ၵူၼ်းၸၢႆး ၵေႃႉၼိုင်ႈ လၵ်ႉရူတ်ႉၶိူင်ႈပၢႆႈ တီႈဝဵင်းဝဵင်းၵူတ်ႉၶၢႆ ၵူၼ်းမိူင်းႁူမ်ႈၵၼ်လိုပ်ႈလမ်းတီႉၺွပ်းလႆႈၶိုၼ်း လႆႈႁူႉဝႃႈပဵၼ် ၽူႈလၵ်ႉပဵၼ်ၵူၼ်းသိုၵ်း TNLA ဝႃႈၼႆ။
ဝၼ်းတီႈ 15/11/2025 ႁူဝ်ၶမ်ႈ 6 မူင်းပၢႆ ၵူၼ်းၸၢႆးၵေႃႉၼိုင်ႈ လၵ်ႉဢဝ်ရူတ်ႉၶိူင်ႈ တီႈၾၢႆႇၼႃႈႁၢၼ်ႉမႄးရူတ်ႉၶိူင်ႈ ‘’ဢွင်ႇ’’ ၼႂ်းပွၵ်ႉ 1 ဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။ ၸဝ်ႈရူတ်ႉၶိူင်ႈ တင်း ၵူၼ်းႁိမ်းႁွမ်းတၼ်းႁၼ်သေ လိုပ်ႈလမ်းၸွမ်းလင်၊ ၵႂႃႇတီႉၺွပ်းလႆႈတီႈႁူဝ်ဝဵင်း ႁိမ်းႁၢၼ်ႉၶၢႆၼမ်ႉမၼ်းၸၢၵ်ႈ ‘’ရတႃႇမူဝ်း’’ ဝႃႈၼႆ။
ဢိင်ၼိူဝ်လွင်ႈၼႆႉသေ ၵူၼ်းပိုၼ်ႉတီႈၵေႃႉၼိုင်ႈ ယိုၼ်ယၼ်လၢတ်ႈဝႃႈ – “မၼ်းၸၢႆးပဵၼ်ၵူၼ်းသိုၵ်း ၼႂ်းၸုမ်းသိုၵ်းတဢၢင်း၊ လုၵ်ႉတီႈဝဵင်းၼမ်ႉသၼ်ႇ တူၵ်းပုၼ်ႈၽွၼ်းမႃးယူႇဝႆႉတီႈဝဵင်းၵူတ်ႉၶၢႆ၊ ၵူၼ်းႁိမ်းႁွမ်းႁူမ်ႈၵၼ်တီႉၺွပ်းလႆႈသေ ဢၢပ်ႈပၼ်ဝႆႉတီႈၸုမ်းသိုၵ်းတဢၢင်းၼႂ်းၸႄႈဝဵင်းၵူတ်ႉၶၢႆ ၶိုၼ်းယဝ်ႉ” ဝႃႈၼႆ။
တေဢဝ်လိူင်ႈပၼ်တၢမ်ႇၸိူင်ႉႁိုဝ်ၵႂႃႇဢၼ်ဝႃႈၼၼ်ႉတႄႉ ဢမ်ႇလႆႈႁူႉၸွမ်း။
ၵူၼ်းပိုၼ်ႉတီႈတႄႉလၢတ်ႈဝႃႈ ပၢင်တေႃႇလွင်းၵေႃႈလိူင်ႇ ယႃႈမဝ်းၵမ်ၵေႃႈလိူင်ႇ။ ဢၼ်ၵူၼ်းၼုမ်ႇပိုၼ်ႉတီႈလႆႈထူပ်းပၼ်ႁႃယူႇယၢမ်းလဵဝ်ၵေႃႈ ပဵၼ်လူဝ်ႇတႅၼ်းၼီႈၼမ် ၊ လွင်ႈသိုၵ်းတဢၢင်းလၵ်ႉရူတ်ႉၶိူင်ႈယၢမ်းလဵဝ်ၵေႃႈလႅပ်ႈတေပဵၼ်ပၼ်ႁႃလူဝ်ႇတႅၼ်းၼီႈၵူၺ်း- ဝႃႈၼႆ။
ယၢမ်းလဵဝ်ၵေႃႈ TNLA ပိုၼ်လိၵ်ႈဝႆႉထိုင်ၵေႃႉသိုၵ်းၵေႃႉႁၢၼ်ၶဝ်ဝႃႈ – သင်ဝႃႈၵူတ်ႇထတ်းႁၼ်မႅၼ်ႈ ၵူၼ်းသိုၵ်းတေႃႇလွင်းလဵၼ်ႈ သလွတ်ႉၵဵမ်း ၊ ၵဵမ်းဢွၼ်ႊလၢႆႊ ၸိူဝ်းၼႆႉၸိုင် တေပၼ်တူတ်ႈတၢမ်ႇၶွၵ်ႈထိုင် 3 ပီဝႃႈၼႆဝႆႉ။
မိူဝ်ႈဝၼ်းတီႈ 23/08/2025 ၼၼ်ႉၵေႃႈ သိုၵ်းတဢၢင်း TNLA ဢဝ်ၵူၼ်းမီးတၢင်းၽိတ်း 5 ၵေႃႉတၢင်ႇရူတ်ႉၵႃးသေလႄႇလဵပ်ႈၵၢင်ဝဵင်းၼမ်ႉၶမ်း။
မိူဝ်ႈ ဝၼ်းတီႈ 1 ပူၼ်ႉမႃးၼၼ်ႉၵေႃႈ ၵူၼ်း 38 ၵေႃႉ ဢၼ်ၺႃးၵုမ်းၶင်ၶွၵ်ႈဝႆႉ ၼႂ်းဝဵင်းၵူတ်ႉၶၢႆ တႂ်ႈသိုၵ်းတဢၢင်းၵုမ်းၵမ်ၼၼ်ႉ လၵ်ႉပၢႆႈဢွၵ်ႇ ပူၼ်ႉလွတ်ႈၵႂႃႇ။ ၼႂ်းၼၼ်ႉ တွၵ်ႇတႃႇ ဢွင်ႇၽဵဝ်းၼၢႆႇ ဢၼ်ယၢမ်ႈၵၼ်ႉၸၼ် ဢွၼ်ႇယိင်း ဢႃယု 14 ပီသေ ၺႃးၵုမ်းၶင်ဝႆႉၼၼ်ႉၵေႃႈ လွတ်ႈဢွၵ်ႇပႃး ဝႃႈၼႆ။
ၵဵဝ်ႇၵပ်းလွင်ႈၼႆႉသေ တႃႇတေႁူႉလႆႈႁူဝ်ယွႆႈတႅတ်ႈတေႃးၼၼ်ႉ ယူႇတီႈၸုမ်းႁဝ်းၶႃႈ ၵပ်းသိုပ်ႇၸူး ၽူႈၶၢၼ်ပၢၵ်ႇသိုၵ်းတဢၢင်း လူၺ်းယေႇဢူး ယူႇသေတႃႉ ၵပ်းသိုပ်ႇဢမ်ႇလႆႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ