ်ႉ လူဝ်ႇတင်းၸွႆႈထႅမ် ၶူဝ်းလႄႈ ယႃႈယႃ ။
ၵူၼ်းၸွႆႈထႅမ် ၵူၼ်းပၢႆႈၽေးသိုၵ်းလၢတ်ႈၽူႈတွႆႇႁွၵ်ႈဝႃႈ -“ဢၼ်ၶဝ်ပၢႆႈဝႆႉၼၼ်ႉ ပဵၼ်ဢွင်ႈတီႈ ၵႆဝၢၼ်ႈၵူၼ်း ၊ ယွၼ်ႉၼၼ် တွၼ်ႈတႃႇပၢႆးယူႇလီတႄႉ ဢမ်ႇၵုမ်ႇထူၼ်ႈ ၊တလဵဝ် မီးၵူၼ်းၼၢဝ်ၼမ်ၼႃႇ ၊ ပိူင်လူင်မၼ်းလူဝ်ႇယႃႈယႃ လႄႈ သိူဝ်ႈၼႃ ၸိူဝ်းၼႆႉ ၊ မိူဝ်ႈၶဝ်ပၢႆႈမႃးဢမ်ႇလႆႈ သင်မႃးၶႃႈလူး ”- ဝႃႈၼႆ ။
10 ဝၢၼ်ႈဢၼ်လူဝ်ႇတင်းၸွႆႈထႅမ်ၼၼ်ႉ ပဵၼ်ၵူၼ်းဝၢၼ်ႈဝေႃႉယၢၼ်ႇၼိူဝ် (ဘောရန် အပေါ်) ၊ ဝေႃႉယၢၼ်ႇတႂ်ႈ (ဘောရန်အောက်) ၊ ထီႇတမွင်း (ထီတမောင်း) ၊ ၵုင်းၼမ်ႉၵတ်း (ရေအေးကုန်း) ၊ လွႆလူင် (လွယ်လုံ) ၊ ၵတႄး (ကသဲ) ၊ ဝၢၼ်ႈၸလူင်ႈၼိူဝ် (မြောက်စလုံး) ၊ ၸလူင်ႈတႂ်ႈ ( တောင်စလုံး ) ၊ ယေႇၶျၢၼ်း (ရေချမ်း) ၸိူဝ်းၼႆႉ ဝႃႈၼႆ ။
တႄႇၼႂ်းဝၼ်းတီႈ 6/10/2025 ၼၼ်ႉ သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း ထူဝ်းသိုၵ်းၶဝ်ႈၼႂ်း ဝၢၼ်ႈၵေႃမႆႉသၢင်း ဝၢၼ်ႈဝေႃႉယၢၼ်ႇ(ဘောရန်) ၊ ဝၢၼ်ႈၸလူင်ႈၼိူဝ် (မြောက်စလုံး) ၊ ၸလူင်ႈတႂ်ႈ ( တောင်စလုံး ) ၼႂ်းၸႄႈဝဵင်းပၢင်လွင်း- ၾၢႆၶုၼ် ပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉမႃး ႁဵတ်းႁႂ်ႈၵူၼ်းပိုၼ်ႉတီႈ 4 ႁဵင်ပၢႆလႆႈငိူင်ႉပၢႆႈၽေးသိုၵ်း ၼႆယဝ်ႉ ။
ၵူၼ်းပၢႆႈၽေးသိုၵ်း4 ႁဵင်ပၢႆ ပၢႆႈၼႂ်းၸႄႈဝဵင်းယွင်ႁူၺ်ႈ ၊ ပၢင်လွင်း မၢင်ၸိူဝ်းပၢႆႈၵႂႃႇယူႇ ၼႂ်းထိူၼ်ၼႂ်းၶိူဝ်း ၊ ပၢႆႈၵႂႃႇတင်းဢွင်ႈတီႈ သုၼ်ပၢႆႈၽေးသိုၵ်းတီႈမူၵ်းသိူဝ် လႅၼ်လိၼ်တႆး- ယၢင်းလႅင် ၸိူဝ်းၼႆႉ ။
ၸုမ်းၸွႆႈထႅမ်ၵူၼ်းပၢႆႈၽေးသိုၵ်း Dove KK လၢတ်ႈၽူႈတွႆႇႁွၵ်ႈဝႃႈ -“ တလဵဝ်ၼႆႉ လူဝ်ႇၽႃႈယင် မူဝ်းၵႃႇ တႃႇႁဵတ်းသုမ်ႉယူႇ ၊ သဵၼ်ႈမၢႆ ဢၼ်မီးဝႆႉတႄႉ မီး100 တေလႆႈႁဵတ်းထႅင်ႈ ၊ ၵူၼ်းပၢႆႈၽေး သိုၵ်း ပၢႆႈၵေႃႉတီႈၵေႃႉတၢင်း။ ၵမ်ႈၼမ် လူဝ်ႇတင်းၸွႆႈထႅမ် ၶူဝ်း ၽႃႈယၢင်မူဝ်းၵႃႇလႄႈ ယႃႈယႃၸိူဝ်းၼႆႉ ဝႃႈၼႆ ။
မိူၼ်ၼင်ႇၼႆ ၼႂ်းဝၼ်းတီႈ 13/10/2025 ယၢမ်းဝၢႆးဝၼ်း 4 မူင်းၼၼ်ႉၵေႃႈ သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း PNO ၶဝ်ႈၽဝ်ႁိူၼ်းၵူၼ်းဝၢၼ်ႈဝေႃႉယၢၼ်ႇ လူႉၵွႆ 30 လင်ပၢႆ ၼႆယဝ်ႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ