တႄႇႁၢင်လိူၼ်ဢွၵ်ႉထူဝ်ႊပိူဝ်ႊၼၼ်ႉမႃး ပျီႇတူႉၸိတ်ႉ PNO တဵၵ်းၶၢၼ်းၵူၼ်းဝၢၼ်ႈထီႇရီး ၊ ၼမ်ႉပွၼ် ၊ ၼမ်ႉဢုၼ်ႇဢၼ်မီးၼႂ်းထုင်ႉၸၢမ်ၵႃး ၸႄႈဝဵင်းယွင်ႁူၺ်ႈၾိုၵ်းၵၢၼ်သိုၵ်း ၼႆသေ တဵၵ်းဢဝ် သူင်ႇၼႃႈသိုၵ်း ဝႃႈၼႆ ။
ပျီႇတူႉၸိတ်ႉပဢူဝ်း လွၵ်ႇငိုတ်ႈလၢတ်ႈဝႃႈ ၽႂ်ဢမ်ႇၵႂႃႇတေတီႉၺွပ်းၼႆလႄႈ ၵူၼ်းဝၢၼ်ႈၼႂ်းထုင်ႉၸၢမ်ၵႃး လႆႈၵႂႃႇၼႃႈသိုၵ်းၼိုင်ႈဝၢၼ်ႈ 20 ၵေႃႉ ၼႂ်းၸႄႈဝဵင်းပၢင်လွင်း- ၾၢႆႇၶုၼ် လႅၼ်လိၼ် တႆး- ယၢင်းလႅင် ၸိူဝ်းၼၼ်ႉ ဝႃႈၼႆ ။
ၵူၼ်းပိုၼ်ႉတီႈၼႂ်းထုင်ႉၸၢမ်ၵႃးလၢတ်ႈၽူႈတွႆႇႁွၵ်ႈဝႃႈ –“ၵူၼ်းဢၼ်ယၢမ်ႈၵႂႃႇၶိုၼ်ႈပၢင်သွၼ် 5 ဝၼ်း၊ ၵူၼ်းဢၼ်မီးတူဝ်ထူပ်းၼႂ်းပၢင်တိုၵ်းၼႆႉ ၶဝ်ႁွင်ႉၵႂႃႇ ၵမ်းလဵဝ် ပေႃးဢမ်ႇၵႂႃႇ တေၺွပ်းၼႆႉလႄႈ ၽႂ်ၵေႃႈဢမ်ႇႁတ်းထဵင် ၵႃႈလႆႈၵႂႃႇ” – ၼႆယဝ်ႉ ။
ဢၼ်ပျီႇတူႉၸိတ်ႉ PNO တဵၵ်းၸႂ်ႉၵူၼ်းဝၢၼ်ႈၵႂႃႇၼႃႈသိုၵ်းၼႆႉပဵၼ်ၵူၼ်းဝၢၼ်ႈၼမ်ႉဢုၼ်ႇလႄႈ ၊ ဝၢၼ်ႈထီႇရီး ဢၼ်ပဵၼ်ဝၢၼ်ႈယႂ်ႇၼႂ်းထုင်ႉၸၢမ်ၵႃးၼႆယဝ်ႉ ။
လွင်ႈပျီႇတူႉၸိတ်ႉ တဵၵ်းၸႂ်ႉၵူၼ်းဝၢၼ်ႈထုင်ႉၸၢမ်ၵႃးသူင်ႇၵႂႃႇၼႃႈသိုၵ်းၼႆႉၵေႃႈ ဢမ်ႇၸႂ်ႈပွၵ်ႈၼႆႉ ပွၵ်ႈလဵဝ် ၽွင်းသိုၵ်းမၢၼ်ႈတင်းၸုမ်းၵႅတ်ႇၶႄႇၵူၼ်းမိူင်း PDF ပဵၼ်ပၢင်တိုၵ်း ၵၼ်ၼႂ်းလိူၼ် ၵျူႊလၢႆႊ ၼၼ်ႉၵေႃႈယၢမ်ႈၵဵပ်းသိုၵ်း တဵၵ်းၸႂ်ႉသူင်ႇၼႃႈသိုၵ်းယဝ်ႉပွၵ်ႈၼိုင်ႈ – ၵူၼ်းပိုၼ်ႉတီႈလၢတ်ႈ ။
ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ –“ မိူဝ်ႈဢွၼ်တၢင်းၵေႃႈယၢမ်းသူင်ႇၼႃႈသိုၵ်း ၸိူင်ႉၼၼ် ယဝ်ႉ ပွၵ်ႈၼိုင်ႈ ၊ ၵူၼ်းႁူႉၸၵ်းၶႃႈပႃးၵႂႃႇ 3 ၵေႃႉ ၊ ထိုင်တလဵဝ်ၼႆႉ တၢႆႁႃႉ တူင်ႉႁႃႉၵေႃႈဢမ်ႇလႆႈႁူႉၸွမ်းသင် ၊ မႃးၵေႃႈဢမ်ႇပွၵ်ႈမႃးၶိုၼ်း မိူဝ်ႈသူင်ႇၾိုၵ်းသိုၵ်းၼၼ်ႉဝႃႈတႄႉဝႃႈ တႃႇတေဢဝ်ႁူမ်ႇလူမ်ႈ ၼႂ်း ပိုၼ်ႉတီႈၵူၺ်း ၼႆ ၵမ်းၼႆႉ သူင်ႇၼႃႈသိုၵ်းပႃးတၢင်ႇတီႈထႅင်ႈ ”– ဝႃႈၼႆ ။
ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈၵပ်းသိုပ်ႇၸူး ၽူႈၶၢၼ်ပၢၵ်ႇ ပျီႇတူႉၸိတ်ႉပဢူဝ်း PNO ၵေႃႈ ဢမ်ႇလႆႈ။
တႄႇဢဝ် ဝၼ်းတီႈ 18/07/2024 ၼၼ်ႉမႃး သိုၵ်းမၢၼ်ႈတင်း ၸုမ်းၵႅတ်ႇၶႄၵူၼ်းမိူင်း PDF ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ႁဵတ်းႁႂ်ႈတုမ်ႉတိူဝ်ႉၵူၼ်းမိူင်း 2,000 ပၢႆ လႆႈငိူင်ႉပၢႆႈ ၽေးသိုၵ်း၊ ဝၢႆးၼၼ်ႉ ၼႂ်းလိူၼ်ဢေႃႊၵတ်ႉပျီႇတူႉၸိတ်ႉPNO ၶဝ်ႈဢဝ်တီႈယူႇၼႂ်းထုင်ႉၸၢမ်ၵႃးၶိုၼ်းသေ တဵၵ်းၸႂ်ႉၵူၼ်းပၢႆႈၽေးသိုၵ်းပွၵ်ႈၶိုၼ်းႁိူၼ်းယေးၽႂ်မၼ်းယဝ်ႉ ၵဵပ်း ၶွၼ်ႇတီႈၵူၼ်းပၢႆႈၽေးသိုၵ်းပွၵ်ႈႁိူၼ်း ၼိုင်ႈၵေႃႉ 5 သႅၼ်ပျႃး ပေႃးဢမ်ႇပၼ်လႆႈ လႆႈၼုင်ႈၶူဝ်းပျီႇတူႉၸိတ်ႉ PNO သေသူင်ႇၼႃႈသိုၵ်းၼႆယဝ်ႉ ။
ဝၢႆးလင် သိုၵ်းမၢၼ်ႈယိုတ်းမိူင်းမႃးၼႂ်းၶၢဝ်းတၢင်း 5 ပီၼႆႉ ပျီႇတူႉၸိတ်ႉပဢူဝ်း PNO ၶဝ်ၵဵပ်းၵူၼ်းၼႂ်းၸႄႈဝဵင်းသီႇသႅင် ၊ ပၢင်လွင်း ၊ ႁူဝ်ပူင်း သူင်ႇၾိုၵ်းၵၢၼ်သိုၵ်း သူင်ႇၼႃႈသိုၵ်း ၼႆယဝ်ႉ ၊ လိူဝ်ၼၼ်ႉ လႆႈတိုဝ်ႉတၢင်းၶဝ်ႈဢဝ်တီႈယူႇၼႂ်းဝၢၼ်ႈသေ ၵဵပ်းၵူၼ်းဝၢၼ်ႈ သူင်ႇၾိုၵ်းၵၢၼ်သိုၵ်းယဝ်ႉ ၼႄၶေႃႈဢၢင်ႈလွင်ႈၼိုင်ႈယဝ်ႉ လွင်ႈၼိုင်ႈ ၵဵပ်းၶွၼ်ႇၵူၼ်းမိူင်း ၼႂ်းထုင်ႉၸၢမ်ၵႃးမႃးၶိူဝ်းယႂ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ