ၸုမ်းသိုၵ်းမၢၼ်ႈတင်ႈၵဵတ်ႉလၢၼ်ႇၵူတ်ႇထတ်းၶူဝ်းၵုၼ်ႇၶဝ်ႈ/ဢွၵ်ႇ တီႈဝဵင်းမိူင်းပွၼ် ဝၼ်းဝၼ်းၶိုၼ်းၶိုၼ်း ႁဵတ်းႁႂ်ႈ ရူတ်ႉၵႃးတၢင်ႇၶူဝ်းၵုၼ်ႇ တိတ်းၶမ်ယိုတ်ႈယၢဝ်းပဵၼ်ထႅဝ် ။
သိုၵ်းမၢၼ်ႈတႄႇၵူတ်ႇထတ်းၵႃးတၢင်ႇၶူဝ်းၵုၼ်ႇၼႆႉ တႄႇဢဝ်ၵၢင်လိူၼ် ၼူဝ်ႊဝႅမ်ႊပိူဝ်ႊၼႆႉမႃး။ ၾၢႆႇၼိုင်ႈၵေႃႈၼိူဝ်သဵၼ်ႈတၢင်း လွႆလႅမ်- မိူင်းပွၼ် သမ်ႉတိုၵ်ႉမႄးၶုတ်း/သိူဝ်ႇသဵၼ်ႈတၢင်းၵႃးလႄႈယိင်ႈၶႅၼ်းႁဵတ်းႁႂ်ႈၵႃးတိတ်းၶမ်ယၢဝ်း ၼႆၵူၼ်းႁေႃႈရူတ်ႉၵႃးတၢင်ႇၵုၼ်ႇ တူၼ်ႈတီး-လွႆလႅမ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈၼင်ႇၼႆ။
“ၶဝ်ပႂ်ႉၵူတ်ႇထတ်းၾၢႆႇတူၵ်းမိူင်းပွၼ်ၼၼ်ႉဢေႃႈ။ ၶဝ်ၸႂ်ႉဢဝ်ၶူဝ်းၵုၼ်ႇလူင်းရူတ်ႉသေၵူတ်ႇထတ်းထိုင် တၢင်းၼႂ်းပႃး။ ၶူဝ်းမၢင်ၸိူဝ်းၵေႃႈ ၶဝ်တီႉဝႆႉ ဢမ်ႇပၼ်ဢဝ်တၢင်ႇၵႂႃႇပႃး။ ၸိူဝ်းၼႆႉႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇ။ ၶဝ်သမ်ႉမႄးတၢင်းပႃးလႄႈသဵၼ်ႈတၢင်းၵေႃႈပဵၼ်ၵူမ်ႇပဵၼ်ဢုင် ရူတ်ႉၵႃးတိတ်းၶမ်”
တီႈသဵၼ်ႈတၢင်းလူင် တူၼ်ႈတီး−လွႆလႅမ်ၼႆႉ ၸုမ်းသိုၵ်းမၢၼ်ႈ တင်ႈၵဵတ်ႉလၢၼ်ႇ ၵူတ်ႇထတ်းၶူဝ်းၵုၼ်ႇ ၼွၵ်ႈမိူင်း ႁၢဝ်ႈႁႅင်းမႃးၵူႈဝၼ်းလႄႈႁဵတ်းႁႂ်ႈလႆႈၸႂ်ႉၶၢဝ်းယၢမ်းႁိုင်။ ၵူႈပွၵ်ႈလႆႈၸႂ်ႉၶၢဝ်းယၢမ်း 2 ၸူဝ်ႈမူင်းၼၼ်ႉ ယၢမ်းလဵဝ်ပဵၼ်ၵႂႃႇ 4 ၸူဝ်ႈမူင်းၸိူဝ်းၼႆႉ။ ၵွပ်ႈၼႆ ၵႂႃႇမႃးဝၼ်းလဵဝ်ဢမ်ႇထိုင်လႆႈယဝ်ႉ – ၵူၼ်းလွႆလႅမ်လၢတ်ႈၼင်ႇၼႆ။
ယွၼ်ႉပိူဝ်ႈသိုၵ်းမၢၼ်ႈၵိတ်ႇၶႂၢင် ႁဵတ်းႁႂ်ႈၶၢဝ်းတၢင်းႁိုင်ၼၢၼ်းၸိူင်ႉၼႆလႄႈ တုမ်ႉတိူဝ်ႉလွင်ႈၵၢၼ်ႁႃၵိၼ်လဵင်ႉတွင်ႉၵူၼ်းမိူင်း။ ၶူဝ်းၵုၼ်ႇၵေႃႈဢမ်ႇႁွတ်ႈထိုင်ၼင်ႇၶၢဝ်းယၢမ်းဢၼ်ယိူင်းဢၢၼ်းဝႆႉ။
တီႈဝဵင်းလူင်တူၼ်ႈတီးသမ်ႉ သိုၵ်းမၢၼ်ႈတိုၵ်ႉၵူတ်ႇထတ်းရူတ်ႉၵႃးဢမ်ႇမီးဝတ်းဝႂ်ၶွၼ်ႇ(လၢႆႊသိၼ်ႊ) ယူႇတိၵ်းတိၵ်းပႆႇၵိုတ်းပႆႇလိုဝ်ႈ။ ၸိူဝ်းၼႆႉၵေႃႈ ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇၵိၼ်းၸႂ်။ ဢွၼ်ၵၼ်ၶၢင်းပွင်ႉဝႃႈ – သိုၵ်းမၢၼ်ႈၼႆႉဢမ်ႇပိုတ်ႇႁဵတ်းဝႂ်လၢႆႊသိၼ်ႊပၼ် ႁႂ်ႈမၼ်းငၢႆႈလူမ်ၸႂ်သေ – သမ်ႉဢႅဝ်ႇႁႃတီႉရူတ်ႉဢမ်ႇမီးဝႂ်လၢႆႊသိၼ်ႊ ယူႇၸိူင်ႉၼႆတိၵ်းတိၵ်းၼႆႉ မိူၼ်တင်း ၶႂ်ႈၶႃၸႂ်ၵူၼ်းမိူင်းႁႂ်ႈႁႃၵိၼ်လဵင်ႉတွင်ႉယၢပ်ႇၵူၺ်း – ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ